-
Vbọ Re Arriọba Osanobua?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
7. Uhi Arriọba Osanobua maan sẹ ọghe arriọba emwa nagbọn
Arriọba keghi yi uhi ne emwa ne iran kha yan. Te iran yi avbe uhi na, ne emwa gha miẹn ere vbọ, nọ vbe gha gbogba ga iran. Arriọba Osanobua vbe mwẹ uhi nọ khẹke ne emwa hia ni rre ototọ re gha lele. Tie 1 Kọrinti 6:9-11, iyeke ọni, uwa ghi ziro yan avbe inọta na:
Vbe uwẹ a yayi wẹẹ agbọn na khian gha ye hẹ, deghẹ emwa hia na gha lele uhi ọghe Osanobua?a
Uwẹ yayi wẹẹ ọ khẹke ne Jehova yi avbe uhi vbenian ne emwa ni rre ototọ Arriọba ọghẹe ra? Vbua gu kha vberriọ?
Vbe ima ya rẹn hẹ wẹẹ, emwa nẹi ka lele avbe uhi na, gha sẹtin fi werriẹ?—Ghee uviẹn 11.
Arriọba keghi yi uhi ne emwa ne iran kha yan. Te iran yi avbe uhi na, ne emwa gha miẹn ere vbọ, nọ vbe gha gbogba ga iran. Sokpan uhi ọghe Arriọba Osanobua ẹre ọ maan sẹ, emwa ne Arriọba na kha yan wa miẹn ere vbọ, erriọ vbe ya gbogba ga iran
-
-
De Emwi Ne Baibol Khare Vbekpa Emwi Ọdọ Vbe Amwẹ?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 41
De Emwi Ne Baibol Khare Vbekpa Emwi Ọdọ Vbe Amwẹ?
Emwa nibun i mobọ hoo ne iran gha guan kaẹn emwi ọdọ vbe amwẹ. Vbọrhirhighayehẹ, e Baibol gha guan kaẹn rẹn, emwa hia ghi wa rẹn eke ne ẹmwẹ rrie, sokpan ọ ghi tae vbe odẹ ọghe ọghọ vbe ute. Ma wa miẹn ere vbe emwi ne Baibol tae vbekpa emwi ọdọ vbe amwẹ. Erriọ ẹre ọ khẹke nọ gha ye rhunmwuda, e Jehova ẹre ọ yi ima, irẹn ẹre ọ rẹn emwi nọ maan ne ima sẹ. Irẹn ẹre ọ tama ima, emwi ne ima gha ru nọ gha ya ẹko rhiẹnrhiẹn ọnrẹn kevbe emwi nọ gha ru iyobọ ne ima ya gha sọyẹnmwẹ arrọọ vbe etẹbitẹ.
1. De aro ne Jehova ya ghee emwi ọdọ vbe amwẹ?
Emwi ọdọ vbe amwẹ keghi re ẹse ọhẹ nọ ke obọ e Jehova rre. Te ọ hoo ne okpia vbe okhuo ni ru orọnmwẹ nẹ, yae gha sọyẹnmwẹ egbe. Ẹse ọhẹ na, ẹre ọ zẹe ighẹ ọdọ vbe amwẹ sẹtin biẹ, gberra ọni, ọ vbe kie ẹkpotọ yọ ne iran ya gha rhie ẹre ma vbe odẹ ọghe abiọmwabiẹ wẹẹ, iran gele hoẹmwẹ egbe. Ọna ẹre ọ zẹe ne Ẹmwẹ Osanobua na kha wẹẹ: “Gi uvbi ne u rhie re, gha ya ekhọe ruẹ rhiẹnrhiẹn.” (Itan 5:18, 19) E Jehova hoo ne eguọmwadia re ni ru orọnmwẹ nẹ gha mwẹ ẹkoata daa ogieva iran, ọna gha ru iyobọ ne iran, ne iran ghẹ fi owẹ ye oha.—Tie Hibru 13:4.
