-
U Gha Sẹtin Gu E Jehova Ru ỌseSọyẹnmwẹ Arrọọ Vbe Etẹbitẹ!—Iruẹmwi E Baibol
-
-
5. Emwi ne Jehova hoo ne avbe ọsiọre gha ru
Ọ mwẹ emwi eso ne ima hoo ne avbe ọse ima gha ru.
De emwi eso ne u hoo ne avbe ọse ruẹ ru nuẹn?
Tie 1 Jọn 5:3, iyeke ọni, uwa ghi ziro yan inọta na:
De emwi ne Jehova hoo ne avbe ọsiọre gha ru?
Ma ghaa hoo ne ima gha re emwa ni họn ẹmwẹ ne Jehova, te ima gha fi uyinmwẹ werriẹ. Tie Aizaia 48:17, 18, iyeke ọni, uwa ghi ziro yan inọta na:
Vbọzẹ ne Jehova na hoo ne avbe ọsiọre fi uyinmwẹ werriẹ?
Ọse nọ hoẹmwẹ ruẹ, ẹre ọ khian bu ruẹ ude nọ maan, ne agbọn mieke na maan ruẹ. Erriọ e Jehova wa vbe ye zẹẹ
-
-
Vbe Ima Khian Ya Rhie Ẹre Ma Hẹ Wẹẹ Ima Hoẹmwẹ E Jehova?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 34
Vbe Ima Khian Ya Rhie Ẹre Ma Hẹ Wẹẹ Ima Hoẹmwẹ E Jehova?
Uwẹ ghee ẹre wẹẹ, te u ghi do sikẹ Osanobua sayọ, ke ne u ya suẹn gha ruẹ e Baibol ra? U hoo ne u ye sikẹ Osanobua sayọ ra? Adeghẹ ẹẹn ọre ewanniẹn ne u rhie ye avbe inọta na, gha mwẹ ọnrẹn vbe orhiọn wẹẹ, zẹvbe ne Jehova ya bẹghe ẹre wẹẹ, ahoẹmwọmwa ne u mwẹ ne irẹn wegbe sayọ, erriọ ẹre irẹn khian vbe ya gha hoẹmwẹ ruẹ sayọ, ọ ghi vbe gha gbaroghe ruẹ. Vbua khian ya rhie ẹre ma hẹ wẹẹ, u hoẹmwẹ Osanobua?
1. Vbe ima khian ya rhie ẹre ma hẹ wẹẹ ima hoẹmwẹ e Jehova?
Ma ghaa họn ẹmwẹ ne Jehova, te ima rhie ẹre ma wẹẹ, ima hoẹmwẹ ọnrẹn. (Tie 1 Jọn 5:3.) Ẹi kpikpi ọmwa rhọkpa nọ họn ẹmwẹ nẹẹn. Nọghayayerriọ, ọ keghi fan obọ re ne ima, ne ima ya zẹ ne egbe ima, deghẹ ima gha họn ẹmwẹ nẹẹn, ra ima i khian ru vberriọ. Vbọzẹ? E Jehova hoo ne ima gha ya ekhọe obọ ima họn ẹmwẹ nẹẹn. (Rom 6:17) Ọni nọ wẹẹ, irẹn hoo ne u gha họn ẹmwẹ ne irẹn, ẹi re rhunmwuda wẹẹ, a wẹẹ ne u ru vberriọ, sokpan rhunmwuda ahoẹmwọmwa ne u mwẹ nẹẹn. Abọ nogie 3 kevbe nogie 4 ọghe ebe na, keghi re na mwamwaẹn, nọ ru iyobọ nuẹn ya gha rhie ẹre ma wẹẹ, u hoẹmwẹ e Jehova. Odẹ ne u gha ya ru ọna ọre wẹẹ, u ghi gha ru emwi ni yẹẹ ọre, u ghi vbe gha lẹẹ ne emwi ni sọnnọ ọnrẹn.
2. De emwi eso nọ yae lọghọ na gha rhie ẹre ma wẹẹ ima hoẹmwẹ e Jehova?
“Ọlọghọmwa nibun, ẹre ọmwata miẹn.” (Psalm 34:19) Amagba ọghomwa keghi rre usun emwi ne ima hia gu suan. Emwi ọvbehe ne ima vbe gu suan ọre ọlọghọmwa ọghe ai miẹn igho loo sẹ omwa, agbọmwa ekueku kevbe avbe ọlọghọmwa ọvbehe. Ma ghaa rre uwu ọlọghọmwa, ọ sẹtin gha lọghọ ne ima gha họn ẹmwẹ ne Jehova rhunmwuda, ẹghẹ nii, ẹre emwi dan na ru na kẹ ọmwa sẹ. Sokpan, u ghaa ru emwi hia ne Jehova hoo ne u ru, te u rhie ẹre ma wẹẹ, u hoẹmwẹ ọnrẹn sẹ emwi hia. Te u vbe rhie ẹre ma wẹẹ, u mwẹ ẹkoata daa re. Irẹn tobọ irẹn ghi vbe gha ya obọ esi mu ruẹ. Ẹi khian sẹ ruẹ rae ẹdẹ.—Tie Psalm 4:3.
