AZA EBE ỌGHE Watchtower NỌ RRE INTANẸT
Watchtower
AZA ỌGHE EBE NỌ RRE INTANẸT
Edo
  • E BAIBOL
  • AVBE EBE KEVBE EVBA KPEE
  • IKO
  • mwbr23 January ipapa 1-9
  • Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima

E vidio rhọkpa i rre ako na.

Ghẹ gui, e vidio na ma sẹtin kpee rhunmwuda emwi eso nọ ya egbe kaẹn egbe.

  • Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
  • Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima—2023
  • Abọ uhunmwuta
  • JANUARY 2-8
  • JANUARY 9-15
  • JANUARY 16-22
  • JANUARY 23-29
  • JANUARY 30–FEBRUARY 5
  • FEBRUARY 6-12
  • FEBRUARY 13-19
  • FEBRUARY 20-26
  • FEBRUARY 27–MARCH 5
Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima—2023
mwbr23 January ipapa 1-9

Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima

© 2022 Christian Congregation of Jehovah’s Witnesses

JANUARY 2-8

EMWI EWE NI RRE UWU ẸMWẸ ỌGHE OSANOBUA | 2 ỌBA 22-23

“Vbọzẹ Nọ Na Khẹke Ne Ima Gha Mu Egbe Rriotọ?”

w00 9/15 29-30

Ẹmwẹ E Josaia Kegha Yẹẹ E Jehova Rhunmwuda Nọ Na Gha Mu Egbe Rriotọ

Ẹghẹ owiẹ ẹre emwa ni dọlọ Ọgua Osa yi ya suẹn iwinna. Ẹi mwẹ e Josaia ma kpọnmwẹ e Jehova wẹẹ, emwi ne avbe erha iran odede ka mu rhia vbe Ọgua Osa ẹre iran dọlọ yi na. Zẹvbe ne iwinna nii ya gha khian, e Siafan keghi do na iyẹn ma ọba. De emwi nọ do tama rẹn? Ọ keghi rhie ebe na kiri ọkpa mwẹ obọ, ọ na tama rẹn wẹẹ, e Hilkaia ne Ogie Ohẹn miẹn “ebe uhi ọghe Jehova, uhi ne Osanobua viọ ne Mozis.” (2 Krọnikol 34:​12-18) Emwi kpataki ẹre iran wa miẹn na, rhunmwuda, ọna ọre ebe uhi na ka wa gha gbẹn!

Te Josaia wa gha hoo nọ họn emwi hia na gbẹn ye ebe na. Zẹvbe ne Siafan ya gha tie ebe uhi nii ladian, e Josaia na gha roro vbene ọ ya kaan irẹn vbe emwa rẹn hẹ. Emwi nọ wa mu e Josaia ekhọe vbe a tie ebe uhi na, ọre vbene ọ ya nianian vbene ugamwẹ ẹmwata ru ekpataki sẹ hẹ, kevbe ẹbe nọ gha kẹrikian deghẹ eguọmwadia e Jehova na gha ga ẹbọ. Ebe uhi nii vbe tae wẹẹ, a gha viọ iran gha rrie imu deghẹ iran na fi iyeke gbe Jehova. Vbe Josaia ghi bẹghe ẹre wẹẹ, Ivbi Izrẹl ma họn ẹmwẹ ne Jehova vbene ọ khẹke, ọ na yanghan ukpọn ye egbe ẹre urhu. Ọ na vbe tama e Hilkaia, Siafan kevbe emwa nikẹre wẹẹ: “Uwa ya gualọ otọ ẹmwẹ emwi na gbẹnnẹ ye ebe na . . . vbe obọ e Jehova. Ohu ima mu e Jehova rhunmwuda, avbe erha mwa odede ma ru vbene ẹmwẹ ni rre ebe na wẹẹ na ru.”​—2 Ọba 22:​11-13; 2 Krọnikol 34:​19-21.

w00 9/15 30 ¶2

Ẹmwẹ E Josaia Kegha Yẹẹ E Jehova Rhunmwuda Nọ Na Gha Mu Egbe Rriotọ

Emwa ne Josaia gie keghi ya miẹn e Hulda ne akhasẹ nokhuo nọ rre Jerusalẹm, iran na vbe werriegbe gha dee do na iyẹn ma e Josaia. E Hulda na tama iran ẹmwẹ ne Jehova tae, ọ na wẹẹ te emwi hia na gbẹn ye ebe ne iran miẹn nii, khian gele rruan Ivbi Izrẹl, rhunmwuda ne iran na fi iyeke gbe Jehova. Sokpan rhunmwuda ne Josaia na mu egbe rriotọ vbe odaro e Jehova, ọfuan i khian rruan iran vbe uwu ẹghẹ ne Josaia khian ya gha rre agbọn. E Josaia gha ghi wu, a ghi ya ree ẹre vbe ọfunmwegbe.​—2 Ọba 22:​14-20; 2 Krọnikol 34:​22-28.

Emwi Ewe Ọghe Orhiọn

w01 4/15 26 ¶3-4

U Gha Ye Sẹtin Musọe, Ọ Gha Khọnrẹn Wẹẹ Emwi Ghaa Lọghọ Vbe U Waan Dee

Ọ gha khọnrẹn wẹẹ emwi ghaa lọghọ vbe ọ waan dee, e Josaia na ye gha ru emwi nọ yẹẹ e Jehova. Te emwi wa gha khian ẹse vbe ẹghẹ nọ ya gha re ọba, uhiẹn, e Baibol keghi kha wẹẹ: “A ma he ka miẹn ọba nọ yevbe ọre, ọmwa nọ wa ya ekhọe ọre hia, ẹko ẹre hia kevbe ẹtin ẹnrẹn hia gha lele uhi e Jehova, nọ viọ ne Mozis. A ma ghi vbe miẹn ọvbehe ke ẹghẹ nii gha dee.”​—2 Ọba 23:​19-25.

Okha ọghe Josaia gha wa rhie igiọdu ne emwa ne emwi ghaa lọghọ vbe iran waan dee! De emwi ne okha ọghẹe ma ima re? Vbọ ru iyobọ nẹẹn ya gha ru emwi esi vbene egbe ma na wọọ re?

