-
Vbọ Khian Ru Iyobọ Nuẹn Ne U Ghẹ Dobọ Iruẹmwi E Baibol Yi?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 12
Vbọ Khian Ru Iyobọ Nuẹn Ne U Ghẹ Dobọ Iruẹmwi E Baibol Yi?
A wa miẹn ere vbe iruẹmwi e Baibol. Vbọrhirhighayehẹ, ẹi wa re emwi nọ khuẹrhẹ. Ugbẹnso, u sẹtin gha roro ẹre deghẹ u gha gele sẹtin gha ruẹ e Baibol vbene u i na dobọ yi. Sokpan, vbọzẹ nọ na gele khẹke ne u hia ne u ghẹ dobọ yi? Vbọ khian ru iyobọ nuẹn, ọ gha khọnrẹn ne emwi wegbe muẹn?
1. Vbọzẹ ne iruẹmwi e Baibol na ru ekpataki?
“Ekpakpasusu ọre ẹmwẹ Osanobua khin.” (Hibru 4:12) E Baibol wa ru ekpataki rhunmwuda, ọ gha ya ruẹ rẹn emwamwa ọghe Osanobua kevbe aro nọ ya ghee ruẹ. Ọ gha vbe ya ruẹ gha mwẹ irẹnmwi kevbe ẹwaẹn kẹ kevbe ayayẹro nẹi beghe. Sẹ ehia, e Baibol gha ya ruẹ khian ọsie Jehova. U ghaa tie Baibol, te uwẹ kie ẹkpotọ yọ, ne ẹtin nọ rre Ẹmwẹ Osanobua fi arrọọ ruẹ werriẹ.
2. Vbọzẹ nọ na khẹke ne ima gha ya aro nọ ghaan ghee imamwaemwi ẹmwata ni rre Baibol?
Te imamwaemwi ẹmwata ni rre Baibol yevbe emwi ighobioye. Ọna ẹre ọ zẹe ne Baibol na wẹẹ ne ima “ha osa” ye ẹmwata sokpan ne ima ghẹ khiẹn ọnrẹn. (Itan 23:23) Ma gha gele rẹn vbene ẹmwata ni rre Baibol hiunsi sẹ hẹ, ma i kue ne emwi rhọkpa mu idobo ye iruẹmwi e Baibol ọghe ima.—Tie Itan 2:4, 5.
3. De iyobọ ne Jehova gha sẹtin ru nuẹn, ne u ghẹ dobọ iruẹmwi yi?
E Jehova ẹre ọ yi ruẹ, Ọse ruẹ vbe nọ, rhunmwuda ọni, ọ gha ru iyobọ nuẹn ya rẹn aro ọmwa ne irẹn khin. Ọ gha sẹtin rhie “aguakpa kevbe ẹtin nuẹn ya zẹ emwi ru.” (Tie Filipai 2:13, NW.) Ugbẹnso, ọ gha yevbe ne egbe iruẹmwi e Baibol khian wọọ ruẹ, ra te ọ ghi lọghọ ne u gha rhie emwi ne u ruẹ ye uyinmwẹ, ọ gha sẹtin rhie aguakpa nuẹn. U ghaa werriẹ aro daa ọlọghọmwa ra ukpokpo, ọ gha vbe sẹtin rhie ẹtin nuẹn ya lae gberra. Gha rinmwian e Jehova vbe ẹghẹ hia nọ ru iyobọ nuẹn ne u ye gha ruẹ e Baibol.—1 Tẹsalonaika 5:17.
GUALỌ OTỌ RE SAYỌ
Gia ziro yan evbọ gha ru iyobọ nuẹn ne u ghẹ dobọ iruẹmwi yi agharhemiẹn wẹẹ, emwi bun nọ rhie ruẹ ẹghẹ, ra ọmwa nọ werriẹ aro daa ukpokpo ẹre u khin. A gha vbe ziro yan odẹ ne Jehova gha ya ru iyobọ nuẹn.
4. Ghẹ ya iruẹmwi e Baibol rhẹghẹrẹ
Ugbẹnso, iwinna ughughan sẹtin mu ima sẹrriọ wẹẹ, ma i ghi miẹn obọ ya ruẹ e Baibol. Vbọ khian ru iyobọ ne ima? Tie Filipai 1:10, iyeke ọni, uwa ghi ziro yan avbe inọta na:
De usun emwi ne uwẹ yayi wẹẹ ọ “maan sẹ” vbe ẹdagbọn ima?