GUALỌ OTỌ RE SAYỌ
Gia ziro yan evbọzẹe nọ na ya ẹko rhiẹnrhiẹn e Jehova, vbe u ghaa họn ẹmwẹ nẹẹn, kevbe evbọ khian ru iyobọ nuẹn ya gha họn ẹmwẹ nẹẹn.
3. Ẹmwẹ nọ rre otọ nọ kaan ruẹ
Zẹvbe nọ rre ebe Job, emwa hia ni hoo ne iran ga e Jehova, ẹre Setan si ẹre evẹn, ẹi wa re Job ọkpa kẹkan. Tie Job 1:1, 6–2:10, iyeke ọni, uwa ghi ziro yan avbe inọta na:
De emwi ne Setan wẹẹ ọ ya e Job gha họn ẹmwẹ ne Jehova?—Ghee Job 1:9-11.
De ifiẹzọ ne Esu ba emwa nagbọn hia re, ya sẹ egbe uwẹ?—Ghee Job 2:4.
Tie Job 27:5b, NW, iyeke ọni, uwa ghi ziro yan inọta na:
De vbene Job ya rhie ẹre ma hẹ wẹẹ, irẹn gele hoẹmwẹ e Jehova?
Ne Job na gha ya ẹkoata ga e Jehova rhie ẹre ma wẹẹ, ọ gele hoẹmwẹ e Jehova
Ma ghaa ya ẹkoata ga e Jehova, te ima rhie ẹre ma wẹẹ ima gele hoẹmwẹ ọnrẹn
4. Gha ya ẹko rhiẹnrhiẹn e Jehova
Tie Itan 27:11, iyeke ọni, uwa ghi ziro yan avbe inọta na:
Vbọ ye Jehova hẹ vbe ekhọe deghẹ u na gha re ọmọ nọ waan kevbe nọ họn ẹmwẹ nẹẹn? Vbua gu kha vberriọ?
5. U gha sẹtin gha ya ẹkoata ga e Jehova
Ahoẹmwọmwa ne ima mwẹ ne Jehova, ẹre ọ gua ima kpa ya tama emwa ọvbehe vbekpa re. Ẹkoata ne ima mwẹ daa re, ẹre ọ gua ima kpa ya ru vberriọ uhiẹn vbe emwi ghaa baa su ima. Kpee VIDIO na, iyeke ọni, uwa ghi ziro yan inọta ni lelẹe.
Ọ he mwẹ ẹghẹ nọ ya lọghọ ruẹ, ne u ya tama emwa ọvbehe vbekpa e Jehova ra?
Vbe vidio na, vbọ ru iyobọ ne Grayson ya do gha mwẹ udinmwẹ?
Ma gha hoẹmwẹ emwi ne Jehova hoẹmwẹ ọnrẹn, emwi ni sọnnọ ọnrẹn na vbe gha sọnnọ ima, ẹi ghi lọghọ ima gbe, ne ima gha họn ẹmwẹ nẹẹn. Tie Psalm 97:10, iyeke ọni, uwa ghi ziro yan avbe inọta na:
Zẹvbe ne u he ruẹ ọre vbe Baibol, de emwi eso ne Jehova hoẹmwẹ ọnrẹn? De emwi eso ni sọnnọ ọnrẹn?
Vbọ khian ru iyobọ nuẹn ya do gha re ọmwa nọ hoẹmwẹ emwi nọ maan kevbe ọmwa ne emwi dan sọnnọ?
6. Ma keghi miẹn ere vbọ vbe ima ghaa họn ẹmwẹ ne Jehova
A ghaa họn ẹmwẹ ne Jehova, afiangbe na miẹn vbọ i gia gie. Tie Aizaia 48:17, 18, iyeke ọni, uwa ghi ziro yan avbe inọta na:
Uwẹ gele yayi wẹẹ, e Jehova ẹre ọ rẹn emwi nọ maan ne ima sẹ ra? Vbua gu kha vberriọ?