2. Vbọ re uyinmwẹ alama oghẹ?
E Baibol tama ima wẹẹ, nọ ne “iran ni ghẹẹ, . . . ne Arriọba Osanobua gha sẹ ọre obọ, ẹi rrọọ.” (1 Kọrinti 6:9, 10) Emwa ni ya urhuẹvbo e Grik gbẹn e Baibol, keghi loo ẹmwẹ na ighẹ por·neiʹa ya gie alama oghẹ. Emwi ne ẹmwẹ na demu ọre (1) ne emwa ni ma he ru orọnmwẹ na ru emwi ọdọ vbe amwẹ,a (2) ne ikpia ikpia kevbe ikhuo ikhuo na lovbiẹ ke egbe, kevbe (3) ne emwa na gu aranmwẹ ru emwi ọdọ vbe amwẹ. Ma ghaa re emwa “ne ẹi mwẹ obọ vbe emwi alama oghẹ hiehie,” te ima ya ẹko rhiẹnrhiẹn e Jehova, ma tobọ ima wa vbe miẹn ere vbọ.—1 Tẹsalonaika 4:3.
GUALỌ OTỌ RE SAYỌ
Gia ziro yan vbene u gha ya sẹtin lẹẹ ne uyinmwẹ alama oghẹ hẹ kevbe ere ne u gha miẹn deghẹ u na ru vberriọ.
3. Lẹẹ ne uyinmwẹ alama oghẹ
E Josẹf keghi lẹẹ ne okhuo ọkpa nọ te gha hoo nọ gu ẹre ru oghẹ. Tie Gẹnẹsis 39:1-12, iyeke ọni, uwa ghi ziro yan avbe inọta na:
Vbọ ya e Josẹf lẹẹ?—Ghee uviẹn 9.
Uwẹ yayi wẹẹ emwi nọ khẹke, ẹre Josẹf ru ra? Vbua gu kha vberriọ?
De vbene avbe igbama vbe ẹdẹnẹrẹ gha ya sẹtin ya egbe taa e Josẹf hẹ, vbe odẹ nọ ya lẹẹ ne uyinmwẹ alama oghẹ? Kpee VIDIO na.
E Jehova hoo ne ima hia fẹẹrẹ lẹẹ ne uyinmwẹ alama oghẹ. Tie 1 Kọrinti 6:18, iyeke ọni, uwa ghi ziro yan avbe inọta na:
De emwi eso nọ gha sẹtin si ọmwa fi uyinmwẹ alama oghẹ?
De vbene uwẹ khian ya sẹtin lẹẹ ne uyinmwẹ alama oghẹ hẹ?
4. U gha sẹtin mudia gbain vbe u gha werriẹ aro daa edanmwẹ
De emwi nọ gha yae lọghọ, ne ọmwa sẹtin mudia gbain vbe ọ gha werriẹ aro daa edanmwẹ ọghe uyinmwẹ alama oghẹ? Kpee VIDIO na, iyeke ọni, uwa ghi ziro yan inọta nọ lelẹe.
Vbe vidio na, de emwi ne ọtẹn nokpia na ghi ru, vbe ọ bẹghe ẹre wẹẹ, emwi ne irẹn mu roro kevbe uyinmwẹ ọghe irẹn gha sẹtin ya irẹn fi owẹ ye oha?
Ugbẹnso, iziro dan vbe zẹdia la ekhọe ọghe Ivbiotu e Kristi ni deziẹn vbe ugamwẹ e Jehova. Vbọ khian ru iyobọ nuẹn ne iziro ọghe uyinmwẹ esakan ghẹ do gbọzinian vbe ekhọe ruẹ? Tie Filipai 4:8, iyeke ọni, uwa ghi ziro yan avbe inọta na:
De emwi eso nọ khẹke ne ima gha mu roro?
