Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
NOVEMBER 4-10
EMWI EWE NI RRE UWU ẸMWẸ ỌGHE OSANOBUA PSALM 105
‘Ẹ I Khian Mianmian Ile Ọghẹe Vbe Etẹbitẹ’
Vbọ Khian Ya Ima Gha Mwẹ Amuẹtinyan Nọ Wegbe Wẹẹ, E Jehova Gha Mu Agbọn Ọgbọn Rre?
11 Gia guan kaẹn emwi eso nọ yevbe emwi nẹi khian sẹtin sunu ne Jehova ru eyan rẹn vbe ẹghẹ nọ gberra. Ọ keghi tama Ebraham vbe Sera wẹẹ, iran gha biẹ ọmokpia ọkpa, agharhemiẹn wẹẹ, iran khian ọmaẹn nẹ. (Gẹn 17:15-17) Ọ na vbe tama Ebraham wẹẹ, irẹn gha mu otọ e Kenan ne uniẹn ọnrẹn. Vbe ọwara ukpo nibun ne Ivbi Izrẹl ni re Ivbi Ebraham ya gha rri oya vbe Igipt, ọ na do yevbe na miẹn wẹẹ, eyan ọghe Jehova i khian ghi sẹ. Sokpan, te ọ ye sẹ. Vbene ẹghẹ ya khian, e Jehova na vbe tae wẹẹ, Elizabẹt gha ya egbe ọmaẹn biẹ. Ọ na vbe tama e Meri nọ re uvbi nọ ma he rẹn okpia wẹẹ, ọ gha biẹ Ovbi irẹn. Erriọ e Jehova ya muẹn sẹ eyan nọ yan rẹn vbe ogba ọghe Idẹni!—Gẹn 3:15.
12 Ma ghaa muẹn roro vbene Jehova ya mu eyan rẹn sẹ vbe ẹghẹ nọ gberra, ọ gha ya ima gha mwẹ ilẹkẹtin wẹẹ, ọ gha gele mu agbọn ọgbọn nii rre, rhunmwuda Osa Ne Olẹtin ẹre nọ. (Tie Jọsua 23:14; Aizaia 55:10, 11.) Ẹghẹ nii, ma ghi sẹtin ru iyobọ ne emwa ọvbehe ya rẹn wẹẹ, agbọn ọgbọn i re ọtakua na tisẹ. E Jehova ghi tae nẹ wẹẹ. irẹn gha mu ẹrinmwi ọgbọn kevbe agbọn ọgbọn rre, ọ na vbe kha wẹẹ: “Ẹmwẹ ẹmwata nọ gia mu ẹtin yan ẹre nọ.”—Arhie 21:1, 5.
it-2 1201 ¶2
Ẹmwẹ Nii
Osanobua gha sẹtin loo ẹmwẹ ne unu ẹnrẹn ya dia emwi hia nọ yi, ke nọ mwẹ arrọọ kevbe nẹi mwẹ arrọọ, ọ gha vbe sẹtin loo avbe emwi nọ yi vbe odẹ nọ gha ya emwamwa rẹn mwẹ uhunmwu. (Psm 103:20; 148:8) Ẹmwẹ ọnrẹn gia mu ẹtin yan; Osanobua gha ru eyan nẹ, ẹ i mianmian ya ru ẹre. (Diut 9:5; Psm 105:42-45) E Jehova tobọre tae wẹẹ, ẹmwẹ ọghe irẹn “rrọọ vbe ẹdẹdẹmwẹdẹ”; e Jehova gha ta ẹmwẹ nẹ, ẹmwẹ nọ tae i werriegbe bu ẹre rre, vbe ẹ i re te ọ ru emwi nọ gie ẹre nọ ya ru nẹ.—Aiz 40:8; 55:10, 11; 1 Pit 1:25.
