IRUẸMWI 17
De Aro Ọmwa Ne Jesu Khin?
Ma ghaa ruẹ vbekpa emwi ne Jesu ru kevbe ẹmwẹ nọ tae vbe ọ rre agbọn na, ma ghi do rẹn aro ọmwa nọ khin, ma ghi vbe gha hoo ne ima sikẹ ọre kevbe Jehova ne Erhae. Vbe Jesu a ya yin hẹ vbe ọ rre agbọn na? Vbe ima khian ya ya egbe taa re hẹ?
1. De odẹ eso ne Jesu ya khọ Erhae?
Vbe Jesu rre ẹrinmwi, ukpo nibun ẹre ọ ya ruẹ emwi vbe obọ Erhae. Ọ bẹghe odẹ ughughan ne Erhae ya gha rhie ahoẹmwọmwa ma. Ọna ẹre ọ zẹe nọ na roro emwi kevbe nọ na yin vbe na ghee Erhae. (Tie Jọn 5:19.) Vbene ẹmwata, te Jesu wa gele khọ Erhae vbe odẹ nọ ya yin. Ọna ẹre ọ yae kha wẹẹ: “Ọmwaikọmwa nọ miẹn mwẹ nẹ, ọ vbe miẹn Evbavba nẹ.” (Jọn 14:9) Zẹvbe ne u ya ruẹ vbekpa e Jesu, u ghi gha rẹn e Jehova sayọ. Vbe igiemwi, ẹnina ne Jesu ghaa mwẹ daa emwa rhie ẹre ma wẹẹ, erriọ e Jehova vbe ye.
2. De vbene Jesu ya rhie ẹre ma hẹ wẹẹ irẹn hoẹmwẹ e Jehova?
Jesu khare wẹẹ: “Ọ kere ne agbọn rẹn ighẹ I hoẹmwẹ Evbavba, ọni ọ si ẹre ne I na vbe ru emwi nọ rhirhi khama mwẹ ne I ru.” (Jọn 14:31) Ọ maan ra ọ khọọ, te Jesu wa gha họn ẹmwẹ ne Erhae vbe ọ rre agbọn, nọ rhie ma wẹẹ ọ hoẹmwẹ Erhae ẹsẹsẹmwẹse. Ẹghẹ hia ẹre ọ ya gha gu emwa guan vbekpa Erhae, ọ na vbe gha ru iyobọ ne emwa ya do gha re ọsie Erhae.—Jọn 14:23.
3. De vbene Jesu ya rhie ẹre ma hẹ wẹẹ irẹn hoẹmwẹ emwa?
E Baibol wẹẹ, Jesu wa gele hoẹmwẹ “emwa nagbọn.” (Itan 8:31) Ọ rhie ọna ma vbe odẹ nọ ya gha rhie igiọdu ne emwa, ọ na vbe gha ya ekhọe hia ru iyobọ ne iran. Jesu ru emwi ọyunnuan nibun, ẹi wa re rhunmwuda ẹtin nọ mwẹ ọkpa, sokpan rhunmwuda ẹnina nọ mwẹ. (Mak 1:40-42) Obọ esi ẹre ọ ya gha mu emwa, ọ ma ya aro gbe ọmwa rhọkpa re. Ẹmwẹ nọ ghaa ta kegha rhie ifuẹko ne emwa ni mwẹ ekhọe ata, ọ vbe ya iran gha mwẹ ayayẹro. Vbene ọ hoẹmwẹ emwa nagbọn sẹ, ọ na mu egbe nọ ya rri oya kevbe nọ wu ba ẹmwẹ iran. Sokpan, emwa ne irẹn hoẹmwẹ ọnrẹn sẹ, ọre emwa ni lele iyi ọghẹe.—Tie Jọn 15:13, 14.
GUALỌ OTỌ RE SAYỌ
Gia ziro yan rẹn sayọ, aro ọmwa ne Jesu khin kevbe vbene ima khian ya ya egbe taa re hẹ, vbe odẹ nọ ya gha rhie ahoẹmwọmwa ma kevbe odẹ nọ ya gha zẹ emwi obọ.
4. Jesu hoẹmwẹ Erhae
Igiemwi ọghe Jesu ya ima rẹn odẹ ne ima khian ya rhie ẹre ma wẹẹ ima hoẹmwẹ Osanobua. Tie Luk 6:12, NW kevbe Jọn 15:10; 17:26. Uwa gha tie dọmwadẹ ako na nẹ, uwa ghi ziro yan inọta na:
De odẹ ne ima khian ya rhie ẹre ma wẹẹ ima hoẹmwẹ e Jehova, vbene Jesu ru ẹre?
