E Baibol wẹẹ “agbọn orhikhan nai na tọ, ẹre ima hia ye.” (Job 14:1) Erriọ ẹre Osanobua gele hoo nọ gha ye ra? Deghẹ ẹi re erriọ, de vbene Osanobua ghi hoo nọ gha ye hẹ? Emwamwa ne Osanobua mwẹ ne ima gha gele mwẹ amusẹ ra? Gia ziro yan ewanniẹn nọ fu ọmwa ẹko rre, ne Baibol rhie ye avbe inọta na.

1. De vbene Jehova hoo ne arrọọ ọghe ima gha ye hẹ?

E Jehova hoo ne ima gha sọyẹnmwẹ arrọọ nọ ghi maan sẹ. Vbe ọ yi Adam vbe Ivi, ọ na viọ iran ye ogba ne mosee, nọ re ogba ọghe Idẹni. ‘Ọ keghi fiangbe iran vbenian wẹẹ: “Wa ghi biẹlẹ emọ nibun; uniẹn uwa ghi gba ehe hia vbe agbọn, iran ghi gha khaevbisẹ yan rẹn.”’ (Gẹnẹsis 1:28) E Jehova kegha hoo ne iran biẹlẹ emọ, ne iran ya otagbọn na hia khian e paradais, iran ghi vbe gha gbaroghe avbe aranmwẹ. Emwamwa ọghe Osanobua, ọre ne emwa hia gha rrọọ vbe etẹbitẹ, vbene iran i na khuọnmwi.

Agharhemiẹn wẹẹ emwi hia i wa ye vbene Osanobua te mwamwaẹn,a emwamwa ọghẹe ma he ye fi werriẹ. (Aizaia 46:10, 11) Ọ ye hoo ne emwa ni họn ẹmwẹ ne irẹn gha sọyẹnmwẹ arrọọ vbe etẹbitẹ.​—Tie Arhie Maan 21:3, 4.

2. Vbọ khian ya ima gha sọyẹnmwẹ arrọọ vbe ẹghẹ na nia?

Ma hia hoo ne ima rẹn Osanobua, ne ima vbe gha gae; erriọ ẹre ọ ya yi ima. (Tie Matiu 5:3-6.) Ọ hoo ne ima gha re ọsiọre, ne ima gha “họn ẹmwẹ nẹẹn,” ne ima “hoẹmwẹ ọnrẹn,” ne ima vbe ya ekhọe hia gha gae. (Diuteronomi 10:12; Psalm 25:14) Ma ghaa ru vberriọ, ma ghi gele gha sọyẹnmwẹ, ọ gha khọnrẹn ne ima gha rre uwu ọlọghọmwa. Ma ghaa ga e Jehova, ẹkun ghi sẹ ima otọ, rhunmwuda ne ima na ru emwi vbene ọ gualọe yi.

3. Te Jehova yi ima ne ima gha sọyẹnmwẹ arrọọ

Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: Vbọzẹe Ne Osanobua Na Yi Agbọn Na?​—Abọ Ne Kuẹi Vbọ (1:41)

• Vbọzẹ ne Osanobua na yi agbọn ne mose mose na?

Tie Asan-Ibo 3:11, NW, iyeke ọni, uwa ghi ziro yan inọta na:

• De emwi ne ọna maa ruẹ re vbekpa e Jehova?

4. Emwamwa ọghe Jehova ma he fi werriẹ

Tie Psalm 37:11, 29, NW kevbe Aizaia 55:11, iyeke ọni, uwa ghi ziro yan inọta na:

• Vbe ima ya rẹn hẹ wẹẹ, emwamwa ne Jehova mwẹ ne ima ma he fi werriẹ?

5. Ma ghaa ga e Jehova, arrọọ ọghe ima ghi gha mwẹ evbọ demu

E VIDIO: I Na Do Rẹn Evbọzẹe Ne Osanobua Na Yi Ima (5:03)

• De afiangbe ne Terumi miẹn, vbe ọ ghi do rẹn evbọzẹe ne Osanobua na yi emwa nagbọn?

Tie Asan-Ibo 12:13, iyeke ọni, uwa ghi ziro yan inọta na:

• Vbọ khẹke ne ima ru, ne ima ya kpọnmwẹ e Jehova ye emwi hia nọ he ru ne ima?

OLIKA ẸMWẸ

E Jehova hoo ne ima gha sọyẹnmwẹ arrọọ vbe etẹbitẹ vbe agbọn na. Ma ghaa ya ekhọe hia gae, arrọọ ọghe ima ghi gha mwẹ evbọ demu, uhiẹn vbe ẹghẹ ne ima ye na.

Ogbewerriẹ

• De emwamwa ne Jehova ghaa mwẹ ne Adam vbe Ivi?

• Vbe ima ya rẹn hẹ wẹẹ, emwamwa ne Osanobua mwẹ ne emwa nagbọn ma he fi werriẹ?

• De vbene arrọọ ọghuẹ khian ya gha mwẹ evbọ demu hẹ?