Emwi Ewe Ọghe Orhiọn
w86 11/1 19 ¶15
Avbe Igbama—Emwi Ne Uwa Gha Ru Ne Ẹgbẹe Ọghe Uwa Mieke Na Gha Mwẹ Akugbe
15 “A keghi rrọ ọgiọrọ ye [Josẹf] owẹ, a keghi vbe gba urọnghọn ematọn ye ọre urhu. A te do miẹn wẹẹ emwi nọ ta yotọ sunu, ẹmwẹ ọghe Jehova ẹre ọ kpe ẹre huan.” (Psalm 105:17-19) Ukpo 13 ẹre Josẹf ya rri oya zẹvbe ọviẹn kevbe oleghan, a te miẹn wẹẹ emwi ne Jehova ta yotọ sunu. Emwi nọ sunu daa e Josẹf na, ẹre ọ kpe ẹre huan. Ọ mwẹ emwi nọ si ẹre ne Jehova na kue yọ ne Josẹf miẹn avbe ọlọghọmwa na, agharhemiẹn wẹẹ, ẹ i re irẹn ẹre ọ si ẹre ye ọre egbe. E Josẹf gha ye mu ẹtin yan “ẹmwẹ ọghe Jehova,” agharhemiẹn wẹẹ ọ rre uwu ọlọghọmwa nọ wegbe ra? Ọ gha sẹtin gha mwẹ uyinmwẹ esi sayọ ra, ọ gha vbe sẹtin gha re ọmwa nọ wegbe vbe odẹ ọghe orhiọn, nọ mu egbe nọ ya winna, nọ mwẹ izinegbe kevbe nọ mu egbe rriotọ, nọ mieke na sẹtin ru iwinna nọ lọghọ na rhirhi waa re ra? Vbe okiekie, e Josẹf keghi yevbe igoru nọ ladian vbe uwu erhẹn—ọ na do gha re ọmwa na kpe huan kevbe nọ ghaan vbe aro Osanobua. Iyeke ọni, Osanobua na vbe loo ẹre ya ru iwinna nibun ni hin usi.—Gẹnẹsis 41:14, 38-41, 46; 42:6, 9.
NOVEMBER 11-17
EMWI EWE NI RRE UWU ẸMWẸ ỌGHE OSANOBUA PSALM 106
“Iran Mianmian Osanobua Nọ Miẹn Iran Fan”
“Gha Ọ Ghi Rre Obọ Ọghe Nọyaẹnmwa Vbọ?”
13 Odẹ ọghe ọyunnuan ne Jehova ya rhiegbe ma Ivbi Izrẹl keghi ya orhirhi gbe ku iran, rhunmwuda ọni, iran na wẹẹ ne Mozis gha re ọmunu nọ gu e Jehova guan ne iran. (Ẹks 20:18-21) Vbe Mozis ya gu e Jehova guan vbe uhunmwu Oke Sainai, ọ ma rherhe rre. Rhunmwuda ọni, orhiọn keghi gbe ye Ivbi Izrẹl iwu. Ọ khọ wẹẹ, Ivbi Izrẹl ghaa bẹghe Mozis, ẹre iran na mwẹ amuẹtinyan dae Jehova. Ne iran ma na ghi miẹn Mozis vbe ikpẹdẹ eso, amuẹtinyan ọghe iran keghi worua. Osi na gha si iran sẹrriọ wẹẹ, iran na tama Erọn: “Larre o, do ma Osanobua ne ima, nọ gha viọ ima gha khian rhunmwuda ima ma ghi rẹn emwi nọ ghi ru oko na ighẹ Mozis ne ọ viọ ima ke Igipt ladian.”—Ẹks 32:1, 2.
Emwi Ewe Ọghe Orhiọn
w06 7/15 13 ¶9
Avbe Olika Ẹmwẹ Ni Rre Ebe Nogieha Kevbe Nogienẹ Ọghe Psalm
106:36, 37. Avbe ako ọghe Baibol na ya ima rẹn wẹẹ, igẹbọ kevbe izọese na ru gie avbe ugbogiorinmwi ginna egbe. Ọna rhie ma wẹẹ, deghẹ ọmwa na gha ga ẹbọ, avbe ugbogiorinmwi sẹtin suẹn gha loo ẹre. E Baibol khare wẹẹ: “Wa gha lẹẹ ne amazẹ na gho.”—1 Jọn 5:21.
NOVEMBER 18-24
EMWI EWE NI RRE UWU ẸMWẸ ỌGHE OSANOBUA PSALM 107-108
“Wa Rhie Ekpọnmwẹ Ne Jehova Rhunmwuda Ighẹ Ọ Maan”
w07 4/15 20 ¶2
Gi Emwa Hia Ni Rre Uwu Iko Gha Rho E Jehova
2 Iko i wa re eke ne avbe ọse na si egbe koko kẹkan. Ẹ i re ehe ne emwa ni rre ẹdogbo ọkpa na si egbe koko, ẹ i vbe re ehe ne emwa ni mwẹ emwi ọkpa vbe ekhọe ra emwa ni ru emwi kugbe vbe na ghee iku isasegbe ra emwi ọvbehe vberriọ, na si egbe koko. Sokpan, emwi nọ wa mobọ si ẹre ne ima na si egbe koko vbe iko, ọre ne ima rhie urhomwẹ ne Jehova ne Osanobua mwa. Ẹmwẹ nọ rre ebe Psalm ya ima rẹn wẹẹ, erriọ ẹre ọ wa ye ke otọ gha dee. Ebe Psalm 35:18 khare wẹẹ: “Ẹghẹ nii, mẹ gha kpọnmwọn vbe uwu iko avbe emwa ruẹ. I gha rho ruẹ vbe ehe ne iran hia ye.” Deba ọni, ebe Psalm 107:31, 32 khare wẹẹ: “Ọ kere ne iran kpọnmwẹ e Jehova ye ahoẹmwọmwa rẹn nẹi beghe kevbe emwi ọyunnuan nọ ru ne iran. Ọ kere ne iran na iyẹn ukpọlọmwẹ ọnrẹn vbe iko ọghe emwa.”
