7. De vbene Jehova ya họn erhunmwu ọghe Habakọk hẹ?

⁷ Tie Habakọk 1:5-7. E Habakọk ghi tama e Jehova emwi hia nọ kpokpo irẹn vbe orhiọn nẹ, ọ keghi zinegbe ne Jehova zẹ emwi ru, sokpan ọ ma rẹn vbene Jehova khian ya sọfurre ye ọlọghọmwa ọghe irẹn hẹ. E Jehova keghi re Osa nọ mwẹ itohan, ọ vbe rẹn emwi ne Habakọk la gberra, rhunmwuda ọni, ọ ma gu e Habakọk gui. Ọ keghi tama e Habakọk emwi nọ khian sunu daa Ivbi e Ju ni sọtẹ daa irẹn. Ọ gha kẹ, Habakọk ọre ọmwa okaro ne Jehova ta re ma wẹẹ, irẹn gha rherhe fuẹn Ivbi e Ju rua.

8. Vbọzẹe ne emwi ne Jehova tae na kpa e Habakọk odin?

⁸ E Jehova keghi tama e Habakọk wẹẹ irẹn gha zẹ emwi ru kevbe wẹẹ, ẹi khian kpẹ gbe. Ẹmwẹ ne Jehova loo ro vbe uviẹn 5, rhiẹre ma wẹẹ, ẹghẹ Habakọk kevbe Ivbi e Ju ni ghaa rrọọ vbe ẹghẹ nii, ẹre Jehova khian ya zẹ emwi ru. E Jehova keghi tama e Habakọk wẹẹ, Ivbi e Babilọn ni mwẹ ekhọe atosi ẹre irẹn khian loo ya guọghọ Ivbi Izrẹl. Iran khọ sẹ Ivbi e Izrẹl. Ọna rhiema wẹẹ, te emwi khian rhia sayọ vbe otọ e Juda.a Ọna keghi kpa e Habakọk odin rhunmwuda, ọna i re emwi ne irẹn te yaro yi. Vbọzẹe ne Osanobua khian na loo emwa dan vbenian ya guọghọ emwa rẹn? Ughaghe inọta vbenian ghaa rre ekhọe Habakọk. De emwi ne uwẹ gha te ru deghẹ uwẹ ọ rre ihe vbenian?