Ma ghaa tie Baibol, ma na vbe rhiegba ye iwinna ugamwẹ ọghe Jehova, vbọ khian ya ru iyobọ ne ima hẹ, ne ima ghẹ de ye edanmwẹ ọghe orukhọ?
5. Ma keghi miẹn ere vbe ilele ọghe Jehova
E Jehova ẹre ọ rẹn emwi nọ gele maan ne ima. Ọ keghi tama ima odẹ ne ima gha ya sẹtin lẹẹ ne uyinmwẹ alama oghẹ kevbe ere ne ima gha miẹn vbe ima gha ru vberriọ. Tie Itan 7:7-27 ra kpee VIDIO na, iyeke ọni, uwa ghi ziro yan inọta ni lelẹe.
De vbene igbama na, ya ya owẹ ọre khian fi ẹbe hẹ?—Ghee Itan 7:8, 9.
Zẹvbe nọ rre Itan 7:23, 26, uyinmwẹ alama oghẹ keghi zẹ ẹbe. Ma ghaa lẹẹ ne uyinmwẹ alama oghẹ, de ọlọghọmwa ne ima i khian werriẹ aro daa?
Deghẹ ima i mwẹ obọ vbe uyinmwẹ alama oghẹ, de vbene ọ khian ya ru iyobọ ne ima hẹ, ya sọyẹnmwẹ arrọọ vbe etẹbitẹ?
Emwa eso keghi roro ẹre wẹẹ, deghẹ Osanobua gele mwẹ ahoẹmwọmwa, ẹi ghẹ mu awua ye uyinmwẹ ne ikpia ikpia, ra ikhuo ikhuo na lovbiẹ ke egbe. Sokpan, e Jehova nọ re Osa ọghe ahoẹmwọmwa, hoo ne emwa hia gha sọyẹnmwẹ arrọọ vbe etẹbitẹ. Ne ima mieke na gha rrọọ vbe etẹbitẹ, te ima gha lele ilele ọghẹe. Tie 1 Kọrinti 6:9-11, iyeke ọni, uwa ghi ziro yan inọta na:
Uyinmwẹ ne ikpia ikpia ra ikhuo ikhuo na lovbiẹ ke egbe keghi sọnnọ Osanobua. Sokpan ọna ọkpa ọre uyinmwẹ nọ sọnnọ ọnrẹn ra?
Ne ima mieke na sẹtin ya ẹko rhiẹnrhiẹn Osanobua, ọ khẹke ne ima hia ru afiwerriẹ. Ọna i khuẹrhẹ. Sokpan ere rrọọ ra? Tie Psalm 19:8, 11, iyeke ọni, uwa ghi ziro yan avbe inọta na:
Uwẹ yayi wẹẹ, ilele ọghe Jehova nọ dekaẹn alama oghẹ lọghọ na lele ra? Vbua gu kha vberriọ?
E Jehova ru iyobọ ne emwa nibun nẹ ya do gha lele ilele ọghẹe. Ọ gha vbe sẹtin ru iyobọ nuẹn
EMWA ESO KEGHI KHA WẸẸ: “Orhunmwu eva gha hoẹmwẹ egbe, ọ ma de emwi nọ rhiae deghẹ iran na ru emwi ọdọ vbe amwẹ.”
Vbua khian tama ọmwa vberriọ?
OLIKA ẸMWẸ
Emwi ọdọ vbe amwẹ keghi re ẹse ọhẹ nọ ke obọ e Jehova rre, ne ọdọ vbe amwẹ ya sọyẹnmwẹ egbe.
Ogbewerriẹ
De emwi ne uyinmwẹ alama oghẹ demu?
Vbọ khian ru iyobọ ne ima ya lẹẹ ne uyinmwẹ alama oghẹ?
De ere ne ima miẹn vbọ, vbe ima ghaa lele ilele ọghe Jehova nọ dekaẹn uyinmwẹ alama oghẹ?
