Odẹ Ne U Gha Ya Gele Miẹn Ere Vbe Baibol Na Tie

A sẹtin miẹn wẹẹ, ọ mwẹ iwinna nọkhua ne u hoo ne u suẹn, sokpan u ma rẹn vbene u khian ya mu uhunmwu daa re hẹ. Ne iwinna na ghẹ lọghọ ruẹ gbe, u sẹtin suẹn gha ru ẹre kherhe kherhe. U gha wa ya uhukpa mu uhunmwu daa re, ọ sẹtin gbe orhiọn yọ ruẹ iwu. Erriọ e Baibol na tie vbe ye. U sẹtin gha nọ wẹẹ, ‘De eke ne I khian ke suẹn?’ Vbe iruẹmwi na, ma gha ziro yan emwi eso ni gha ru iyobọ nuẹn ya gha sọyẹnmwẹ e Baibol na tie.

1. Vbọzẹ nọ na khẹke ne ima gha tie Baibol vbe ẹghẹ hia?

Ọmwa ghaa tie Baibol ra “Uhi e Nọyaẹnmwa” vbe ẹghẹ hia, ọ ghi gha sọyẹnmwẹ, emwi hia nọ ru ghi vbe gha dinnodẹ. (Tie Psalm 1:1-3.) U gha khian suẹn e Baibol na tie vbe ẹdẹgbegbe, ghẹ loo ẹghẹ nọ taẹn. Ọ sẹtin gha re ifuanro eso. Zẹvbe ne u ya tie Baibol, erriọ ẹre u khian vbe ya gha sọyẹnmwẹ ọnrẹn.

2. Vbọ khian ya ruẹ gha miẹn ere vbe Baibol na tie?

Ma ghaa hoo ne ima gele gha miẹn ere vbe Baibol ne ima tie, ma ghi gbamẹ sawọn, ma ghi vbe mu emwi ne ima tie roro. Ọni nọ wẹẹ, ma gha tie Baibol, ma ghi vbe ru erria yan rẹn. (Jọsua 1:8) Usun ọta ne u khian gha nọ egbuẹ re vbe u ghaa tie Baibol ọre: ‘Vbe ako na maa mwẹ re vbekpa e Jehova? Vbia khian ya rhie ẹre ye uyinmwẹ hẹ? Vbia khian ya sẹtin yae ru iyobọ ne emwa ọvbehe hẹ?’

3. Vbua khian ya miẹn ẹghẹ ne u khian ya gha tie Baibol?

Ọ lọghọ u ke miẹn ẹghẹ ya gha tie Baibol ra? Ọ wa lọghọ ima nibun. Ọna ẹre ọ si ẹre nọ na khẹke ne ima gha loo ẹghẹ ima ẹse. (Ẹfisọs 5:16) Nọnaghiyerriọ, gha zẹ ẹghẹ kọ ne u ya gha tie Baibol vbe ẹdẹgbegbe. Owiẹ fioro ẹre emwa eso ya tie Baibol. Emwa eso tie vbe odẹ ẹghẹ ne iran ya rri evbare avan, vbene emwa eso na tie vbe asọn, iran ke lovbiẹ. De ẹghẹ nọ gha maan sẹ ne uwẹ?

GUALỌ OTỌ RE SAYỌ

4. Hia ne u gha sọyẹnmwẹ e Baibol na tie

Ẹi wa re emwi nọ khuẹrhẹ na suẹn e Baibol na tie. Vbọrhirhighayehẹ, ma gha sẹtin do gha sọyẹnmwẹ ọnrẹn zẹvbe ne ọmwa ya sọyẹnmwẹ evbare nọ ma he ka re ẹdẹ. Tie 1 Pita 2:2, iyeke ọni, uwa ghi ziro yan inọta na:

• U ghaa tie Baibol vbe ẹdẹgbegbe, u yayi wẹẹ u gha do gha sọyẹnmwẹ ọnrẹn zẹvbe ne ẹghẹ ya khian ra?

Kpee VIDIO na ne u bẹghe vbene emwa eso ghi ya suẹn gha sọyẹnmwẹ e Baibol na tie hẹ. Iyeke ọni, uwa ghi ziro yan inọta ni lelẹe.

E VIDIO: Vbene Igbama Eso Ya Do Gha Sọyẹnmwẹ E Baibol Na Tie Hẹ (5:33)

• Vbe vidio na, de isievẹn ne avbe igbama na werriẹ aro daa?

• Vbọzẹ ne iran ma na dobọ e Baibol na tie yi?

• De emwi ne iran ru nọ ghi ya iran do gha sọyẹnmwẹ e Baibol na tie?

Emwi eso ni gha ru iyobọ nuẹn:

• Gha loo e Baibol na zedu ẹre ẹse kevbe nẹi lọghọ na rẹn otọ re. U sẹtin gha loo New World Translation deghẹ ọ rre urhuẹvbo ruẹ, ra urhuẹvbo ọvbehe ne u gua tie.

• Ka ya tie ako nọ yẹẹ ruẹ sẹ. Isama nọ mwẹ uhunmwuta na, “Suẹn Gha Tie Baibol,” gha ru iyobọ nuẹn.

• Gha sama ye ako ne u he tie. Loo ako na, “Gha Sama Ye Ako Ne U He Tie” nọ rre ebe na.

• Gha loo JW Library^® app. Ọ ghaa rre efoni ra ekọmputa ruẹ, yae gha tie Baibol vbe ehe ne u rhirhi gha ye, u sẹtin vbe gha danmwehọ ako na tiere yotọ nẹ.