Vbua khian ru, nọ gha rhie ẹre ma wẹẹ, u ya aro nọ ghaan ghee iruẹmwi e Baibol?
U na ka zẹ ekẹn ye uwu ikoroba, u ke do viọ okuta yọ, okuta hia i khian ghi sẹtin la uwu ẹre
U na ka viọ nene okuta ye uwu ẹre, ikoroba nii ghi ye gua ekẹn nibun. Erriọ vbe ye, deghẹ “emwi nọ maan sẹ” ẹre u mu ye okaro vbe ẹdagbọn ruẹ, u ghi sẹtin musọe, deba ọni, u ghi vbe miẹn ẹghẹ ya ru emwi ọvbehe
Ma hia keghi hoo ne ima rẹn Osanobua, ne ima vbe gha gae; iruẹmwi e Baibol gha ru iyobọ ne ima. Tie Matiu 5:3, iyeke ọni, uwa ghi ziro yan inọta na:
De afiangbe na lae miẹn deghẹ ima ma ya iruẹmwi e Baibol rhẹghẹrẹ?
5. Ghẹ dobọ yi rhunmwuda igbodan
Ugbẹnso, emwa eso sẹtin gha hia ne iran fi ruẹ ekhọe werriẹ ne u ghẹ ghi ruẹ e Baibol. Gia ghee igiemwi ọghe Francesco. Kpee VIDIO na, iyeke ọni, uwa ghi ziro yan inọta ni lelẹe.
Vbe vidio na, de emwi ne ẹgbẹe Francesco kevbe avbe ọsiọre ru, vbe ọ tama iran emwi ne irẹn ruẹ vbe Baibol?
De afiangbe nọ ghi miẹn nọ ma na gi egbe wọọ re?
Tie 2 Timoti 2:24, 25, iyeke ọni, uwa ghi ziro yan avbe inọta na:
Ke ne u ya suẹn gha ruẹ e Baibol, de aro ne ẹgbẹe ruẹ kevbe avbe ọse ruẹ ghi ya ghee ruẹ?
Zẹvbe na miẹn ọnrẹn vbe ako na tiere na, de obọ nọ khẹke ne u ya gha mu ọmwa nẹi ghọghọ ye Baibol ne u ruẹ? Vbua gu kha vberriọ?
6. Ya enegbe ruẹ hia yan e Jehova
Zẹvbe ne ima ya sikẹ e Jehova, ma ghi gha hoo ne ima gha ya ẹko rhiẹnrhiẹn ọnrẹn. Sokpan, ọ sẹtin ye gha lọghọ ne ima ru afiwerriẹ nọ gha ya ẹko rhiẹnrhiẹn ọnrẹn. Ọ ghaa yerriọ, ghẹ gi ẹtin fuẹ. E Jehova gha ru iyobọ nuẹn. Kpee VIDIO na, iyeke ọni, uwa ghi ziro yan inọta ni lelẹe.
De afiwerriẹ ne Jim ru vbe vidio na, nọ mieke na ya ẹko rhiẹnrhiẹn e Jehova?
Vbua miẹn vbe igiemwi ọghẹe nọ mu ruẹ ekhọe?
Tie Hibru 11:6, iyeke ọni, uwa ghi ziro yan avbe inọta na:
Emwa “ni gualọ aro” e Jehova ọre emwa ni gele hoo ne iran rẹn ọnrẹn kevbe ne iran gha ru emwi nọ yẹẹ ọre. De emwi ne Jehova khian ru ne iran?
De aro ne uwẹ ghi yayi wẹẹ e Jehova ya ghee uwẹ nia, vbe ọ ghaa bẹghe ẹrhiọn ne u loo ya ruẹ e Baibol?
ỌMWA SẸTIN NỌ WẸẸ: “Vbọzẹ ne u na ruẹ e Baibol?”
Vbua khian ya khuẹnniẹn ọnrẹn hẹ?
OLIKA ẸMWẸ
Agharhemiẹn wẹẹ iruẹmwi e Baibol i khuẹrhẹ vbe ugbẹnso, ọ gha ya ruẹ gha sọyẹnmwẹ arrọọ vbe etẹbitẹ. Ya enegbe ruẹ hia yan e Jehova, ọ gha fiangbuẹ.
Ogbewerriẹ
Vbọzẹ ne u na ya aro nọ ghaan ghee ẹmwata ni rre Baibol?