JANUARY 9-15

EMWI EWE NI RRE UWU ẸMWẸ ỌGHE OSANOBUA | 2 ỌBA 24-25

“Ghẹ Mianmian Wẹẹ Ovbi Ẹghẹ Kherhe Ẹre Ọ Ghi Kẹ”

w01 2/15 12 ¶2

Ẹdẹ Ibuohiẹn Ọghe Jehova Sotọ Fo Nẹ!

2 Ẹmwẹ akhasẹ ọghe Zẹfanaia rre usun emwi nọ ya e Josaia rẹn wẹẹ, te ọ khẹke na wabọ ugamwẹ ohoghe hin otọ e Juda rre. Sokpan vbene Josaia hia sẹ nọ wabọ ugamwẹ ohoghe hin otọ nii rre, ọ ma ye sẹtin ha osa ye orukhọ ne erhae nọkhua ighẹ Ọba e Manasẹ ru, vbe ẹghẹ nọ na gbele “emwa ni ma ru khọ” rua vbe Jerusalẹm. (2 Ọba 24:​3, 4; 2 Krọnikol 34:3) Rhunmwuda ọni, ẹi mwẹ ẹdẹ ibuohiẹn ọghe Jehova ma rre.

w07 3/15 11 ¶10

Avbe Olika Ẹmwẹ Ni Rre Ebe Jerimaia

Ukpo 607 B.C.E. ẹre ghaa nọ. Ọna kegha re ukpo nogie 11 ne Zẹdekaia he ya gha re ọba. Uki 18, ẹre Ọba e Nebukiadneza ọghe Babilọn he ya gbe okin lẹga e Jerusalẹm. Vbe ikpẹdẹ nogie ihinrọn ọghe uki nogie isẹn ọghe ukpo nogie 19 ne Nebukiadneza he ya gha re ọba, ọkaokuo ẹre na tie ẹre Nebuzaradan kegha die Jerusalẹm. (2 Ọba 25:8) Ọ gha kẹ, owa ukpọn ọghẹe nọ rre iyeke egbekẹn ọghe ẹvbo nii, ẹre Nebuzaradan ke gha mwamwa vbene ọ khian ya khọn ẹvbo nii mu otọ. Ikpẹdẹ eha ghi gberra nẹ, ọni ọre vbe ikpẹdẹ nogie igbe ọghe uki nii, ọ na mu okuo lae Jerusalẹm, ọ na vbe mu erhẹn yọ.​—Jerimaia 52:​12, 13.

Emwi Ewe Ọghe Orhiọn

w05 8/1 12 ¶1

Avbe Olika Ẹmwẹ Ni Rre Ebe Ọba Nogieva

24:​3, 4. Rhunmwuda ne Manasẹ na rri abe esagiẹn, e Jehova ma yabọ agbẹnvbo ọghe Juda. Osanobua i hoo na da esagiẹn ọghe ọmwa nọ ma rẹn ọkpa rẹn eva. Ma gha sẹtin gha mwẹ ilẹkẹtin wẹẹ, e Jehova gha guọghọ emwa dan rua, nọ ya rria ikhi ne emwa ni ma rẹn ọkpa rẹn eva ne iran gbele rua.​—Psalm 37:​9-11; 145:20.

JANUARY 16-22

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 1-3

“Ẹmwata Ẹre Emwi Hia Ni Rre Baibol Khin”

w09 9/1 14 ¶1

Adam Vbe Ivi Gele Gha Rre Agbọn Na Ra?

Vbe igiemwi, gia ziro yan uniẹn ọghe Ivbi e Ju na guan kaẹn vbe ebe Krọnikol Nokaro, uhunmwu ẹnrẹn 1 ya sẹ 9 kevbe ebe Luk uhunmwu ẹnrẹn 3. Eni emwa nibun ẹre a sunu yi vbe avbe ako ọghe Baibol na. Orre 48 ẹre ebe Krọnikol Nokaro guan kaẹn, vbene ebe Luk na guan kaẹn orre 75. Uniẹn ne Jesu Kristi la rre ẹre ebe Luk guan kaẹn, vbene ebe Krọnikol na guan kaẹn uniẹn ọghe avbe ọba kevbe avbe ohẹn vbe otọ Izrẹl. Eni emwa na kakabọ rẹn vbe na ghee Solomọn, Devid, Jekọb, Aizik, Ebraham, Noa kevbe Adam wa rre ebe eva na. Emwa ni gele gha rre agbọn na, ẹre ebe eva na sunu yi, Adam ẹre ọ vbe gha re ọmwa okaro nọ gele gha rre agbọn na, ne iran sunu yi.

w08 6/1 3 ¶4

Okha Ọghe Noa Kevbe Ọghe Okpamẹ Nọ Dae I Re Ohoghe

Ebe eva ni guan kaẹn uniẹn ne emwa ke rre vbe uwu e Baibol so igiẹ yọ wẹẹ, e Noa gele gha rre agbọn na. (1 Krọnikol 1:4; Luk 3:36) Ẹzra vbe Luk ẹre ọ gbẹnnẹ avbe ebe na, emwa ni gele gbarokotọ gualọ otọ emwi ẹre iran ghaa khin. E Luk gualọ otọ ọre miẹn wẹẹ, uniẹn ọghe Noa ẹre Jesu Kristi la rre.

w09 9/1 14-15

Adam Vbe Ivi Gele Gha Rre Agbọn Na Ra?

Vbe igiemwi, gi ima guan kaẹn imamwaemwi ọkpa nọ rre Baibol, nọ wa kakabọ yẹẹ emwa nibun ni yo esọsi, ọni ọre imamwaemwi ọghe izọese adẹwerriegbe. Izọese adẹwerriegbe na kha na, ọre ne Jesu Kristi na do ya arrọọ ọghẹe nọ gbae dẹ emwa nibun werriegbe, ne iran mieke na miẹn fan vbe orukhọ ọghe iran. (Matiu 20:28; Jọn 3:16) Ma hia rẹnrẹn wẹẹ, adẹwerriegbe ọre emwi na loo ya ha osa ye emwi nọ te wii ọmwa, ne emwi nii mieke na werriegbe sẹ ọre obọ. Ọni ẹre ọ si ẹre ne Baibol na tie Jesu “adẹwerriegbe nọ gua ẹre ro.” (1 Timoti 2:6) Izọese adẹwerriegbe ọghe Jesu kevbe emwi ọvbehe gua egbe ro, de emwi ne ọni khin? E Baibol khare wẹẹ: “Zẹ vbene emwa hia wulo rhunmwuda ighẹ iran vbe Adam gba re ọkpa, erriọ ẹre a gha vbe huẹn emwa hia kpaegbe rhunmwuda ighẹ iran re ọkpa ba e Kristi.” (1 Kọrinti 15:22) Arrọọ nọ gbae ne Jesu ya miẹn emwa esi fan kevbe arrọọ nọ gbae ne Adam mu fua vbe ọ ru orukhọ vbe Idẹni, keghi gua egbe ro. (Rom 5:12) Akpawẹ Adam ma gele gha rre agbọn na, ọni rhie ma wẹẹ, izọese adẹwerriegbe ọghe Kristi ma gha mwẹ esa nọ ye hiehie.

