IRUẸMWI 2

Vbene A Ya Guan Hẹ

2 Kọrinti 2:17

UHUNMWU ẸMWẸ: Guan vbe odẹ ọghe abiọmwabiẹ, ne u mieke na rhiẹre ma wẹẹ ẹmwẹ ne u ta mu ruẹ ekhọe, kevbe wẹẹ u mwẹ ẹmwẹ iran ni danmwehọ ruẹ vbe orhiọn.

VBENE A YA RU ẸRE HẸ:

Fẹko muegbe yotọ. U ghi na erhunmwu u ke suẹn. Muẹn ye erhunmwu ne u sẹtin rhie aro tua ẹmwẹ ne u khian ta, ne u ghẹ rhie aro tua egbuẹ. Kọe ye ekhọe ighẹ uhunmwu ẹmwẹ ne u hoo ne u rhie ladian. Loo ẹmwẹ obọ ruẹ, ẹi re ne u wa gha tie ẹre ladian zẹvbe nọ wa ya rre ebe.

Adeghẹ e Baibol ẹre u khian tie ra ebe ọvbehe, ọ khẹke ne u rẹn otọ ako ne u khian tie, ne u mieke na tie ẹre vbe odẹ nọ rriẹ. Deghẹ ẹmwẹ ne emwa tae ẹre u tie, u ghi ya ekhọe hia tie ẹre, sokpan ọ ma khẹke na miẹn wẹẹ te a ghi ya ruẹ ye ughe.
Gi ẹmwẹ ne u ta gha re nọ gele ke ekhọe rre. Muẹn roro vbene ẹmwẹ ne u khian ta, khian ya ru iyobọ ne emwa ne u gu guan hẹ. Rhie aro tua iran. Ẹghẹ nii, vbene u ya mudia, vbene u ya gbekhakha kevbe ugbaro ruẹ ghi rhiẹre ma wẹẹ u gele mwẹ ẹkorhiẹnrhiẹnmwẹ daa emwa ne u gu guan.

Na gha guan vbe odẹ ọghe abiọmwabiẹ ma rhiema wẹẹ, te a khian wa gha guan vbene a miẹn wẹẹ te a rrie ibota. Gha loo ifiẹmwẹ nọ khẹke vbe ẹghẹ hia, u vbe gha guan vbe odẹ nọ rriẹ, ne emwa mieke na gha ghee ẹmwẹ ne u ta zẹvbe emwi nọ ru ekpataki.
Gha ghee aro emwa ne u gu guan. Gha ghee aro ọghe emwa ne u gu guan vbe ẹghẹ hia deghẹ ọ ma de emwi nọ rhia vbe ẹvbo ne u ye. Adeghẹ u na gha ya ọta guan, gha ghee aro ọghe orhunmwu ọkpọkpa vbe uwu ẹbu, ẹi re ne u gha ghee emwa hia lẹga.