Vbe uhunmwu otagbọn hia, iziro ughughan ẹre emwa mwẹ, vbe nọ dekaẹn ayọn na da. Ugbẹnso, emwa eso keghi da ayọn, vbe iran ghaa gu avbe ọse sọyẹnmwẹ egbe. Eso i zẹdẹ da hiehie, vbene eso na da gbe egbe. De emwi ne Baibol khare vbekpa ayọn na da?

1. Emwi awua ẹre ayọn na da khin ra?

E Baibol ma mu awua ye ayọn na da. Ọ kue kha wẹẹ, ọkpa vbe usun ẹse ọhẹ nọ ke obọ Osanobua rre ẹre nọ. Ọni ẹre ọ zẹe ne Baibol na wẹẹ, ‘te ayọn ya ẹko rhiẹnrhiẹn ọmwa.’ (Psalm 104:14, 15) Ikpia vbe ikhuo eso ni ya ẹkoata ga e Jehova, ne Baibol guan kaẹn, vbe gha da ayọn.​—1 Timoti 5:23.

2. De ibude ne Baibol rhie ne emwa ni da ayọn?

E Jehova gbodan ye ayọn nọ bun gbe na da kevbe na da gbe egbe. (Galatia 5:21) Ẹmwẹ ọnrẹn khare wẹẹ: “Ghẹ gu iran ni da ayọn gbe mu obọ.” (Itan 23:20) Nọnaghiyerriọ, deghẹ ima da ayọn, ọ gha khọnrẹn nọ gha re vbe ehe ne ọmwa rhọkpa i ye, ọ ma khẹke ne ima dae sẹrriọ wẹẹ, te ayọn ghi gbe ima, ma i ghi sẹtin roro emwi ẹse, ẹmwẹ ne ima ta i ghi gba vbe unu, ra te ọ ghi si emianmwẹ ye ima egbe. Deghẹ ima i sẹtin da ayọn ye oreghe, ọ khẹke ne ima wa dobọ ayọn na da yi.

3. De aro nọ khẹke ne ima ya gha ghee azẹ ne emwa ọvbehe ru nọ dekaẹn ayọn na da?

Dọmwadẹ ọghẹe ẹre ọ khian zẹ ne egbe ẹre, deghẹ irẹn gha da ayọn, ra irẹn i da. Ọ ma khẹke ne ima gha ya aro dan ghee ọmwa nọ da ayọn ye oreghe. Ọmwa gha vbe wẹẹ irẹn i da ayọn, ọ ma khẹke ne ima gha kpikpi ẹre nọ da. (Rom 14:10) Ọ ma vbe khẹke ne ima da ayọn deghẹ ọ gha rhua emwa ọvbehe owẹ. (Tie Rom 14:21.) “Ọ ma kei ne ọmwa wa gha rẹn ọghe enegbe ẹre ọkpa, ọ kere nọ vbe gha rẹn ọghe emwa ọvbehe.”​—Tie 1 Kọrinti 10:23, 24.

GUALỌ OTỌ RE SAYỌ

4. Uwẹ ẹre ọ khian zẹ ne egbuẹ deghẹ u gha da ayọn

De aro ne Jesu ya gha ghee ayọn na da? Na ya rhie ewanniẹn ye inọta na, gia ziro yan emwi ọyunnuan nokaro ne Jesu ru. Tie Jọn 2:1-11, iyeke ọni, uwa ghi ziro yan avbe inọta na:

• De emwi ne emwi ọyunnuan na, maa ima re vbekpa aro ne Jesu ya ghee ayọn kevbe emwa ni da ayọn?

• Ne Jesu ma na gbodan ye ayọn na da, de aro nọ khẹke ne Ovbiotu e Kristi ya gha ghee emwa ni da ayọn?

Vbọrhirhighayehẹ, ne Ovbiotu e Kristi na mwẹ asẹ nọ khian ya gha da ayọn, ma rhie ma wẹẹ, ọ khẹke nọ gha da ayọn vbe ẹghẹ hia. Tie Itan 22:3, iyeke ọni, uwa ghi ziro yan rẹn deghẹ ọ khẹke ne u da ayọn vbe:

• U gha khian fi imọto ra u gha khian loo e masini ya winna.

• U ghaa hanmwa.

• Ọbo ebo gha wẹẹ ne u ghẹ gha da ayọn.

• Ọ ghaa lọghọ ruẹ ne u gha da ayọn ye oreghe.

• Uhi arriọba gha wẹẹ ne u ghẹ da ayọn.

• Sirra ọmwa nẹi ghi da ayọn, rhunmwuda nọ na ka gha da ayọn gbe egbe vbe ẹghẹ nọ gberra.