Emwi Ewe Ọghe Orhiọn

it-1 911 ¶3-4

Uniẹn Ne Emwa La Rre

Eni Ikhuo Eso. A ghaa guan kaẹn uniẹn ne emwa eso la rre, a ghi rhie eni ikhuo eso ba re, rhunmwuda emwi eso nọ sunu vbe ẹghẹ nọ gberra. Ọ khọ wẹẹ, emwi nọ si ẹre na na gbẹn eni e Serai (Sera) ladian vbe ebe Gẹnẹsis 11:​29, 30 ọre wẹẹ, irẹn ẹre ọ khian biẹ Ọmọ na ru eyan rẹn wẹẹ, ọ gha ke uniẹn Ebraham rre, ẹi re okhuo ọvbehe ne Ebraham rhie re. Ọ gha kẹ, te a gbẹn eni e Milka ladian vbe ako na rhunmwuda, irẹn ẹre ọ ghaa re iye Rebeka nọkhua. Ọvbokhan Aizik ẹre Rebeka ghaa khin, rhunmwuda ọni, te a ya ọna rhie ẹre ma wẹẹ, ẹgbẹe ne Ebraham ke rre, ẹre Rebeka ke vbe rre, rhunmwuda ọ ma zẹdẹ khẹke ne Aizik ya rhie okhuo vbe agbẹnvbo nikẹre. (Gẹn 22:​20-23; 24:​2-4) Vbe ebe Gẹnẹsis 25:​1, a keghi ya unu kaẹn eni okhuo ne Ebraham ghi rhie vbe okiekie, na tie ẹre Ketura. Ọna ya ima rẹn wẹẹ, Ebraham ye werriegbe rhie okhuo vbe Sera ghi wu nẹ, kevbe wẹẹ ọ ye sẹtin gha mwẹ emọ, agharhemiẹn wẹẹ ọ gberra ukpo 40 nẹ, ne Osanobua ghi ya ru emwi ọyunnuan vbe egbe ẹre, nọ zẹe ighẹ ọ sẹtin biẹ Aizik. (Rom 4:19; Gẹn 24:67; 25:20) Ọna vbe ya ima rẹn wẹẹ, etiẹn Ivbi Izrẹl ẹre Ivbi e Midian kevbe Ivbi Arab nikẹre vbe khin.

A vbe ya unu kaẹn eni e Lia, Rekiẹl kevbe egbakhian ọghe Jekọb deba emọ ikpia ne iran biẹlẹ. (Gẹn 35:​21-26) Ọna keghi ru iyobọ ne ima ya rẹn otọ emwi ne Baibol tae, vbe ọ guan kaẹn obọ ne Osanobua ya mu emọ ikpia na. Emwi vbenian ẹre ọ vbe si ẹre na na sunu ye eni ikhuo ọvbehe vbe a gbẹnnẹ uniẹn ne emwa eso la rre yotọ. Deghẹ a na ghae ukhu sẹ obọ ikhuo eso, a sẹtin vbe gbẹnnẹ eni iran ladian vbe a ghaa guan kaẹn uniẹn ne emwa eso la rre. (Nọm 26:33) Ma rẹnrẹn wẹẹ, ọghe Tama, Rehab kevbe Rut wa lughaẹn rhunmwuda, ọ mwẹ emwi kpataki nọ si ẹre ne dọmwadẹ iran na do gha rre usun emwa ni rre uniẹn ne Jesu Kristi ne Mẹzaia la rre. (Gẹn 38; Rut 1:​3-5; 4:​13-15; Mat 1:​1-5) Ako ọvbehe na na vbe sunu ye eni ikhuo vbe a guan kaẹn uniẹn ne emwa eso la rre ọre ebe 1 Krọnikol 2:​35, 48, 49; 3:​1-3, 5.

JANUARY 23-29

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 4-6

“De Aro Ọmwa Ne Erhunmwu Ne I Na Rhie Ẹre Ma Wẹẹ I Khin?”

w10 10/1 23 ¶3-7

Osa Nọ Họn Erhunmwu

Okpia nọ wa gua na erhunmwu ẹre Jabẹz ghaa khin. Vbe ọ ghi suẹn gha na erhunmwu, ọ na wẹẹ ne Osanobua fiangbe irẹn. Ọ na ghi nọ emwi eha nọ rhie ẹre ma wẹẹ, ọmwa nọ mwẹ amuẹtinyan wa gha nọ.

Vbe okaro ọ na wẹẹ ne Osanobua “mu otọ nọ kpọlọ” ne irẹn. (Uviẹn 10) Adazẹ ẹre okpia na ghaa khin, ọ ma sinmwi otọ, ra nọ mu emwi ẹrrẹe ba ọghẹe. Emwi nọ nọ rẹn na ma rhie ma wẹẹ, iwinna otọ ẹre ọ wa muẹn. Ọ khọ wẹẹ, emwi nọ si ẹre nọ na wẹẹ ne Osanobua mu otọ nọ kpọlọ ne irẹn, ọre ne emwa nibun ni ga e Jehova mieke na sẹtin dia ẹre ya.

Emwi nogieva nọ nọ rẹn, ọre ne Osanobua tan obọ gue irẹn. Obọ Osanobua na guan kaẹn na, ọre ẹtin nọ ya ru iyobọ ne avbe eguọmwadia ẹre. (1 Krọnikol 29:12) E Jabẹz keghi mu ẹtin yan e Jehova wẹẹ ọ gha sẹtin ru emwi nọ da irẹn vbe orhiọn ne irẹn, rhunmwuda ọ rẹnrẹn wẹẹ, e Jehova gha sẹtin ru emwi ke emwi nọ ya gbaroghe emwa ni mu ẹtin yan rẹn.​—Aizaia 59:1.