RUẸ SAYỌ
Ghee evbọzẹe ne Osanobua na wẹẹ, ọ khẹke ne okpia vbe okhuo ru orọnmwẹ nẹ, iran ke gha rrọọ zẹvbe ọdọ vbe amwẹ.
Ghee evbọzẹe ne ima na rẹn wẹẹ, agharhemiẹn wẹẹ, e Baibol gbodan ye uyinmwẹ ikpia ikpia kevbe ikhuo ikhuo ni lovbiẹ ke egbe, ọ ma wẹẹ ne ima gha ya aro dan ghee emwa ni yin uyinmwẹ na.
“Ọ Khẹke Ne Ikpia Ikpia Ra Ikhuo Ikhuo Gha Lovbiẹ Ke Egbe Ra?” (Ọ rre intanẹt)
Ghee vbene uhi ọghe Osanobua nọ dekaẹn emwi ọdọ vbe amwẹ ya gbogba ga ima hẹ.
“Oghẹ Vbe Nọ Ra, Deghẹ Emwa Na Ya Unu Ru Emwi Ọdọ Vbe Amwẹ Ra?” (Ọ rre intanẹt)
Vbe okha nọ mwẹ uhunmwuta na, “Iran Keghi Mu Uyi Yọ Mwẹ Egbe,” u gha miẹn emwi nọ ya okpia ọkpa, nọ te gha lovbiẹ ke ikpia ọvbehe, fi werriẹ do gha ru emwi nọ ya ẹko rhiẹnrhiẹn e Jehova.
a Odẹ ughughan ẹre emwa ya yin uyinmwẹ esakan na. Usun ẹnrẹn ọre, ne ikpia vbe ikhuo ni ma ru orọnmwẹ na ru emwi ọdọ vbe amwẹ, ne emwa na loo unu vbe onisan ya ru emwi ọdọ vbe amwẹ, kevbe ne emwa na ya obọ rrarra ẹgẹn ọghe ọmwa nẹi re ọdafẹn iran ra ọvbokhan iran.
-
-
U Gha Ru Orukhọ Nọ Wegbe Ghi Vbo?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
Agharhemiẹn wẹẹ u ya ekhọe hia hoẹmwẹ e Jehova kevbe wẹẹ, u hia ne u ghẹ ru emwi nọ gha sọnnọ ọnrẹn, u gha ye zẹdia ru abakuru. Vbọrhirhighayehẹ, orukhọ eso wegbe sẹ eso. (1 Kọrinti 6:9, 10) Deghẹ u na ru orukhọ nọ wegbe, ghẹ mianmian wẹẹ e Jehova ye hoẹmwẹ ruẹ; ọ mu egbe nọ ya yabọ ruẹ, ọ gha vbe ru iyobọ nuẹn.
1. Vbọ khẹke ne ima ru ne Jehova mieke na yabọ ima?
Emwa ni hoẹmwẹ e Jehova gha ru orukhọ nọ wegbe, ọ keghi da iran sẹ ugboloko, vbe aro gha gbannọ iran nẹ. Vbọrhirhighayehẹ, eyan ne Jehova yan rẹn keghi rhie ifuẹko ne iran. Ọ khare wẹẹ: “Orukhọ ruẹ gha ya [ruẹ] gbiruẹn sẹrriọ wẹẹ te u ghi baa, . . . I gha khuọ ruẹ ne u gha fua vbe isonorhọ.” (Aizaia 1:18) Deghẹ ima na ya ekhọe hia ro iro fi uyinmwẹ werriẹ, e Jehova gha ya ekhọe hia yabọ ima. Sokpan, de vbene a ya ro iro fi uyinmwẹ werriẹ hẹ? Ma ghi gbe I ma rẹn ye orukhọ ne ima ru sẹrriọ wẹẹ, ma ghi dobọ emwi dan na ru yi, ma ghi vbe rinmwian e Jehova nọ yabọ ima. Iyeke ọni, ma ghi hia ne ima gbe ukhu ẹre rua ighẹ iziro dan, ra uyinmwẹ nọ gua ima obọ ro, nọ ya ima ru orukhọ nii, ma ghi vbe hia ne ima gha ya ilele nọhuanrẹn ọghe Jehova ru emwi.—Tie Aizaia 55:6, 7.
