Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
OCTOBER 7-13
EMWI EWE NI RRE UWU ẸMWẸ ỌGHE OSANOBUA | JEMS 3-5
“Gha Rhiẹre Ma Wẹẹ U Mwẹ Ẹwaẹn Nọ Ke Obọ Osanobua Rre”
(Jems 3:17, NW) Sokpan ẹwaẹn nọ ke odukhunmwu rre, keghi re vbe okaro, nọhuanrẹn, ọghe ọfunmwegbe, ọ mwẹ amuroro, ọ mwẹ ekhọe na ya họn ẹmwẹ, ọ vuọn ne itohan kevbe iwinna esi, ẹi gbe ewanmwẹ ghee obọ ọkpa, ẹi vbe ru ero.
cl 221-222 ¶9-10
Uwẹ Rhiẹre Ma Wẹẹ U Mwẹ “Ẹwaẹn Nọ Ke Odukhunmwu Rre” Ra?
9 “Nọhuanrẹn.” Ọmwa nọhuanrẹn keghi re ọmwa ne ẹi mwẹ ihuẹn ra ne ẹi mwẹ okan vbe egbe, uhiẹn ya sẹ egbe iziro ekhọe ọghẹe. E Baibol keghi rhilo ẹwaẹn kevbe ekhọe ginna egbe. Sokpan, ọmwa nọ mwẹ ekhọe ibisi i sẹtin gha mwẹ ẹwaẹn nọ ke odukhunmwu rre. (Itan 2:10; Matiu 15:19, 20) Vbọrhirhighayehẹ, ọ khẹke ne ima gha mwẹ ekhọe nọhuanrẹn, ọni nọ wẹẹ, zẹvbe emwa ni ma gba, ma ghi hia vbe odẹ ke odẹ ne ima ‘fi iyeke gbe ọkhọ, ne ima gha ru emwi esi.’ (Psalm 37:27; Itan 3:7) Ọna rhiema wẹẹ, ọmwa ke gha mwẹ ẹwaẹn nọ ke obọ Osanobua rre, te ọ khẹke nọ gha re ọmwa nọhuanrẹn. Rhunmwuda deghẹ ima ma huan vbe odẹ ọghe ikpakpa kevbe odẹ ọghe orhiọn, ma i khian sẹtin gha mwẹ avbe akpa nikẹre ne ẹwaẹn nọ ke obọ Osanobua rre ya ọmwa mwẹ.
10 “Ọfunmwegbe.” Ẹwaẹn nọ ke odukhunmwu rre keghi ru iyobọ ne ima ya gha gu emwa rrọọ vbuwe ọfunmwegbe. Ọfunmwegbe keghi re ọkpa vbe usun akpa ne orhiọn nọhuanrẹn ru iyobọ ne ima ya gha mwẹ. (Galatia 5:22) Nọnaghiyerriọ, ọ khẹke ne ima hia, ne ima ghẹ mu idobo ye “ọfunmwegbe” nọ ku eguọmwadia e Jehova hia kugbe. (Ẹfisọs 4:3) Ọ vbe khẹke ne ima hia vbene ẹtin ima sẹ ne ima ru adọlọ deghẹ ima vbe emwa gba mwẹ egbe ẹzọ. Vbọzẹe nọ na khẹke ne ima ru vberriọ? E Baibol khare wẹẹ: “Wa gha rrọọ vbuwe ọfunmwegbe. Osanobua ọghe ahoẹmwọmwa kevbe ọfunmwegbe gha vbe gu uwa gha rrọọ.” (2 Kọrinti 13:11) Ọna rhiema wẹẹ, ma ghaa gu emwa rrọọ vbuwe ọfunmwegbe ẹre Osanobua ọghe ọfunmwegbe khian na gu ima gha rrọọ. Ma ghaa ya obọ esi mu etẹn ne ima gba ga ẹre ima khian na gu e Jehova gha mwẹ asikẹgbe nọ maan. Vbe ima khian ya rhiẹre ma wẹẹ emwa ni gualọ ọfunmwegbe ẹre ima khin? Gi ima ghee igiemwi ọkpa.
(Jems 3:17, NW) Sokpan ẹwaẹn nọ ke odukhunmwu rre, keghi re vbe okaro, nọhuanrẹn, ọghe ọfunmwegbe, ọ mwẹ amuroro, ọ mwẹ ekhọe na ya họn ẹmwẹ, ọ vuọn ne itohan kevbe iwinna esi, ẹi gbe ewanmwẹ ghee obọ ọkpa, ẹi vbe ru ero.
cl 223-224 ¶12
Uwẹ Rhiẹre Ma Wẹẹ U Mwẹ “Ẹwaẹn Nọ Ke Odukhunmwu Rre” Ra?
12 “Ọ mwẹ amuroro.” A gha wẹẹ ọmwa mwẹ amuroro, vbe a yae kha? Zẹvbe ne emwa eso ni rri egie ebe khare, ẹmwẹ e Grik na ke zedu ẹmwẹ na nọ re “amuroro” vbe ebe Jems 3:17, keghi lọghọ na zedu ẹre. Ẹmwẹ ughughan vbe na ghee “ọmẹhẹ,” “izinegbe” kevbe “na daa ne ọmwa” ẹre avbe ọzedu eso loo ro ye ẹmwẹ na. Sokpan ẹmwẹ ne New World Translation loo ro ọre “amuroro.” Vbe ima khian ya sẹtin gha rhie akpa na ma hẹ?
cl 224-225 ¶14-15
Uwẹ Rhiẹre Ma Wẹẹ U Mwẹ “Ẹwaẹn Nọ Ke Odukhunmwu Rre” Ra?
14 “Ọ mwẹ ekhọe na ya họn ẹmwẹ.” Ifiẹmwẹ na, “ekhọe na ya họn ẹmwẹ” keghi re na ke urhuẹvbo e Grik zedu ẹre ladian. Ihe ọkpa ẹre ọ na ladian vbe Abọ Ọghe Baibol Na Ye Grik Gbẹn. Orhunmwu ọkpa nọ rri egie ebe khare wẹẹ, a keghi ya ẹmwẹ e Grik na “gie ivbiyokuo ni lele adia na rhirhi rhie ne iran.” Emwi na ye ẹmwẹ na kha ọre “na gha rherhe miẹn adia yi.” Ọmwa nọ mwẹ ẹwaẹn nọ ke obọ Osanobua rre keghi lele adia nọ rre Baibol vbe ẹghẹ hia. Ẹi re ọmwa nọ gha ta ẹmwẹ nẹ, ẹi kue fi ekhọe werriẹ vbe ọmwa ọvbehe gha rhie ibude nọ khẹke nẹẹn. Sokpan, ọ gha zẹ owẹ ihan, ọ ghi muegbe ne ọ ya fi ekhọe werriẹ vbe a gha ya e Baibol rhie adia nọ khẹke nẹẹn. Ọmwa vberriọ uwẹ khin ra?
“Ọ Vuọn Ne Itohan Kevbe Iwinna Esi”
15 “Ọ vuọn ne itohan kevbe iwinna esi.” Itohan keghi re akpa nọ hiunsi ne ẹwaẹn nọ ke odukhunmwu rre ya ọmwa mwẹ. Vbe ima ya rẹn hẹ? Rhunmwuda e Baibol khare wẹẹ ẹwaẹn vbenian “vuọn ne itohan.” Yẹrẹro wẹẹ te a ku itohan kevbe iwinna esi kugbe vbe ebe Jems 3:17. Te ọna wa gbe ye uviẹn rhunmwuda, emwi ne itohan mobọ demu vbe Baibol ọre ne a gha mwẹ ẹnina daa emwa ọvbehe, a ghi vbe muegbe ne a ya ru iyobọ ne iran. Ebe ọkpa khare wẹẹ itohan keghi re “agiẹngiẹn na mwẹ daa emwa ni rre uwu ọlọghọmwa, nọ ghi gua ima kpa ya ru iyobọ nọ khẹke ne iran.” Nọnaghiyerriọ, ọmwa nọ mwẹ ẹwaẹn nọ ke obọ Osanobua rre i re ọmwa nọ mwẹ ekhọe atosi. Sokpan, ọ keghi re ọmwa nọ mwẹ ekhọe agiẹngiẹn kevbe ẹnina. Vbe ima khian ya rhiẹre ma wẹẹ ima vuọn ne itohan?