Emwi nogieha ne Jabẹz ghi nọ ọre wẹẹ: “Rhie mwẹ lẹre hin obọ emwi ke emwi nọ gha si obalọ yọ mwẹ egbe.” De emwi ne Jabẹz ya ẹmwẹ nọ tae na kha? Ọ khọ wẹẹ, ẹi re te ọ ghaa hoo ne Osanobua gbogba ga irẹn, ne emwi dan rhọkpa ghẹ sunu daa irẹn, sokpan te ọ ghaa hoo ne Osanobua ru iyobọ ne irẹn, ne irẹn ghẹ do gha khiẹ, ra nọ do gha rre uwu obalọ rhunmwuda emwi dan nọ rhirhi sunu.

Erhunmwu ne Jabẹz na rhie ẹre ma wẹẹ, ọ ma zẹdẹ gha ya ugamwẹ ẹmwata ku, kevbe wẹẹ, ọ ya ekhọe hia mu ẹtin yan Osa nọ họn erhunmwu. De emwi ne Jehova ghi ru? E Baibol tama ima wẹẹ: “Osanobua keghi rhie emwi nọ na erhunmwu yi nẹẹn.”

Emwi Ewe Ọghe Orhiọn

w05 10/1 9 ¶7

Avbe Olika Ẹmwẹ Ni Rre Ebe Krọnikol Nokaro

5:​10, 18-22. Vbe ẹghẹ ne Sọl ya gha re ọba, avbe ẹwae ni rre odẹ ekẹn ọghe Jọdan keghi khọnmiotọ yan emwa e Hagrit, agharhemiẹn wẹẹ emwa e Hagrit kakabọ bun sẹ iran. Uhiẹn, a gha ghae emwa e Hagrit ye ihe eva, avbe ẹwae na ni yo okuo ma bun sẹ vbe obọ ọkpa. Emwi nọ si ẹre ne avbe ikpia nii na sẹtin khọnmiotọ yan iran, ọre ne iran na mu ẹtin yan e Jehova, iran na vbe rinmwiaẹn nọ ru iyobọ ne iran. Emwi nibun rrọọ ne ima gu vẹn zẹvbe ne ima ya ga e Jehova, ugbẹnso ọ ghi yevbe na miẹn wẹẹ, eso sẹ ima. Rhunmwuda ọni, ọ khẹke ne ima ya ekhọe hia mu ẹtin yan e Jehova.​—Ẹfisọs 6:​10-17.

JANUARY 30–FEBRUARY 5

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 7-9

“E Jehova Gha Sẹtin Ru Iyobọ Nuẹn Ya Ru Iwinna Nọ Lọghọ Na Rhirhi Waa Ruẹ Re”

w05 10/1 9 ¶8

Avbe Olika Ẹmwẹ Ni Rre Ebe Krọnikol Nokaro

9:​26, 27. Iwinna nọ kakabọ ru ekpataki ẹre Ivbi e Livai ni ghaa gbaroghe onurho ọghe Ọgua Osa wa gha ru. A keghi rhie isanhẹn ọghe avbe ehe ni huanrẹn vbe Ọgua Osa ne iran. Emwa ni gia mu ẹtin yan ẹre iran ghaa khin, rhunmwuda, ẹdẹgbegbe ẹre iran ya gha kie onurho ọghe Ọgua Osa. Vbe ẹdẹnẹrẹ, a vbe mu iwinna ye ima obọ, ọni ọre ne ima ya kporhu ma emwa ni rre ẹdogbo ọghe ima, ma ghi vbe ru iyobọ ne iran, ne iran do ga e Jehova. Vbe na ghee Ivbi e Livai ni ghaa gbaroghe onurho ọghe Ọgua Osa, ẹi re te ọ khẹke ne ima rhie ẹre ma wẹẹ, emwa ni gia mu ẹtin yan kevbe na gba ẹko ẹre, ẹre ima vbe khin?

w11 9/15 32 ¶7

U Gha Sẹtin Ya Egbe Taa E Finihaz Vbe U Ghaa Rre Uwu Ọlọghọmwa Ra?

Ẹi re iwinna nekherhe ẹre Finihaz ghaa ru vbe otọ Izrẹl vbe ẹghẹ nẹdẹ, sokpan ọ kegha mwẹ udinmwẹ, ọ na gha ya ẹwaẹn ru emwi, ọ na vbe mu ẹtin yan e Jehova. Rhunmwuda ọni, ọ keghi sẹtin la avbe ọlọghọmwa ughughan nọ miẹn gberra. Te ẹko wa vbe gha rhiẹnrhiẹn e Jehova rhunmwuda ne Finihaz na gha ya ekhọe hia gbaroghe emwa ọghe Osanobua. Vbe odẹ ukpo 1,000 ghi gberra nẹ, e Jehova keghi loo Ẹzra ya gbẹn wẹẹ: “E Finihaz ne ovbi Eliaza ẹre ọ ghaa su iran vbe ẹghẹ nọ gberra. E Jehova wa gha gu ẹre rrọọ.” (1 Krọ 9:20) Te ọ wa khẹke ne emwa hia ni mu asanikaro vbe uwu ẹbu eguọmwadia e Jehova vbe ẹdẹnẹrẹ ya egbe taa e Finihaz, erriọ vbe khẹke ne emwa hia ni ya ẹkoata ga e Jehova gha ru ẹre.

Emwi Ewe Ọghe Orhiọn

w10 12/15 21 ¶6

So Ihuan Gie Jehova!

6 E Jehova keghi loo avbe akhasẹ ọghẹe ya tama eguọmwadia re ne iran gha so ihuan urhomwẹ gie irẹn. Ihuan na so ru ekpataki sẹrriọ wẹẹ, a na wẹẹ ne Ivbi e Livai ni so ihuan rhie obọ hin iwinna ne Ivbi e Livai nikẹre ru, ne iran mieke na miẹn ẹghẹ ya gha gbẹnnẹ ihuan. Egbọre te a vbe ru emwamwa na, ne ẹkpotọ mieke na kie ne iran ya gha ruẹ ihuan yotọ.​—1 Krọ 9:33.

