De Ere Ne U Gha Miẹn Vbe U Ghaa Yo Iko Ọghe Avbe Osẹe Jehova?

Uwẹ he yo iko ọghe Avbe Osẹe Jehova ẹdẹ ra? Deghẹ u ma he yo ẹdẹ, vbene u gha ya yo hẹ vbe ẹghẹ okaro sẹtin gha kọn ruẹ aro. U sẹtin gha roro ẹre wẹẹ: ‘De emwi na ru vba? Ọ mwẹ esa nọ ye ra? Ọ gele khẹke ne I yo ra?’ Vbe iruẹmwi na, u gha miẹn vbene iko na yo khian ya si ruẹ kẹ Osanobua sayọ hẹ kevbe afiangbe ne uwẹ tobọ ruẹ khian miẹn vbọ.

1. Vbọ mobọ zẹe ne Avbe Osẹe Jehova na do iko?

Gia ghee ẹmwẹ ne ọkpa vbe emwa ni gbẹn e Baibol tae, vbekpa evbọ mobọ zẹe ne a na do iko. Ọ khare wẹẹ: “I rho e Nọyaẹnmwa vbe uwu ẹbu iko emwa rẹn.” (Psalm 26:12) Erriọ Avbe Osẹe Jehova vbe sọyẹnmwẹ iko ne iran do uzọla uzọla vbe otagbọn hia. Evba ẹre iran na rhie urhomwẹ gie Osanobua, iran ghi so ihuan, iran ghi vbe na erhunmwu kugbe. Ọ vbe mwẹ ẹghẹ eso vbe ukpo, ne iran nibun ya si egbe koko ga Osanobua.

2. De emwi ne u gha miẹn ruẹ vbe iko ọghomwa?

Ẹmwẹ Osanobua ẹre a ya maa ima emwi vbe iko ima, a ghi gha “rhan otọ re” vbe odẹ ne emwa gha ya “rẹn otọ re.” (Tie Nehimaia 8:8.) U ghaa yo iko, u gha ruẹ emwi nibun vbekpa e Jehova kevbe aro ọmwa nọ khin. U gha ghi do bẹghe vbene ọ hoẹmwẹ ruẹ hẹ, u ghi gha hoo ne u sikẹ ọre sayọ. U gha vbe do bẹghe ẹre wẹẹ, e Jehova gha sẹtin ru iyobọ nuẹn ya gha sọyẹnmwẹ arrọọ.​—Aizaia 48:17, 18.

3. De iyobọ ne u gha miẹn vbe obọ emwa ni rre uwu iko?

E Jehova wẹẹ ne ima ‘gha zẹ ye ẹmwẹ egbe, na gha mwẹ ahoẹmwọmwa, na gha ru emwi esi kevbe na ghẹ dobọ iko na do miẹn egbe yi.’ (Hibru 10:24, 25) Vbe iko ọghomwa, u gha miẹn emwa ni gele hoẹmwẹ egbe kevbe ni hoo ne iran rẹn Osanobua sayọ vbene uwẹ vbe ye. U gha họn vbe iran ghaa ta ẹmwẹ igiọdu ne iran ruẹ re vbe Baibol. (Tie Rom 1:11, 12.) U gha vbe miẹn emwa ughughan, ke ni ru orọnmwẹ nẹ, ke ni ma he ru, ni sọyẹnmwẹ agharhemiẹn wẹẹ, iran mwẹ ọlọghọmwa. Ena rre usun emwi ne Jehova gu wẹẹ ne ima gha si egbe koko vbe ẹghẹ hia!

GUALỌ OTỌ RE SAYỌ

4. Iko ọghe Avbe Osẹe Jehova

Ẹghẹ hia ẹre Ivbiotu e Kristi ni ghaa rrọọ vbe orre nokaro ya gha si egbe koko ga e Jehova. (Rom 16:3-5, NW) Tie Kọlose 3:16, iyeke ọni, uwa ghi ziro yan inọta na:

• De vbene Ivbiotu e Kristi ni ghaa rrọọ vbe orre nokaro ya gha ga e Jehova hẹ?

E VIDIO: De Emwi Na Ru Vbe Ọgua Arriọba? (2:12)

• Vbe uwẹ a bẹghe vbe efoto kevbe vidio na, nọ guaero ighẹ emwi nọ rre ebe Kọlose 3:16?

• De emwi ọvbehe nọ yẹẹ ruẹ, ne u bẹghe wẹẹ a ru vbe iko ọghomwa, zẹvbe nọ rre vidio na, ra efoto na?

Tie 2 Kọrinti 9:7, iyeke ọni, uwa ghi ziro yan inọta na:

• Vbọzẹ nai na zẹ igho vbe iko ọghe Avbe Osẹe Jehova?

Uwẹ vbe ọmwa nọ maa ruẹ emwi ghi gba rhie aro la emwi na khian ziro yan vbe iko ọghomwa nọ ghi sọregbe.

• De nọ ghi yẹẹ ruẹ sẹ vbe abọ ọghe iko na? De abọ ne u yayi wẹẹ ọ gha ru iyobọ nuẹn?

U ka rẹn ra?

Vbe jw.org, u gha miẹn ako ne Avbe Osẹe Jehova na do iko vbe ehe ughughan vbe uhunmwu otagbọn hia, kevbe ẹghẹ ne iran ya do ẹre.

