5-7. De ọlọghọmwa nọ rhiegbe ma vbe Ivbi Izrẹl wa da kpa hin Igipt rre? De emwi ne Mozis ghi ru?

⁵ Vbe ọ ma he sẹ uki eva ne Ivbi Izrẹl kpaa vbe Igipt rre, ọlọghọmwa keghi rhiegbe ma. Vbe ẹghẹ ne a kha na, iran ma he sẹ Oke Sainai. Ivbi Izrẹl kegha vian rhunmwuda amẹ ne iran ma miẹn wọn. Iran vian sẹrriọ wẹẹ, e Mozis na ghi tu tie Jehova wẹẹ: ‘Vbia khian ru iran na hẹ yi? Tẹ iran ghi ra filo okuta ya gbe mwẹ uan.’ (Ẹks 17:4) E Jehova na ghi tama e Mozis emwi nọ gha ru. Ọ na wẹẹ nọ gbe ọkpọ ọghe yaẹn okuta e Horẹb, ne amẹ mieke na gbọba kua. E Baibol keghi kha wẹẹ: “E Mozis keghi sirra avbe ekaolotu Izrel nii ru vberrio.” Ivbi Izrẹl ma ghi gha vian rhunmwuda iran keghi miẹn amẹ wọn sẹ ọkẹn.—Ẹks 17:5, 6.

11. Ne Mozis na kinmwi okuta nii igbava, de iziro nọ ghi ya Ivbi Izrẹl gha mwẹ?

¹¹ Ọ sẹtin vbe gha re emwi nọ sunu vbe Mẹriba nọ sikẹ Kedẹs. Okuta nii rre Mẹriba nọ sikẹ Rẹfidim keghi re okuta ni wa wegbe. Ẹi mwẹ vbene ọmwa gha kinmwi ẹnrẹn sẹ hẹ, ẹi sẹtin tugie ne amẹ ke uwu ẹre gha vẹ ladian. Ọmwa i khian vbe gha roro ẹre wẹẹ, amẹ nọ hẹnhẹn ye uwu ẹre ẹre ọ vẹ ladian. Sokpan avbe okuta ni rre Mẹriba nọ sikẹ Kedẹs keghi lughaẹn, iran ma mobọ wegbe rhunmwuda uvun ne iran mwẹ. Amẹ sẹtin la uwu uvun vberriọ ya hẹnhẹn ye ototọ ọre. Ne Mozis na kinmwi okuta nii igbava, ughaghe, te Ivbi Izrẹl ghaa roro ẹre wẹẹ, te amẹ tobọre vẹ ladian vbuwe okuta. Ọ gha kẹ, iran ma ghi yayi wẹẹ, odẹ ọghe ọyunnuan ẹre amẹ ya ladian.b Vbọrhirhighayehẹ, ima ma wa rẹn vbene ena hia ya sunu.