FEBRUARY 6-12

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 10-12

“Gi Ahoo Ọghe Jehova Gha Khọn Ruẹ Na Ru”

w12 11/15 6 ¶12-13

“Ma Mwẹ Re, Ne I Gha Ru Ahoo Ruẹ”

12 Te Devid wa gha gbọyẹmwẹ ye avbe ilele ni rre Uhi e Mozis, ọ vbe gha hoo nọ gha lele iran. Igiemwi esi nọ wa khẹke na gha ya egbe taa, ẹre ọna wa khin. Gia guan kaẹn emwi nọ sunu vbe ẹghẹ ne Devid ya kha wẹẹ, “amẹ uhae nọ rre onurho e Bẹtlẹhẹm” khọn irẹn. Eha vbe uwu avbe ikpia ni lele Devid khian kegha rrie Bẹtlẹhẹm, iran na gu Ivbi e Filistia ni ghaa rre evba vbe ẹghẹ nii khọn, ne iran mieke na sẹtin sa amẹ nii mu gha dee. Sokpan, e Devid “ma wọẹn, ọ keghi hihiẹ ọre ku otọ zẹvbe emwi izọese ghee Jehova.” Vbọzẹ nọ na ru vberriọ? E Devid khare wẹẹ: “Ohan i gu mwẹ wọn ọna, te ọ ra yevbe na wọn esagiẹn emwa na ni rhie uhunmwu daa ẹbe.”​—1 Krọ 11:​15-19.

13 E Devid rẹnrẹn wẹẹ, Uhi khare wẹẹ ọ ma zẹdẹ khẹke na gha rri esagiẹn, nọghayayerriọ, a ghi hihiẹ ọre ku otọ gie Jehova. Ọ vbe rẹn emwi nọ si ẹre nọ na khẹke na ru ẹre vberriọ. E Devid rẹnrẹn wẹẹ, “arrọọ ọghe emwi ke emwi nọ ghi rre agbọn nẹ, esagiẹn ẹre ọ ye.” Sokpan, amẹ ẹre a sa gie ẹre na, ẹi re esagiẹn. Vbọzẹ nọ ma na ghi wọẹn? Rhunmwuda, ọ rẹn ilele ne uhi nii hẹnhẹn egbe yan. Te amẹ nii wa yevbe esagiẹn ọghe ikpia eha nii vbe aro e Devid. Rhunmwuda ọni, ọ na wẹẹ irẹn i sẹtin wọn rẹn. Nọ gha te ya wọn rẹn, ọ na zẹ ọre vbe iro wẹẹ, te ọ khẹke ne irẹn hihiẹ ọre ku otọ.​—Lẹv 17:11; Diut 12:​23, 24.

w18.06 17 ¶5-6

Gi Uhi Kevbe Ilele Ọghe Osanobua Gha Dia Ekhọe Ọguọmwaziro Ọghuẹ

5 Ne ima mieke na gha miẹn ere vbe uhi Osanobua, te ọ khẹke ne ima gha gbọyẹmwẹ yọ, ẹi re ne ima gha tie ẹre kẹkan. E Baibol khare wẹẹ: “Wa gie emwi dan gha sọnnọ uwa, wa gie emwi esi gha yẹẹ uwa.” (Emọs 5:15) Vbe ima khian ya sẹtin gha lele adia na hẹ? Te ọ khẹke ne ima gha ya aro ne Jehova ya ghee emwi ghee ẹre. Vbe igiemwi, gia kha wẹẹ u i vbiẹ ẹse vbe asọn. Rhunmwuda ọni, ọbo ebo nọ gbaroghe ruẹ keghi tama ruẹ aro evbare ne u khian gha re, aro iku isasa egbe ne u khian gha ku kevbe afiwerriẹ eso ne u gha ru vbe arrọọ ruẹ. U ghi lele adia na, u na do gha vbiẹ ẹse. Ẹi mwẹ u ma gbọyẹmwẹ ye iyobọ ne obọ ebo nii ru nuẹn.

6 Erriọ uhi ọghe Osanobua vbe ye ne ima. Ma ghaa lele avbe uhi na, ma i miẹn ikuanegbe ne orukhọ si ye ọmwa egbe. Ma ghi do gha mwẹ adogbannọ vbe arrọọ ọghe ima. Vbe igiemwi, e Baibol wẹẹ ne ima ghẹ rra, ne ima ghẹ si uma dan, ne ima ghẹ taa ohoghe, ne ima ghẹ gu orhiọn dan mu obọ kevbe ne ima gha gbaengbe ne oghẹ. (Tie Itan 6:​16-19; Arhie 21:8) Ma ghaa lele avbe adia na, afiangbe nọkhua ẹre ima miẹn vbọ. Ọna ẹre ọ ghi ya ima gbọyẹmwẹ ye uhi Osanobua, ọ ghi vbe ya ima họemwẹ Osanobua sayọ.

Emwi Ewe Ọghe Orhiọn

it-1 1058 ¶5-6

Ẹkokoudu

Na Gha Ya Ekhọe Hia Ga E Jehova. Deghẹ abọ eso na la hin ẹkokoudu ọghe ọmwa rre, ẹi ghi sẹtin winna ẹse, sokpan ekhọe ima ne emwa nagbọn sẹtin gha rre ihe ughughan. Vbe Devid na erhunmwu gie Jehova, ọ keghi kha wẹẹ: “Gu mwẹ sẹtin gha ya ekhọe mwẹ hia mu ohan eni ruẹ,” ọna rhie ma wẹẹ, ọmwa sẹtin gha ru emwi sokpan ẹi ya ekhọe hia ru ẹre, rhunmwuda wẹẹ ohan muẹn ra rhunmwuda ne emwi ọvbehe na yẹẹ ọre. (Psm 86:11) Ọmwa vbenian sẹtin gha ga Osanobua, sokpan ẹi wa ya ekhọe hia gae. (Psm 119:113; Arhie 3:16) Ọmwa sẹtin vbe gha mwẹ emwi eva vbe ekhọe, ọ ghi gha hoo nọ ga arowa eva, ra emwi nọ ta ghi lughaẹn ne emwi nọ rre ọre ekhọe. (1 Krọ 12:33; Psm 12:2) Jesu wẹẹ, ọ ma zẹdẹ khẹke na gha yin vbenian.​—Mat 15:​7, 8.