(Jems 3:17, NW) Sokpan ẹwaẹn nọ ke odukhunmwu rre, keghi re vbe okaro, nọhuanrẹn, ọghe ọfunmwegbe, ọ mwẹ amuroro, ọ mwẹ ekhọe na ya họn ẹmwẹ, ọ vuọn ne itohan kevbe iwinna esi, ẹi gbe ewanmwẹ ghee obọ ọkpa, ẹi vbe ru ero.
cl 226-227 ¶18-19
Uwẹ Rhiẹre Ma Wẹẹ U Mwẹ “Ẹwaẹn Nọ Ke Odukhunmwu Rre” Ra?
18 “Ẹi gbe ewanmwẹ ghee obọ ọkpa.” Ọmwa nọ mwẹ ẹwaẹn nọ ke obọ Osanobua rre i khọ ẹko emwa ni ke ẹvbo ọvbehe rre, ẹi vbe roro ẹre wẹẹ ẹvbo irẹn ẹre ọ maan sẹ ọghe emwa ọvbehe. Ma gha gele gha mwẹ ẹwaẹn nọ ke obọ Osanobua rre, ma i khian gha gbe ewanmwẹ ghee obọ ọkpa. (Jems 2:9) Aro ọkpa ẹre ima khian ya gha ghee emwa ni yo owebe nọ yo kevbe emwa ni ma yo, emwa ni mwẹ ukpamuyọmọ nibun vbuwe iko kevbe iran ne ẹi mwẹ, emwa ni fe kevbe ne obọ ma sẹ ọre. Deghẹ Jehova hoẹmwẹ etẹn ne obọ ma sẹ ọre, ọ vbe khẹke ne ima hoẹmwẹ iran. Nọnaghiyerriọ, obọ ọkpa ẹre ọ khẹke ne ima ya gha mu emwa hia.
19 “Ẹi vbe ru ero.” Ẹmwẹ e Grik nọ re hy·po·kri·tesʹ ẹre a ghaa loo ya gie Ivbi e Grik kevbe Ivbi e Rom ni ghaa ku ikueta vbe ẹghẹ nẹdẹ. Iran ghi mu emwi gue aro vbe iran ghaa ku ikueta. Vbene ẹghẹ ya khian, a keghi suẹn gha loo ẹmwẹ e Grik na nọ re hy·po·kri·tesʹ ginna emwa ni “ru ero” ra ni mu emwi ne iran khin lẹre. Ma gha gele gha mwẹ ẹwaẹn nọ ke obọ Osanobua rre, obọ esi ẹre ima khian ya gha mu etẹn, ma ghi vbe ya ekhọe hia hoẹmwẹ iran.
Gualọ Emwi Ewe Ọghe Orhiọn
(Jems 4:5) Ghẹ gha roro ighẹ, ẹi mwẹ otọ emwi ne a yae kha ighẹ ne ebe na kha wẹẹ, “Orhiọn ne Osanobua rhie ye uwu ima, orriarria ọbanabe ẹre ọ vuọn rẹn.”
w08 11/15 20 ¶6
Avbe Olika Ẹmwẹ Ni Rre Ebe Jems Kevbe Ebe Pita
4:5—De ako ọghe Evbagbẹn Nọhuanrẹn ne Jems sunu yi mwa? Ẹmwẹ ne Jems tae i wa rre ako ọkpa vbe Baibol. Sokpan, ẹmwẹ ne ọ tae vbe ako na hẹnhẹn egbe yan ẹmwẹ nọ rre ebe Gẹnẹsis 6:5; 8:21; Itan 21:10; kevbe Galatia 5:17.
(Jems 4:11, 12) Wa ghẹ gha zan egbe etẹn mwẹ, ọmwakọmwa ne ọ zan ọtiọnrẹn ra ne ọ bu ohiẹn ọnrẹn, ọ zan nene uhi, ọ keghi vbe gha bu ohiẹn ọnrẹn. Adeghẹ uwẹ bu ohiẹn nene uhi, ẹghẹ nii, uwẹ i ghi re ne ọ bu vbene nene uhi khare, sokpan ne ọ bu ohiẹn ọnrẹn. 12 Osanobua ọrọre ne ọ yi uhi kevbe ne ọ bu ohiẹn. Irẹn ọkpa kẹkan ẹre ọ sẹtin miẹn emwi fan kevbe ne ọ vbe sẹtin fuẹn ọnrẹn rua. Vbe uwẹ a tie egbuẹ re yi, ne u na bu ohiẹn ihua?
w97 11/15 20-21 ¶8
Amuẹtinyan Keghi Ya Ima Mwẹ Izinegbe, Ọ Vbe Ya Ima Rhiegba Ye Erhunmwu Ne A Na
8 Ọ ma khẹke ne ima gha zan etẹn ne ima gba ga. Ma gha ru vberriọ, te ima ru orukhọ. (Jems 4:11, 12) Ọrheyerriọ, emwa eso keghi zan etẹn ne iran gba ga rhunmwuda iran roro ighẹ iran maan sẹ emwa ọvbehe. Eso vbe ru vberriọ rhunmwuda uyinmwẹ itengbemu ọghe iran. (Psalm 50:20; Itan 3:29) Emwi nọ demu ighẹ ẹmwẹ e Grik na ke zedu ẹmwẹ na nọ re ‘ozan’ ladian, ọre ikhẹko ra na ba ọmwa ifiẹzọ ohoghe. Ọna rhiema wẹẹ, ma ghaa zan ọtẹn ne ima gba ga, te ima bu ohiẹn gbe ẹre. Ma ghaa ru ọna, te ima zan uhi Osanobua, te ima vbe bu ohiẹn uhi ẹre. De odẹ nọ khin? Avbe iran ni maa emwa uhi kevbe avbe Farisi keghi ya ‘ẹkẹ vbe ero fi iyeke gbe Ẹmwẹ Osanobua,’ iran na gha ya ilele ọghe obọ iran bu ohiẹn emwa. (Mak 7:1-13) Ma ghaa zan ọtẹn ima ne Jehova hoẹmwẹ ọnrẹn, te ima ‘bu ohiẹn uhi Osanobua,’ odẹ vberriọ, te ima ghi kha wẹẹ uhi nii ma gba. Deghẹ ima na gha zan ọtẹn ima, ọ vbe rhiema wẹẹ, ma i lele uhi ahoẹmwọmwa.—Rom 13:8-10.