De afiangbe ne u he miẹn ke ne u ya suẹn gha ruẹ e Baibol kevbe ne u ya suẹn gha ruẹ vbekpa e Jehova nọ re Osa ọghe ẹmwata?
EMWA ESO KEGHI KHA WẸẸ: “Osanobua i ka emwi ne I ru yọ.”
De ako ọghe Baibol ne u gha sẹtin loo ya gi ọmwa vbenian rẹn wẹẹ, emwi ne ima rhirhi ru sẹtin sọnnọ e Jehova, ọ sẹtin vbe gha yẹẹ ọre?
OLIKA ẸMWẸ
U gha sẹtin rhie ẹre ma wẹẹ u hoẹmwẹ e Jehova, vbe u ghaa họn ẹmwẹ nẹẹn kevbe u ghaa ya ẹkoata gae, uhiẹn vbe emwi ghaa baa su ruẹ.
Ogbewerriẹ
Vbua miẹn ruẹ vbe igiemwi ọghe Job?
Vbua khian ya rhie ẹre ma hẹ wẹẹ, u hoẹmwẹ e Jehova?
Vbọ khian ru iyobọ nuẹn ya gha ya ẹkoata ga e Jehova?
RUẸ SAYỌ
Ghee emwi nọ gha ru iyobọ nuẹn ya gha rhie ẹre ma wẹẹ, u mwẹ ẹkoata daa e Jehova kevbe otu ọghẹe.
Ruẹ sayọ vbekpa ifiẹzọ ne Setan ba emwa nagbọn re.
“E Job Keghi Da Imudiase Ọghẹe Yi” (The Bible—What Is Its Message? abọ 6)
Ghee vbene ibiẹka gha ya sẹtin rhie ẹre ma hẹ wẹẹ, iran hoẹmwẹ e Jehova.
De vbene igbama nọ werriẹ aro daa ukpokpo otu ihegbe khian ya sẹtin rhie ẹre ma hẹ wẹẹ, irẹn mwẹ ẹkoata daa Osanobua?
Mudia Gbain Vbe U Gha Werriẹ Aro Daa Ukpokpo Otu Ihegbe! (4:00)
-
-
Vbene A Ya Ru Azẹ Nọ Maan HẹSọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 35
Vbene A Ya Ru Azẹ Nọ Maan Hẹ
Ma hia keghi ru azẹ. Azẹ nibun ne ima ru sẹtin ya agbọn maan ima, ọ sẹtin ya agbọn lọghọ ima, ọ sẹtin si ima kẹ e Jehova, ọ sẹtin vbe ya ima khian rree nẹẹn. Vbe igiemwi, ma ẹre ọ khian ru azẹ nọ dekaẹn ehe ne ima gha dia, iwinna ne ima gha ru ne ima ya gha gaga egbe, kevbe deghẹ ima gha ru orọnmwẹ. Ma ghaa ru azẹ nọ maan, ma ghi gha sọyẹnmwẹ arrọọ, ẹko ghi vbe gha rhiẹnrhiẹn e Jehova.
1. De vbene u khian ya sẹtin gha ya e Baibol ru azẹ ni maan hẹ?
U ke ru azẹ, rinmwian e Jehova nọ ru iyobọ nuẹn, u ghi vbe gbarokotọ tie Baibol, ne u mieke na rẹn aro ne Jehova ya ghee azẹ ne u khian ru nii. (Tie Itan 2:3-6.) Ugbẹnso, e Baibol ghi wa sunu yọ taara, adia ọghe Jehova ne u gha lele. Ọ ghaa yerriọ, ọ wa khẹke ne u lelẹe zẹẹ.
Deghẹ e Baibol ma sunu yọ taara ghi vbo, ighẹ emwi nọ khẹke ne u ru? E Jehova gha ye rhie adia nọ khẹke nuẹn, ne u mieke na rẹn “odẹ ne [u] gha la.” (Aizaia 48:17) Odẹ vbo? U gha miẹn ilele ni rre Baibol ni gha dia ruẹ. Avbe ilele ni rre Baibol keghi re ẹmwata nẹi fi werriẹ, ni ya ima rẹn aro ne Osanobua ya ghee emwi. Ma gha tie okha eso vbe Baibol, ọ keghi ya ima rẹn aro ne Osanobua ya ghee emwi. Ma gha rẹn aro ne Jehova ya ghee emwi, ma gha sẹtin ru azẹ nọ gha yẹẹ ọre.