Deghẹ ọmwa hoo nọ gha ru emwi nọ ya ẹko rhiẹnrhiẹn e Jehova, te ọ khẹke nọ gha ya ekhọe hia gae, ẹi re nọ gha hoo nọ ga arowa eva. (1 Krọ 28:9) Na do sẹtin ru ọna i wa khuẹrhẹ, te ima gha loo ẹrhiọn yọ, rhunmwuda, emwi dan wa rherhe la ima ne emwa nagbọn ekhọe. (Jer 17:​9, 10; Gẹn 8:21) Deghẹ ima hoo ne ima gha ya ekhọe hia ga e Jehova, ọ khẹke ne ima gha fannọ otọ ẹko ima ma rẹn vbe erhunmwu (Psm 119:145; Eve 3:41), ma ghi gha tie Baibol vbe ẹghẹ hia (Ẹzr 7:10; Itan 15:28), ma ghi rhiegba ye iwinna ikporhu (yae taa Jer 20:9), ma ghi vbe gha gu emwa ni ya ekhọe hia ga e Jehova mu obọ.​—Yae taa 2 Ọba 10:​15, 16.

FEBRUARY 13-19

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 13-16

“Emwi Gha Dunna Ne Ima Deghẹ Ima Na Gha Lele Uhi E Jehova”

w03 5/1 10-11

U Rinmwian E Jehova Nọ Gha Dia Ruẹ Vbe Ẹghẹ Hia Ra?

12 Vbe a ghi mu ẹkpẹti ile werriegbe gie Ivbi Izrẹl nẹ, ọ kegha rre Kiriat Jearim vbe ukpo nibun. Ọba e Devid na ghi gha hoo nọ muẹn gha die Jerusalẹm. E Devid keghi gu avbe ọkaolotu ọghe Ivbi Izrẹl ziro, ọ na tama iran wẹẹ, ‘deghẹ iran kue yọ kevbe wẹẹ deghẹ ahoo ọghe Jehova nọ,’ a sẹtin mu ẹkpẹti ile nii gha die Jerusalẹm. Sokpan ọ ma gualọ otọ ẹmwẹ na vbe obọ e Jehova vbene ọ khẹke. Akpawẹ ọ ru vberriọ, iran i ghẹ te ya okotọ mu ẹkpẹti ile nii. Ivbi e Livai ni ke ẹgbẹe ọghe Kohat rre, ẹre ọ gha te muẹn yan izabọ, zẹvbe ne Osanobua tama Ivbi Izrẹl. Ẹi re avbiẹ inugba ẹre Devid he ya gualọ otọ emwi nọ khẹke nọ ru vbe obọ e Jehova, sokpan vbe ẹghẹ na nia, ọ ma ru vberriọ. Emwi nọ ru na keghi zẹ ẹbe. Vbe okiekie, e Devid na ghi kha wẹẹ: “E Jehova ne Osanobua ima keghi rri ima oya ye ne ima ma na gae vbene ọ te ke yi.”​—1 Krọnikol 13:​1-3; 15:​11-13; Nọmbas 4:​4-6, 15; 7:​1-9.

w03 5/1 11 ¶13

U Rinmwian E Jehova Nọ Gha Dia Ruẹ Vbe Ẹghẹ Hia Ra?

13 Vbe okiekie, vbe ẹghẹ ne Ivbi e Livai ghi ya mu ẹkpẹti ile ke owa Obẹd Idọm gha die Jerusalẹm, iran kegha so ihuan ọkpa ne Devid gbẹn. Ẹmwẹ eso vbe ihuan nii, keghi ye Ivbi Izrẹl ẹre rre, emwi ne kpataki nọ khẹke ne iran ru: “Uwa bu e Jehova ya nọ ẹre iyobọ, uwa vbe gha gae vbe nai na dobọ yi. Uwa ye iwinna ọyunnuan nọ winnaẹn rre kevbe ohiẹn nọ buru.”​—1 Krọnikol 16:​11, 12.

Emwi Ewe Ọghe Orhiọn

w14 1/15 10 ¶14

Gha Ga E Jehova Nọ Re Ọba Ọghe Etẹbitẹ

14 E Devid keghi mu ẹkpẹti ile gha die Jerusalẹm. Vbe a muẹn dee, emwa hia na gha ghọghọ, Ivbi e Livai na gha so ihuan urhomwẹ gie Jehova. Usun ẹmwẹ na loo ro vbe ihuan nii ẹre a gbẹn ye ebe 1 Krọnikol 16:31: “Uwa tama agbẹnvbo hia wẹẹ: ‘E Jehova khian Ọba nẹ!’” Ọmwa sẹtin gha kha wẹẹ, ‘Ẹi re Jehova ọre Ọba ọghe etẹbitẹ, vbọzẹ na ghi na kha wẹẹ, ẹghẹ nii ẹre Jehova ghi ya khian Ọba?’ Ẹghẹ ke ẹghẹ ne Jehova ya rhie ẹre ma wẹẹ irẹn ọre Ọba ra ẹghẹ ke ẹghẹ nọ ya mu emwamwa rhọkpa gbọọ, nọ gha loo ya ru emwi ne irẹn gualọ, a gha sẹtin kha wẹẹ ẹghẹ nii, ẹre Jehova ya khian Ọba. Odẹ ne Jehova ya khian Ọba ne ako na guan kaẹn na, wa kakabọ ru ekpataki. Vbene Devid te wu, e Jehova keghi yan ma rẹn wẹẹ, te ọmwa nọ ke uniẹn ọghẹe rre khian gha kha zẹvbe ọba vbe etẹbitẹ. Ọ keghi tama e Devid wẹẹ: “I gha ya ọkpa vbe uwu ivbuẹ ma ọba, I ghi vbe gi arriọba ẹre digiẹ.” (2 Sam 7:​12, 13) Vbe okiekie, ọ gberra ukpo 1,000 ovbi e Devid na ke do rhiegbe ma. De ọmwa nọ ghi gha khin, kevbe wẹẹ, de ẹghẹ nọ khian ghi ya khian Ọba?

