Vbene A Ya Loo ene Ebe Ẹmu Iyẹn Nọma Ya Ma Emwa Emwi Hẹ
1. Vba ya mwamwa ne ebe ẹmu Iyẹn Nọma hẹ?
1 Ima guan kan rẹn vbe Iwinna Arriọba Ọghomwa ọghe July wẹẹ, ọkpa vbe usun emadogua ne kpataki ne ima loo ya ma emwa emwi ọre ne ebe ẹmu Iyẹn Nọma Nọ Ke Obọ Osanobua Rre! A ma gbẹnnẹ avbe ako ọghe evbagbẹn nọhuanrẹn na sunnu yi ladian, ne ọ yan owa mieke na wa bẹghe ẹre vbuwe Baibol zẹẹ, ighẹ emwi nọ ruẹ. Odẹ na ya gbẹnnẹ ebe ima nibun na ya ruẹ emwi keghi re nọ gha gie ọmwa ruẹ ne egbe ẹre, sokpan a keghi mwamwa ọna zẹvbe ebe na gu ọmwa ruẹ. Rhunmwuda ọni, ima gha rhie ebe na ne ọmwa, ọ khẹke ne ima ru igiemwi ọghe vbene ima ya ruọre hẹ, nọ mieke na rẹn vbene ọ rhiẹnrhiẹn hẹ na ruẹ vbekpae iyẹn nọma nọ rre uwe Baibol.—Mat. 13:44.
2. De vbene ima gha ya loo ne ebe ẹmu Iyẹn nọma hẹ vbe ẹghẹ okaro na ya miẹn ọmwa?
2 Vbe Ẹghẹ Okaro Nu Ya Miẹn Ọmwa: U sẹtin kha wẹẹ: “emwi ni gu se emwa ọre wẹẹ, emwa ma ghi rẹn eke ne agbọn na ghi rrie. Uwẹ roro ẹre wẹẹ emwi hia gha maan ra? [U ghi ziengbe nọ guan.] Iyẹn nọma wa rre uwe Baibol nọ gha ye ima gha mwẹ ayayẹro. Ghee inọta eso ne Baibol rhie ewanniẹ yi.” Rhie ne ebe ẹmu ne ọ yan owa, kevbe u ghi tama rẹn nọ zẹ ọkpa vbe avbe inota nọ rre iyeke ẹre. Vbe iyeke ọni, u ghi loo okhuẹn nokaro ọghe iruẹmwi nii ne irẹn zẹẹ, ya ru igiemwi ọghe iruẹmwi e Baibol. U sẹtin vbe nọ rẹn inọta ọkpa ne uwẹ tobọ ruẹ zẹẹ, nu rẹn wẹẹ emwa wa mobọ nọ, ẹghẹ nii, u ghi giẹre ma rẹn vbene ebe ẹmu na gha ya ru iyobọ nẹ hẹ ya miẹn ewanniẹ ne Baibol rhie yọ. Adeghẹ e vidio rrọọ nọ guaẹro ako iruẹmwi na ziro yan vbe jw.org, etẹn eso keghi wa kpee ẹre vbe ẹghẹ ne iran ya kporhu.
3. Rhan otọre, vbene a ya loo ne ebe ẹmu Iyẹn Nọma ya gu ọmwa ruẹ e Baibol hẹ?
3 Vbene A Ya Gu Ọmwa Ruọre Hẹ: (1) Tie inọta na gbẹnnẹ gbodoo nọ mwẹ enọmba, ne ọ yan owa mieke na sẹtin rhie aro tua olika ẹmwẹ nọ rre okhuẹn nii. (2) Tie okhuẹn nọ lelẹe. (3) Tie ako ọghe evbagbẹn nọhuanrẹn na ya ikpẹmwẹ ni bilogọ gbẹnnẹ, kevbe nu loo ẹwaẹn ya nọ ọta eso nọ gha ye ne ọ yan owa bẹghe vbene evbagbẹn nọhuanrẹn ya rhie ewanniẹ ye inọta ọghe okhuẹn nii hẹ. (4) Adeghẹ okhuẹn ọvbehe ye rre ototọ inọta nii, u sẹtin werriegbe lele obẹlẹ 2 kevbe 3. Deghẹ vidio rrọọ nọ guaẹro ighẹ inọta nu nọ rẹn, sokpan u ma he kpee ẹre ma ọ yan owa, u sẹtin kpee ẹre, vbe ẹghẹ ne u ya gu ẹre ziro. (5) Ne okiekie, u ghi wẹẹ ne ọ yan owa zẹ ewanniẹ ye inọta nọ rre omuhẹn ọghe okhuẹn nii, nu ya rẹn deghẹ ọ rẹn ototọ re.
4. Vbọ khian ru iyobọ ne ima, ne ima gha re nọ guẹ, vbe odẹ na ya loo emadogua ne kpataki na?
4 Ọ khẹke nu rẹn vbene a ya loo emadogua na hẹ. Loo ẹre vbe ẹghẹ ke ẹghẹ ne ẹkpoto ya kie. Ọ te se ẹghẹ dọmwadẹ iruẹmwi, muẹn roro odẹ nọ maan sẹ nu gha ya loo evbagbẹn nọhuanrẹn nọ rre ne iruẹmwi, ya gu ọmwa nu ma re emwi ziro. (Itan 15:28; Iwinna 17:2, 3) Zẹvbe ne u ya guẹ sayọ vbe nọ dekaan vbene a ya loo ebe na hẹ, ọ ghi do gha re ọkpa vbe usun ebe nọ yẹẹ ruẹ sẹ, na loo ya ma emwa ẹmwata!