RUẸ SAYỌ

Ghee osẹ nọ rhie ẹre ma wẹẹ, ogba ọghe Idẹni gele gha rrọọ.

“Ogba Ọghe Idẹni Gele Gha Rrọọ Ra?” (The Watchtower, January 1, 2011)

Ghee evbọzẹe ne ima gha na sẹtin yaeyi wẹẹ, te uhunmwu otagbọn na khian gha rrọọ vbe etẹbitẹ.

“A Gha Fuẹn Uhunmwu Otagbọn Na Rua Ra?” (Ọ rre intanẹt)

Ghee emwi ne Baibol wẹẹ ọ khian ya arrọọ ọghe ima gha mwẹ evbọ demu.

“Vbọzẹ Ne Ima Na Rre Agbọn Na?” (Ọ rre intanẹt)

Ghee vbene okpia ọkpa nọ te gha roro ẹre wẹẹ, irẹn mwẹ emwi hia, ghi ya do bẹghe ẹre wẹẹ, ọ mwẹ emwi ne irẹn i mwẹ.

Eban Ẹre Arrọọ Mwẹ Ghi Mwẹ Evbọ Demu (3:55)

2. De emwa ni khian deba e Jesu khaevbisẹ?

Ẹi re Jesu ọkpa ẹre ọ khian khaevbisẹ. Emwa ni zẹ urhuẹvbo ughughan kevbe ni ke agbẹnvbo ughughan rre, ẹre ọ khian deba e Jesu khaevbisẹ yan agbọn na. (Arhie Maan 5:9, 10) Inu ẹre iran khin? Ke ẹghẹ ne Jesu ya gha rre agbọn na do fi ẹghẹ ne ima ye na, ọkhọngborrie emwa ẹre ọ he do khian erhuanegbe ẹre. Sokpan, vbe uwu iran na, arhunmwu 144,000 ọkpa, ẹre ọ khian deba re khaevbisẹ vbe ẹrinmwi. (Tie Arhie Maan 14:1-4.) Iran nikẹre ghi gha rre uhunmwu otagbọn na; iran na, ẹre Arriọba na khian gha kha yan.​—Psalm 37:29, NW.

Arriọba Osanobua kha nẹ. Ọ gha rherhe do fi emwi hia werriẹ vbe agbọn na. Gia ziro yan emwi eso ne u gha sọyẹnmwẹ ọnrẹn vbe Arriọba na.

1. De emwi ne Arriọba Osanobua khian ru, ne ọfurre kevbe ibuohiẹn ata gha rre agbọn na?

Jesu, nọ re Ọba ọghe Arriọba Osanobua, gha fuẹn emwa dan kevbe arriọba emwa nagbọn vbe okuo Amagẹdọn. (Arhie Maan 16:14, 16) Ẹghẹ nii, ẹmwẹ akhasẹ na, ghi gele mwẹ amusẹ: “Vbe ọ ma he kpẹẹ wan, a gha ho emwa dan bẹkun.” (Psalm 37:10) Arriọba na, ẹre Jesu khian ya ru ẹre, ne ọfurre kevbe ibuohiẹn ata gha rre otagbọn na hia.​—Tie Aizaia 11:4.

2. De vbene emwi khian gha ye hẹ vbe a ghaa ru ahoo ọghe Osanobua nẹ vbe agbọn na?

Vbe Arriọba Osanobua, “emwa esi ẹre ọ ra yin uhunmwu otagbọn na, iran ghi vbe gha rrọọ vbe etẹbitẹ.” (Psalm 37:29, NW) Muẹn roro vbene ọ khian gha ye hẹ, vbe u ghaa rre agbọn ne emwa hia na re emwa esi, iran ghi hoẹmwẹ e Jehova, iran ghi vbe hoẹmwẹ egbe! Ai ghi khuọnmwi, emwa hia ghi gha rrọọ vbe etẹbitẹ.

3. De emwi ne Arriọba Osanobua khian ru vbe a gha fuẹn emwa dan nẹ?

A gha ghi fuẹn emwa dan nẹ, Jesu ghi kha zẹvbe Ọba vbe ukpo 1,000. Vbe uwu ẹghẹ nii, irẹn kevbe arhunmwu 144,000 ni khian deba re kha, ghi ru iyobọ ne emwa nagbọn ya do khian emwa ni gbae. Vbe ufomwẹ ukpo 1,000 na, Jesu ghi werriegbe mu nene Arriọba ye Erhae obọ. Sokpan vbe ẹghẹ na kha na, otagbọn hia khian e paradais nẹ. Emwa ni khian vbe gha rre agbọn vbe ẹghẹ nii, ghi gha sọyẹnmwẹ rhunmwuda iran lele uhi e Jehova. Ẹghẹ nii, eni e Jehova ghi gele do khian “nọhuanrẹn” vbe odẹ na ma he miẹn egbọre ẹdẹ. (Matiu 6:9, 10) Ọ ghi gele do vẹ ne emwa hia rẹn wẹẹ, Ọba nọ mwẹ ekhọe esi kevbe nọ ya obọ esi mu emwa nọ kha yan, ẹre Jehova khin. E Jehova ghi wabọ Esu rua, kevbe avbe ugbogiorinmwi kẹ kevbe emwa ọvbehe ni sọtẹ daa ọdakha ọghẹe. (Arhie Maan 20:7-10) Afiangbe etẹbitẹ, ẹre emwa khian gha sọyẹnmwẹ ọnrẹn vbe Arriọba Osanobua.

