-
De Vbene Baibol Gha Ya Sẹtin Ru Iyobọ Nuẹn Hẹ?Sọyẹnmwẹ Arrọọ Vbe Etẹbitẹ!—Iruẹmwi E Baibol
-
-
IRUẸMWI 01
De Vbene Baibol Gha Ya Sẹtin Ru Iyobọ Nuẹn Hẹ?
Ma nibun keghi hoo ne ima rẹn emwi ne ima do ru vbe agbọn, emwi nọ ya emwa susẹ, emwi nọ si uwu kevbe emwi nọ khian sunu vbe ẹdẹ nakhuẹ. Ma vbe si osi ye ẹmwẹ evba gha re, evba gha da, kevbe vbene ẹgbẹe ima khian ya gha mwẹ oghọghọ hẹ. Emwa nibun keghi do bẹghe ẹre wẹẹ, e Baibol zẹ ewanniẹn ye avbe inọta ne kpataki ni kpokpo iran vbe orhiọn. Gberra ọni, iran vbe do bẹghe ẹre wẹẹ, adia ni rre Baibol keghi ru iyobọ ne ọmwa deghẹ a na gha lelẹe. Vbua ghee ẹre hẹ? E Baibol gha gele sẹtin ru iyobọ ne ima ra?
1. De inọta eso ne Baibol zẹ ewanniẹn yi?
Usun avbe inọta ne kpataki ne Baibol zẹ ewanniẹn yi ẹre ena khin: Vbe arrọọ a ya suẹn hẹ? Vbe ima do ru vbe agbọn na? Vbọzẹ ne emwa na rri oya, uhiẹn emwa ni ma rẹn ọkpa rẹn eva? Vbọ sunu daa ima vbe ima gha wu nẹ? Emwa hia hoo ne iran gha mwẹ ọfunmwegbe, sokpan vbọ ghi si ẹre ne okuo na gba ehe hia? De vbene agbọn na khian gha ye hẹ vbe odaro? E Baibol rhie igiọdu ne ima, ne ima gualọ ewanniẹn ọghe avbe inọta na. Emwa nibun gele ru vberriọ, iran na wa vbe miẹn ewanniẹn nọ sẹ iran ọkẹn.
2. De vbene Baibol ya ya ima sọyẹnmwẹ hẹ?
Ibude ni rre Baibol gha sẹtin ru iyobọ ne ima. Vbe igiemwi, ibude ni rre Baibol gha sẹtin ya ẹgbẹe gha sọyẹnmwẹ, ọ gha sẹtin ru iyobọ ne ima vbe ima ghaa rre uwu ọlọghọmwa nọ rhirhi gha khin, ọ gha vbe sẹtin ya ima gha sọyẹnmwẹ iwinna ima. Zẹvbe ne ima ya koko ziro yan iruẹmwi ughughan vbe ebe na, u gha ruẹ emwi nibun vbekpa emwi na he ya unu kaẹn na kevbe nibun ọvbehe. U gha do bẹghe ẹre wẹẹ, emwi hia ni rre Baibol “keghi . . . re emwi esiesi ne a ya maa emwa emwi.”—2 Timoti 3:16.
Ebe na ma rhihe Baibol. Sokpan, ọ gha ru iyobọ nuẹn ya gha tie Baibol ne egbuẹ. Nọnaghiyerriọ, ma rhie igiọdu nuẹn, ne u gha tie avbe ako ọghe Baibol ni rre dọmwadẹ iruẹmwi vbe ebe na, ne u mieke na rẹn deghẹ emwi ne u ruẹ, gua emwi ni rre Baibol ro.
GUALỌ OTỌ RE SAYỌ
Gia ziro yan vbene Baibol he ya ru iyobọ ne emwa hẹ, odẹ ne u gha ya sọyẹnmwẹ e Baibol na tie, kevbe evbọzẹe nọ na khẹke na ru iyobọ nuẹn ya rẹn otọ e Baibol.
3. E Baibol gha sẹtin dia ima ye uviẹn
Te Baibol yevbe na ghee ukpa nọ kakabọ baa. E Baibol gha sẹtin ru iyobọ ne ima ya rẹn emwi nọ khẹke ya ru. E Baibol vbe tae yotọ, emwi nọ khian sunu vbe odaro.
Tie Psalm 119:105, iyeke ọni, uwa ghi ziro yan avbe inọta na:
De aro ne ọmwa nọ gbẹn ako ọghe Baibol na, ya gha ghee Baibol?
De aro ne uwẹ ya ghee Baibol?
4. E Baibol gha sẹtin zẹ ewanniẹn ye inọta ọghe ima
E Baibol keghi zẹ ewanniẹn ye avbe inọta ni ghaa kpokpo okhuo ọkpa vbe orhiọn, vbe ọwara ukpo nibun. Kpee VIDIO na, iyeke ọni, uwa ghi ziro yan inọta ni lelẹe.
De inọta eso nọ ghaa kpokpo okhuo na vbe orhiọn vbe vidio na?
De vbene iruẹmwi e Baibol ghi ya ru iyobọ nẹẹn hẹ?
E Baibol rhie igiọdu ne ima, ne ima gha nọ ọta. Tie Matiu 7:7, iyeke ọni, uwa ghi ziro yan inọta na:
De inọta eso ne u mwẹ, ne u gha hoo ne Baibol zẹ ewanniẹn yi?
5. U gha sẹtin gha sọyẹnmwẹ e Baibol na tie
Emwa nibun wa sọyẹnmwẹ e Baibol na tie, erriọ iran wa vbe ya miẹn ere vbọ. Kpee VIDIO na, iyeke ọni, uwa ghi ziro yan inọta ni lelẹe.