E Baibol Na Tie
(Jems 3:1-18) Etẹn mwẹ, ọ ma kei ne ima hia wa gha re emamwaemwi, rhunmwuda, wa rẹnrẹn ighẹ, ma ne emamwaemwi ẹre a ra ya obọ nọ tọn mu sẹ emwa ọvbehe vbe a gha bu ohiẹn. 2 Ẹghẹ hia ma hia ya ba emwi ku ru. Ọmwa nẹi ba ẹmwẹ ku ta, ọmwa ne ọ gbae nọ, ọ ghi vbe sẹtin gha ye egbe hia khian ẹse. 3 Te ima rroo ekagha ye ẹsin unu, ne iran miẹn ehe na gha ru vbene ima hoo, ẹghẹ nii, ma ghi sẹtin gha sua iran la ehe ne ima hoo. 4 Wa vbe ghee okọ nekhua, ghee vbene ọ digba sẹ nii, kevbe ne ẹhoho nọ bi ẹre khian a yan wo vbe egbe sẹ, emwi ne a ya dia okọ ye odẹ ne kherhe nii, ẹre a ya dia ẹre, ọ ghi vbe gha rrie ehe ne oziguẹ hoo nọ gha rrie. 5 Erriọ ẹre ẹmwẹ aranmwẹ ye, vbene ọ kanmwa sẹ nii, ọ ghi gha rhuọ orhuọ ni kọnkọn. U ghi ghee vbene ẹgbo kpọlọ hẹ ne ovbi ogiọnmwẹ erhẹn sẹtin mu erhẹn yi! 6 Te aranmwẹ yevbe erhẹn, agbọn nọ kulo nọ, ọ keghi rre ehe nọ khẹkẹe vbuwe egbe mwa, ọ keghi vbe gha wawa emwi dan gba egbe mwa hia, ọ ghi rhie erhẹn nọ ke ẹrinmwi erhẹn tobọ ẹre sẹ irẹn obọ, ya rhu erhẹn ye ehe ne ima ra ya egbe la hia, vbe ẹdẹ agbọn mwa. 7 Ọmwa sẹtin rrii avbe emwi nekpa ne Osanobua yi hia fẹẹrẹ, ọ ka vbe rrii ehia nẹ avbe aranmwẹ, ahianmwẹ, aranmwẹ ni họ ekẹn, kevbe avbe ehẹn. 8 Sokpan a ma he miẹn ọmwa ne ọ he sẹtin rrii aranmwẹ ẹdẹ. Emwi dan nọ, ẹi gia da yi, obi uwu dan hia ẹre ọ rrọọ. 9 Irẹn ni ẹre a ya kpọnmwẹ Nọyaẹnmwa kevbe Erha mwa. Irẹn ẹre a vbe ya rhovbiẹ emwa nagbọn ne iho mwa, emwa ne a yi zẹvbe ama Osanobua. 10 Ẹmwẹ ekpọnmwẹ kevbe ẹbọ ne a tie ghi gha tue ke unu ọkpa nii ladian. Etẹn mwẹ, ọ ma kei ne ọna gha sunu. 11 Ẹzẹ nọ lẹ amẹ nọ rhiẹnrhiẹn kevbe nọ rriara ke uhunmwu ẹzẹ ọkpa nii rre i rrọọ 12 Etẹn mwẹ, erhan ohọ i sẹtin mọ ọmọ oliv, vberriọ azara i sẹtin mọ ọmọ ohọ, erriọ zẹẹ, ẹzẹ umwẹ i sẹtin lẹ amẹ nẹi fian ladian. 13 Orhiọnkpa rrọọ vbuwe uwa ne ọ waan ne ọ vbe rẹn otọ ẹmwẹ ra? Wẹ ne uyinmwẹ ọnrẹn ne ọ maan rhie ẹre ma vbekpa iwinna esi ne ọ ya imuegberriotọ kevbe ẹwaẹn winna. 14 Sokpan, deghẹ te uwa mwẹ oya ọmwa da ọmwa vbe ekhọe uwa, ighẹ ẹko khọ uwa, emwi vbe da uwa, ọ ma ghi kei ne uwa gha hio, ne uwa vbe gha ba ẹmwata ohoghe. 15 Ẹi re ẹrinmwi egbe ẹwaẹn vberriọ ke rre, ọghe agbọn na nọ, ẹi re emwi orhiọn, ọghe esu nọ. 16 Rhunmwuda, ehekehe ne oya ọmwa da ọmwa kevbe emwi da mwẹ ye, evba ẹre a na miẹn olighi kevbe emwi dan hia. 17 Sokpan ẹwaẹn ne ọ ke odukhunmwu rre, keghi re vbe okaro, nọhuanrẹn, ọ keghi vbe re nọ fu ọmwa egbe rre, ne rhọkhọ kevbe ọghe ọse, ọ vuọn ne itohan, ọ keghi vbe viọ iwinna esi ladian, ẹi mwẹ ẹko nọ khọ ọmwa ra ẹkẹ vbe iwẹnwẹn. 18 Emwi ẹmwata ọrọre emwiorhọ ne a rhọọ, vbe emwiokọ ne iran ni mu igbinna, ye ọfunmwegbe kọ.
OCTOBER 14-20
EMWI EWE NI RRE UWU ẸMWẸ ỌGHE OSANOBUA | 1 PITA 1-2
“Ọ Kere Ne Uwa Gha Re Nọhuanrẹn”
(1 Pita 1:14, 15) Wa gha họn ẹmwẹ ne Osanobua, wa ghẹ gia miẹn wẹẹ avbe emwi ne uwa te rriarria ba ẹghẹ ne uwa na he re ne ọ ma rẹn ne a ye, ye gha ma uwa emwi ne uwa gha ru. 15 Sokpan, wa gha re nọhuanrẹn vbe emwi ne uwa ru hia zẹ vbene Osanobua ne ọ tie uwa vbe re nọhuanrẹn.
w17.02 9 ¶5
Adẹwerriegbe Keghi Re ‘Ẹse Nọ Gbae’ Nọ Ke Obọ E Jehova Rre
5 Ma gha sẹtin rhiẹre ma wẹẹ ima hoẹmwẹ e Jehova deghẹ ima na gha mwẹ uyinmwẹ esi. E Jehova hoo ne ima gha re emwa ni huanrẹn. (Tie 1 Pita 1:15, 16.) Ọna rhiema wẹẹ, e Jehova ọkpa ẹre ima gha ga, ma ghi vbe gha ya ekhọe hia họn ẹmwẹ nẹẹn. Ma keghi hia ne ima gha lele avbe uhi kevbe ilele ọghẹe, ọ gha khọn rẹn wẹẹ emwa zẹ ima kpokpo. Ma ghaa rhie uyinmwẹ esi ma, emwa ghi lekpae ima gha rhie uyi gie Jehova. Ẹghẹ nii, ma ghi do yevbe ukpa nọ baa vbuwe ebiebi. (Mat 5:14-16) Ne ima na re emwa ni huanrẹn, ọ khẹke ne odẹ ne ima ya loo arrọọ ọghe ima gha rhiẹre ma wẹẹ, uhi e Jehova ẹre ọ maan sẹ kevbe wẹẹ ọmwa ohoghe ẹre Esu khin. Ẹi mwẹ ima ma ru abakuru rhunmwuda, emwa ni ma gba ẹre ima khin, nọnaghiyerriọ, ẹghẹ ke ẹghẹ ne ima ya ru abakuru, ọ khẹke ne ima roro iro fi uyinmwẹ werriẹ, ma ghi vbe zobọ vbe emwi ke emwi ne ima ru ne ẹi yẹẹ e Jehova.—Psm 79:9.
(1 Pita 1:16) Rhunmwuda, ebe khare wẹẹ, “Ọ kere ne uwa gha re nọhuanrẹn rhunmwuda nọhuanrẹn ẹre imẹ vbe khin.”
lvs 77 ¶6
Odẹ Nọ Khẹke Ne Ima Ya Gha Sọyẹnmwẹ Egbe
6 E Jehova wẹẹ: “Ọ kere ne uwa gha re nọhuanrẹn rhunmwuda nọhuanrẹn ẹre imẹ vbe khin.” (1 Pita 1:14-16; 2 Pita 3:11) E Jehova gha miẹn ugamwẹ ọghe ima yi deghẹ ọ na gha re ugamwẹ nọhuanrẹn ra na ma gua. (Diuteronomi 15:21) Ugamwẹ ne ima rhie ne Jehova i khian sẹtin gha re nọhuanrẹn deghẹ ima na gha mwẹ obọ vbe uyinmwẹ eso ne ẹi yẹẹ e Jehova, vbe na ghee uyinmwẹ esakan, igbinnoguo kevbe orhiọn dan na gu mu obọ. (Rom 6:12-14; 8:13) Ẹi khian vbe ya ẹko rhiẹnrhiẹn e Jehova hiehie, deghẹ ima na gha ya avbe emwi vbenian sọyẹnmwẹ egbe. Uyinmwẹ vbenian sẹtin do ya ugamwẹ ne ima rhie ne Jehova khian nọ ma huan, ẹghẹ nii, ma i ghi sẹtin gha re ọsiọre.