2. De vbene Jehova ya loo ediọn ya ru iyobọ ne ima hẹ vbe ima gha ru orukhọ?
E Jehova wẹẹ ne ima “tie eniwanrẹn iko” vbe ima gha ru orukhọ nọ wegbe. (Tie Jems 5:14, 15.) Ikpia na zẹ ye ukpo na, keghi hoẹmwẹ e Jehova kevbe ohuan ọghẹe. Iran gbegba ni gha ru iyobọ ne ima ya werriegbe do gha re ọsie Jehova.—Galatia 6:1.
De vbene ediọn ya ru iyobọ ne ima hẹ vbe ima gha ru orukhọ nọ wegbe? Ediọn eva ra eha ghi ya e Baibol rhie adia nọ khẹke ne ima. Iran ghi vbe gi ima rẹn emwi eso ne ima gha ru, ne ima ghẹ mieke na werriegbe ru orukhọ nọ wegbe. Ọmwa gha ru orukhọ nọ wegbe, ọ ma na vbe ro iro fi uyinmwẹ werriẹ, ediọn ghi rhie ẹre hin uwu iko rre, nẹ ghẹ mieke na mu iko rhia.
GUALỌ OTỌ RE SAYỌ
Gia ziro yan rẹn sayọ, odẹ ne Jehova ya ru iyobọ ne ima vbe ima gha ru orukhọ nọ wegbe, kevbe vbene u gha ya sẹtin gbọyẹmwẹ yọ hẹ.
3. Ma gha miẹn orukhọ ọghe ima kue, ma gha sẹtin werriegbe do gha re ọsie Jehova
Ma gha ru orukhọ, ọ wa da e Jehova, ọni ẹre ọ si ẹre nọ na khẹke ne ima miẹn orukhọ ọghe ima kue ma rẹn. Tie Psalm 32:1-5, iyeke ọni, uwa ghi ziro yan inọta na:
Vbọzẹ nọ na khẹke ne ima miẹn orukhọ ọghe ima kue ma e Jehova, ne ima gha te ya gha gbe gue ẹre?
Ma gha miẹn orukhọ ọghe ima kue ma e Jehova nẹ, ma na vbe bu ediọn ne iran ru iyobọ ne ima, orhiọn ima ghi sotọ. Kpee VIDIO na, iyeke ọni, uwa ghi ziro yan inọta nọ lelẹe.
Vbe vidio na, de vbene ediọn ya ru iyobọ ne Canon hẹ, nọ mieke na werriegbe bu e Jehova gha dee?
Ọ khẹke ne ima gha ta ẹmwata ma ediọn rhunmwuda, iran mu egbe ne iran ya ru iyobọ ne ima. Tie Jems 5:16, iyeke ọni, uwa ghi ziro yan inọta na:
Vbọzẹ ne a na miẹn wẹẹ, ma gha ta ẹmwata ma ediọn, ẹre ọ na khuẹrhẹ ne iran sẹ, ya ru iyobọ ne ima?
Miẹn orukhọ ruẹ kue, ta ẹmwata ma ediọn, u ghi vbe miẹn iyobọ ọghe Jehova yi
4. E Jehova keghi tohan emwa ni ru orukhọ
Deghẹ ọmwa nọ ru orukhọ nọ wegbe ma mu egbe nọ ya fi werriẹ, nọ gha lele ilele ọghe Jehova, a ghi rhie ẹre hin uwu iko rre, rhunmwuda ọni, ai ghi gu ẹre mu obọ. Tie 1 Kọrint 5:6, 11, iyeke ọni, uwa ghi ziro yan inọta na:
Zẹvbe ne eyist fi ebrẹd werriẹ, ọmwa orukhọ nọ ma fi werriẹ gha vbe sẹtin mu iko rhia vbe a ghaa gu ẹre mu obọ. Odẹ vbo?
