IRUẸMWI 1

Omuso Nọ Dagbẹn

Iwinna 17:22

UHUNMWU ẸMWẸ: Gi ẹmwẹ omuso ọghuẹ gha re nọ gha gua emwa kpa, ne iran ya danmwehọ ruẹ, ọ ghi rhiẹre ladian ighẹ uhunmwuta ne u khian guan yan, kevbe evbọzẹe ne uhunmwuta nii na ru ekpataki.

VBENE A YA RU ẸRE HẸ:

Ta ẹmwẹ nọ gha gua emwa kpa, ne iran ya danmwehọ ruẹ. Ọ sẹtin gha re inọta, iyẹn, ifiẹmwẹ ra emwi nọ gele sunu.

Ọ ke sẹ ẹghẹ ne u khian ya guan, muẹn roro emwi ne u rẹnrẹn wẹẹ ọ gha yẹẹ emwa ni khian danmwehọ ruẹ. Ọna ẹre ọ khẹke ne u ya mu ẹmwẹ so.
Rhiẹre ladian uhunmwuta ne u khian guan yan. Vbe ẹmwẹ omuso ọghuẹ, gi uhunmwuta ọghe ọta ruẹ kevbe evbọ demu dewuarorua ma emwa ni danmwehọ ruẹ.
Gi iran rẹn evbọzẹe ne uhunmwuta nii na ru ekpataki. Gi ẹmwẹ ne u khian ta gha re nọ gha ru iyobọ ne emwa ni danmwehọ ruẹ. Ọ khẹke ne dọmwadọghẹ vbuwe iran rẹn vbene ọta ne u ya guan khian ya ru iyobọ ne iran hẹ.

Vbe u ghaa mu egbe ọta ruẹ, nọ egbuẹ wẹẹ, ‘De emwi eso ne etẹn ne ima gba rre iko werriẹ aro daa?’ Gi ẹmwẹ omuso ọghuẹ ginna emwi ne iran werriẹ aro daa.