Ẹmwẹ Nọ Gbae Kevbe Nọ Mu Ọmwa Ekhọe

Luk 1:3

UHUNMWU ẸMWẸ: Gha ta ẹmwẹ nọ gele mwẹ ẹzi, ne u yae ru iyobọ ne emwa ni danmwehọ ruẹ ya miẹn ẹmwata nọ rrọọ.

VBENE A YA RU ẸRE HẸ:

• Gualọ ehe ne u gha na miẹn ayahọmwaehọ ọghe ẹmwata. Gi ẹmwẹ ne u ta hẹnhẹn egbe yan Ẹmwẹ Ọghe Osanobua. Ọ gha maan sẹ deghẹ u na wa gha tiẹre ladian vbuwe Baibol. Deghẹ emwi ne avbe umẹwaẹn tae ẹre u hoo ne u sunu yi, ra ẹmwẹ na ya wewe vbe ugha iyẹn, ra emwi ẹwaẹn, ra ayahọmwaehọ ọvbehe, ọ khẹke ne u gualọ otọre wẹẹ ẹmwata ẹre nọ kevbe wẹẹ, ọ gbae.

• Loo ẹre ẹse ighẹ ayahọmwaehọ ne u miẹn. Adeghẹ u na gha rhan otọ ako ọghe evbagbẹn nọhuanrẹn, ọ khẹke nọ guaero ighẹ avbe uviẹn ni lẹga ako nii, ọ ghi vbe guaẹro uhunmwuta ọghe Baibol, kevbe emwi nọ rre avbe ebe ne ‘ọviẹn nọ gia mu ẹtin yan kevbe nọ fuẹro’ gbẹnnẹ ladian. (Mat 24:45) Deghẹ ebe ne emwa ọvbehe gbẹn ẹre u ke rhie ẹmwẹ ruẹ ladian, ghẹ fi igiuhunmwu nọ rrọọ werriẹ.

• Gu emwa ni danmwehọ ruẹ ziro. U gha tie evbagbẹn nọhuanrẹn, ra u na sunu ye ẹmwẹ nọ rre ebe ọvbehe nẹ, u ghi ya ẹwaẹn nọ ọta, ra u ghi ru igiemwi eso nọ gha ru iyobọ ne emwa ni danmwehọ ruẹ ya rẹn otọ ẹmwẹ nii.