w15 1/15 9 ¶4
Rhie Ekpọnmwẹ Gie Jehova Ne U Mieke Na Miẹn Afiangbe
4 Ọ mwẹ emwi eso ne ima gha ru ne ima mieke na sẹtin ye gha gbọyẹmwẹ ye emwi hia ne Jehova ru ne ima. Vbe okaro, te ọ khẹke ne ima gbarokotọ, ne ima bẹghe odẹ ughughan ne Jehova he ya fiangbe ima, iyeke ọni, ma ghi muẹn roro vbene avbe afiangbe na ya rhie ẹre ma wẹẹ, Osanobua hoẹmwẹ ima ẹsẹsẹmwẹse. Vbe ọsian ghi ru avbe emwi na guan kaẹn na, emwi hia ne Jehova he ru nẹẹn keghi yan rẹn unu rua.—Tie Psalm 40:5; 107:43.
Emwi Ewe Ọghe Orhiọn
it-2 420 ¶4
E Moab
Vbe ẹghẹ eso ghi gberra nẹ, vbe Devid tobọre ghi suẹn gha kha nẹ zẹvbe ọba, Izrẹl kevbe Moab na ye gha gu egbe khọn. Obọ Ivbi Izrẹl keghi ke ukhunmwu ne Ivbi e Moab, ẹre a na ghi we ne Ivbi e Moab suẹn gha ha oko gie Devid. Ọ khọ wẹẹ, vbe iran ghi khọn okuo nii fo nẹ, a na ghae ivbiyokuo e Moab ye ihe eha, a na gbele obọ eva vbọ. A sẹtin miẹn wẹẹ, te Devid we ne iran lovbiẹ lele otọ, nọ mieke na rẹn obọ eva nọ gha gbele vbọ, kevbe obọ ọkpa nọ khian sẹrae. (2 Sam 8:2, 11, 12; 1 Krọ 18:2, 11) Ughaghe, uwu ẹghẹ ne iran ya gha khọn okuo na, ẹre Benaia ne ovbi e Jehoiada ya ‘gbele emọ ikpia eva ọghe Ariẹl ne ovbi e Moab.’ (2 Sam 23:20; 1 Krọ 11:22) Vbe Devid khọnmiotọ yan Ivbi e Moab, ẹmwẹ akhasẹ ne Balam tae keghi sẹ. Ọ gberra ukpo 400 nọ ta ẹmwẹ akhasẹ na yotọ. Ọ khare wẹẹ: “Orhọnmwẹ gha ke uniẹn ọghe Jekọb ladian, ọkpọ ọghe ọdakha gha vbe ke uniẹn ọghe Izrẹl ladian, ọ gha guọghọ uharo ọghe Moab, kevbe ugboloko uhunmwu ọghe emọ ikpia ọghe igbinnoguo.” (Nọm 24:17) Ọ khọ wẹẹ, akhọnmiotọ na ẹre ọsian ghaa guan kaẹn, vbe ọ khare wẹẹ, Osanobua gie Moab zẹvbe “uwawa akhuẹ” ọghẹe.—Psm 60:8; 108:9.