• Gha loo avbe appendix ni rre New World Translation. Vbe ako na, u gha miẹn avbe emapu, isama kevbe ẹmwẹ eso na rhan otọ re, ni gha ya ruẹ gha sọyẹnmwẹ e Baibol na tie.

5. Gha mu egbe iruẹmwi e Baibol yotọ

Tie Psalm 119:34, iyeke ọni, uwa ghi ziro yan inọta na:

• Vbọzẹ nọ na khẹke ne u ka gha na erhunmwu, u ke suẹn e Baibol na tie, ra vbe u gha khian mu egbe iruẹmwi e Baibol yotọ?

De vbene u khian ya gele gha miẹn ere vbe dọmwadẹ iruẹmwi hẹ? Zẹvbe ne u ya mu egbe dọmwadẹ iruẹmwi ni rre ebe na yotọ, hia ne u lele avbe obẹlẹ na:

1. Tie dọmwadẹ okhuẹn ni rre abọ nokaro vbe dọmwadẹ iruẹmwi.

2. Tie ako ọghe Baibol ni rrọọ, u ghi vbe hia ne u rẹn vbene iran ya rhilo ginna olika ẹmwẹ ni rre nene iruẹmwi.

3. Vinnọ ama ye ehe ne ewanniẹn ye; ọna gha ru iyobọ nuẹn vbe uwẹ vbe ọmwa nọ maa ruẹ emwi ghaa ziro yan rẹn.

U ka rẹn ra?

E Baibol ughughan ẹre Avbe Osẹe Jehova he loo. Sokpan New World Translation of the Holy Scriptures ẹre ima wa mobọ loo, rhunmwuda, a zedu ẹre vbe odẹ nọ gbae, ọ rriẹ, a wa vbe loo eni Osanobua vbọ.​—Ya ghee uhunmwuta na nọ rre intanẹt, “Avbe Osẹe Jehova Mwẹ E Baibol Ọghe Iran Ra?”

OLIKA ẸMWẸ

U ghaa hoo ne u gele gha miẹn ere vbe Baibol, zẹ ẹghẹ kọ ya gha tie ẹre, gha na erhunmwu ne u mieke na gha rẹn otọ re, u ghi vbe gha mu egbe iruẹmwi yotọ.

Ogbewerriẹ

• Vbọ khian ya ruẹ gha miẹn ere vbe Baibol na tie?

• De ẹghẹ ne uwẹ zẹ kọ, ne u ya gha tie Baibol ne egbuẹ?

• Vbọzẹ nọ na khẹke ne u gha mu egbe iruẹmwi e Baibol yotọ?

RUẸ SAYỌ

Ghee emwi eso ne u gha ru, nọ gha ya ruẹ gha miẹn ere vbe Baibol ne u tie.

“Vbene U Khian Ya Gha Miẹn Ere Vbe Baibol Na Tie” (The Watchtower No. 1 2017)

Ghee odẹ eha ne u khian ya gha tie Baibol.

“De Odẹ Ne Baibol Khian Ya Sẹtin Ru Iyobọ Mẹ?​—Abọ 1: Rẹn E Baibol Ruẹ Sayọ” (Ọ rre intanẹt)

Ghee vbene u khian ya gha sọyẹnmwẹ e Baibol na tie hẹ.

“De Odẹ Ne Baibol Khian Ya Sẹtin Ru Iyobọ Mẹ?​—Abọ 2: Gha Sọyẹnmwẹ E Baibol Na Tie” (Ọ rre intanẹt)

Ghee obẹlẹ eso ne emwa nọ kpẹẹ re ne iran ke tie Baibol loo.

Gha Tie Baibol Vbe Odẹ Ne U Gha Ya Miẹn Ere Vbọ (2:06)

4. Ọ khẹke ne uwẹ vbe Ọse nọ ghi sikẹ ruẹ sẹ gha gu egbe guan vbe ẹghẹ hia

Erhunmwu kevbe Baibol na ruẹ, ẹre ọ ru iyobọ nuẹn ya do gha re ọsie Jehova. De vbene emwi na sunu yi na, gha ya ru iyobọ nuẹn ya sikẹ e Jehova sayọ hẹ?

Tie Psalm 62:8, iyeke ọni, uwa ghi ziro yan inọta na:

• De vbene u gha ya sẹtin gha mwẹ alaghodaro hẹ vbe odẹ ne u ya na erhunmwu, ne u mieke na sikẹ e Jehova sayọ?

Tie Psalm 1:2, iyeke ọni, uwa ghi ziro yan inọta na:

• De emwi ne u gha ru, nọ gha ya ruẹ gha miẹn ere vbe Baibol na tie, ne u mieke na sikẹ e Jehova sayọ?

Vbua khian ya sẹtin gha tie Baibol hẹ, vbe odẹ ne u gha ya miẹn ere vbọ sayọ? Ne u ya rẹn odẹ eso ne u gha ya ru ọna, kpee VIDIO na, iyeke ọni, uwa ghi ziro yan inọta ni lelẹe.

E VIDIO: Gha Mwẹ Alaghodaro Vbe Odẹ Ne U Ya Tie Baibol Ne Egbuẹ (5:22)

• De obẹlẹ eso na guan kaẹn vbe vidio na, ne u gha sẹtin lele?

• De uhunmwuta eso ne u gha hoo ne u tie vbekpa re?