Ọ khẹke ne u ya ayọn nọ gbe ọmwa mu ọghọ ye emwa egbe vbe ugie orọnmwẹ ruẹ ra, ra vbe u gha tie emwa ne iran do sọyẹnmwẹ egbe ra? Ne u mieke na rẹn emwi ne u gha ru, kpee VIDIO na.

E VIDIO: Ọ Khẹke Ne I Ya Ayọn Nọ Gbe Ọmwa Mu Ọghọ Ye Emwa Egbe Ra? (2:41)

Tie Rom 13:13 kevbe 1 Kọrinti 10:31, 32, NW. Uwa gha tie dọmwadẹ ako na nẹ, uwa ghi ziro yan inọta na:

• U gha lele ilele nọ rre ako na, de vbene ọ gha ya ru iyobọ nuẹn hẹ ya ru azẹ nọ gha ya ẹko rhiẹnrhiẹn e Jehova?

5. Uwẹ ẹre ọ khian zẹ ne egbuẹ, vbene u gha da ayọn sẹ hẹ

Deghẹ u da ayọn, evbọ khẹke ne u kọ ye orhiọn na khin: Agharhemiẹn wẹẹ e Jehova ma mu awua ye ayọn na da, ọ sọnnọ ọnrẹn deghẹ a na gha da ayọn nọ bun gbe. Vbọzẹ? Tie Hozia 4:11, 18, iyeke ọni, uwa ghi ziro yan inọta na:

• De emwi nọ gha sẹtin sunu deghẹ ọmwa na gha da ayọn nọ bun gbe?

De emwi nọ gha ru iyobọ ne ima ya gha da ayọn ye oreghe? Ọ khẹke ne ima rẹn vbene ima gha dae sẹ hẹ, nẹ ghẹ do gha gbe ima. Tie Itan 11:2, iyeke ọni, uwa ghi ziro yan inọta na:

• Vbọzẹ nọ na khẹke ne u zẹ ne egbuẹ, vbene u gha da ayọn sẹ hẹ?

6. Hia ne u ban ayọn na da gbe egbe

E VIDIO: ‘Egbe Agbọn Ne I Ghaa Ye Na Wa Wọọ Mwẹ’ (6:32)

• Vbe vidio na, de vbene Dmitry ya gha yin hẹ, vbe ọ gha da ayọn nẹ?

• Ọ sẹtin ya uhukpa ban ayọn na da ra?

• De vbene ọ ghi ya sẹtin ban ayọn na da gbe egbe hẹ vbe okiekie?

Tie 1 Kọrinti 6:10, 11, iyeke ọni, uwa ghi ziro yan avbe inọta na:

• Vbọ wegbe sẹ hẹ ighẹ orukhọ ọghe ayọn na da gbe egbe?

• Vbọ ya ima rẹn wẹẹ, ọmwa nọ da ayọn gbe egbe gha sẹtin fi werriẹ?

Tie Matiu 5:30, NW, iyeke ọni, uwa ghi ziro yan inọta na:

• Ne Jesu na wẹẹ ne ọmwa fian obọ re ọkpa fua vbe erre nọ zẹ na, rhie ma wẹẹ, te ima gha sẹ emwi eso rae, ne ima mieke na ya ẹko rhiẹnrhiẹn e Jehova. Vbọ khẹke ne u ru deghẹ ọ lọghọ ruẹ ne u ban ayọn na da gbe egbe?a

Tie 1 Kọrinti 15:33, iyeke ọni, uwa ghi ziro yan avbe inọta na:

• Avbe ọse ruẹ gha sẹtin ya ruẹ gha da ayọn gbe egbe ra? Vbua gu kha vberriọ?

OLIKA ẸMWẸ

Te Jehova kpemehe ayọn, ne ima ya gha sọyẹnmwẹ egbe, sokpan ọ gbodan ye ayọn nọ bun gbe na da kevbe na da gbe egbe.

Ogbewerriẹ

• De emwi ne Baibol khare vbekpa ayọn na da?

• De ẹbe nọ si vbe ọmwa ghaa da ayọn nọ bun gbe?

• De aro nọ khẹke ne ima ya gha ghee azẹ ne emwa ọvbehe ru nọ dekaẹn ayọn na da?

RUẸ SAYỌ

De vbene avbe ehọnrre gha ya sẹtin ru azẹ nọ maan vbekpa ayọn na da?

Ya Ẹwaẹn Gha Da Ayọn (2:31)

Ghee emwi eso ne u gha ru, ne u mieke na sẹtin ban ayọn na da gbe egbe.