Jesu hoẹmwẹ Erhae nọ rre ẹrinmwi; ẹghẹ hia ẹre ọ ya gha na erhunmwu gie ẹre
5. Jesu keghi tohan emwa ni gualọ iyobọ
Te Jesu wa gha mu ọghe emwa ọvbehe ye okaro. Te irẹn wa gha loo ẹghẹ kevbe ẹrhiọn ya ru iyobọ ne emwa ọvbehe, ya sẹ egbe ẹghẹ nọ te khẹke nọ ya hẹwẹ. Tie Mak 6:30-44, iyeke ọni, uwa ghi ziro yan avbe inọta na:
De odẹ eso ne Jesu ya rhie ẹre ma vbe ako na wẹẹ, irẹn mwẹ amuroro daa emwa ọvbehe?—Ghee uviẹn 31, 34, 41, kevbe 42.
Vbọ ya e Jesu gha ru iyobọ ne emwa?—Ghee uviẹn 34.
Ugbẹnvbe a miẹn wẹẹ te Jesu ru emwi vbe na ghee Erhae, vbe ọna ghi maa ruẹ re vbekpa e Jehova?
De odẹ eso ne ima khian ya rhie ẹre ma wẹẹ ima mu ẹmwẹ emwa ọvbehe roro, vbe na ghee Jesu?
6. Jesu keghi zẹ emwi obọ
Te Jesu wa gha zẹ emwi obọ, agharhemiẹn wẹẹ ọ ma gha re ọmwa nọ fe, ọ vbe rhie igiọdu ne ima, ne ima gha zẹ emwi obọ. Tie Iwinna 20:35, NW, iyeke ọni, uwa ghi ziro yan inọta na:
De emwi ne Jesu wẹẹ ọ khian ya ima gha mwẹ oghọghọ?
Kpee VIDIO na, iyeke ọni, uwa ghi ziro yan inọta nọ lelẹe.
De odẹ eso ne ima khian ya gha zẹ emwi obọ, ọ gha khọnrẹn wẹẹ ima ma fe?
U ka rẹn ra?
E Baibol wẹẹ ne ima gha na erhunmwu gie Jehova vbe eni Jesu. (Tie Jọn 16:23, 24.) Ma ghaa ru vberriọ, te ima rhie ẹre ma wẹẹ, ima gbọyẹmwẹ ye ẹse ne Jesu ru ne ima, nọ na ru iyobọ ne ima ya do gha re ọsie Jehova.
EMWA ESO KEGHI KHA WẸẸ: “Osanobua i zẹyọ ima re vbe ima ghaa susẹ.”
Te Jesu wa gha mwẹ amuroro daa emwa. Vbe ọna ghi maa ruẹ re vbekpa e Jehova, ugbẹnvbe a miẹn wẹẹ te Jesu ru emwi vbe na ghee Erhae?
OLIKA ẸMWẸ
Jesu hoẹmwẹ e Jehova, ọ vbe hoẹmwẹ emwa. Ugbẹnvbe a miẹn wẹẹ te Jesu ru emwi vbe na ghee Erhae, u ghaa ruẹ vbekpa e Jesu, u ghi gha rẹn e Jehova sayọ.
Ogbewerriẹ
Vbe ima khian ya rhie ẹre ma hẹ wẹẹ ima hoẹmwẹ e Jehova, vbene Jesu ru ẹre?
Vbe ima khian ya rhie ẹre ma hẹ wẹẹ ima hoẹmwẹ emwa ọvbehe, vbene Jesu ru ẹre?
Vbọ yẹẹ ruẹ sẹ, vbe odẹ ne Jesu ya ru emwi?
RUẸ SAYỌ
Ghee odẹ eso ne Jesu ya gha yin, ne ima gha sẹtin ya egbe taa.
“U Ghaa Hoo Ne U Ya Egbe Taa E Jesu, Gha . . . ” (Jesus—The Way, the Truth, the Life, ipapa 317)
Ghee evbọzẹe nọ na khẹke ne ima gha na erhunmwu vbe eni Jesu.
“Vbọzẹ Nọ Na Khẹke Ne Ima Gha Na Erhunmwu Vbe Eni Jesu?” (The Watchtower, February 1, 2008)
E Baibol ta ẹmwẹ rhọkpa vbekpa ukhuegbe ọghe Jesu ra?
Vbe ima miẹn ruẹ vbe obọ ne Jesu ya gha mu ikhuo?
“Osanobua Hoo Ne Ima Gha Rhie Ọghọ Kevbe Uyi Ne Ikhuo” (The Watchtower, September 1, 2012)