IRUẸMWI 10

Gha Fi Urhu Werriẹ

Itan 8:4

UHUNMWU ẸMWẸ: Adeghẹ u na gha fi urhu werriẹ, ọ gha ya emwa rẹn ototọ ẹmwẹ ne u ta, ọ gha vbe gua iran kpa.

VBENE A YA RU ẸRE HẸ:

Ẹghẹ na ya tọn urhu mu kevbe ẹghẹ na ya gbe urhu kotọ. Ọ khẹke ne u tọn urhu mu vbe u gha khian niania uhunmwu ẹmwẹ ọghe ọta ruẹ kevbe deghẹ u hoo ne u gua ekhọe emwa ni danmwehọ ruẹ kpa. Erriọ ẹre ọ khẹke ne u vbe tọn urhu mu deghẹ u na gha tie ako Evbagbẹn Nọhuanrẹn nọ dekaan ibuohiẹn. Sokpan deghẹ u ma hoo ne u gbe ẹmwẹ ẹho rua fo, ne emwa mieke na gha kpẹho khẹ evbọ gha lelẹe, ra osi ọghe ẹmwẹ agbọn ẹre u guan kaan, u ghi gbe urhu kotọ.

Ghẹ wa gha tọn urhu mu vbe ẹghẹ hia, nẹ ghẹ do yevbe na miẹn wẹẹ te u gu emwa ni danmwehọ ruẹ gui. Ọ ma khẹke ne emwa ni danmwehọ ruẹ wa ya ruẹ ye ughe rhunmwuda vbene u ya guan.
Gha vbuọ urhu ruẹ vbe odẹ ughughan. U sẹtin vbuọ urhu ruẹ ghee odukhunmwu vbe u gha khian niania ẹmwẹ, ra vbe u gha khian guan kaan emwi nọ kpọlọ, deghẹ a ru ẹre vberriọ vbe urhuẹvbo ruẹ. Sokpan u ghi vbuọ urhu ruẹ ghee otọ deghẹ ẹmwẹ akhiẹ ẹre u ta ra te u guan kaan osi ọghe ẹmwẹ agbọn.
Ẹghẹ na ya khirhi ẹmwẹ kevbe ẹghẹ na ya fẹko nana ẹmwẹ. Guan zaizai deghẹ u na gha ta ẹmwẹ nọ gbe ọmwa otiti, sokpan u gha khian rhie uhunmwu ẹmwẹ ladian, u ghi fẹko gha nanaẹn.

Ghẹ guan vbe odẹ nọ gha ya emwa ni danmwehọ ruẹ ha. Deghẹ u na fẹko gha nana ẹmwẹ, ghẹ wa suẹn gha guan zaizai vbe udemwurri. Ghẹ khirhi ẹmwẹ gbe, na ghẹ do miẹn wẹẹ emwa ma ghi rẹn otọ emwi ne u ta.