“Gha Da Ayọn Ye Oreghe” (The Watchtower, January 1, 2010)

Emwa eso ke da ayọn, iran ghi ka mu ukpu ayọn ọghe iran kaẹn ọghe emwa ọvbehe, iran ghi vbe tọẹn mu ghee odukhunmwu. Ọ khẹke ne Ovbiotu e Kristi gha mwẹ obọ vbe uyinmwẹ vbenian ra?

“Ọta Ne Emwa Nọ” (The Watchtower, February 15, 2007)

Vbe okha nọ mwẹ uhunmwuta na, “Ọdayọn Da Iku Ẹre I Te Gha Khin,” u gha miẹn vbene okpia ọkpa ghi ya sẹtin ban ayọn nọ bun gbe na da.

“E Baibol Fi Arrọọ Werriẹ” (The Watchtower, May 1, 2012)

Ma hia keghi mu egbe vbe odẹ ughughan nọ yẹẹ ima. Ma ghaa lele ilele ni rre Baibol, ma gha sẹtin gha mu egbe vbe odẹ nọ yẹẹ ima kevbe odẹ nọ gha yẹẹ e Jehova. Gia ziro yan eso vbe ilele na.

1. De ilele eso nọ khẹke nọ gha dia odẹ ne ima ya mu egbe kevbe odẹ ne ima ya te egbe?

Ọ khẹke ne ima gha ‘ru emwi ye oreghe, ne ima gha waan vbekpa ukpọn ne ima rhuan, ne ima vbe gha mu egbe ẹse,’ vbe odẹ nọ gha rhie ẹre ma wẹẹ, ‘emwa iyayi ẹre ima khin.’ (1 Timoti 2:9, 10) Gia ziro yan ilele enẹ na: (1) Ọ khẹke ne ima “gha mu egbe ẹse.” Ẹi mwẹ aro ruẹ ma he dae wẹẹ, odẹ ughughan ẹre Avbe Osẹe Jehova ya mu egbe yo iko. Ọrheyerriọ, te odẹ ne ima ya mu egbe, eto ne ima gbe kevbe eto ne ima ru, ye rhie uyi gie Osanobua. (2) Ọmwa nọ mu egbe “ye oreghe” i yọ ukpọn na la bẹghe uwu egbe, nọ gha ya emwa gha mwẹ iziro nọ ma khẹke. Ẹi vbe yọ ukpọn ọghe uwa do ghee. (3) Ma keghi rhie ẹre ma wẹẹ, ima “waan” deghẹ ima i gbinna igbinna ukpọn nọ rre atẹ, ra odẹ ne emwa ya te egbe. (4) Ọ khẹke ne odẹ ne ima ya mu egbe gha rhie ẹre ma wẹẹ, “emwa iyayi ẹre [ima] khin,” ọ ghi vbe ya emwa rẹn wẹẹ, Osa ọghe ẹmwata ẹre ima ga.​—1 Kọrinti 10:31.

2. De vbene odẹ ne ima ya mu egbe ya kaẹn etẹn ne ima gba ga hẹ?

Agharhemiẹn wẹẹ ima mwẹ asẹ na ya mu egbe vbe odẹ nọ yẹẹ ima, ọ khẹke ne ima ka muẹn roro, deghẹ odẹ ne ima ya mu egbe gha sẹtin rhua emwa ọvbehe owẹ. Te ima gha hia ne ima ghẹ ru emwi nọ gha sọnnọ ọmwa rhọkpa, sokpan ma ghi gha ru emwi nọ yẹẹ emwa ọvbehe, nọ gha ya iran deziẹn vbe odẹ ẹmwata.​—Tie Rom 15:1, 2.

3. De vbene egbe ne ima mu gha ya sẹtin si emwa la odẹ ẹmwata?

Ẹghẹ hia ẹre ọ khẹke ne ima ya gha mu egbe ẹse, sokpan ọ wa kakabọ ru ekpataki ne ima gha mu egbe ẹse yo iko kevbe ikporhu. Ọ ma khẹke ne emwa rhunmwuda vbene ima ya mu egbe, gha ya aro tilae rua ighẹ iyẹn ne kpataki ne ima ya wewe. Nọghayayerriọ, ọ khẹke ne egbe ne ima mu gha si emwa la odẹ ẹmwata na, ọ ghi vbe ya iran ‘gha ta ẹmwẹ ọnrẹn ẹse, imamwaemwi ọghe Ọmiọnmwafan mwa.’​—Taitọs 2:10.

GUALỌ OTỌ RE SAYỌ

4. Ma ghaa mu egbe ẹse, te ima rhie uyi gie Jehova

Vbọ mobọ zẹe nọ na khẹke ne ima gha mu egbe ẹse? Tie Psalm 47:2, iyeke ọni, uwa ghi ziro yan avbe inọta na:

• Ne ima na rẹn wẹẹ, emwa ne Jehova ya zẹ ihe egbe, ẹre ima khin, de odẹ nọ khẹke ne ima ya gha mu egbe?