Gualọ Emwi Ewe Ọghe Orhiọn
(1 Pita 1:10-12) Ẹmwẹ imiẹnfan na, ẹre avbe akhasẹ wa gbarokotọ gha nọ ẹmwẹ ọnrẹn, vbe gha gualọ otọ ẹre khian, iran keghi ta ẹmwẹ emwi na ne Osanobua ra ya we uwa yotọ. 11 Iran keghi hia ne iran gualọe miẹn, ẹghẹ nọ khian gha khin, kevbe vbene ọ gha ya rre hẹ, rhunmwuda, orhiọn e Kristi nọ rre uwu iran keghi ta ẹmwẹ ẹghẹ na, vbene iran na ta ẹmwẹ oya ne Jesu gha re yotọ, kẹ kevbe uyi nọ gha lele ẹre. 12 Osanobua keghi rhiema avbe akhasẹ na wẹẹ iwinna iran i re ọghe ẹmwẹ ọ maan ne egbe iran, sokpan ọ maan ne egbe uwa, vbe ẹghẹ ne iran na guan kaẹn ẹmwẹ ẹmwata na ne uwa họn nẹ nian. Avbe odibo iyẹn nọ maan nii, ya ẹtin orhiọn nọhuanrẹn ne a gie ke ẹrinmwi rre gha guan, iran ta ẹmwẹ ẹmwata na ma uwa. Avbe ẹmwata na keghi re egbe ne avbe odibo Osa tobọ iran gha hoo ne iran rẹn emwi ne a yae kha.
w08 11/15 21 ¶10
Avbe Olika Ẹmwẹ Ni Rre Ebe Jems Kevbe Ebe Pita
1:10-12. Avbe odibosa kegha hoo ne iran rẹn otọ ẹmwata ne kpataki ne avbe akhasẹ ọghe Osanobua gbẹn yotọ vbekpa iko ọghe Ivbiotu e Kristi ne a hannọ zẹ. Vbọrhirhighayehẹ, Osanobua ghi suẹn gha dia emwa ni rre iko na, avbe ẹmwata na keghi do dewarorua. (Ẹfis 3:10) Ọ khẹke ne ima ya egbe taa avbe odibosa, ma ghi hia ne ima gha gualọ otọ emwi, ne ima mieke na gha mwẹ ‘irẹnmwi nọ dinmwi ọghe Osanobua.’—1 Kọr 2:10.
(1 Pita 2:25) Wa keghi te yevbe avbe ohuan ni bibi odẹ, sokpan, banbanna nian, a viọ uwa bu Ọsuohuan kevbe Nọgbaroghe orhiọn uwa gha dee nẹ.
it-2 565 ¶3
Ọgbaroghe
Ọgbaroghe Ne Ọ Sẹre. Ọ gha kẹ emwi nọ rre ebe Aizaia 53:6 ẹre Pita ghaa guan kaẹn vbe ebe 1 Pita 2:25. E Pita keghi guan kaẹn “avbe ohuan ni bibi odẹ,” iyeke ọni, ọ na wẹẹ: “A viọ uwa bu ọsuohuan kevbe nọgbaroghe orhiọn uwa gha dee nẹ.” ‘Ọsuohuan kevbe ọgbaroghe’ ne Pita guan kaẹn mwa ọre Jehova, rhunmwuda ẹi re Jesu emwa ne Pita gbẹn ebe na gie yan gbe, sokpan, iran keghi lekpae Jesu werriegbe bu e Jehova nọ re Ọsuohuan Nọ Sẹre gha dee. (Psm 23:1; 80:1; Jer 23:3; Ezik 34:12) E Jehova ẹre ọ vbe re ọgbaroghe ọghomwa, rhunmwuda irẹn ẹre ọ zanzan ekhọe ima ghee. (Psm 17:3) E Jehova gha zanzan ekhọe emwa eso ghee, ọ ghi bu ohiẹn gbe iran. Vbe igiemwi, e Jehova keghi buohiẹn gbe emwa ni rre Jerusalẹm vbe orre nokaro, rhunmwuda, ọ ghi zanzan ekhọe iran ghee, ọ na bẹghe ẹre wẹẹ iran ma muegbe ne iran ya họn ẹmwẹ nẹẹn. (Luk 19:44) Sokpan, e Jehova gha vbe zanzan ekhọe emwa eso ghee, ọ ghi fiangbe iran, zẹvbe nọ khian gha ye ne iran ni gha “rho Osanobua vbe ẹdẹ ne ọ ra rre.”—1 Pit 2:12.
E Baibol Na Tie
(1 Pita 1:1-16) E Pita ne ukọ Jesu Kristi ẹre ọ gbẹn ebe na gie emwa ne Osanobua hannọ zẹ ni ragha zẹ vbe emwa ne ọlọghọmwa yae lẹ hin owa rre, gba ikinkin ọghe Pọntus, Galatia, Kapadonia, Esia kevbe Bitinia. 2 Te a hannọ uwa zẹ vbe emwamwa ekhọe ọghe Osanobua ne Erha, ne orhiọn rẹn ye uwa khian emwa ni huanrẹn, ne uwa gha họn ẹmwẹ ne Jesu Kristi, ne esagiẹn ọnrẹn kpe uwa iruẹn kua. Ẹseọhẹ kevbe ọfunmwegbe gha re ọghe uwa vbene ọ vuọn sẹ omwa foo. 3 Wa gie ima rhie ekpọnmwẹ ne Osanobua ne Erha kevbe Nọyaẹnmwa Jesu Kristi! Rhunmwuda itohan rẹn nọkhua, ọ keghi rhie arrọọ ọghe ọgbọn ne ima, vbekpa ne ọ na huẹn Jesu Kristi kpa vbe orinmwi. Ọ na rhie idaehọ ne ọ ma wu vuọn ima. 4 Rhunmwuda ọni, te ima ghi rhie aro ye odẹ wẹẹ, ọ gha sẹ ima obọ vbe afiangbe ọrhẹnrhẹn ne Osanobua rhie khẹ emwa rẹn. Ọ rhie ẹre hin rre khẹ uwa vbe ẹrinmwi, ehe nẹi na sẹtin kẹkẹ ra nọ rhia, ra nọ fafaaa. 5 Ọghe uwa ẹre nọ, wa ne a lekpa ẹseọhẹ ya ẹtin Osanobua rhie lẹre, vbe ne ai na mwẹ ẹbe, vbe uwu ne uwa na mudia khẹ imiẹnfan, ne a gha rhie ne emwa hia miẹn vbe ẹdẹ ufomwẹ ẹghẹ. 6 Wa gie ọyẹnmwẹ ọna gha sẹ uwa, agharhemiẹn wẹẹ ẹi mwẹ wa ma gha mwẹ ẹkorriaramwẹ vbe ẹghẹ kherhe, rhunmwuda edanmwẹ ughughan ne u wa miẹn. 7 Emwi ne ọ na sunu vberriọ ọrọre ne a miẹn ehe na ghee adeghẹ iyayi ẹmwata ẹre uwa mwẹ. Igoru ne a miẹn wẹẹ ọ sẹtin rhia, uhin ighẹ te a ye ya erhẹn danmwẹ ọnrẹn ghee, rhunmwuda ọni, iyayi uwa nọ ya ọgbingho ghan sẹẹ igoru, ẹi mwẹ a ma danmwẹ ọnrẹn ghee, nọ miẹn ehe na tọ. Erriọ uwa gha na miẹn urhomwẹ, ọghọ, kevbe uyi rhie vbe ẹdẹ ne Jesu Kristi gha ye egbe ne a miẹn. 8 Egbe ne uwa ma rhe ya miẹn ọre aro, wa ye hoẹmwẹ ọnrẹn, egbe ne uwa ma he rhe ye miẹn ọnrẹn nian, wa ye yaeyi, wa keghi ya ọyẹnmwẹ nọkhua, ọghe uyi ne ẹi gia gie, sọyẹnmwẹ. 