IRUẸMWI 28
Gha Rhie Ẹre Ma Wẹẹ U Gbọyẹmwẹ Ye Emwi Ne Jehova Kevbe Jesu Ru Nuẹn
Vbọ ye ruẹ hẹ, vbe ọse ruẹ gha ya emwi nọ ghaan nuẹn? Ẹi mwẹ u ma gha sọyẹnmwẹ, u ghi vbe gha hoo ne u gi ọse ruẹ nii rẹn wẹẹ, u gele gbọyẹmwẹ ye ẹse ọhẹ nii. Ẹse nọ ghi kpọlọ sẹ, ẹre Jehova kevbe Jesu ru ne ima. De ẹse ne ọni khin? Vbe ima khian ya rhie ẹre ma hẹ wẹẹ ima gbọyẹmwẹ yọ?
1. De odẹ ọkpa ne ima khian ya rhie ẹre ma wẹẹ, ima gbọyẹmwẹ ye emwi ne Osanobua kevbe Kristi ru ne ima?
E Baibol khare wẹẹ, “ọmwaikọmwa nọ rhirhi ya [e Jesu] yi” ghi gha rrọọ vbe etẹbitẹ. (Jọn 3:16) Vbe ọna demu? Ọna gberra na wa ya e Jesu yi kẹkan. Te ima gha vbe rhie ẹre ma wẹẹ, ima mu ẹtin yan e Jesu vbe emwi hia ne ima ru vbe ẹdagbọn ima. (Jems 2:17) Ma ghaa rhie ẹre ma vbe ẹmwẹ ne ima ta kevbe emwi ne ima ru wẹẹ, ima gele mu ẹtin yan e Jesu, ma ghi do sikẹ irẹn vbe Erhae sayọ.—Tie Jọn 14:21.
2. De ugie ne kpataki nọ ru iyobọ ne ima ya gha rhie ẹre ma wẹẹ ima gbọyẹmwẹ ye emwi ne Jehova kevbe Jesu ru ne ima?
Vbe asọn nokiekie ne Jesu gbe vbe agbọn, ọ keghi tama erhuanegbe ẹre, odẹ ọvbehe ne iran khian ya gha rhie ẹre ma wẹẹ, iran gbọyẹmwẹ ye izọese ọghe irẹn. Ọ keghi mu ugie ọkpa ne kpataki gbọọ, ne Baibol tie ẹre ‘Evbare Ota Ọghe Nọyaẹnmwa,’ na vbe tie ẹre Ugie Ayere ọghe uwu e Kristi. (1 Kọrinti 11:20) Te Jesu mu ugie na gbọọ, ne avbe ukọ kevbe Ivbiotu e Kristi ọghe ẹmwata hia gha ye ẹre rre wẹẹ, te irẹn wu ne ima. Vbe nọ dekaẹn ugie na, Jesu keghi kha wẹẹ: “Wa gha ru ọna ya ye mwẹ rre.” (Luk 22:19) U gha yo Ugie Ayere, te u rhie ẹre ma wẹẹ, u gbọyẹmwẹ ye ahoẹmwọmwa nọ kpọlọ, ne Jehova kevbe Jesu mwẹ ghee ima.
GUALỌ OTỌ RE SAYỌ
Gia ziro yan rẹn sayọ, odẹ eso ne u gha ya rhie ẹre ma wẹẹ u gbọyẹmwẹ ye ahoẹmwọmwa nọ kpọlọ, ne Jehova kevbe Jesu mwẹ ghee ima. Gia vbe ziro yan vbene Ugie Ayere ọghe uwu e Kristi ru ekpataki sẹ hẹ.
3. Rhie ẹre ma wẹẹ u gbọyẹmwẹ ye ẹse na ru nuẹn
Gia kha wẹẹ ọmwa do miẹn ruẹ fan vbe uwu odin amẹ. U gha mianmian ẹse ne ọmwa nii ru nuẹn ra? Ra te u khian gha gualọ odẹ ke odẹ, ne u khian ya gi ọmwa nii rẹn wẹẹ, u gbọyẹmwẹ ye ẹse nọ ru nuẹn?
Akpawẹ ẹi re Jehova, ọghe ima te fo nẹ. Tie 1 Jọn 4:8-10, iyeke ọni, uwa ghi ziro yan avbe inọta na:
Vbọzẹ ne izọese ne Jesu ru, na re ẹse ọhẹ nọ hin usi?
Vbọ ye ruẹ hẹ vbe ekhọe ighẹ emwi ne Jehova kevbe Jesu ru nuẹn?