• Uwẹ ghee ẹre wẹẹ esa rrọọ, ne ima gha mu egbe ẹse, vbe ima ghaa rrie iko, ra ikporhu ra? Vbua gu kha vberriọ?

5. Emwi nọ gha ru iyobọ ne ima ya gha mu egbe ẹse

Kpee VIDIO na.

E VIDIO: ‘Gha Ru Emwi Hia Ne Uyi Osanobua’ (10:18)

Ọ ma khẹke ne ukpọn ima gha re nọ gbiruẹn, ọre te ọ ghaan o, ra ẹi ghaan. Vbe ehe ne ima rhirhi gha ye, ra emwi ne ima rhirhi gha ru, ukpọn ne ima yọ ghi gha re nọ khẹke. Tie 1 Kọrinti 10:24 kevbe 1 Timoti 2:9, 10. Iyeke ọni, uwa ghi ziro yan evbọzẹe nọ ma na khẹke ne ima gha yọ ukpọn . . .

• nọ gbiruẹn, nọ sọọ re, ra nọ ye yanma yanma.

• ne piẹnpiẹnpiẹn, na la bẹghe uwu egbe, ra nọ gha ya emwa ọvbehe gha mwẹ iziro nọ ma khẹke.

Agharhemiẹn wẹẹ Ivbiotu e Kristi i rre ototọ Uhi e Mosis, uhi nii ya ima rẹn aro ne Jehova ya ghee emwi. Tie Diuteronomi 22:5, iyeke ọni, uwa ghi ziro yan inọta na:

• Vbọzẹ nọ ma na khẹke ne ikpia gha mu egbe vbe na ghee ikhuo, ra ne ikhuo gha mu egbe vbe na ghee ikpia?

Tie 1 Kọrinti 10:32, 33, NW kevbe 1 Jọn 2:15, 16, iyeke ọni, uwa ghi ziro yan avbe inọta na:

• Vbọzẹ nọ na khẹke ne ima gha begbe, ne odẹ ne ima ya mu egbe ghẹ do gha sọnnọ emwa ni rre ẹdogbo ne ima ye, ra emwa ni rre iko ne ima ye?

• De vbene emwa ya mu egbe hẹ vbe ẹdogbo ne u ye?

• Uwẹ ghee ẹre wẹẹ, ọ khẹke ne Ivbiotu e Kristi gha mu egbe vbe odẹ ne emwa eso ya mu egbe vbe ẹdogbo ne u ye ra? Vbua gu kha vberriọ?

OLIKA ẸMWẸ

Ma ghaa mu egbe ẹse, te ima rhie ẹre ma wẹẹ, ima rhie ọghọ ne Jehova kevbe emwa ọvbehe.

Ogbewerriẹ

• Vbọzẹ ne odẹ ne ima ya mu egbe kevbe odẹ ne ima ya te egbe na ru ekpataki vbe odaro e Jehova?

• De ilele eso nọ khẹke nọ gha dia odẹ ne ima ya mu egbe?

• De aro ne emwa khian ya gha ghee ugamwẹ ẹmwata, vbe ima ghaa mu egbe ẹse, ra deghẹ ima i mu egbe ẹse?

RUẸ SAYỌ

Ghee emwi ne emwa gha sẹtin gha ta lele ruẹ rhunmwuda aro ukpọn ne u yọ.

“Egbe Ne I Mu Maan Ra?” (Ọ rre intanẹt)

Ghee evbọzẹe nọ na khẹke ne u ka muẹn roro nẹ, u ke gbẹnnẹ emwi ye egbe.

“De Emwi Ne Baibol Khare Vbekpa Evba Gbẹnnẹ Ye Egbe (Tattoo)?” (Ọ rre intanẹt)

Ghee ilele ọvbehe ni gha ru iyobọ ne ima ya ru azẹ nọ maan.

“Odẹ Ne U Ya Mu Egbe Rhie Uyi Gie Osanobua Ra?” (The Watchtower, September 2016)

De vbene okhuo ọkpa nọ mwẹ ekhọe ata ghi ya do rẹn wẹẹ, emwa hia mwẹ asẹ na ya mu egbe vbe odẹ nọ yẹẹ iran?

“Vbene Emwa Ọvbehe Ya Mu Egbe Kevbe Vbene Iran Ya Te Egbe, Ẹre Ọ Wa Gha Kpokpo Mwẹ Vbe Orhiọn” (Awake!, December 22, 2003)