NOVEMBER 25–DECEMBER 1
EMWI EWE NI RRE UWU ẸMWẸ ỌGHE OSANOBUA PSALM 109-112
Gha Ye Jesu Ne Ọba Ike!
w06 9/1 13 ¶6
Avbe Olika Ẹmwẹ Ni Rre Ebe Nogie Isẹn Ọghe Psalm
110:1, 2—De emwi ne Jesu Kristi ne Devid tie ẹre “Nọyaẹnmwẹ” ghaa ru, vbe ọ tota ye obọ erha ọmwa ọghe Osanobua? Vbe Jesu ghi rhiọ kpaegbe nẹ, ọ na ya tota ye obọ erha ọmwa ọghe Osanobua, ọ na zin egbe ya sẹ ẹghẹ ne Osanobua ya ma re ọba vbe ukpo 1914. Vbe uwu ẹghẹ nii, ọ na gha khaevbisẹ yan avbe erhuanegbe ẹre na hannọ zẹ, ọ na gha dia iran vbe iwinna ikporhu kevbe iwinna imamwaemwi ne iran ghaa ru, ọ na vbe gha mu iran egbe yotọ khẹ ẹghẹ ne iran khian ya deba irẹn do gha kha vbe ẹrinmwi.—Matiu 24:14; 28:18-20; Luk 22:28-30.
w00 4/1 18 ¶3
Ọkpa I Khian Gbe Ifuẹn Ne Emwa Ni Gu Osanobua Khọn!
3 Ke odẹ ukpo 100 nọ gberra (early 20th century) gha dee, ẹre a ke gu emwa ọghe Jehova khọn. Vbe otọ ẹvbo nibun, ikpia ni mwẹ ekhọe dan keghi hia vbe odẹ ke odẹ ne iran mu idobo ye iwinna ikporhu iyẹn nọ maan ọghe Arriọba Osanobua, na ghẹ ghi zẹdẹ ya iyẹn na wewe hiehie. Esu ne oghian ima nọ “khian yo khian rre vbe na ghee oduma nọ davan, nọ gualọ ọmwa nọ khian gbe re,” ẹre ọ rre iran iyeke. (1 Pita 5:8) “Ẹghẹ na rhie ne avbe agbẹnvbo” ghi sẹ ufomwẹ nẹ vbe ukpo 1914, Osanobua tobọre na ma Ovbi ẹre Ọba, ọ na we nọ gha kha yan uhunmwu otagbọn na, ọ na vbe tama rẹn wẹẹ: “Gha khaevbisẹ yan avbe eghian ruẹ.” (Luk 21:24; Psalm 110:2) E Kristi keghi loo ẹtin ọghẹe ya khu e Setan fua vbe ẹrinmwi gha die uhunmwu otagbọn na. Esu rẹnrẹn wẹẹ, ovbi ẹghẹ kherhe ẹre irẹn ghi mwẹ, rhunmwuda ọni, te ọ ghi gu Ivbi Otu e Kristi na hannọ zẹ kevbe emwa ne iran gba ga Osanobua khọn. (Arhie Maan 12:9, 17) De emwi eso nọ he sunu rhunmwuda ne avbe eghian na, na gu Osanobua khọn?
be 76 ¶2
Gha Mwẹ Alaghodaro
Te ima gha zẹ emwi ru, ne ima mieke na sẹtin loo emwi ughughan ne Osanobua ya we ima. Wẹ zẹ owẹ nokaro ne u mieke na sẹtin gu emwa ọvbehe winna vbe ikporhu ra? Wẹ gualọ ẹkpotọ ne u gha ya sẹtin ru iyobọ ne emwa ọgbọn, avbe igbama, emwa ni khuọnmwi ra ni khian ọmaẹn nẹ ni rre iko ruẹ ra? Wẹ rhiegbe ladian ne u mieke na sẹtin deba etẹn kpe Ọgua Arriọba huan ra, ra ne u vbe gha mwẹ obọ vbe iwinna ughughan na ru, vbe asikoko ọghe otako kevbe asikoko nọkhua ra? Ke ẹghẹ ya fi ẹghẹ, u gha sẹtin gha ru iwinna arọndẹ ọghe ọyọmwabọ ra? U gha sẹtin ru iwinna arọndẹ ọghe ẹghẹ hia ra, ra ne u gha rrie iko na na gualọ iyobọ etẹn ra? Deghẹ ọtẹn nokpia ẹre u khin, wẹ vbe hia ne u gha lele emwi ne Baibol tae, ne u mieke na gbegba nọ gha ga zẹvbe ọguọmwadia iwinna ra ọdiọn ra? Deghẹ u na gha ya ekhọe obọ ruẹ ru iyobọ ne emwa ọvbehe, u na vbe gha ru iwinna na rhirhi waa ruẹ re, te u rhie ẹre ma wẹẹ u mwẹ alaghodaro.—Psm 110:3.