9 Rhunmwuda emwi ne uwa rhunmwuda ẹre yayi, sẹ uwa obọ nẹ, ọni nọ wẹẹ, imiẹnfan orhiọn uwa. 10 Ẹmwẹ imiẹnfan na, ọre avbe akhasẹ wa gbarokotọ gha nọ ẹmwẹ ọnrẹn, vbe gha gualọ otọ ẹre khian, iran keghi ta ẹmwẹ emwi na ne Osanobua ra ya we uwa ye otọ. 11 Iran keghi hia ne iran gualọe miẹn, ẹghẹ nọ khian gha khin, kevbe vbene ọ gha ya rre hẹ, rhunmwuda, orhiọn e Kristi ne ọ rre uwu iran keghi ta ẹmwẹ ẹghẹ na, vbene iran na ta ẹmwẹ oya ne Jesu gha re ye otọ, kẹ kevbe uyi ne ọ gha lelẹe. 12 Osanobua keghi rhie maan avbe akhasẹ na wẹẹ iwinna iran i re ọghe ẹmwẹ ọ maan ne egbe iran, sokpan ọ maan ne egbe uwa, vbe ẹghẹ ne iran na guan kan ẹmwẹ ẹmwata na ne uwa họn nẹ nian. Avbe odibo iyẹn nọ maan nii, ya ẹtin orhiọn nọhuanrẹn ne a gie ke ẹrinmwi rre gha guan, iran ta ẹmwẹ ẹmwata na ma uwa. Avbe ẹmwata na keghi re egbe ne avbe odibo Osa tobọ iran gha hoo ne iran rẹn emwi ne a yae kha. 13 Rhunmwuda ọni khekherriọ, wa mu ekhọe uwa egbe yotọ ne a ya fian emwi gbua. Wa rhie vbẹ ne uwa vbe rhie ekhọe uwa aro ye odẹ fẹẹrẹ gha khẹ afaingbe ne a gha rhie ne uwa vbe ẹdẹ ne Jesu Kristi gha ya egbe ladain. 14 Wa gha họn ẹmwẹ ne Osanobua, wa ghẹ gie a miẹn wẹẹ avbe emwi ne uwa te rriarria ba ẹghẹ ne uwa na he re ne ọ ma rẹn ne a ye, ye gha maa uwa emwi ne uwa gha ru. 15 Sokpan, wa gha re ne ọ huanrẹn vbe emwi ne uwa ru hia zẹ vbene Osanobua ne ọ tie uwa vbe re ne ọ huanrẹn. 16 Rhunmwuda, ebe khare wẹẹ, “Ọ kere ne uwa gha re ne ọ huanrẹn rhunmwuda ne ọ huanrẹn ọre imẹ vbe khin.”
OCTOBER 21-27
EMWI EWE NI RRE UWU ẸMWẸ ỌGHE OSANOBUA | 1 PITA 3-5
“Ufomwẹ Emwi Hia Sẹ Otọ Fo Nẹ”
(1 Pita 4:7) Ufomwẹ emwi hia sẹ otọ fo nẹ. Wa gha zinegbe emwi, wa ghi vbe khẹ yegbe, ne uwa sẹtin gha na erhunmwu.
w13 11/15 3 ¶1
“Wa Ghi Vbe Khẹ Yegbe, Ne Uwa Sẹtin Gha Na Erhunmwu”
Orhunmwu ọkpa ne ọ ka gha khẹ odẹ vbe asọn keghi kha wẹẹ: “Ẹghẹ nọ ghi lọghọ sẹ ne a ya khẹ odẹ vbe asọn ọre vbe ẹdẹ gha khian ghi gbe.” Emwa nibun ni winna iwinna asọn gha vbe sẹtin sosẹ yọ wẹẹ, ẹmwata ẹre ọmwa na tae. Egbe ọlọghọmwa vbenian ẹre Ivbiotu e Kristi vbe ẹdẹnẹrẹ wa werriẹ aro daa, rhunmwuda, te agbọn Esu na khian ghi sẹ ufomwẹ, ọni ẹre ọ si ẹre ne ẹghẹ ne ima ye na, na re ẹghẹ nọ ghi wegbe sẹ ke na ya bu agbọn tu agbọn gha dee. (Rom 13:12) Ẹi re ẹghẹ na ẹre ima khian ya suẹn gha vbiẹ! Sokpan, te ọ khẹke ne ima gha re emwa ni mwẹ ẹwaẹn, ma ghi vbe “khẹ yegbe, ne [ima] sẹtin gha na erhunmwu.”—1 Pit 4:7.
(1 Pita 4:8) Ke odaro emwi hia, wa gha ya ẹkoata hoẹmwẹ egbe, rhunmwuda, ahoẹmwọmwa gbe ebe gue orukhọ nibun.
w99 4/15 22 ¶3
Vbene Ima Khian Ya Rẹn Ako Ne Ima Na Vburriẹ Vbe Odẹ Ọghe Orhiọn Kevbe Odẹ Ne Ima Khian Ya Sẹtin Ru Afiwerriẹ Nọ Khẹke
Ọ ma khẹke ne ima mianmian ẹmwẹ ne ukọ e Pita tae. Ọ khare wẹẹ: “Ufomwẹ emwi hia sẹ otọ fo nẹ. Wa gha zinegbe emwi, wa ghi vbe khẹ yegbe, ne uwa sẹtin gha na erhunmwu. Ke odaro emwi hia, wa gha ya ẹkoata hoẹmwẹ egbe, rhunmwuda, ahoẹmwọmwa gbe ebe gue orukhọ nibun.” (1 Pita 4:7, 8) Ugbẹnso, abakuru ọghomwa kevbe ọghe emwa ọvbehe sẹtin mu idobo ye ima egbe, ọ ghi do khian okuta irhuawẹ ne ima. Esu rẹnrẹn wẹẹ ọna gha sẹtin sunu, ọni ẹre ọ si ẹre ne ọ na hia nọ si ighaegbe ye uwu ẹkpo ima. Nọnaghiyerriọ, te ima gha hia ne ahoẹmwọmwa ne ima mwẹ ne etẹn ima gha “gbe ebe gue abakuru” ne iran ru daa ima, odẹ vbenian ma i khian “rhie ẹghẹ ne Esu.”—Ẹfisọs 4:25-27.
(1 Pita 4:9, NW) Wa gha mu ọghọ ye etẹn egbe, vbe ne ai na gui ẹzọ egbe.
Te Ọ Khẹke Ne A Gha Mu Ọghọ Ye Emwa Egbe!
2 Vbe uwu ẹghẹ nọ wegbe nii, e Pita keghi rhie ibude kpataki ne etẹn nii. Ọ keghi kha wẹẹ: “Wa gha mu ọghọ ye etẹn egbe.” (1 Pit 4:9, NW ) Evba yae kha ighẹ ẹmwẹ e Grik ne a ke zedu ẹmwẹ na ladian, “mu ọghọ ye emwa egbe” ọre “na gha ya obọ esi mu erhunmwuyẹn.” Sokpan, yẹrẹro wẹẹ, adia ne Pita rhie ne Ivbiotu e Kristi vbe orre nokaro ọre ne iran gha mu ọghọ ye “etẹn” egbe, ọni ọre etẹn ne iran gba ga. De emwi ne iran khian ghi lae miẹn deghẹ iran na gha mu ọghọ ye etẹn iran egbe?
3 Ọ gha ya iran gha mwẹ akugbe. Uwẹ vbe vbo? U ye yerre, ọyẹnmwẹ nọ ghaa sẹ ruẹ vbe ọtẹn gie na tie ruẹ gha die owa re ra? Ai mianmian ẹdẹ vberriọ. Ẹmwata nọ wẹẹ, u gha mu ọghọ ye ọtẹn egbe, ọ ghi ya uwa sikẹ egbe sayọ. Ma ghaa mu ọghọ ye etẹn egbe, ẹre ima na gele rẹn iran ẹse. E Pita keghi rhie ibude ne etẹn vbe orre nokaro ne iran sikẹ egbe khuankhuankhuan zẹ vbene emwi ya gha wegbe sayọ. Erriọ vbe khẹke ne ima vbe gha gu etẹn mwẹ asikẹgbe ne khuankhuankhuan “vbe ẹdẹ okiekie” ne ima ye na.—2 Tim 3:1.