E Jehova keghi tohan emwa ni ru orukhọ. Rhunmwuda ne ediọn na ya egbe taa ẹre, iran keghi hia ne iran gha ru iyobọ ne emwa ni ru orukhọ na rhie hin uwu iko rre. Iran nibun werriegbe rre nẹ rhunmwuda ne iran na ghi do rẹn wẹẹ emwi ne iran ru ma gba, agharhemiẹn wẹẹ, ọ da iran vbe ẹghẹ na ya rhie iran hin uwu iko rre.—Psalm 141:5.
De vbene obọ ne Jehova ya mu emwa orukhọ ya rhie ẹre ma wẹẹ, Osa nọ mwẹ amuroro, itohan kevbe ahoẹmwọmwa nọ?
5. E Jehova keghi yabọ ima vbe ima gha ro iro fi uyinmwẹ werriẹ
Jesu keghi zẹ erre ọkpa, nọ ya ru iyobọ ne ima ya rẹn vbene ọ ye hẹ vbe ekhọe Jehova, vbe ọmwa gha ro iro fi uyinmwẹ werriẹ. Tie Luk 15:1-7, iyeke ọni, uwa ghi ziro yan inọta na:
Vbe ọna maa ruẹ re vbekpa e Jehova?
Tie Ẹzikiẹl 33:11, iyeke ọni, uwa ghi ziro yan inọta na:
De emwi kpataki nọ khẹke ne ima ru, ne ima ya rhie ẹre ma wẹẹ ima gele gbe I ma rẹn ye emwi ne ima ru?
Vbene ọsuohuan gbaroghe ohuan ọghẹe, erriọ ẹre Jehova vbe ya ya obọ esi mu eguọmwadia re
EMWA ESO KEGHI KHA WẸẸ: “Ohan i gu mwẹ ya tama ediọn wẹẹ, I ru orukhọ rhunmwuda, iran gha rhie mwẹ hin uwu iko rre.”
Vbua khian tama ọmwa nọ mwẹ iziro vbenian?
OLIKA ẸMWẸ
Ma gha ru orukhọ nọ wegbe, ma na gele gbe I ma rẹn ye emwi ne ima ru nii, ma na vbe ta mu olọ yan rẹn wẹẹ, ima i khian werriegbe ru emwi dan, e Jehova gha yabọ ima.
Ogbewerriẹ
Vbọzẹ nọ na khẹke ne ima miẹn orukhọ ọghe ima kue ma e Jehova?
Vbọ khẹke ne ima ru ne Jehova mieke na yabọ ima?
Ma gha ru orukhọ nọ wegbe, vbọzẹ nọ na khẹke ne ima ya gualọ iyobọ vbe obọ ediọn?
RUẸ SAYỌ
Ghee vbene Jehova ya mwẹ itohan daa okpia ọkpa hẹ, zẹvbe na gie ẹre vbe ebe Aizaia 1:18.
De vbene ediọn ya hia ne iran ru iyobọ ne emwa ni ru orukhọ nọ wegbe?
Tie vbekpa vbene a ya mwẹ ahoẹmwọmwa kevbe itohan daa emwa ni ru orukhọ ni ma fi uyinmwẹ werriẹ.
“Vbene Ediọn Khian Ya Sẹtin Ru Iyobọ Ne Emwa Na Rhie Hin Uwu Iko Rre” (Owa Ọkhẹ, August 2024)
Vbe okha nọ mwẹ uhunmwuta na, “Te Ọ Khẹke Ne I Werriegbe Bu E Jehova Gha Dee,” u gha miẹn emwi nọ ya okpia ọkpa nọ te de fua vbe odẹ ọghe ẹmwata kha wẹẹ, e Jehova ẹre ọ werriegbe si irẹn kẹ egbe.
-