1. Vbe iko ọghomwa, a keghi danmwehọ ọta, a ru orhiema, a vbe ghee vidio. Ihuan kevbe erhunmwu ẹre ima ya suẹn iko, ẹre ima vbe ya muẹn sẹ ufomwẹ

2. Vbe abọ eso vbe iko ọghomwa, ẹkpotọ keghi kie ne emwa ni gbẹbu ya zẹ ewanniẹn

3. Ẹkpotọ kie ne emwa hia ya rrie iko ọghomwa​—ke ikpia ke ikhuo, ke ọmaẹn ke ẹghele, ke emọ obọ ke emọ owẹ

4. Ma i zẹ igho vbe iko ọghomwa. Ai ya igho la owa, ai vbe mu ọkpan lẹga

5. Ẹrhiọn ẹre a loo ya yo iko vbe ẹghẹ hia

Gia ziro yan igiemwi ọghe ẹgbẹe Jesu. Ukpukpo ẹre iran ya gha yo Ọgua Osa nọ rre Jerusalẹm. Iran gha kpa vbe Nazarẹt, odẹ ikpẹdẹ eha ẹre iran ya khian vbe odẹ, iran ke sẹ e Jerusalẹm. Na kha na, oke oke ẹre iran gbe, iran ke sẹ evba. Tie Luk 2:39-42, iyeke ọni, uwa ghi ziro yan avbe inọta na:

• Uwẹ yayi wẹẹ emwi nọ khuẹrhẹ ghaa nọ, ne iran na gha mu okhian yo e Jerusalẹm vbe ukpukpo ra?

• Vbọzẹ ne u gha na loo ẹrhiọn yọ, ne u mieke na sẹtin gha yo iko vbe ẹghẹ hia?

• Uwẹ yayi wẹẹ esa rrọọ na gha yo iko ra, agharhemiẹn wẹẹ ẹi khuẹrhẹ vbe ugbẹnso ra? Vbua gu kha vberriọ?

• Vbọzẹ nọ na khẹke ne ima gha yo iko vbe ẹghẹ hia?

OLIKA ẸMWẸ

Iko na yo gha ru iyobọ nuẹn ya rẹn emwi nibun vbekpa e Jehova, ọ ghi vbe ya ruẹ sikẹ ọre sayọ, ẹkpotọ ghi vbe kie nuẹn ya deba emwa ọvbehe gha gae.

Ogbewerriẹ

• Vbọzẹ ne Jehova na wẹẹ ne ima gha si egbe koko?

• De emwi ne u gha miẹn ruẹ vbe iko ọghe Avbe Osẹe Jehova?

• De odẹ ọvbehe ne u yayi wẹẹ iko na yo gha ya ru iyobọ nuẹn?

RUẸ SAYỌ

Iko na yo kọn ruẹ aro ra? Ghee emwi nọ ru iyobọ ne okpia ọkpa ya gha sọyẹnmwẹ iko na yo, agharhemiẹn wẹẹ ọ te gha kọn rẹn aro vbe ẹghẹ okaro.

Ma I Khian Sẹtin Miamia Otuẹ Nii (4:16)

Ghee vbene igbama ọkpa ya sọyẹnmwẹ iko nọ yo hẹ, kevbe emwi nọ ghi ru nọ mieke na sẹtin ye gha yo iko vbe ẹghẹ hia.

Iko Na Yo Wa Gha Yẹẹ Mwẹ! (4:33)

Ghee aro ne emwa eso ya ghee iko na yo.

“Vbọzẹ Nọ Na Khẹke Na Gha Yo Iko Vbe Ọgua Arriọba?” (Ọ rre intanẹt)

Ghee vbene ẹdagbọn okpia ọkpa nọ te ka rre otu dan ya fi werriẹ hẹ, vbe ọ ghi yo iko ọghe Avbe Osẹe Jehova.

“Ai Miẹn Eke Ne I Yo Ne Ii Na Mu Osisi Lele Egbe” (The Watchtower, July 1, 2014)

5. Agbọn fi werriẹ ke ukpo 1914 gha dee

Kpee VIDIO na.

E VIDIO: Agbọn Fi Werriẹ Ke Ukpo 1914 Gha Dee (1:10)

Jesu tae yotọ, vbene emwi khian gha ye hẹ vbe agbọn na, vbe irẹn gha rri Ọba nẹ. Tie Luk 21:9-11, iyeke ọni, uwa ghi ziro yan avbe inọta na:

• De ne aro ruẹ he sẹ vbe uwu avbe emwi na sunu yi na? De ne ehọ ruẹ he vbe họn vbọ?

Ukọ e Pọl tae yotọ, uyinmwẹ ne emwa nibun khian gha yin, vbe ọ ghaa bu ufomwẹ ọghe arriọba emwa nagbọn. Tie 2 Timoti 3:1-5, iyeke ọni, uwa ghi ziro yan inọta na:

• De ne aro ruẹ he sẹ vbe uwu avbe uyinmwẹ na?

6. Emwi nọ khẹke ne Arriọba Osanobua gua ima kpa ya ru

Tie Matiu 24:3, 14, iyeke ọni, uwa ghi ziro yan avbe inọta na:

• De iwinna ne kpataki nọ so igiẹ yọ wẹẹ, Arriọba Osanobua suẹn gha kha nẹ?

• Vbua khian ya sẹtin gha mwẹ obọ vbe iwinna na hẹ?

Arriọba Osanobua suẹn gha kha nẹ, vbe nẹi khian ghi kpẹẹ gbe, ọ gha suẹn gha kha yan otagbọn na hia. Tie Hibru 10:24, 25, iyeke ọni, uwa ghi ziro yan inọta na:

• Vbọ khẹke ne dọmwadẹ ima ru, ugbẹnvbe a miẹn wẹẹ ufomwẹ agbọn na “sẹ otọ fo nẹ”?