GUALỌ OTỌ RE SAYỌ

4. Arriọba Osanobua gha wabọ arriọba emwa nagbọn rua

“Agbọn na ne emwa eso na wa mwẹ ẹtin, emwa ọvbehe ghi gha sẹ usẹ lele iran.” (Asan-Ibo 8:9) E Jehova gha ya Arriọba ọghẹe wabọ re rua, ọlọghọmwa hia ne uyinmwẹ agbọmwa ekueku he si.

Tie Daniẹl 2:44 kevbe 2 Tẹsalonaika 1:6-8, iyeke ọni, uwa ghi ziro yan avbe inọta na:

• De emwi ne Jehova kevbe Ovbi ẹre ighẹ Jesu khian ru arriọba emwa nagbọn re kevbe emwa ni ye iran ike?

• De emwi ne u he ruẹ vbekpa e Jehova kevbe Jesu, nọ ya ruẹ mwẹ ilẹkẹtin wẹẹ, iran gha bu ohiẹn ata vbe odaro?

5. Jesu ẹre ukpo Ọba gele khẹke

Zẹvbe Ọba ọghe Arriọba Osanobua, Jesu gha ru iyobọ ne emwa ne irẹn kha yan vbe odẹ ughughan. Kpee VIDIO na, ne u ya rẹn vbene Jesu he ya rhie ẹre ma hẹ wẹẹ, irẹn hoo ne irẹn ru iyobọ ne emwa kevbe wẹẹ, Osanobua rhie ẹtin nẹẹn nọ khian ya ru vberriọ.

E VIDIO: Jesu Ya Ima Rẹn Emwi Ne Arriọba Osanobua Khian Ru (1:13)

Emwi ne Jesu ru vbe ọ rre agbọn na, ya ima rẹn emwi ne Arriọba Osanobua khian ru ne emwa nagbọn. Vbe uwu avbe afiangbe na gbẹnnẹ ladian na, de ne uwẹ wa mobọ ya aro yi? Tie avbe ako e Baibol ni ginna avbe afiangbe na.

6. Arriọba Osanobua gha ya agbọn maan emwa hia vbe odaro

E VIDIO: Awanwan Ọghe Vbene Emwi Khian Gha Ye Hẹ Vbe Odaro (4:38)

Tie Psalm 145:16, iyeke ọni, uwa ghi ziro yan inọta na:

• Vbọ ye ruẹ hẹ vbe ekhọe ne u na rẹn wẹẹ, e Jehova gha ‘ya ẹko ẹre vuọn iran’ ighẹ emwi hia ne evbayi hia gualọ?

OLIKA ẸMWẸ

Arriọba Osanobua gha ru emwi hia ne Osanobua mwẹ vbe orhiọn. Ọ gha fi agbọn na werriẹ khian e paradais, nọ khian vuọn ne emwa esi ni khian gha ga e Jehova vbe etẹbitẹ.

Ogbewerriẹ

• De vbene Arriọba Osanobua khian ya ya eni Osanobua khian nọhuanrẹn hẹ?

• Vbọzẹ ne ima gha na sẹtin yaeyi wẹẹ, Arriọba Osanobua gha mu eyan hia ni rre Baibol sẹ?

• Vbe uwu emwi hia ne Arriọba Osanobua khian ru ne ima, de nọ yẹẹ ruẹ sẹ, ne uwẹ wa mobọ ya aro yi?

RUẸ SAYỌ

Gualọ otọ emwi na ya Amagẹdọn kha.

“Vbọ Re Okuo Amagẹdọn?” (Ọ rre intanẹt)

Ruẹ vbekpa emwi ni khian sunu vbe uwu ẹghẹ “orueghe nọkhua” ne Jesu guan kaẹn.—Matiu 24:21.

“Vbọ Re Orueghe Nọkhua?” (Ọ rre intanẹt)

Ghee vbene avbe ẹgbẹe gha ya sẹtin muẹn roro hẹ, afiangbe ne iran khian sọyẹnmwẹ ọnrẹn vbe Arriọba Osanobua.

Gha Mu Ẹmwẹ E Paradais Roro (1:50)

Vbe okha nọ mwẹ uhunmwuta na, “Inọta Nibun Kegha Kpokpo Mwẹ Vbe Orhiọn,” u gha miẹn vbene okpia ọkpa nọ ghaa sọtẹ daa arriọba, ya do miẹn ewanniẹn ọghe avbe inọta ni ghaa kpokpo ẹre vbe orhiọn.

“E Baibol Fi Arrọọ Werriẹ” (The Watchtower, January 1, 2012)