2. De emwi eso nọ khẹke ne u mu roro u ke ru azẹ rhọkpa?
E Baibol wẹẹ: ‘Te avbe umẹwaẹn ghee owẹ zẹ vbe otọ.’ (Itan 14:15) Ọna rhie ma wẹẹ, u ke ru azẹ, ọ khẹke ne u ka roro ẹre nẹ. Zẹvbe ne u ya muẹn roro, nọ egbuẹ wẹẹ: ‘De ilele ni rre Baibol nọ khẹke ne I lele? De azẹ ne I gha ru, nọ gha ya orhiọn mwẹ sotọ? Ọ gha rhua emwa ọvbehe owẹ ra? Sẹ ehia, ọ gha ya ẹko rhiẹnrhiẹn e Jehova ra?’—Diuteronomi 32:29, NW.
E Jehova mwẹ asẹ nọ ya tama ima, emwi nọ maan kevbe nẹi maan. Ma gha gele rẹn avbe uhi kevbe ilele ọghe Jehova, ma na vbe ta mu olọ yan rẹn wẹẹ ima gha lelẹe, ọ ghi ru iyobọ ne ima ya do gha mwẹ ekhọe ọguọmwaziro nọ maan. Ekhọe ọguọmwaziro ọre ẹwaẹn nọ rre uwu ima, nọ ya ima rẹn emwi nọ maan kevbe nẹi maan. (Rom 2:14, 15) Ekhọe ọguọmwaziro na ya ilele ni rre Baibol dia, gha sẹtin ru iyobọ ne ima ya gha ru azẹ ni maan.
GUALỌ OTỌ RE SAYỌ
Gia ziro yan rẹn sayọ, vbene ilele ni rre Baibol kevbe ekhọe ọguọmwaziro ya ru iyobọ ne ima ya gha ru azẹ hẹ.
3. Gi e Baibol gha dia ruẹ
De vbene ilele ni rre Baibol khian ya dia ima hẹ vbe ima gha khian ru azẹ? Kpee VIDIO na, iyeke ọni, uwa ghi ziro yan inọta ni lelẹe.
Vbọ re asẹ na ya zẹ ne egbe ọmwa?
Vbọzẹ ne Jehova na rhie asẹ na ne ima?
De emwi ne Jehova kpemehe ẹre, nọ gha ru iyobọ ne ima ya gha loo asẹ na ya zẹ ne egbe ọmwa, vbe odẹ nọ ghi maan sẹ?
Ghee ilele ọkpa nọ rre Baibol. Tie Ẹfisọs 5:15, 16, iyeke ọni, uwa ghi ziro yan emwi ne u gha ru, ne u mieke na miẹn ẹghẹ . . .
ya gha tie Baibol vbe ẹghẹ hia.
ya gha ru emwi nọ gha ya ruẹ gha re ọdọ, amwẹ, evbibiẹ ọmọ, ra ọmọ nọ maan.
ya gha yo iko vbe ẹghẹ hia.
4. Gha dia ekhọe ọguọmwaziro ruẹ ne u mieke na gha ru azẹ nọ maan
E Baibol gha wa sunu yọ taara, ighẹ adia ọghe Jehova ne u gha lele vbe u gha khian ru azẹ, ọ ghi wa gha khuẹrhẹ na ru. Sokpan deghẹ adia vberriọ i rrọọ vbo? Kpee VIDIO na, iyeke ọni, uwa ghi ziro yan inọta nọ lelẹe.
De emwi eso ne ọtẹn nokhuo na ru vbe vidio na, nọ ghi yae do gha mwẹ ekhọe ọguọmwaziro nọ maan, nọ ghi zẹe ighẹ ọ sẹtin ru azẹ nọ ya ẹko rhiẹnrhiẹn e Jehova?
Vbọzẹ nọ ma na khẹke ne ima gha tama emwa ọvbehe ne iran gha ru azẹ ne ima? Tie Hibru 5:14, iyeke ọni, uwa ghi ziro yan avbe inọta na:
Ẹi lọghọ na gha tama emwa ọvbehe ne iran gha ru azẹ ne ima, sokpan vbọ khẹke ne ima tobọ ima rẹn?
De emwi eso ni gha ru iyobọ nuẹn ya do gha mwẹ ekhọe ọguọmwaziro, nọ gha ya ruẹ gha ru azẹ nọ maan?
Te ekhọe ọguọmwaziro yevbe na ghee ọgiodẹ, nọ dia ima ye odẹ nọ khẹke ne ima la vbe ẹdagbọn ima
5. Gha daa ne emwa ọvbehe
Emwi ọkpa gha de rre, azẹ ne orhunmwu ọkpa gha ru sẹtin lughaẹn ne ọghe ọmwa ọvbehe. De vbene ima khian ya gha daa ne emwa ọvbehe hẹ, ne ima ghẹ mieke na rhua iran owẹ? Gia ziro yan igiemwi eva:
Igiemwi 1: Ọtẹn nokhuo nọ gua wa ya emwi rra aro keghi kpa gha rrie iko ọvbehe. Sokpan emwi na ya rra aro i yẹẹ etẹn nikhuo ni rre iko ọgbọn nọ kpa gha rrie na.
