IRUẸMWI 58
Ye Gha Ya Ẹkoata Ga E Jehova
Ivbiotu e Kristi ọghe ẹmwata ta mu olọ yan rẹn nẹ wẹẹ, iran i khian kue ne emwi rhọkpa, ra ọmwa rhọkpa si iran digiẹn vbe ugamwẹ e Jehova. Ma wa yayi wẹẹ, erriọ vbe ye vbe ekhọe ruẹ. Aro nọ ghaan ẹre Jehova ya ghee ẹkoata ne u mwẹ daa re. (Tie 1 Krọnikol 28:9.) De emwi eso nọ gha sẹtin yae gha lọghọ, ne u gha mwẹ ẹkoata daa e Jehova? De emwi nọ gha ru iyobọ nuẹn, ne u ghẹ de ye edanmwẹ vberriọ?
1. De emwi eso ne emwa ọvbehe gha ru, nọ gha sẹtin yae gha lọghọ ne ima gha mwẹ ẹkoata daa e Jehova?
Emwa eso gha hia ne iran mu idobo yọ, ne ima ghẹ ghi ga e Jehova. De emwa ni gha sẹtin ru emwi vberriọ? Emwa eso ni kpa hin odẹ ẹmwata rre nẹ, keghi ta ohoghe vbekpa otu e Jehova, ne iran mieke na gbe amuẹtinyan ọghe ima mu otọ. Iran na, ọre emwa okeke. Avbe ọkaolotu ugamwẹ eso vbe ta ohoghe vbekpa ima, ohoghe ne iran ta na, sẹtin ya emwa nẹi begbe kpa hin odẹ ọghe ẹmwata rre. Ọ sẹtin zẹ ẹbe vbe ima ghaa gu emwa vbenian muan ẹmwẹ, ma ghaa tie ebe iran, ma ghaa yo e wẹbsait ọghe iran, ra ma ghaa ghee vidio ọghe iran. Vbe Jesu ghi guan kaẹn emwa ni hoo ne iran gha mu emwa ekhọe rhia, ne iran ghẹ ghi sẹtin gha ya ẹkoata ga e Jehova, ọ na kha wẹẹ: “Ghẹ zẹ ye iran re. Arọndẹ ni rhu aro iran khin. Arhuaro gha rhie arhuaro la odẹ, uye iran eva ra kharha yi.”—Matiu 15:14.
2. De vbene azẹ ne ima ru ya rhie ẹre ma, deghẹ ima mwẹ ẹkoata daa e Jehova?
Ahoẹmwọmwa ne iwinna ne ima ru, ra otu ne ima ye, ra emwi ọvbehe ne ima rhirhi gha ru ginna ugamwẹ ohoghe. E Jehova ya obọ sekhae ne ima wẹẹ: “Wa ke [Babilọn Nọkhua] ladian, wa ne emwa mwẹ.”—Arhie Maan 18:2, 4.
GUALỌ OTỌ RE SAYỌ
Gia ziro yan emwi ne u gha ru, ne ọmwaikọmwa ghẹ do ya ruẹ khian nẹi ghi mwẹ ẹkoata daa e Jehova. Ma gha vbe ruẹ ọre wẹẹ, u gha kpa hin e Babilọn Nọkhua rre, te u rhie ẹre ma wẹẹ u mwẹ ẹkoata daa e Jehova.
3. Gha begbe vbe egbe avbe ọmamwaemwi ohoghe
De emwi nọ khẹke ne ima ru, vbe ima gha họn iyẹn nẹi maan vbekpa otu e Jehova? Tie Itan 14:15, iyeke ọni, uwa ghi ziro yan inọta na:
Vbọzẹ nọ ma na khẹke ne ima gha ya emwi hia ne ima rhirhi họn yi?
Tie 2 Jọn 9-11, iyeke ọni, uwa ghi ziro yan avbe inọta na:
De obọ nọ khẹke ne ima ya gha mu emwa okeke?
Agharhemiẹn wẹẹ ima i wa gu emwa okeke guan ghee mwẹ ghee ruẹ, de odẹ ọvbehe ne ima gha ya sẹtin dekun imamwaemwi ọghe iran?
Vbua yayi wẹẹ ọ khian gha ye hẹ vbe ekhọe Jehova, vbe ima ghaa danmwehọ ẹmwẹ dan ne emwa ọvbehe ta vbekpa irẹn ra otu ọghẹe?
