1. Gha re Jesu?

Ọmwa orhiọn nọ mwẹ ẹtin ẹre Jesu khin. Ẹrinmwi ẹre ọ ye. Irẹn ẹre Jehova ka gha yi, ọ ke yi emwi nikẹre hia. Ọni ẹre ọ si ẹre ne a na tie ẹre ‘ọmọdiọn ọghe emwi na yi hia fẹẹrẹ.’ (Kọlose 1:15) E Baibol tie Jesu “ukpọmọkpa” ọghe Osanobua rhunmwuda, Jesu ọkpa ẹre Jehova wa tobọre yi. (Jọn 3:16) Jesu keghi ku obọ gbe ba Erhae ighẹ e Jehova ya yi emwi nikẹre hia. (Tie Itan 8:30.) Do fi vbene a guan na, te irẹn vbe Erhae wa ye sikẹ egbe. A vbe tie Jesu “nene Ẹmwẹ” rhunmwuda, irẹn ọre ọmunu ne Jehova loo ya gu emwa kevbe avbe odibosa guan kevbe nọ ya rhie adia ne iran.​—Jọn 1:14.

Adam vbe Ivi keghi sọtẹ daa Osanobua, ọna ẹre ọ si ẹre ne ima na ru orukhọ, ne ima na susẹ kevbe ne ima na wu.a Sokpan ma mwẹ ayayẹro. E Jehova keghi gie Ovbi ẹre ighẹ Jesu Kristi nọ do wu ne ima, nọ ya fan ima hin ẹtin orukhọ kevbe uwu rre. E Baibol gi ima rẹn wẹẹ, te Jesu ya uwu ọghẹe dẹ ima werriegbe. Adẹwerriegbe ọre osa na hae ya fan ọmwa fua. Arrọọ nọ gbae ọghe Jesu, ẹre ọ ya ha osa ye orukhọ ọghe ima. (Tie Matiu 20:28.) Jesu te mwẹ asẹ nọ gha te ya gha rre agbọn na vbe etẹbitẹ, sokpan ọ keghi ya ekhọe obọ re wu ne ima, ọna ẹre ọ zẹe ne ẹkpotọ na kie ne ima ya dọlegbe gha mwẹ emwi hia ni te wii Adam vbe Ivi. Ọna ya ima rẹn wẹẹ, ahoẹmwọmwa ne Jesu kevbe Jehova mwẹ ne ima i re nekherhe. Iruẹmwi na, gha ru iyobọ nuẹn ya kakabọ gbọyẹmwẹ ye uwu ọghe Jesu.

1. De ere ne ima miẹn vbe uwu ọghe Jesu vbe ẹdẹnẹrẹ?

Rhunmwuda ne ima na re emwa orukhọ, ẹghẹ hia ẹre ima ya ru emwi nẹi yẹẹ e Jehova. Sokpan, ma gha gele roro iro fi uyinmwẹ werriẹ, ma na rinmwian e Jehova vbe eni Jesu nọ yabọ ima, ma na vbe hia ne ima ghẹ dọlegbe ru abakuru nii, e Jehova gha yabọ ima, ma ghi do gha re ọsiọre. (1 Jọn 2:1) E Baibol khare wẹẹ: “Kristi tobọre wu ne uwa, ọ wu ye orukhọ, uhukpa ne emwa hia, ọmwa esi wu ne emwa dan, nọ miẹn ehe na viọ uwa gie Osanobua.”​—1 Pita 3:18.

2. De ere ne ima khian miẹn vbe uwu ọghe Jesu vbe odaro?

E Jehova keghi gie Jesu gha dee, nọ do ya arrọọ ọghẹe nọ gbae zọ ese ne ima, “ne ọmwaikọmwa nọ rhirhi ya [e Jesu] yi ghẹ wirua, sokpan nọ gha mwẹ” arrọọ ọghe etẹbitẹ. (Jọn 3:16) Rhunmwuda ne Jesu na wu, e Jehova gha rherhe do sọfurre ye ọlọghọmwa hia ne isọtẹ ọghe Adam si. Ọna rhie ma wẹẹ, ima ghaa rhie ẹre ma vbe emwi hia ne ima ru wẹẹ, ima mu ẹtin yan izọese adẹwerriegbe ọghe Jesu, ẹkpotọ ghi kie ne ima ya sọyẹnmwẹ arrọọ vbe etẹbitẹ vbe otagbọn na!​—Aizaia 65:21-23.

GUALỌ OTỌ RE SAYỌ

3. Uwu ọghe Jesu keghi fan ima hin ẹtin orukhọ kevbe uwu rre

E VIDIO: Vbọzẹe Ne Jesu Na Wu?​—Abọ 1 (2:01)

• De emwi nọ hin usi ne Adam mu fua vbe ọ sọtẹ daa Osanobua?

Tie Rom 5:12, iyeke ọni, uwa ghi ziro yan inọta na:

• De emwi ne orukhọ ọghe Adam he si yọ ruẹ egbe?

Tie Jọn 3:16, iyeke ọni, uwa ghi ziro yan inọta na:

• Vbọzẹ ne Jehova na gie Ovbi ẹre gha die agbọn na?