FEBRUARY 20-26

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 17-19

“Ye Gha Sọyẹnmwẹ Ọ Gha Khọnrẹn Wẹẹ Emwi Ma Deyọ Vbene U Gualọe Yi”

w06 7/15 19 ¶1

Rhie Aro Tua Vbene Otu E Jehova Maan Hẹ

E DEVID nọ ke otọ Izrẹl rre keghi re ọkpa vbe usun emwa ni hin usi sẹ, na guan kaẹn vbe Abọ Ọghe Baibol Na Ya E Hibru Gbẹn. Ọ kegha re ọsuohuan, ọsihuan, akhasẹ kevbe ọba, ekhọe hia ẹre ọ ya mu ẹtin yan e Jehova. Te Devid wa sikẹ e Jehova ẹsẹsẹmwẹse, rhunmwuda ọni, ọ kegha hoo nọ bọ owa nẹẹn. Owa nọ ghaa hoo nọ bọ na, ẹre ọ khian gha re Ọgua Osa ne Ivbi Izrẹl hia khian na do gha ga e Jehova. E Devid rẹnrẹn wẹẹ emwi hia na khian gha ru vbe Ọgua Osa na, gha ya emwa ọghe Osanobua gha sọyẹnmwẹ, ọ ghi vbe ya e Jehova fiangbe iran. Rhunmwuda ọni, vbe Devid ghi so ihuan, ọ na wẹẹ: “Afiangbe ọrọre ọghe iran ne uwẹ hannọ zẹ, ne uwẹ vbe viọ gha dee do dia owa ruẹ nọhuanrẹn ya. Emwi esiesi ni rre owa ruẹ gha sẹ ima ọkẹn, afiangbe ọghe Ọgua Osa nọhuanrẹn ruẹ.”​—Psalm 65:4.

w21.08 22-23 ¶11

Gi Ukpamuyọmọ Ne U Mwẹ Gha Sẹ Ruẹ Ọyẹnmwẹ

11 Ma gha sẹtin ya ọyẹnmwẹ nọ sẹ ima gha muan yọ, deghẹ ima na ya ekhọe hia rhiegba ye iwinna na waa ima re vbe ugamwẹ e Jehova. Rhie egbe ye iwinna ikporhu kevbe iwinna na ru vbe uwu iko. (Iwinna 18:5; Hib 10:​24, 25) Gha mu egbe ye otọ u ke gha rrie iko, ne u mieke na sẹtin zẹ ewanniẹn nọ gha rhie igiọdu ne etẹn. U ghaa mwẹ obọ vbe abọ ọghe owebe vbe iko ne ima do vbe uwu uzọla, u ghi tie ẹre ekhuarro. Ọ ghaa mwẹ iwinna na mu nuẹn vbe iko, u ghi hia ne u rherhe gha sẹ iko, u ghi vbe gha ya ekhọe hia ru iwinna nii. Ghẹ ya iwinna rhọkpa na mu nuẹn rhẹghẹrẹ, hia ne u guẹ iwinna nii sayọ. (Itan 22:29) Zẹvbe ne u ya rhie egbe ye iwinna vbe ugamwẹ e Jehova, u ghi do gha mwẹ alaghodaro, ẹghẹ nii ọyẹnmwẹ ghi gha sẹ ruẹ. (Gal 6:4) Ọ ghaa yerriọ, deghẹ ukpamuyọmọ ne u te ya aro yi na ghi sẹ ọmwa ọvbehe obọ, u ghi sẹtin gu ọmwa nii ghọghọ.​—Rom 12:15; Gal 5:26.

Emwi Ewe Ọghe Orhiọn

w20.02 12, ẹkpẹti

Ma Hoẹmwẹ E Jehova Ne Erha Mwa Ẹsẹsẹmwẹse

Aro E Jehova Sotọ Vbe Egbe Mwẹ Ra?

Uwẹ zẹdia roro ẹre wẹẹ, ‘Vbuwe ọkhọngborrie emwa ni rre uhunmwu otagbọn na, gha re imẹ ne aro e Jehova gha na sotọ vbe egbe mwẹ?’ Adeghẹ u zẹdia roro ẹre vberriọ, ọ khẹke ne u rẹn wẹẹ ẹi re uwẹ ọkpa. Ọba e Devid khare wẹẹ: “Nọyaẹnmwa de emwi ne ọmwa khin, ne uwẹ na vbe bẹghe ẹre, ọmwa kẹkan, ne u vbe zẹ yọ ẹre re?” (Psm 144:3) E Devid kegha mwẹ ilẹkẹtin wẹẹ, te Jehova wa rẹn irẹn ẹsẹsẹmwẹse. (1 Krọ 17:​16-18) E Jehova keghi loo Evbagbẹn Nọhuanrẹn kevbe otu ọghẹe ya gi ima rẹn wẹẹ, aro irẹn sotọ vbe egbe ima, kevbe wẹẹ, irẹn bẹghe emwi hia ne ima ru rhunmwuda ahoẹmwọmwa ne ima mwẹ ne irẹn. Gia ziro yan ako eso vbe Evbagbẹn Nọhuanrẹn nọ ya ima rẹn wẹẹ, aro e Jehova sotọ vbe egbe ima:

• Ọ kpẹẹ re ne aro e Jehova ke sotọ vbe egbuẹ, uhiẹn vbene a te biẹ ruẹ.​—Psm 139:16.

• E Jehova rẹn emwi nọ rrọọ ruẹ ekhọe kevbe vbene emwi ye ruẹ hẹ.​—1 Krọ 28:9.

• E Jehova tobọre keghi danmwehọ dọmwadẹ erhunmwu ne u na.​—Psm 65:2.

• Emwi ne u ru sẹtin ya ẹko gha rriara e Jehova, ọ sẹtin vbe ya ẹko gha rhiẹnrhiẹn ọnrẹn.​—Itan 27:11.

• E Jehova ẹre ọ tobọre si ruẹ kẹ egbe.​—Jọn 6:44.

• E Jehova rẹn ruẹ sẹrriọ wẹẹ, u gha wu, ọ gha sẹtin huẹn ruẹ kpaegbe. Ọ ghi mu egbe kevbe ekhọe ọghe ọgbọn nuẹn. Egbe kevbe ekhọe ọghe ọgbọn na, ghi yevbe ne u mwẹ nia. Ẹghẹ nii, u ghi sẹtin yee ẹre rre, emwi hia ne u te ka rẹn, u ghi vbe gha mwẹ avbe akpa ne u te ka mwẹ.​—Jọn 11:​21-26, 39-44; Iwinna 24:15.

