Vbene A Ya Guẹ Sayọ Vbe Iwinna Ikporhu—Vbene A Ya Gbẹn E Lẹta Nọ Maan Hẹ

EVBỌZẸE NE Ọ NA RU EKPATAKI: Ebe 1 Kọrinti keghi re ọkpa vbe lẹta 14 ne ukọ e Pọl gbẹn gie Ivbiotu e Kristi, ne ọ ya rhie igiọdu ne iran. Ọmwa ghaa gbẹn e lẹta, ẹkpotọ keghi kie nẹẹn ne ọ ya hannọ ẹmwẹ ne ọ khian loo; ọmwa na gbẹn nene lẹta gie sẹtin vbe tie ẹre yan egbe yan egbe. E lẹta na gbẹn keghi re odẹ ọkpa nọ maan na ya kporhu ma etẹn vbuwe ẹgbẹe kevbe avbe ọse. Ọ keghi vbe kie ẹkpotọ ne ima ya sẹtin kporhu ma ọmwa ne ima ma sẹtin kporhu ma, ghee mwẹ ghee ruẹ. Vbe igiemwi, emwa eso rrọọ ni te mwẹ ẹkorhiẹnrhiẹnmwẹ ye ikporhu ọghe ima, sokpan ai miẹn iran vbe owa. Emwa eso sẹtin gha lọghọ na miẹn vbe ẹdogbo ne ima na kporhu, rhunmwuda ne iran na rre owa na wa kakabọ gbogba ga, iran sẹtin vbe gha rre ẹdogbo ne a gbe ekẹn lẹga, ra eke nọ rree ne orere ẹvbo. De emwi eso nọ khẹke ne ima kọ ye ekhọe, katekate deghẹ a na miẹn wẹẹ, ọmwa ne ima ma rẹn ẹdẹ ẹre ima khian gbẹn e lẹta gie?

VBENE A YA RUẸ HẸ:

• 

  Gi ẹmwẹ ne u khian ta vbe nene lẹta gha re ẹmwẹ ne u gha vbe sẹtin tama rẹn vbe u gha miẹn ọnrẹn. Vbe u gha wa da suẹn gha gbẹn nene lẹta, u ghi tama rẹn ọmwa ne u khin, kevbe evbọzẹe ne u na gbẹn nene lẹta gie ẹre. U sẹtin vbe gbẹn inọta ọkpa yọ, ne ọmwa nii khian gha mu roro, u ghi vbe tama rẹn vbekpae wẹbsait ọghe ima. Tama rẹn vbekpa ako ne ọ gha na sẹtin ruẹ e Baibol vbe intanẹt, nọ re Online Bible Study Lessons (nọ rre jw.org vbe urhuẹvbo ọghe Ebo); u sẹtin vbe tama rẹn vbekpae Baibol ne ima gu emwa ruẹ vbe owa, ra u ghi sunu yi ọkpa vbe uhunmwuta ni rre ebe ne ima ya gu emwa ruẹ e Baibol. U sẹtin rhie ekadi nọ dia ọmwa lae wẹbsait ọghomwa, ebe itie, ra asobọrrie ye uwu envelope ne u rhie nene lẹta yi

• Ghẹ talọ ẹmwẹ nọ bun gbe. Gi ẹmwẹ ne u khian ta vbe nene lẹta ye kuẹi, ne egbe ghẹ mieke na wọọ ọmwa ne u gbẹn ọnrẹn gie vbe ọ gha zẹ tie ẹre.​—⁠Ya ghee lẹta na ya ru igiemwi vbe ipapa 8

• U gha gbẹn ọnrẹn fo nẹ, u ghi gbarokotọ tie ẹre, ne u mieke na ghee ẹre deghẹ abakuru rhọkpa rrọọ, deghẹ ọ khuẹrhẹ na tie, ra deghẹ ọ rhiẹnrhiẹn; u ghi gia miẹn wẹẹ ẹmwẹ ne u gbẹn i khian ya ohu mu ọmwa ne u gbẹn ọnrẹn gie