Gualọ Emwi Ewe Ọghe Orhiọn
(1 Pita 3:19, 20) Vbuwe a rrọọ zẹvbe orhiọn nii, ẹre ọ na ya kporhu ma avbe orhiọn ne a munọ ye eghan. 20 Ena keghi re orhiọn iran ni ma họn ẹmwẹ ne Osanobua vbuwe ẹghẹ ne ọ na ya izinegbe mudia vbe Noa ka okọ. Ibozẹghẹ ni ghaa rre uwu okọ nii—iran erẹnrẹn nọ, a keghi lekpa amẹ miẹn iran fan.
w13 6/15 23
Inọta Ne Emwa Nọ
E Baibol wẹẹ e Jesu kporhu ma “avbe orhiọn ne a munọ ye eghan.” (1 Pit 3:19) Vbe a ya ọna kha?
▪ Ukọ e Pita ya ima rẹn wẹẹ, avbe orhiọn na keghi re orhiọn ni “ma họn ẹmwẹ ne Osanobua vbuwe ẹghẹ ne ọ na ya izinegbe mudia vbe Noa ka okọ.” (1 Pit 3:20) Emwa orhiọn ni deba Esu sọtẹ ẹre Pita ghaa guan kaẹn. E Jud vbe ya unu kaẹn avbe odibosa “ni ma gbe ye egbe, vbe ehe ne a rhie ẹtin ne iran sẹ, sokpan, iran keghi kpa sẹ ehe ne a rhie ne iran gha ye rre.” Ọ na vbe kha wẹẹ, “Osanobua hẹ iran ku uwu ebiebi nọ rre ototọ, a ya eghan etẹbitẹ de iran khẹ Ẹdẹ ne ẹdẹrriọ ne a gha bu abe gbe iran.”—Jud 6.
De vbene odibo eso ya sọtẹ hẹ vbe ẹghẹ e Noa? Ọ te sẹ ẹghẹ okpamẹ nọ rhọọ re vbe ẹghẹ e Noa, odibosa eso keghi mu akpa ọghe emwa nagbọn yọ, iran na gha die uhunmwu otagbọn. Sokpan, Osanobua ma rhie asẹ vberriọ ne iran. (Gẹn 6:2, 4) Iran na vbe suẹn gha viọ ikhuo rọnmwẹ. Ai ghẹ ru ẹre iran ru rhunmwuda, e Jehova ma te yi avbe odibo ne iran gha gu ikhuo ru emwi ọdọ vbe amwẹ. (Gẹn 5:2) Osanobua gha guọghọ avbe odibo dan na vbe ọ gha sẹ ẹghẹ. Sokpan, zẹvbe ne Jud khare, avbe odibo dan na wa rre “uwu ebiebi,” vbe na guan na. Rhunmwuda ọni, ọ gha gia na kha wẹẹ, eghan ẹre iran ye vbe odẹ ọghe orhiọn.
De ẹghẹ ne Jesu ya kporhu ma “avbe orhiọn ne a munọ ye eghan” kevbe wẹẹ, de vbene ọ ya kporhu ma iran hẹ? E Pita khare wẹẹ, iyeke vbe a huẹn Jesu kpaegbe nẹ zẹvbe ‘ọmwa orhiọn,’ ẹre emwi na ya sunu. (1 Pit 3:18, 19) E Pita vbe kha wẹẹ, e Jesu “kporhu ma avbe orhiọn.” Ẹmwẹ ne Pita loo ro mwa rhiẹre ma wẹẹ, e Jesu kporhu ma avbe orhiọn dan na nẹ, a te miẹn wẹẹ e Pita gbẹn ebe nokaro ọghẹe. Ọ khọ wẹẹ, vbe Jesu ghi rhiọkpaegbe nẹ, ọ na ya tama avbe orhiọn dan nii vbekpae ọfuan nọ khẹ iran vbe odaro. Ẹi re te Jesu ya kporhu ma iran ne iran fi werriẹ. Sokpan, ikporhu ọghe ibuohiẹn ẹre Jesu ya kpe ma iran. (Jona 1:1, 2) Jesu keghi ya ẹkoata ga e Jehova ya sẹ ẹdẹ uwu. Iyeke ọni, Osanobua na huẹn ọnrẹn kpaegbe, nọ rhiema wẹẹ Esu i mwẹ asẹ ọkpa vbe egbe Jesu. Nọnaghiyerriọ, e Jesu gele mwẹ asẹ ne ọ ya buohiẹn avbe odibo ni sọtẹ daa e Jehova.—Jọn 14:30; 16:8-11.
Jesu gha ya ọgiọrọ gbalọ Esu kevbe avbe odibo ni sọtẹ, ọ ghi munọ iran fi uvun ne ẹi mwẹ otọ. (Luk 8:30, 31; Arhie 20:1-3) Ọ te sẹ ẹghẹ nii, uwu ebiebi ọghe orhiọn ẹre avbe odibo ni sọtẹ na khian gha ye kevbe wẹẹ, ọfuan nọ khẹ iran vbe odaro i sẹtin la iran ban.—Arhie 20:7-10.
(1 Pita 4:6) Ọna ẹre ọ si ẹre ne a na vbe ya kporhu nene iyẹn nọ maan ma iran ni wulo nẹ, iran ne a bu ohiẹn ọnrẹn nẹ vbe ne a vbe bu ohiẹn emwa hia vbekpa ọghe egbe. A kporhu ẹre ma iran, ne iran miẹn ehe na gha loo ẹdagbọn iran vbe ọghe orhiọn [vbe odaro] Osanobua.
w08 11/15 21 ¶8
Avbe Olika Ẹmwẹ Ni Rre Ebe Jems Kevbe Ebe Pita
4:6—Avba re “iran ni wulo nẹ” ne a kporhu “iyẹn nọ maan ma”? Iran na keghi re emwa orukhọ ra emwa ni wulo vbe odẹ ọghe orhiọn, a te miẹn wẹẹ iran họn iyẹn nọ maan. (Ẹfis 2:1) Iran ghi họn iyẹn nọ maan nẹ, iran keghi yayi, iran na ghi suẹn gha ‘loo ẹdagbọn iran vbe odẹ ọghe orhiọn.’