Vbe ima khian ya rhie ẹre ma hẹ wẹẹ, ima gbọyẹmwẹ ye emwi ne Jehova kevbe Jesu ru ne ima? Tie 2 Kọrinti 5:15 kevbe 1 Jọn 4:11; 5:3. Uwa gha tie dọmwadẹ ako na nẹ, uwa ghi ziro yan inọta na:
Zẹvbe nọ rre ako ọghe Baibol na, vbọ khẹke ne ima ru, ne ima ya rhie ẹre ma wẹẹ, ima gbọyẹmwẹ ye ẹse ne Jehova kevbe Jesu ru ne ima?
4. Gha ya egbe taa e Jesu
Odẹ ọvbehe ne ima khian ya rhie ẹre ma wẹẹ ima gbọyẹmwẹ ye izọese ọghe Jesu, ọre ne ima gha ya egbe taa e Jesu. Tie 1 Pita 2:21, iyeke ọni, uwa ghi ziro yan inọta na:
De odẹ eso ne u gha ya sẹtin lele ukpowẹ ọghe Jesu?
Ẹmwẹ Ọghe Osanobua wa gha yẹẹ Jesu, ọ kegha kporhu iyẹn nọ maan, ọ vbe gha ru iyobọ ne emwa ọvbehe
5. Gha yo Ugie Ayere ọghe uwu e Kristi
Ne u ya rẹn vbene ugie Evbare Ota Ọghe Nọyaẹnmwa nokaro ghaa ye hẹ, tie Luk 22:14, 19, 20. Iyeke ọni, uwa ghi ziro yan avbe inọta na:
Vbọ sunu vbe ugie Evbare Ota Ọghe Nọyaẹnmwa nokaro?
De emwi ne eka kevbe ayọn mudia ye ihe ẹre?—Ghee uviẹn 19 kevbe 20.
Jesu hoo ne erhuanegbe ẹre gha do Ugie Ayere ọghe uwu irẹn vbe ukpukpo, vbe ẹdẹ ne irẹn wu. Ọna ẹre ọ si ẹre ne Avbe Osẹe Jehova na si egbe koko vbe ukpukpo, ne iran ya ye uwu ọghe Jesu rre, zẹvbe ne Jesu wẹẹ na gha ru ẹre. Ne u ya rẹn sayọ vbekpa ugie ne kpataki na, kpee VIDIO na. Iyeke ọni, uwa ghi ziro yan inọta nọ lelẹe.
De emwi ughughan na ru vbe a ghaa do Ugie Ayere?
Ọ mwẹ emwi ne eka kevbe ayọn na loo vbe Ugie Ayere mudia yi. Eka nọ rrọọ, mudia ye ihe egbe nọ gbae ne Jesu ya zọ ese ne ima. Ayọn nọ rrọọ na mudia ye ihe esagiẹn ọghẹe
OLIKA ẸMWẸ
Ma gha mu ẹtin yan e Jesu, ma na vbe gha yo Ugie Ayere ọghe uwu ọghẹe, te ima rhie ẹre ma wẹẹ ima gbọyẹmwẹ ye emwi nọ ru ne ima.
Ogbewerriẹ
Vbe a yae kha, na mu ẹtin yan e Jesu?
De odẹ ne u hoo ne u ya rhie ẹre ma wẹẹ, u gbọyẹmwẹ ye emwi ne Jehova kevbe Jesu ru nuẹn?
Vbọzẹ nọ na ru ekpataki, ne ima gha yo Ugie Ayere ọghe uwu e Kristi?
RUẸ SAYỌ
De emwi ne uwu ọghe Kristi gua ima kpa ya ru?
Ruẹ sayọ vbekpa amuẹtinyan, kevbe odẹ ne u gha ya sẹtin rhie ẹre ma wẹẹ u mwẹ amuẹtinyan.
“Rhie Ẹre Ma Wẹẹ U Mu Ẹtin Yan E Jehova Wẹẹ, Ọ Gha Mu Eyan Ọghẹe Sẹ” (The Watchtower, October 2016)
Tie okha nọ mwẹ uhunmwuta na, “Ii Ghi Mwẹ Obọ Vbe Uyinmwẹ Nọ Gbiruẹn, Eban Ẹre Imẹ Rre Agbọn,” ne u ya rẹn vbene izọese ọghe Kristi ya ru iyobọ ne okhuo ọkpa hẹ.
Ghee evbọzẹe ne a na miẹn wẹẹ, ibozẹghẹ emwa ẹre ọ re vbe eka, ẹre ọ vbe da vbe ayọn na mu lẹga vbe Ugie Ayere.