2. De emwi eso na gha gban egbe na, na mieke na gha re nọhuanrẹn?

E Baibol wẹẹ ne ima “khuẹ egbe mwa huan hin emwi nọ sẹtin ya egbe ra orhiọn khian nọ ma huan.” (2 Kọrinti 7:1) Ọni ọre wẹẹ, ma ghi gha gban egbe ne emwi ke emwi nọ gha sẹtin mu ima egbe ra ekhọe rhia. Ọ khẹke ne iziro ọghe ima gha yẹẹ e Jehova, nọnaghiyerriọ, te ima gha hia ne iziro dan ghẹ la ima ekhọe. (Psalm 104:34, NW) Ọ vbe khẹke ne ẹmwẹ nọ maan gha ke ima unu ladian.​—Tie Kọlose 3:8.

De emwi ọvbehe nọ gha sẹtin ya egbe ima, ekhọe ima kevbe uyinmwẹ ima khian nọ ma huan? Emwi eso gha sẹtin mu ima egbe rhia. Nọnaghiyerriọ, ọ ma khẹke ne ima gha si itaba, esiga ra ne ima gha ya ukhunmwu ni wegbe rọkhọ egbe. Ma ghaa lẹẹ ne emwi vbenian, ma i khian mu emianmwẹ ne iran si, te ima vbe rhie ẹre ma wẹẹ, ma gbọyẹmwẹ ye arrọọ. Ma ghaa gban egbe ne ughe ne emwa na bannọ ruan kevbe uyinmwẹ ne emwa na gua ẹgẹn iran kpa, te ima rhie ẹre ma wẹẹ, ekhọe ima kevbe uyinmwẹ ima huanrẹn. (Psalm 119:37; Ẹfisọs 5:5) Emwi vbenian gha gua ọmwa obọ ro nẹ, ọ wa lọghọ na ban, sokpan e Jehova gha sẹtin ru iyobọ.​—Tie Aizaia 41:13.

5. Hia ne u khọnmiotọ yan iziro dan kevbe uyinmwẹ nọ gbiruẹn

Tie Kọlose 3:5, iyeke ọni, uwa ghi ziro yan avbe inọta na:

• Vbe ima ya rẹn hẹ wẹẹ ọ sọnnọ e Jehova ighẹ ughe ne emwa na bannọ ruan, uyinmwẹ ne emwa na gua ẹgẹn iran kpa, kevbe ne emwa na ya efoni ra ekọmputa gie uhunmwu alama oghẹ gie emwa ọvbehe?

• Uwẹ yayi wẹẹ ima gha gele sẹtin gha mwẹ ekhọe kevbe uyinmwẹ nọhuanrẹn, zẹvbe ne Jehova gualọe yi ra? Vbua gu kha vberriọ?

Ghee odẹ ne u gha ya sẹtin khọnmiotọ yan iziro dan. Kpee VIDIO na.

E VIDIO: Zẹ Emwi Ru Ne U Mieke Na Gha Re Ọmwa Nọhuanrẹn (1:51)

Jesu keghi zẹ erre ọkpa nọ rhie ẹre ma wẹẹ, ọ khẹke ne ima zẹ emwi ru, ne ima mieke na gha re emwa ni huanrẹn. Tie Matiu 5:29, 30, NW, iyeke ọni, uwa ghi ziro yan inọta na:

• Vbe ako na, Jesu ma wẹẹ ne ima rhie ikuanegbe ne egbe ima, sokpan te irẹn wẹẹ ne ima zẹ emwi ru. De odẹ ne ọmwa gha ya sẹtin zẹ emwi ru, vbe iziro dan gha khian la re ekhọe?b

U ghaa hia ne u sẹtin khọnmiotọ yan iziro dan, e Jehova wa gbọyẹmwẹ ye ẹrhiọn ne u loo. Tie Psalm 103:13, 14, iyeke ọni, uwa ghi ziro yan inọta na:

• Deghẹ ọ mwẹ uyinmwẹ nọ gbiruẹn nọ gua ruẹ obọ ro, nọ lọghọ ruẹ na ban, de ẹmwẹ igiọdu nọ rre ako ọghe evbagbẹn nọhuanrẹn na, nọ gha ru iyobọ nuẹn ne ẹtin ghẹ fuẹ?

Ghẹ gi ẹtin fuẹ!

A sẹtin miẹn wẹẹ u hia vbe odẹ ke odẹ ne u ban uyinmwẹ dan, sokpan u ma he ye sẹtin. Ọna sẹtin gbe ruẹ orhiọn mu otọ. Sokpan muẹn roro: Ọmwa nọ rhulẹ gha de vbe odẹ, ọ rhie ma wẹẹ ọ wa gbokhuẹre nẹ vbe ulẹ nii ra? Te ọ khian dọlegbe ya suẹn ulẹ nii vbe omuhẹn ra? Hiehie! Erriọ vbe ye, u na dọlegbe yin uyinmwẹ ne u te hoo ne u ban, ọ ma rhie ma wẹẹ u gbokhuẹre. Ọ ma vbe rhie ma wẹẹ te u muẹn rhia ighẹ ẹrhiọn ne u he loo. Ai guẹ okhian, a ma rhua owẹ. Sokpan ọmwa gha rhua owẹ, ọ na de, ọ ghi vbe kpaegbe. Ghẹ gi ẹtin fuẹ! E Jehova gha ru iyobọ nuẹn ya ban uyinmwẹ dan nii.