E Baibol Na Tie
(1 Pita 3:8-22) Ne I ya fian ẹre ifi: wa gie vbene uwa ziro kevbe vbene emwi ye vbe ekhọe uwa, gha ya kugbe. Wa gha hoẹmwẹ egbe, zẹvbe etentẹn ne ikpia. Wa gha mwẹ itohan ghee egbe, ne uwa vbe gha mu egbe rriotọ ne egbe. 9 Wa ghẹ ya ọkhọ ha osa ọkhọ, ra ne a ya ihẹn ha osa ihẹn, sokpan wa gha ya erhunmwu afiangbe ha osa, rhunmwuda, ẹghẹ ne Osanobua na tie uwa, afiangbe ẹre ọ wẹẹ irẹn ra rhie ne uwa. 10 Zẹ vbene ebe khare, “Ọmwa ne ọ hoo ne irẹn rri orhiẹnrhiẹn agbọn, ne irẹn vbe tọọ, wẹẹ ne ọ ghẹ ghi ta ẹmwẹ dan, ne ọ ghẹ vbe ta ohoghe. 11 Ọ ghi zobọ vbe emwi dan do gha ru emwi esi. Ọ ghi gha gualọ ọfunmwegbe, ọ ghi gha zọ uhio ẹre khian. 12 Rhunmwuda, te Nọyaẹnmwa wa rhie aro ye egbe ọmwata, ọ ghi gha họn erhunmwu ẹnrẹn vbe ẹghẹ hia. Sokpan, ọ ghi mu aro daa iran ni ru emwi dan.” 13 Gha ọ ra ru uwa emwi dan yi adeghẹ uwa mu aro ye ẹmwẹ ne uwa gha ru emwi esi? 14 Sokpan, gie a kha ighẹ te uwa gele rri oya ye ẹmwẹ emwi esi ne uwa ru, ọ ma kin uwa! Wa ghẹ fian afianma ọmwa rhọkpa, wa ghẹ vbe si osi. 15 Sokpan, wa gha ya ọghọ ne Kristi vbuwe ekhọe uwa, ne uwa vbe yae ru Nọyan uwa. Mu egbe vbe ẹghẹ hia ne u ya rhie ewanniẹn ne ọmwa ne ọ rhirhi nọ ruẹn, wẹ ne u rhan otọ idaehọ ne u mwẹ. 16 Sokpan u ghi ru ẹre ọghe ọghọ vbe ute. Ghẹ gie ekhọe ruẹ bu ohiẹn gbuẹ hiehie, ai rẹn deghẹ te a ghi ya ukpẹ sankan uwa, ọmwakọmwa ne ọ ya unu rhia uwa, vbekpa uyinmwẹ ne uwa yin, zẹ vbe ne ọ lele Kristi, ekhue ghi mu iran ba ẹmwẹ ne iran ta. 17 Rhunmwuda, a rri oya ba ẹmwẹ uyinmwẹ esi, adeghẹ Osanobua hoo ẹre ye vberriọ, ọre ọ maan sẹ, rhunmwuda ighẹ a ru emwi dan. 18 Rhunmwuda, Kristi tobọ ẹre wu ne uwa, ọ wu ye orukhọ, uhukpa ne emwa hia, ọmwa esi wu ne emwa dan, ne ọ miẹn ehe na viọ uwa gie Osanobua. A gbe ẹre rua vbekpa ọghe egbe, a keghi huẹn ọnrẹn kpaegbe vbekpa ọghe orhiọn. 19 Vbuwe a rrọọ zẹvbe orhiọn nii, ẹre ọ na ya kporhu ma avbe orhiọn ne a munọ ye eghan. 20 Ena keghi re orhiọn iran ni ma họn ẹmwẹ ne Osanobua vbuwe ẹghẹ ne ọ na ya izinegbe mudia vbe Noa ka okọ. Ibozẹghẹ ni ghaa rre uwu okọ nii—iran erẹnrẹn nọ, a keghi lekpa amẹ miẹn iran fan. 21 Amẹ na keghi re emwikemwi ne a ya gie isamẹ nọ miẹn uwa fan bannanna nian, ẹi re vbekpa nọ na kpe iruẹn nọ rre ikinnegbe kua, sokpan vbekpa eyan ne a ya ekhọe nọ ma bu abe gbe ọmwa yan ma Osanobua. Te isamẹ lekpa arhiọkpaegbe Jesu Kristri miẹn uwa fan. 22 Ọmwa ne ọ kpaa gha rrie ẹrinmwi nẹ, ọ keghi vbe rre obọ erha ọmwa Osanobua, ehe ne ọ na khaemwisẹ yan avbe odibo Osa hia kevbe avbe ọdakha ni rre ẹrinmwi kevbe avbe ẹtin.
OCTOBER 28–NOVEMBER 3
EMWI EWE NI RRE UWU ẸMWẸ ỌGHE OSANOBUA | 2 PITA 1-3
“Ghẹ Mianmian Wẹẹ Ẹdẹ Ọghe Jehova Sotọ Nẹ”
(2 Pita 3:9, 10) Zẹ vbene emwa eso roro ẹre, ẹi re te Nọyaẹnmwa ghi si ẹre kpẹe vbe otọ ighẹ emwi ne ọ wẹẹ irẹn ra ru, sokpan te ọ zin egbe rhunmwuda uwa, rhumwuda, irẹn i hoo ne ọmwa rhọkpa fuan, sokpan ọ hoo ne emwa hia fiwerriẹ hin orukhọ iran rre. 10 Sokpan ẹdẹ Enọyaẹnmwa gha rre zẹvbe oyi. Vbe ẹdẹnẹdẹrriọ, uwu owogho nọ khẹkhẹ ehọ, ọre a ra na ho iso bẹkun, avbe emwi ni wie yo wie rre vbe ideghedeghe aro iso ghi giẹn ruan, ehia ghi la ọrhiae rrie, agbọn kẹ kevbe emwi ni rre uwu ẹre hia, ghi khian ne a ho bẹkun.
w06 12/15 27 ¶11
E Jehova Gha “Bu Ohiẹn” Ata
11 Vbe Jesu a yae kha, ne ọ na wẹẹ, e Jehova gha “zẹgiẹ” do buohiẹn? E Baibol ya ima rẹn wẹẹ, agharhemiẹn wẹẹ, e Jehova mwẹ ẹbo ‘izinegbe,’ ọ gha rherhe do buohiẹn vbe ẹghẹ nọ khẹke. (Luk 18:7, 8; 2 Pita 3:9, 10) Uhukpa ẹre emwa dan ya guọghua vbe ẹghẹ ne okpamẹ ya rhọọ vbe ẹghẹ e Noa. Erriọ vbe gha ye vbe ẹghẹ e Lọt. Erhẹn keghi ke ẹrinmwi rre, ọ na fuẹn emwa dan hia. Jesu vbe kha wẹẹ: “Erriọ khian gha ye vbe ẹdẹ ne Ovbi ọmwa gha ye egbe ladian.” (Luk 17:27-30) Ọ gha sẹ ẹghẹ na kha na, ọfuan gha rhuan emwa dan “vbe udemwurri.” (1 Tẹsalonaika 5:2, 3) Rhunmwuda ọni, ọ khẹke ne ima gha mwẹ ilẹkẹtin wẹẹ, e Jehova i khian kue ne agbọn Esu na ya ikpẹdẹ ọkpa gberra ẹghẹ nọ khẹke.
(2 Pita 3:11, 12) Vbene a ghi na miẹn nian wẹẹ, erriọ ẹre a ra ya fuẹn avbe emwi na hia rua, de egbe emwa nọ kere ne uwa gha khin? Wa gie ẹdagbọn uwa gha re ni huanrẹn, kevbe ne a ya fi ohan ne Osanobua, 12 vbuwe ne uwa na mudia khẹ ẹdẹ Osanobua, wa loo ẹtin uwa hia ne a miẹn wẹẹ ọ rherhe rre. Ẹdẹ ne a gha giẹn ọnrẹn rua ighẹ ẹrinmwi, ọ ghi gha re ne a fuẹn rua, owowo ghi ranran iran rua ighẹ avbe emwi ni wie yo wie rre vbe ideghedeghe aro iso.
w06 12/15 19 ¶18
‘Ẹdẹ Ọghe Jehova Sikẹ Otọ Nẹ’
18 Ẹi khabe ne ukọ e Pita na tama ima ne ima ghẹ mianmian wẹẹ ‘ẹdẹ e Jehova’ sotọ nẹ! Vbe ima khian ya rhiẹre ma wẹẹ ima mu egbe khẹ ẹdẹ e Jehova? Ọ khẹke ne ima “gie ẹdagbọn [ima] gha re ni huanrẹn, kevbe ne a ya fi ohan ne Osanobua.” Ọni nọ wẹẹ, ma ghi gha mwẹ ọghae vbe iwinna ugamwẹ. (2 Pita 3:11, 12) Ma gha ru vberriọ, ọ gha ru iyobọ ne ima ya rhie aro ye odẹ gha khẹ ‘ẹdẹ ọghe Jehova.’ Ukọ e Pita vbe tama ima ne ima ‘loo ẹtin ima hia ne a miẹn wẹẹ ẹdẹ ọghe Osanobua rherhe rre.’ Vbene ẹmwata, ma i mwẹ ẹtin ne ima khian ya ru ẹre nọ rherhe rre. Sokpan ma gha rhiegba ye ugamwẹ e Jehova, vbene ima te rẹn, ẹdẹ ọghe Jehova sẹ nẹ.—1 Kọrinti 15:58.