Tie Rom 15:1 kevbe 1 Kọrinti 10:23, 24, iyeke ọni, uwa ghi ziro yan avbe inọta na:
Zẹvbe nọ rre avbe ako na tie re na, de emwi ne ọtẹn nokhuo nii gha ghi ru? De emwi ne uwẹ gha ru, vbe u ghaa rre uwu ẹbu emwa ne ekhọe ọguọmwaziro ọghe iran i gi iran ru emwi eso, ne ọghe uwẹ kue yi?
Igiemwi 2: Ọtẹn nokpia ọkpa rẹnrẹn wẹẹ, e Baibol ma gbodan ye ayọn na da ye oreghe, ọrheyerriọ, ẹi da ayọn. A keghi gie na tie ẹre gha die eke ne etẹn na rọkhọ egbe, etẹn eso na gha da ayọn vba.
Tie Asan-Ibo 7:16 kevbe Rom 14:1, 10, iyeke ọni, uwa ghi ziro yan avbe inọta na:
Zẹvbe nọ rre avbe ako na tie re na, de emwi ne ọtẹn nokpia nii gha ghi ru? De emwi ne uwẹ gha ru, vbe u gha bẹghe ọmwa nọ ru emwi eso, ne ekhọe ọguọmwaziro ọghuẹ ma kue yi?
De emwi eso ni gha ru iyobọ nuẹn ya gha ru azẹ ni maan?
1. Rinmwian e Jehova nọ ru iyobọ nuẹn ya ru emwi nọ khẹke.—Jems 1:5.
2. Gbarokotọ tie Baibol kevbe ebe ughughan ni rhan otọ e Baibol, ne u mieke na miẹn ilele eso ni gha ru iyobọ nuẹn. U sẹtin vbe gu etẹn eso ni wẹro guan vbe uwu iko.
3. Muẹn roro deghẹ azẹ ne u khian ru, gha ya ekhọe ruẹ gha fi ruẹ uwẹnrhiẹn vbe okiekie, ra deghẹ ọ gha rhua emwa ọvbehe owẹ.
EMWA ESO KEGHI KHA WẸẸ: “U mwẹ asẹ ne u gha ya ru emwi nọ rhirhi khọn ruẹ. Ghẹ zẹ ye emwi ne emwa ọvbehe ta.”
Vbọzẹ nọ na khẹke ne ima muẹn roro, aro ne Osanobua kevbe emwa ọvbehe gha ya ghee emwi ke emwi ne ima khian ru?
OLIKA ẸMWẸ
Ma gha sẹtin gha ru azẹ ni maan deghẹ ima na gha hia ne ima rẹn aro ne Jehova ya ghee emwi, kevbe ima na gha muẹn roro deghẹ emwi ne ima khian ru gha ya ẹko rhiẹnrhiẹn emwa ọvbehe, ra ọ gha ya agbọn lọghọ iran.
Ogbewerriẹ
Vbua khian ya sẹtin gha ru azẹ ni ya ẹko rhiẹnrhiẹn e Jehova hẹ?
De vbene u khian ya sẹtin gha dia ekhọe ọguọmwaziro ọghuẹ hẹ?
De vbene u khian ya gha daa ne emwa ọvbehe hẹ, ne u ghẹ mieke na rhua iran owẹ?
RUẸ SAYỌ
De vbene u khian ya sẹtin gha ru azẹ nọ gha si ruẹ kẹ Osanobua sayọ?
“Gha Ru Azẹ Nọ Gha Rhie Uyi Gie Osanobua” (The Watchtower, April 15, 2011)
Ruẹ sayọ vbekpa odẹ ne Jehova ya dia ima.
Ghee emwi eso nọ ru iyobọ ne okpia ọkpa ya ru azẹ nọ te gha lọghọ ọre na ru.
U Ghaa Ga E Jehova, U Gha Sẹtin Ya Obọ Sudu Wẹẹ Emwi Esi Ẹre U Khian Lae Miẹn (5:46)
Ruẹ sayọ vbekpa vbene u gha ya ru azẹ nọ gha ya ẹko rhiẹnrhiẹn e Jehova, deghẹ e Baibol ma wa sunu yọ taara ighẹ emwi nọ khẹke ne u ru.
-