Vbua khian ru, nọ gha rhie ẹre ma wẹẹ, u “zẹ emwi nọ maan sẹ”?
Vbọzẹ nọ na khẹke ne u rinmwian e Jehova nọ ru iyobọ nuẹn, ne u ghẹ dobọ iruẹmwi e Baibol yi?
RUẸ SAYỌ
Ghee emwi enẹ ni he ru iyobọ ne emwa ya gha loo ẹghẹ iran ẹse.
“Vbene U Khian Ya Gha Loo Ẹghẹ Ruẹ Ẹse Hẹ” (Awake!, February 2014)
Ghee vbene Jehova ya ru iyobọ ne okhuo ọkpa, ne ọdọ re ghaa gbe ẹre odan, rhunmwuda nọ na gha ga Osanobua.
E Jehova Ẹre Ọ Rhie Ẹrhiọn Ye Ima Iwu Ne Ima Mieke Na Sẹtin Mu Ihẹ Ọghe Ima (5:05)
Ghee afiangbe ne okpia ọkpa miẹn rhunmwuda izinegbe ọghe ọvbokhan rẹn.
Emwa eso keghi ba Avbe Osẹe Jehova ifiẹzọ wẹẹ iran zagha ẹgbẹe. Ẹmwata gele nọ ra?
“Te Avbe Osẹe Jehova Zagha Ẹgbẹe Ra, Ra Te Iran Ya Ẹgbẹe Mwẹ Akugbe?” (Ọ rre intanẹt)
-
-
Vbene A Ya Ru Azẹ Nọ Maan HẹSọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 35
Vbene A Ya Ru Azẹ Nọ Maan Hẹ
Ma hia keghi ru azẹ. Azẹ nibun ne ima ru sẹtin ya agbọn maan ima, ọ sẹtin ya agbọn lọghọ ima, ọ sẹtin si ima kẹ e Jehova, ọ sẹtin vbe ya ima khian rree nẹẹn. Vbe igiemwi, ma ẹre ọ khian ru azẹ nọ dekaẹn ehe ne ima gha dia, iwinna ne ima gha ru ne ima ya gha gaga egbe, kevbe deghẹ ima gha ru orọnmwẹ. Ma ghaa ru azẹ nọ maan, ma ghi gha sọyẹnmwẹ arrọọ, ẹko ghi vbe gha rhiẹnrhiẹn e Jehova.
1. De vbene u khian ya sẹtin gha ya e Baibol ru azẹ ni maan hẹ?
U ke ru azẹ, rinmwian e Jehova nọ ru iyobọ nuẹn, u ghi vbe gbarokotọ tie Baibol, ne u mieke na rẹn aro ne Jehova ya ghee azẹ ne u khian ru nii. (Tie Itan 2:3-6.) Ugbẹnso, e Baibol ghi wa sunu yọ taara, adia ọghe Jehova ne u gha lele. Ọ ghaa yerriọ, ọ wa khẹke ne u lelẹe zẹẹ.
Deghẹ e Baibol ma sunu yọ taara ghi vbo, ighẹ emwi nọ khẹke ne u ru? E Jehova gha ye rhie adia nọ khẹke nuẹn, ne u mieke na rẹn “odẹ ne [u] gha la.” (Aizaia 48:17) Odẹ vbo? U gha miẹn ilele ni rre Baibol ni gha dia ruẹ. Avbe ilele ni rre Baibol keghi re ẹmwata nẹi fi werriẹ, ni ya ima rẹn aro ne Osanobua ya ghee emwi. Ma gha tie okha eso vbe Baibol, ọ keghi ya ima rẹn aro ne Osanobua ya ghee emwi. Ma gha rẹn aro ne Jehova ya ghee emwi, ma gha sẹtin ru azẹ nọ gha yẹẹ ọre.
2. De emwi eso nọ khẹke ne u mu roro u ke ru azẹ rhọkpa?
E Baibol wẹẹ: ‘Te avbe umẹwaẹn ghee owẹ zẹ vbe otọ.’ (Itan 14:15) Ọna rhie ma wẹẹ, u ke ru azẹ, ọ khẹke ne u ka roro ẹre nẹ. Zẹvbe ne u ya muẹn roro, nọ egbuẹ wẹẹ: ‘De ilele ni rre Baibol nọ khẹke ne I lele? De azẹ ne I gha ru, nọ gha ya orhiọn mwẹ sotọ? Ọ gha rhua emwa ọvbehe owẹ ra? Sẹ ehia, ọ gha ya ẹko rhiẹnrhiẹn e Jehova ra?’—Diuteronomi 32:29, NW.
