• “Ghẹ Gi Ohan Mu Ruẹ!”
    ‘Gha Ta Ẹmwẹ Arriọba Osanobua Ma Emwa Ẹsẹsẹmwẹse’

    • 10. De avbe ifiẹzọ ni wegbe na ba e Pọl re?

      10 Vbe Pọl ghi sẹ e Sẹseria, iran keghi rhie ẹre “gha rrie ẹguae Hẹrọd, ne ivbiyokuo gha ghee ẹre,” vbene iran ni ba ẹre ifiẹzọ te ke Jerusalẹm rre. (Iwinna 23:35) Ọ ghi rre ikpẹdẹ isẹn, Ananaias ne Ogie Ohẹn, ọmunu ọkpa na tie ẹre Tẹtọlọs kevbe ediọn eso keghi rre. E Tẹtọlọs na ka wa tian e Fẹlis ye emwi nọ ru ne Ivbi e Ju; ọ vẹ na rẹn wẹẹ, te ọ ba gha tian e Fẹlis, nọ mieke na gha ya aro nọ maan ghee ẹre.b Iyeke ọni, e Tẹtọlọs na suẹn gha guan yan ẹzọ nọ rre otọ; vbe ọ ghi guan kaẹn Pọl, ọ na wẹẹ: “Okpia na i gi egbe rọkhọ ima vbe ẹvbo; ehe nọ rhirhi la vbe otagbọn na hia, ọ ghi gha bọ ọkhọ ye Ivbi e Ju hia ẹko, ne iran sọtẹ daa arriọba. Irẹn ẹre ọ vbe re ọkaolotu ọghe otu Ivbi e Nazarẹt. Te ọ te vbe gha hoo nọ mu awua la ọgua Osa, ẹre ima na muẹn.” Ivbi e Ju nikẹre “na vbe rhie unu ba ẹre, iran na gha kha wẹẹ, ẹmwata ẹre ẹmwẹ na hia khin.” (Iwinna 24:​5, 6, 9) Iran we te Pọl bọ ọkhọ ye emwa ẹko, ne iran sọtẹ daa arriọba, iran na vbe wẹẹ, ọkaolotu ọghe otu dan kevbe ọmwa nọ mu awua la ọgua Osa ẹre Pọl khin. A gha sẹtin bu ohiẹn uwu gbe Pọl rhunmwuda avbe ifiẹzọ na ba ẹre na.

  • “Ghẹ Gi Ohan Mu Ruẹ!”
    ‘Gha Ta Ẹmwẹ Arriọba Osanobua Ma Emwa Ẹsẹsẹmwẹse’

    • b E Tẹtọlọs keghi kpọnmwẹ e Fẹlis, ọ na tama rẹn wẹẹ, “te egbe ghi wa rọkhọ” iran vbe ẹvbo. Sokpan, ẹmwata nọ rrọọ ọre wẹẹ, ọfunmwegbe ma mobọ gha rre Judia vbe ẹghẹ ne Fẹlis ya gha khaevbisẹ zẹvbe gọvinọ, uhiẹn, ẹghẹ nọ ya gha khaevbisẹ ẹre ọ ghi khọọ sẹ ọghe avbe gọvinọ nikẹre ni khaevbisẹ a te miẹn wẹẹ, Ivbi e Ju sọtẹ daa arriọba e Rom. Deba ọni, ohoghe ẹre Tẹtọlọs tae, nọ na wẹẹ, “ẹko emwi ne u ru wa vuọn ima,” rhunmwuda, ẹmwata nọ rrọọ ọre wẹẹ, Ivbi e Ju ma gha ghọghọ ye afiwerriẹ ne Fẹlis ru vbe ẹvbo. Sokpan, te Ivbi e Ju nibun sẹ wa gha khẹko e Fẹlis rhunmwuda nọ na gha ya agbọn lọghọ iran kevbe nọ na gha ya obọ atosi mu emwa ni ghaa sọtẹ daa arriọba.​—Iwinna 24:​2, 3.