4. Ye gha mwẹ ẹkoata daa Osanobua vbe ọtẹn gha ru orukhọ
Ma gha rẹn wẹẹ ọtẹn ru orukhọ nọ wegbe, vbọ khẹke ne ima ru? Gia ziro yan ilele ọkpa nọ rre Uhi ne Osanobua yi ne Ivbi Izrẹl nẹdẹ. Tie Lẹvitikọs 5:1.
Zẹvbe ne ako na khare, ma gha rẹn wẹẹ ọtẹn ru orukhọ nọ wegbe, te ọ khẹke ne ima ya tama ediọn vbekpa re. Ma ke ru vberriọ, ọ khẹke ne ima ka tama ọtẹn nii, nọ tobọre ya tama ediọn. Ma gha ru vberriọ, te ima rhie ẹre ma wẹẹ ima hoẹmwẹ ọnrẹn. Sokpan deghẹ ọ ma ghi bu ediọn, ọ khẹke ne ẹkoata ne ima mwẹ daa e Jehova gua ima kpa ya tama ediọn. De vbene ilele na, ya rhie ẹre ma wẹẹ, ima mwẹ ahoẹmwọmwa nẹi beghe daa . . .
Osanobua ne Jehova?
ọmwa nii nọ ru orukhọ?
etẹn ni rre iko?
Ọtẹn ghaa rre ọlọghọmwa, ru iyobọ nẹẹn!
5. Ladian vbe uwu e Babilọn Nọkhua
Tie Luk 4:8 kevbe Arhie Maan 18:4, 5, iyeke ọni, u ghi zẹ ewanniẹn ye avbe inọta na:
Eni mwẹ ye rre ebe na gbẹnnẹ eni emwa yi vbe ugamwẹ ohoghe ra?
I rre otu rhọkpa nọ ginna ugamwẹ ohoghe ra?
Iwinna ne I ru, ye ugamwẹ ohoghe ike vbe odẹ ke odẹ ra?
Ọ ye mwẹ odẹ ọvbehe vbe arrọọ mwẹ, nọ na khẹke ne I gban egbe ne ugamwẹ ohoghe ra?
Deghẹ ẹẹn ọre ewanniẹn ne I zẹ ye avbe inọta na, de afiwerriẹ nọ khẹke ne I ru?
Gi azẹ ne u rhirhi ru, gha re nọ gha ya ruẹ gha mwẹ ekhọe ọguọmwaziro nọ hianrẹn, kevbe nọ gha rhie ẹre ma wẹẹ, u mwẹ ẹkoata daa e Jehova.
Otu ọghe ugamwẹ ohoghe eso keghi ru emwamwa ne iran ya ru iyobọ ne emwa ni gualọ iyobọ. Otu vbenian gha wẹẹ ne u do ru izọhẹ, vbua khian ru?
EMWA ESO KEGHI KHA WẸẸ: “Ọ khẹke ne I rẹn emwi ne emwa okeke ta vbekpa Avbe Osẹe Jehova, ne I mieke na sẹtin sinmwi oseghe ne ugamwẹ ẹmwata.”
Ẹwaẹn rre ọni ra? Vbua gu kha vberriọ?
OLIKA ẸMWẸ
Ne ima mieke na ye gha mwẹ ẹkoata daa e Jehova, te ima gha gban egbe ne emwa ni hoo ne iran bibi ima odẹ.
Ogbewerriẹ
Vbọzẹ nọ ma na khẹke ne ima gha danmwehọ ẹmwẹ ne emwa okeke ta?
Ma gha rẹn wẹẹ ọtẹn ru orukhọ nọ wegbe, vbọ khẹke ne ima ru?
Vbe ima khian ya rhie ẹre ma hẹ wẹẹ ima lele adia ne Jehova rhie ne ima, nọ na wẹẹ ne ima kpa hin ugamwẹ ohoghe rre?
RUẸ SAYỌ
Ghee emwi nọ khẹke ne u ru, vbe emwa ghaa ta ohoghe vbekpa Avbe Osẹe Jehova.
Vbua khian ya sẹtin yẹrẹro hẹ ighẹ avbe otu, ra emwi ke emwi ni ye Babilọn Nọkhua ike?
De emwi eso ne eghian ni gbodan ye odẹ ẹmwata he ru, ne iran mieke na si ima digiẹn vbe odẹ ọghe orhiọn?
Vbe okha nọ mwẹ uhunmwuta na, “Ke Egbe Ọvbokhan Gha Dee Ẹre I Ke Gualọ Osanobua,” tie vbekpa vbene ohẹn ọghe ugamwẹ Shinto, ya sẹtin kpa hin ugamwẹ ohoghe rre hẹ.