E Jehova mwẹ asẹ nọ ya tama ima, emwi nọ maan kevbe nẹi maan. Ma gha gele rẹn avbe uhi kevbe ilele ọghe Jehova, ma na vbe ta mu olọ yan rẹn wẹẹ ima gha lelẹe, ọ ghi ru iyobọ ne ima ya do gha mwẹ ekhọe ọguọmwaziro nọ maan. Ekhọe ọguọmwaziro ọre ẹwaẹn nọ rre uwu ima, nọ ya ima rẹn emwi nọ maan kevbe nẹi maan. (Rom 2:14, 15) Ekhọe ọguọmwaziro na ya ilele ni rre Baibol dia, gha sẹtin ru iyobọ ne ima ya gha ru azẹ ni maan.
GUALỌ OTỌ RE SAYỌ
Gia ziro yan rẹn sayọ, vbene ilele ni rre Baibol kevbe ekhọe ọguọmwaziro ya ru iyobọ ne ima ya gha ru azẹ hẹ.
3. Gi e Baibol gha dia ruẹ
De vbene ilele ni rre Baibol khian ya dia ima hẹ vbe ima gha khian ru azẹ? Kpee VIDIO na, iyeke ọni, uwa ghi ziro yan inọta ni lelẹe.
Vbọ re asẹ na ya zẹ ne egbe ọmwa?
Vbọzẹ ne Jehova na rhie asẹ na ne ima?
De emwi ne Jehova kpemehe ẹre, nọ gha ru iyobọ ne ima ya gha loo asẹ na ya zẹ ne egbe ọmwa, vbe odẹ nọ ghi maan sẹ?
Ghee ilele ọkpa nọ rre Baibol. Tie Ẹfisọs 5:15, 16, iyeke ọni, uwa ghi ziro yan emwi ne u gha ru, ne u mieke na miẹn ẹghẹ . . .
ya gha tie Baibol vbe ẹghẹ hia.
ya gha ru emwi nọ gha ya ruẹ gha re ọdọ, amwẹ, evbibiẹ ọmọ, ra ọmọ nọ maan.
ya gha yo iko vbe ẹghẹ hia.
4. Gha dia ekhọe ọguọmwaziro ruẹ ne u mieke na gha ru azẹ nọ maan
E Baibol gha wa sunu yọ taara, ighẹ adia ọghe Jehova ne u gha lele vbe u gha khian ru azẹ, ọ ghi wa gha khuẹrhẹ na ru. Sokpan deghẹ adia vberriọ i rrọọ vbo? Kpee VIDIO na, iyeke ọni, uwa ghi ziro yan inọta nọ lelẹe.
De emwi eso ne ọtẹn nokhuo na ru vbe vidio na, nọ ghi yae do gha mwẹ ekhọe ọguọmwaziro nọ maan, nọ ghi zẹe ighẹ ọ sẹtin ru azẹ nọ ya ẹko rhiẹnrhiẹn e Jehova?
Vbọzẹ nọ ma na khẹke ne ima gha tama emwa ọvbehe ne iran gha ru azẹ ne ima? Tie Hibru 5:14, iyeke ọni, uwa ghi ziro yan avbe inọta na:
Ẹi lọghọ na gha tama emwa ọvbehe ne iran gha ru azẹ ne ima, sokpan vbọ khẹke ne ima tobọ ima rẹn?
De emwi eso ni gha ru iyobọ nuẹn ya do gha mwẹ ekhọe ọguọmwaziro, nọ gha ya ruẹ gha ru azẹ nọ maan?
Te ekhọe ọguọmwaziro yevbe na ghee ọgiodẹ, nọ dia ima ye odẹ nọ khẹke ne ima la vbe ẹdagbọn ima
5. Gha daa ne emwa ọvbehe
Emwi ọkpa gha de rre, azẹ ne orhunmwu ọkpa gha ru sẹtin lughaẹn ne ọghe ọmwa ọvbehe. De vbene ima khian ya gha daa ne emwa ọvbehe hẹ, ne ima ghẹ mieke na rhua iran owẹ? Gia ziro yan igiemwi eva:
Igiemwi 1: Ọtẹn nokhuo nọ gua wa ya emwi rra aro keghi kpa gha rrie iko ọvbehe. Sokpan emwi na ya rra aro i yẹẹ etẹn nikhuo ni rre iko ọgbọn nọ kpa gha rrie na.
