AZA EBE ỌGHE Watchtower NỌ RRE INTANẸT

“Ọ Na Gha Ya Ebe Nọhuanrẹn Gu Emwa Ni Rre Evba Zẹ Iro”

‘Gha Ta Ẹmwẹ Arriọba Osanobua Ma Emwa Ẹsẹsẹmwẹse’
- “Iran na we na viọ e Pọl vbe Sailas ladian ne iran.”—Iwinna 17:5
  
  ¹⁰ E Luk gi ima rẹn emwi nọ ghi sunu. Ọ na wẹẹ: “Sokpan, Ivbi e Ju na suẹn gha gbọvo iran, iran na ghi ya si ikpia dan eso koko; ikpia ne iran si koko na, keghi re emwa ni wa hẹ yo hẹ rre vbe adesẹ ẹki, iran i mwẹ emwi ne iran ru. Ikpia nii ghi si egbe koko nẹ, iran na suẹn gha gbe olighi vbe ẹvbo. Iran na mu igbinna gha rrie owa e Jesin, iran na we na viọ e Pọl vbe Sailas ladian ne iran. Ugbẹnvbe iran ma ghi miẹn iran, iran na si e Jesin kevbe etẹn eso bu iran ni khaevbisẹ vbe ẹvbo, iran na gha go wẹẹ: ‘Ikpia nii ni wa mu uhunmwu otagbọn hia rueghe wa rre ẹvbo ima na, e Jesin na vbe viọ iran la owa. Vbe uwu iran na hia, ọkpa nọ vbe ya ẹmwẹ e Siza ru emwi i rrọọ, iran wẹẹ ọba ọvbehe rrọọ, na tie ẹre Jesu.’” (Iwinna 17:5-7) Vbọ khian ghi sunu daa e Pọl kevbe emwa ne iran gba khian, ugbẹnvbe emwa ghi suẹn gha gbe olighi?
  
  11. De ifiẹzọ ne iran ba e Pọl re kevbe emwa ne iran gba kporhu? De uhi ne ima yayi wẹẹ iran ghaa hoo ne iran ya gbalọ iran? (Ya ghee futnot.)
  
  ¹¹ Ẹbu emwa ni gbe olighi gha si uhunmwu koko, emwi rhọkpa ne iran ru i biẹ ọmọ esi. Ohu nọ mu iran i re nekherhe, te ọ yevbe ogbigbi amẹ nọ vba yo vba rre. Emwa vberriọ ẹre Ivbi e Ju si koko ne iran miehe na suẹn gha gbe olighi, ne Pọl vbe Sailas miehe na kpa hin ẹvbo iran rre. Ivbi e Ju ghi si “olighi” ye ẹvbo nẹ, iran na ghi bu iran ni khaevbisẹ vbe ẹvbo, iran na ya mu ẹzọ nọkhua kuan e Pọl kevbe emwa ne iran gba khian. Ifiẹzọ nokaro ne iran ba iran re ọre wẹẹ, te iran “mu uhunmwu otagbọn hia rueghe,” agharhemiẹn wẹẹ, e Pọl kevbe emwa ne iran gba khian ma gha mwẹ obọ vbe olighi nọ ghaa rre Tẹsalonaika! Ifiẹzọ nogieva ne iran ba iran re ẹre ọ ghi khọọ sẹ. Ivbi e Ju na kegha kha wẹẹ, e Pọl kevbe emwa ne iran gba kporhu yae wewe khian wẹẹ, Ọba ọvbehe rrọọ na tie ẹre Jesu, ọna rhie ma wẹẹ, te iran sọtẹ daa ọba nọ khaevbisẹ yan otọ arriọba e Rom hia.a
  
  12. Vbọ rhie ẹre ma wẹẹ, ifiẹzọ na ba etẹn ni ghaa rre Tẹsalonaika re gha te sẹtin si iran fi ẹti?
  
  ¹² Yerre wẹẹ, avbe ọkaolotu ugamwẹ vbe ba e Jesu egbe ifiẹzọ vbenian. Iran keghi tama e Pailet wẹẹ: “Ma mu okpia na, vbe ọ ruẹn ẹmwẹ ye emwa ima ẹko, ne iran sọtẹ daa arriọba . . . Ọ wẹẹ irẹn, ẹre ọ vbe re Kristi ne ọba.” (Luk 23:2) Ọ gha kẹ, te Pailet ghaa mu ohan wẹẹ, ọba nọ khaevbisẹ yan otọ arriọba e Rom hia sẹtin do kha wẹẹ, irẹn gbe gue ne ọmwa nọ sọtẹ daa arriọba, ọni ẹre ọ si ẹre nọ na ghi bu ohiẹn uwu gbe Jesu. Egbe ohoghe vbenian ne iran mu ba Ivbi Otu e Kristi ni ghaa rre Tẹsalonaika gha te vbe sẹtin si iran fi ẹti nọkhua. Ebe ọkpa nọ rhan otọ emwi eso nọ rre ebe Iwinna khare wẹẹ: “Ẹzọ nọ wegbe ẹre iran mu kuan iran na rhunmwuda, ‘a gha zẹdẹ kha nẹ wẹẹ, ọ khọ wẹẹ ọmwa sọtẹ daa ọba nọ khaevbisẹ yan otọ arriọba e Rom hia, uhunmwu ẹre ọmwa nii ya tae, ọ gha khọnrẹn wẹẹ, a ma he wa muẹn vbe ọ yin uyinmwẹ vberriọ.’” Emwamwa dan ne Ivbi e Ju mwamwaẹn na gha mwẹ uhunmwu ra?

“Ọ Na Gha Ya Ebe Nọhuanrẹn Gu Emwa Ni Rre Evba Zẹ Iro”

‘Gha Ta Ẹmwẹ Arriọba Osanobua Ma Emwa Ẹsẹsẹmwẹse’
- a Okpia ọkpa nọ rri egie ebe khare wẹẹ, vbe ẹghẹ nii, e Siza keghi yi uhi yọ wẹẹ, awua nọ deghẹ ọmwa rhọkpa na kha wẹẹ “ọba ọgbọn dee, ra a gha mu arriọba ọgbọn gbọọ, katekate deghẹ ọmwa nii na gha kha wẹẹ, te ọba ọgbọn nii khian rhie ihe ọba nọ khaevbisẹ yan arriọba e Rom hia, ra te ọ khian do bu ohiẹn ọnrẹn.” A sẹtin miẹn wẹẹ, te emwa ni ghaa gbe Pọl odan ghaa kha wẹẹ, e Pọl rra uhi na, rhunmwuda ikporhu nọ ghaa kpee. Ya ghee ẹkpẹti nọ khare wẹẹ, “Avbe Siza Na Ya Unu Kaẹn Vbe Ebe Iwinna.”