FEBRUARY 27–MARCH 5

EMWI EWE NI RRE UWU ẸMWẸ ỌGHE OSANOBUA | 1 KRỌNIKOL 20-22

“Ru Iyobọ Ne Avbe Igbama Ne Iran Mieke Na Sẹtin Musọe”

w17.01 29 ¶8

“U Ghi Viọ Avbe Emwi Na Ne Ikpia Ne U Gha Sẹtin Mu Ẹtin Yan”

8 Tie 1 Krọnikol 22:5. E Devid gha te sẹtin kha wẹẹ, e Solomọn ma sẹ nọ gha siẹnro iwinna ne kpataki vberriọ. Vbene ẹmwata, te a khian bọ Ọgua Osa na nọ ‘kakabọ gha mose,’ sokpan vbe ẹghẹ na kha na, ọvbokhan ẹre Solomọn ghaa khin, “ọ ma he rẹn emwi rhọkpa.” Ọrheyerriọ, e Devid rẹnrẹn wẹẹ, e Jehova gha ru iyobọ nọ khẹke ne Solomọn nọ mieke na sẹtin ru iwinna na mu nẹẹn. Rhunmwuda ọni, e Devid kegha hoo nọ ru emwi nọ gha sẹtin ru, nọ ya ru iyobọ ne Solomọn. Ọ na si emwi nibun na khian loo ya bọ owa nii koko.

w17.01 29 ¶7

“U Ghi Viọ Avbe Emwi Na Ne Emwa Ne U Gha Sẹtin Mu Ẹtin Yan”

7 E Devid ma kha wẹẹ, irẹn i khian rhie obọ ye iwinna nii, rhunmwuda ẹi re irẹn a khian gha kha wẹẹ, ẹre ọ bọ nene Ọgua Osa. Gele gele, Ọgua Osa ọghe Solomọn ẹre a ghi gha tie Ọgua Osa nii, a ma gha tie ẹre Ọgua Osa ọghe Devid. A sẹtin miẹn wẹẹ, ọ wa gele da e Devid wẹẹ ọ ma ghi sẹtin ru emwi nọ ghaa rre ọre ekhọe, sokpan te ọ wa ye ya egbe hia rhie obọ ba iwinna nii. Ọ na ru emwamwa ọghe vbene emwa khian ya gha winna vbe a ghaa bọ Ọgua Osa nii, ọ na viọ ematọn, oze, esiliva, igoru kevbe erhan esida yotọ. Deba ọni, ọ keghi rhie igiọdu ne Solomọn, ọ na tama rẹn wẹẹ: “Banbanna nian, ovbi mwẹ, te Jehova ne Osanobua ruẹ gha deba ruẹ, nọ vbe mu eyan rẹn sẹ, nọ gi Ọgua Osa na khian bọ nẹẹn mwẹ ruẹ uhunmwu.”​—1 Krọ 22:​11, 14-16.

w18.03 11-12 ¶14-15

Evbibiẹ Emọ, Wa Ru Iyobọ Ne Ivbi Uwa Ne Iran Mieke Na Sẹtin Dinmwiamẹ?

14 Odẹ ọkpa ne ediọn vbe iko gha ya sẹtin ru iyobọ ne evbibiẹ emọ, ọre ne iran gha nianiaẹn vbene ọ ru ekpataki sẹ hẹ na gha fian okhuo ne egbe ọmwa vbe odẹ ọghe orhiọn. Ọtẹn nokhuo ọkpa keghi ya yerre, iyobọ ne Ọtẹn Nokpia Charles T. Russell ru nẹẹn, vbe ọ rre ukpo ehan. Ọ keghi kha wẹẹ, “Ọ na ya ifuanro 15 rhie ibude mẹ ne I fian okhuo ne egbe mwẹ vbe odẹ ọghe orhiọn.” Vbọ ghi sunu? Ọ gberra ukpo 70 ne ọtẹn nokhuo na ya ga zẹvbe arọndẹ. Emwi ẹwaẹn na rhiẹre ma wẹẹ, ude nọ maan ne a bu ọmwa re, keghi biẹ ọmọ esi. (Itan 25:11) Ọ khẹke ne ediọn vbe gha tama evbibiẹ emọ kevbe ivbi iran ne iran gha mwẹ obọ vbe iwinna ne a rhirhi gha ru vbe Ọgua Arriọba. Ọrheyerriọ, iwinna ne emọ gha sẹtin ru ẹre ọ khẹke ne iran waa ne iran.

15 Odẹ eso ne etẹn ọvbehe vbe iko gha ya sẹtin ru iyobọ ọre wẹẹ, iran ghi gha si avbe ibiẹka ni wan dee kẹ egbe. Etẹn na ghi gha rhie aro sẹ otọ vbe egbe ibiẹka na, ne iran mieke na bẹghe ako ne iran na mwẹ alaghodaro vbe odẹ ọghe orhiọn. Vbọ khẹke ne etẹn vberriọ ru deghẹ iran na bẹghe ẹre wẹẹ, igbama vbe uwu iko zẹ ewanniẹn nọ gbe ye uviẹn vbe ẹghẹ hia? Ọ ghaa mwẹ ọta vbe iko ne a do vbe adesẹ uzọla vbo? A sẹtin vbe miẹn wẹẹ, ọ mwẹ edanmwẹ ne ọ da la gberra ra ọ loo ẹkpotọ nọ kie re ya kporhu iyẹn nọ maan vbe owebe. Ọ ghaa yerriọ, te ọ wa khẹke ne a tian rẹn. Ma sẹtin vbe ru emwamwa ne ima gha rhie igiọdu ne igbama vbe iko vbene iko te suẹn ra vbe a gha ghi zobọ nẹ. Ena hia gha ya igbama rẹn wẹẹ, iran mwẹ esa ne iran ye “vbe uwu iko” ọghe Jehova.​—Psm 35:18.

Emwi Ewe Ọghe Orhiọn

w05 10/1 11 ¶6

Avbe Olika Ẹmwẹ Ni Rre Ebe Krọnikol Nokaro

21:​13-15. E Jehova keghi tama odibo ọghẹe, nọ dobọ emianmwẹ nii yi, nọ ghaa gbele Ivbi Izrẹl, rhunmwuda ẹko i rhiẹnrhiẹn ọnrẹn vbe emwa rẹn ghaa rri oya. Vbene ẹmwata, Osanobua gele “vuọn ne itohan.”

    Ebe Edo Hia (2001-2025)
    Lọg Out
    Lọgin
    • Edo
    • Share
    • Vbene Ne U Gualọe Yi
    • Copyright © 2025 Watch Tower Bible and Tract Society of Pennsylvania
    • Vbene A Ya Loo Ẹre Hẹ
    • Uhi Nọ Dia Ayahọmwaehọ Ọghe Emwa Ni Loo E Wẹbsait Na
    • Privacy Settings
    • JW.ORG
    • Lọgin
    Share