1. Vbọ re eni Osanobua? Vbọ ya ima rẹn wẹẹ, ọ hoo ne ima rẹn eni ẹnrẹn?

Osanobua ẹre ọ tobọre gie egbe ẹre ma ima vbe Baibol. Ọ khare wẹẹ: “Mẹ ọre Jehova. Ọni ọre eni mwẹ.” (Tie Aizaia 42:5, 8, NW.) Eni Osanobua vbe urhuẹvbo ọghe Hibru ẹre a zedu ẹre khian “e Jehova.” Emwa nibun ni rri egie ebe khare wẹẹ, emwi ne eni na demu ọre “Vbene Irẹn Wẹẹ Ne Emwi Gha Ye, Erriọ Ye.” E Jehova hoo ne ima rẹn eni irẹn. (Ẹksodọs 3:15, NW) Vbọ ya ima kha vberriọ? Rhunmwuda, ọ gberra igba 7,000 ne eni Osanobua ladian vbe Baibol!a Osa ọghe ẹmwata ọkpa ẹre ọ rre “ẹrinmwi kevbe agbọn,” eni ẹnrẹn ọre Jehova.​—Diuteronomi 4:39.

2. De odẹ nọ khẹke ne ima ya gha ga e Jehova?

E Jehova ọre Ayi ọghomwa, irẹn ẹre ọ khẹke ne ima gha rhie ugamwẹ na ma gua na. (Arhie Maan 4:11) Ọni nọ wẹẹ, ma ghi hoẹmwẹ ọnrẹn, ma ghi vbe gha ga irẹn ọkpa, vbene ima i na loo amazẹ rhọkpa.​—Tie Aizaia 42:8.

Ọ khẹke ne ugamwẹ ima gha re nọhuanrẹn kevbe ne Jehova gha miẹn yi. (Rom 12:1) Ọna rhie ma wẹẹ, te ima khian gha lele uhi ọghẹe. Vbe igiemwi, emwa ni hoẹmwẹ e Jehova keghi ya ekhọe hia lele uhi ọghẹe nọ dekaẹn orọnmwẹ. Iran i mwẹ obọ vbe uyinmwẹ nọ gbiruẹn, vbe na ghee itaba na si, ukhunmwu na loo ghee ihan, ra ayọn na da gbe egbe.a