Tie Rom 15:1 kevbe 1 Kọrinti 10:23, 24, iyeke ọni, uwa ghi ziro yan avbe inọta na:
Zẹvbe nọ rre avbe ako na tie re na, de emwi ne ọtẹn nokhuo nii gha ghi ru? De emwi ne uwẹ gha ru, vbe u ghaa rre uwu ẹbu emwa ne ekhọe ọguọmwaziro ọghe iran i gi iran ru emwi eso, ne ọghe uwẹ kue yi?
Igiemwi 2: Ọtẹn nokpia ọkpa rẹnrẹn wẹẹ, e Baibol ma gbodan ye ayọn na da ye oreghe, ọrheyerriọ, ẹi da ayọn. A keghi gie na tie ẹre gha die eke ne etẹn na rọkhọ egbe, etẹn eso na gha da ayọn vba.
Tie Asan-Ibo 7:16 kevbe Rom 14:1, 10, iyeke ọni, uwa ghi ziro yan avbe inọta na:
Zẹvbe nọ rre avbe ako na tie re na, de emwi ne ọtẹn nokpia nii gha ghi ru? De emwi ne uwẹ gha ru, vbe u gha bẹghe ọmwa nọ ru emwi eso, ne ekhọe ọguọmwaziro ọghuẹ ma kue yi?
De emwi eso ni gha ru iyobọ nuẹn ya gha ru azẹ ni maan?
1. Rinmwian e Jehova nọ ru iyobọ nuẹn ya ru emwi nọ khẹke.—Jems 1:5.
2. Gbarokotọ tie Baibol kevbe ebe ughughan ni rhan otọ e Baibol, ne u mieke na miẹn ilele eso ni gha ru iyobọ nuẹn. U sẹtin vbe gu etẹn eso ni wẹro guan vbe uwu iko.
3. Muẹn roro deghẹ azẹ ne u khian ru, gha ya ekhọe ruẹ gha fi ruẹ uwẹnrhiẹn vbe okiekie, ra deghẹ ọ gha rhua emwa ọvbehe owẹ.
EMWA ESO KEGHI KHA WẸẸ: “U mwẹ asẹ ne u gha ya ru emwi nọ rhirhi khọn ruẹ. Ghẹ zẹ ye emwi ne emwa ọvbehe ta.”
Vbọzẹ nọ na khẹke ne ima muẹn roro, aro ne Osanobua kevbe emwa ọvbehe gha ya ghee emwi ke emwi ne ima khian ru?
OLIKA ẸMWẸ
Ma gha sẹtin gha ru azẹ ni maan deghẹ ima na gha hia ne ima rẹn aro ne Jehova ya ghee emwi, kevbe ima na gha muẹn roro deghẹ emwi ne ima khian ru gha ya ẹko rhiẹnrhiẹn emwa ọvbehe, ra ọ gha ya agbọn lọghọ iran.
Ogbewerriẹ
Vbua khian ya sẹtin gha ru azẹ ni ya ẹko rhiẹnrhiẹn e Jehova hẹ?
De vbene u khian ya sẹtin gha dia ekhọe ọguọmwaziro ọghuẹ hẹ?
De vbene u khian ya gha daa ne emwa ọvbehe hẹ, ne u ghẹ mieke na rhua iran owẹ?
RUẸ SAYỌ
De vbene u khian ya sẹtin gha ru azẹ nọ gha si ruẹ kẹ Osanobua sayọ?
“Gha Ru Azẹ Nọ Gha Rhie Uyi Gie Osanobua” (The Watchtower, April 15, 2011)
Ruẹ sayọ vbekpa odẹ ne Jehova ya dia ima.
Ghee emwi eso nọ ru iyobọ ne okpia ọkpa ya ru azẹ nọ te gha lọghọ ọre na ru.
U Ghaa Ga E Jehova, U Gha Sẹtin Ya Obọ Sudu Wẹẹ Emwi Esi Ẹre U Khian Lae Miẹn (5:46)
Ruẹ sayọ vbekpa vbene u gha ya ru azẹ nọ gha ya ẹko rhiẹnrhiẹn e Jehova, deghẹ e Baibol ma wa sunu yọ taara ighẹ emwi nọ khẹke ne u ru.
-