De aro ne avbe igbama ni rre vidio na, ya gha ghee ebe na tie?
Vbọzẹ ne Baibol na tie na yẹẹ iran?
E Baibol gha sẹtin rhie ifuẹko ne ima vbe ẹghẹ ibavbaro, ọ ghi vbe ya ima gha mwẹ ilẹkẹtin wẹẹ, emwi hia gha dunna vbe odaro. Tie Rom 15:4, iyeke ọni, uwa ghi ziro yan inọta na:
Uwẹ hoo ne uwẹ miẹn avbe afiangbe ne Baibol guan kaẹn na ra?
6. Emwa ọvbehe gha sẹtin ru iyobọ ne ima ya rẹn otọ e Baibol
Emwa eso tie Baibol ne egbe iran, ọrheyerriọ, iran keghi do bẹghe ẹre wẹẹ, te ọ vbe khẹke ne emwa ọvbehe ru iyobọ ne iran ya rẹn otọ e Baibol. Tie Iwinna 8:26-31, iyeke ọni, uwa ghi ziro yan inọta na:
Vbọ khian ru iyobọ ne ima ya rẹn otọ e Baibol?—Ghee uviẹn 30 kevbe 31.
A keghi ru iyobọ ne Ovbi Ẹtiopia ọkpa ya rẹn otọ Evbagbẹn Nọhuanrẹn. Emwa nibun vbe ẹdẹnẹrẹ wa do bẹghe ẹre wẹẹ, te ọ vbe khẹke ne emwa ọvbehe ru iyobọ ne iran ya rẹn otọ e Baibol
EMWA ESO KEGHI KHA WẸẸ: “Te emwa ni tie Baibol mu ẹghẹ rhia.”
Vbua ghee ẹre hẹ? Vbua gu kha vberriọ?
OLIKA ẸMWẸ
E Baibol ya ima sọyẹnmwẹ arrọọ, ọ zẹ ewanniẹn ye avbe inọta ne kpataki, ọ rhie ifuẹko ne ima, ọ vbe ya ima mwẹ ilẹkẹtin wẹẹ, emwi hia gha dunna vbe odaro.
Ogbewerriẹ
De aro ibude ni rre Baibol?
De inọta eso ne Baibol zẹ ewanniẹn yi?
De emwi ne u hoo ne u ruẹ vbe Baibol?
RUẸ SAYỌ
Ghee vbene ibude ni rre Baibol gha ya sẹtin ru iyobọ ne ima hẹ vbe ẹdẹnẹrẹ.
“Imamwaemwi Ni Rre Baibol—Ẹwaẹn Nọ Rrọọ I Fafa” (The Watchtower No. 1 2018)
Ghee vbene Baibol ya ru iyobọ ne okpia ọkpa ne iro han rẹn ke otọ gha dee.
Ghee vbene ibude ni rre Baibol gha ya sẹtin ru iyobọ ne ẹgbẹe hẹ.
Ghee vbene Baibol ya gi ima rẹn ọmwa nọ gele kha yan agbọn na.
-
-
E Baibol Keghi Re Uhunmwu Ne Osanobua Gie Gie ImaSọyẹnmwẹ Arrọọ Vbe Etẹbitẹ!—Iruẹmwi E Baibol
-
-
1. Emwa nagbọn ẹre ọ gbẹn e Baibol, vbọ ghi ya re Ẹmwẹ Osanobua hẹ?
Odẹ orhunmwu 40 ẹre ọ gbẹn e Baibol. Odẹ ukpo 1,600 ẹre a ya gbẹn ọnrẹn. 1513 B.C.E. ẹre a suẹn ọnrẹn na gbẹn, a na ya gbẹn ọnrẹn fo vbe odẹ ukpo 98 C.E. Emwa ughughan ẹre ọ gbẹn e Baibol, iwinna ughughan ẹre iran vbe gha ru. Ọrheyerriọ, te emwi hia ne iran gbẹn wa gua egbe ro. Vbọzẹ? Rhunmwuda, ẹmwẹ Osanobua nọ. (Tie 1 Tẹsalonaika 2:13.) Iran ma gbẹn ẹmwẹ obọ iran yotọ. Sokpan, orhiọn nọhuanrẹna ẹre ọ dia iran ya “ta ẹmwẹ nọ ke ehe ne Osanobua ye rre.” (2 Pita 1:21) Te Osanobua ya orhiọn nọhuanrẹn gua emwa kpa ya gbẹn ẹmwẹ ọnrẹn yotọ.—2 Timoti 3:16.
-
-
E Baibol Keghi Re Uhunmwu Ne Osanobua Gie Gie ImaSọyẹnmwẹ Arrọọ Vbe Etẹbitẹ!—Iruẹmwi E Baibol
-
-
4. E Baibol tama ima ọmwa nọ yan rẹn
Kpee VIDIO na. Iyeke ọni, tie 2 Timoti 3:16, ne uwa ziro yan inọta ni lelẹe.
Ugbẹnvbe a miẹn wẹẹ emwa nagbọn ẹre ọ gbẹn e Baibol, vbọ ghi zẹe ne a na tie ẹre Ẹmwẹ Ọghe Osanobua?
Uwẹ gele yayi wẹẹ Osanobua gha sẹtin loo emwa nagbọn ya gbẹn ẹmwẹ ọnrẹn yotọ ra?
Akọwe sẹtin gu ọmwa gbẹn elẹta, sokpan ẹmwẹ nọ rre elẹta nii keghi re ọghe ọmwa nọ gie uhunmwu nii. Erriọ vbe ye, emwa nagbọn ẹre ọ gbẹn e Baibol, sokpan ẹmwẹ ọghe Osanobua ẹre iran gbẹn yotọ
-