Gualọ Emwi Ewe Ọghe Orhiọn
(2 Pita 1:19) Rhunmwuda ọni, ẹre ima na mwẹ amuẹtinyan ẹsẹse vbe ọghe orhu ne avbe akhasẹ do kpee. Emwi nọ gha ke ne uwa nọ, ne uwa mu aro ye ẹmwẹ ọnrẹn, rhunmwuda te ọ ye vbe ukpa nọ baa vbe ehe nọ so ebiebi rhinrin ẹdẹ te do gbe, ne uwanmwẹ orhọnmwẹ owiẹ wan vbuwe ekhọe uwa.
w08 11/15 22 ¶2
Avbe Olika Ẹmwẹ Ni Rre Ebe Jems Kevbe Ebe Pita
1:19—De ọmwa nọ re “orhọnmwẹ owiẹ,” de ẹghẹ ne ọ ya rhiegbe ma kevbe wẹẹ, vbe ima ya rẹn hẹ wẹẹ, ọ rhiegbe ma nẹ? E Jesu suẹn gha kha nẹ zẹvbe Ọba, ọ ke do gha re “orhọnmwẹ owiẹ.” (Arhie 22:16) Ukpo 1914, ẹre Jesu suẹn gha kha zẹvbe Ọba vbe ẹrinmwi, ukpo na, ẹre ẹdẹ okiekie suẹn rẹn. Ọ mwẹ asẹ ọkpa ne Jesu ya fi egbe werriẹ vbe ọ ye rre agbọn. Ọna keghi rhiẹre ma, uyi ne Jesu khian gha mwẹ kevbe ukpo Ọba nọ khian gha ye vbe odaro. Ọ vbe ya ima mwẹ ilẹkẹtin wẹẹ, ẹmwẹ akhasẹ hia ne Jehova tae gha mwẹ amusẹ. Ma gha kọ ena hia ye orhiọn, ọ ghi ya ima gha sọyẹnmwẹ, ọ vbe ya ima gha mwẹ ọnrẹn vbe orhiọn wẹẹ, Orhọnmwẹ Owiẹ rhiegbe ma nẹ.
(2 Pita 2:4, NW) Rhunmwuda Osanobua ma yabọ avbe odibo ni ru orukhọ, sokpan te ọ filo iran ku uwu e Tarʹta·rus, ehe ne a na khui iran ye uwu ebiebi gha khẹ ẹdẹ na khian buohiẹn iran.
w08 11/15 22 ¶3
Avbe Olika Ẹmwẹ Ni Rre Ebe Jems Kevbe Ebe Pita
2:4—Vbọ re “Tartarus” kevbe wẹẹ, de ẹghẹ na ya khui avbe odibo ni sọtẹ ye uwu ẹre? Te Tartarus yevbe eghan na mu emwa orhiọn yi, sokpan ai mu emwa nagbọn yọ. Ẹi wa re eghan kẹkan na zaro miẹn. Ne a na wẹẹ avbe odibo ni sọtẹ rre Tartarus, ọ rhiema wẹẹ iran ma ghi rẹn emwi rhọkpa vbekpae emwamwa ọghe Osanobua, iran i vbe mwẹ ayayẹro rhọkpa. Ẹghẹ e Noa ẹre Jehova ya khui avbe odibo na ye uwu e Tartarus, evba ẹre iran khian gha ye, ọ te do sẹ ẹghẹ ne Osanobua khian ya fuẹn iran rua.
E Baibol Na Tie
(2 Pita 1:1-15) E Saimọn Pita ne ọguọmwadia kevbe ukọ Jesu Kristi, ẹre ọ gbẹn ebe na gie avbe emwa ni ne a lekpa ẹmwata Osanobua mwa kevbe Jesu Kristi Ọmiọnmwafan mwa rhie iyayi ighobioye nọ vbe ye vbe ọghomwa na nẹ. 2 Ẹseọhẹ kevbe ọfunmwegbe nọ vuọn sẹ omwa, nọ gha re ọghe uwa vbekpa urẹnmwẹ ne uwa rẹn Osanobua kevbe Jesu ne Nọyaẹnmwa, 3 Ẹtin nọhuanrẹn ọghẹe viọ emwi hia ne ima hoo ne ima nẹ, ne a ya loo ẹdagbọn mwa vbe nọ khọ ọghe Osanobua, vbekpa ne ima na rẹn ọmwa ne ọ tie mwa, ne ima do ghae vbe uwu uyi kevbe umamwẹ ọghẹe. 4 Odẹ vbenian ẹre ọ na ve ima emwi ighobioye nọ maan ẹsẹse, wẹẹ emwi nọ ve uwa ẹre gha ghi sẹ uwa obọ nẹ, wa ghi lẹfe vbe obọ orriarria ne ọre ọghe ọmwa ne ọ rre agbọn na, wa ghi vbe do ghae vbe ama emwi ne a yi nọhuanrẹn. 5 Rhunmwuda emwi vbenian, wa ziga vbe ẹtin uwa hia, ne uwa rhie umamwẹ ba iyayi uwa, wa ghi rhie irẹnmwi ba umamwẹ uwa, 6 wa ghi rhie izinegbe ba irẹnmwi uwa, wa ghi rhie amuwuegbe ba izinegbe uwa, a ghi rhie a ru emwi vbene ọ khọ ọghe Osanobua ba amuwuegbe uwa, 7 wa ghi rhie ahoẹmwọmwa nọ rre ẹkpo etẹn ba a ru emwi vbene ọ khọ ọghe Osanobua uwa, wa ghi rhie ahoẹmwọmwa ba ahoẹmwọmwa nọ rre ẹkpo etẹn uwa. 8 Enena ọrọre emwi ne a gie ọmwa mu nọ khẹke uwa, adeghẹ uwa vbe mwẹ ọnrẹn bun sẹ, ọ gha ya uwa khian ne ọ sẹtin fian emwi gbua, kevbe ne egbe sasa vbuwe vbene uwa rẹn Nọyaẹnmwa Jesu Kristi hẹ. 9 Sokpan ọmwa ne ẹi mwẹ enena, ẹi ro iro dinmwi, sẹrriọ wẹẹ, ẹi vbe bẹghe emwi ọ kevbe mianmian wẹẹ, a kpe orukhọ ẹre ni gberra kua nẹ. 10 Rhunmwuda ọni khekherriọ, wa ne etẹn mwẹ, wa kakabọ hia ne uwa ya vbene uwa miẹn ọnrẹn hẹ ighẹ utiemwẹ ne Osanobua tie uwa, kevbe ne ọ na hannọ uwa zẹ, khian ọghe etẹbitẹ: rhunmwuda, wa gha ru ẹre vberriọ, ẹi mwẹ wa ma musọe. 11 Odẹ vberriọ ẹre a gha na rhie asẹ nọ gbae fo ne uwa, ne uwa ya la uwu Arriọba etẹbitẹ, ọghe Nọyaẹnmwa kevbe Ọmiọnmwafan mwa Jesu Kristi. 12 Ọna ẹre ọ si ẹre ne I gha na gha ye uwa avbe ẹmwẹ na rre ẹghẹ hia, agharhemiẹn ighẹ wa ka rẹn ọnrẹn nẹ, kevbe wẹẹ, uwa ziẹn ẹnrẹn ye uwu ẹmwata ne uwa rhan obọ miẹn nẹ. 13 Mẹ yayi wẹẹ emwi nọ kei nọ ne I gha gua avbe emwi na kpa vbe uwu ayere uwa, omwa vbe ne a na miẹn ighẹ mẹ he ye rre agbọn. 14 Rhunmwuda, mẹ rẹnrẹn wẹẹ, vbe ọ ma he kpẹe wan, I gha ban egbe nọ sẹtin wu na mu fua, zẹ vbene Nọyaẹnmwa Kristi ta ma mwẹ sẹsẹsẹ. 15 I gha loo ẹtin mwẹ hia khekherriọ, ne I ya zẹ urodẹ vbene uwa gha ya ye avbe ẹmwẹ na rre hẹ ẹghẹ hia vbe I gha wu nẹ, ye uwa otọ.