1. Adam kegha re ọmwa nọ gbae, sokpan ọ keghi sọtẹ daa Osanobua. Ọna ẹre ọ ghi si orukhọ kevbe uwu ye emwa nagbọn egbe

2. Jesu kegha re ọmwa nọ gbae nọ họn ẹmwẹ ne Osanobua, nọ ghi kie ẹkpotọ yọ, ne emwa nagbọn ya do gha re emwa ni gbae, ne iran vbe gha rrọọ vbe etẹbitẹ

4. Emwa hia gha sẹtin miẹn ere vbe uwu ọghe Jesu

E VIDIO: Vbọzẹe Ne Jesu Na Wu?​—Abọ 2 (2:00)

• De vbene uwu ọghe orhunmwu ọkpa, gha ya sẹtin miẹn emwa hia fan hẹ?

Tie 1 Timoti 2:5, 6, NW, iyeke ọni, uwa ghi ziro yan inọta na:

• Adam kegha re ọmwa nọ gbae, sokpan obọ re ẹre orukhọ kevbe uwu la la emwa nagbọn egbe. Ọmwa nọ gbae ẹre Jesu vbe gha khin. De odẹ ne Jesu ya kpemehe “adẹwerriegbe nọ guaero”?

5. Adẹwerriegbe keghi re ẹse ne Jehova ru nuẹn

Te avbe ọsie Jehova ghee adẹwerriegbe zẹvbe ẹse ne Jehova ru ne dọmwadẹ iran. Vbe igiemwi, tie Galatia 2:20, iyeke ọni, uwa ghi ziro yan inọta na:

• De vbene ukọ e Pọl ya rhie ẹre ma wẹẹ, irẹn ghee adẹwerriegbe zẹvbe ẹse ne Jehova ru ne irẹn?

Vbe Adam ru orukhọ, a keghi bu ohiẹn uwu gbe irẹn vbe ivbi ẹre hia. Sokpan e Jehova keghi gie Ovbi ẹre gha dee nọ do wu nuẹn, ne ẹkpotọ mieke na kie nuẹn ya gha mwẹ arrọọ ọghe etẹbitẹ.

Zẹvbe ne u ya tie avbe ako na, ya ekhọe zomwa rẹn, vbene ọ ghaa ye Jehova hẹ, vbe Ovbi ẹre rri oya. Tie Jọn 19:1-7, NW, Jọn 19:16-18, NW, iyeke ọni, uwa ghi ziro yan inọta na:

• Vbọ ye ruẹ hẹ vbe ekhọe ighẹ emwi ne Jehova kevbe Jesu ru nuẹn?

OLIKA ẸMWẸ

Uwu ọghe Jesu ẹre ọ zẹe ne Jehova na ya orukhọ bọ ima, ẹre ọ vbe kie ẹkpotọ yọ, ne ima ya gha rrọọ vbe etẹbitẹ.

Ogbewerriẹ

• Vbọzẹ ne Jesu na wu?

• De odẹ ne arrọọ ọghe Jesu nọ gbae, ya re adẹwerriegbe nọ gua arrọọ ọghe Adam ro?

• De odẹ ne u gha ya miẹn ere vbe uwu ọghe Jesu?

RUẸ SAYỌ

Ghee evbọ ya ima rẹn wẹẹ, te Jesu ya arrọọ ọghẹe nọ gbae dẹ ima werriegbe.

“De Vbene Uwu Ọghe Jesu Ya Dẹ Emwa Nibun Werriegbe Hẹ?” (Ọ rre intanẹt)

Ghee emwi nọ khẹke ne ima ru, ne ima mieke na miẹn fan.

“De Odẹ Ne Jesu Ya Miẹn Emwa Fan?” (Ọ rre intanẹt)

E Jehova gha sẹtin yabọ ọmwa nọ ru orukhọ nọ wegbe ra?

“Inọta Ne Baibol Zẹ Ewanniẹn Yi” (The Watchtower, May 1, 2013)

Ghee vbene izọese adẹwerriegbe ọghe Kristi, ya ru iyobọ ne okpia ọkpa ya fi uyinmwẹ ọnrẹn werriẹ.

“I I Ghi Mwẹ Obọ Vbe ­Uyinmwẹ Igbinna Oguo” (Ọ rre intanẹt)

1. De odẹ ọkpa ne ima khian ya rhie ẹre ma wẹẹ, ima gbọyẹmwẹ ye emwi ne Osanobua kevbe Kristi ru ne ima?

E Baibol khare wẹẹ, “ọmwaikọmwa nọ rhirhi ya [e Jesu] yi” ghi gha rrọọ vbe etẹbitẹ. (Jọn 3:16) Vbe ọna demu? Ọna gberra na wa ya e Jesu yi kẹkan. Te ima gha vbe rhie ẹre ma wẹẹ, ima mu ẹtin yan e Jesu vbe emwi hia ne ima ru vbe ẹdagbọn ima. (Jems 2:17) Ma ghaa rhie ẹre ma vbe ẹmwẹ ne ima ta kevbe emwi ne ima ru wẹẹ, ima gele mu ẹtin yan e Jesu, ma ghi do sikẹ irẹn vbe Erhae sayọ.​—Tie Jọn 14:21.