Emwi Ewe Ọghe Orhiọn
it-1 524 ¶2
Ile
Ile Ọghe Ohẹn Nọ Khian Gha Yevbe Mẹlkizẹdẹk. Ile na rre ebe Psalm 110:4. Vbe ebe Hibru 7:1-3, 15-17, ọmwa nọ gbẹn ebe Hibru keghi rhan otọ re wẹẹ, e Kristi ẹre ako na guan kaẹn. Jesu Kristi ọkpa kẹkan ẹre Jehova gu ta ile na. Egbọre, ile na ẹre Jesu ghaa guan kaẹn vbe ọ gu erhuanegbe ẹre ta ile ọghe arriọba. (Luk 22:29) E Jehova yan rẹn wẹẹ, e Jesu Kristi nọ re Ovbi Osanobua nọ rre ẹrinmwi gha do gha re ohẹn, nọ yevbe Mẹlkizẹdẹk. Ọba kevbe ohẹn ọghe Osanobua ẹre Mẹlkizẹdẹk ghaa khin vbe uhunmwu otagbọn na. Jesu Kristi ẹre ọ khian gha re Ọba kevbe Ogie Ohẹn, ẹrinmwi ẹre ọ khian na gha kha, ẹ i re uhunmwu otagbọn na. Jesu ghi sẹ ẹrinmwi nẹ, a na do muẹn ye ukpo ọghe Ọba kevbe Ogie Ohẹn vbe etẹbitẹ. (Hib 6:20; 7:26, 28; 8:1) Te ile na khian gha rrọọ vbe etẹbitẹ rhunmwuda, ototọ ọdakha ọghe Jehova ẹre Jesu khian na gha re Ọba kevbe Ogie Ohẹn vbe etẹbitẹ.—Hib 7:3.
DECEMBER 2-8
EMWI EWE NI RRE UWU ẸMWẸ ỌGHE OSANOBUA PSALM 113-118
De Emwi Ne Ima Gha Rhie Ne Jehova Rhunmwuda Emwi Hia Nọ He Ru Ne Ima?
w01 1/1 11 ¶13
Gi Ahoẹmwọmwa Gha Rhie Igiọdu Nuẹn
13 Ẹmwẹ ne Jesu tae ya ima rẹn wẹẹ, emwi nọ ghi ru ekpataki sẹ ọre ne ima hoẹmwẹ e Jehova. Vbọrhirhighayehẹ, ọmwa rhọkpa nọ ya ekhọe hia hoẹmwẹ e Jehova vbe a biẹ ọre i rrọọ. Te ima gha loo ẹrhiọn yọ ne ima mieke na sẹtin ya ekhọe hia hoẹmwẹ e Jehova. Emwi okaro ne ima ruẹre vbekpa e Jehova keghi ya ima gha hoo ne ima sikẹ ọre. Kherhe kherhe, ma na do ruẹ vbekpa vbene ọ ya yi uhunmwu otagbọn na, ne ima ne emwa nagbọn mieke na sẹtin dia ẹre ya. (Gẹnẹsis 2:5-23) Ma na do ruẹ vbekpa obọ nọ ya mu emwa nagbọn; nọ gha te ya fi iyeke gbe ima vbe Adam vbe Ivi ru orukhọ, ọ na zẹ owẹ nọ khẹke nọ mieke na sẹtin miẹn ima fan. (Gẹnẹsis 3:1-5, 15) Ọ kegha ya obọ esi mu emwa ni họn ẹmwẹ nẹẹn. Ọ ghi sẹ ẹghẹ, ọ na gie Ovbi ẹre ne ukpọmọkpa gha dee, nọ do wu ye orukhọ ọghe ima. (Jọn 3:16, 36) Ma ghi do rẹn ena hia vbekpa e Jehova, ahoẹmwọmwa ne ima mwẹ nẹẹn na do gha wegbe yọ. (Aizaia 25:1) E Devid ne Ọba wẹẹ irẹn hoẹmwẹ e Jehova, rhunmwuda odẹ nọ ya gbaroghe irẹn. (Psalm 116:1-9) Vbe ẹdẹnẹrẹ, e Jehova keghi gbaroghe ima, ọ dia ima, ọ rhie ẹtin ne ima, erriọ ẹre ọ vbe ya rhie igiọdu ne ima. Vbene ima ya ruẹ vbekpa e Jehova, erriọ ahoẹmwọmwa ne ima mwẹ nẹẹn khian ya gha wegbe yọ.—Psalm 31:23; Zẹfanaia 3:17; Rom 8:28.
w09 7/15 29 ¶4-5
Gha Gbọyẹmwẹ Ye Ẹse Na Ru Nuẹn—U Ghi Vbe Gha Ya Ekhọe Hia Ru Ẹse Ne Emwa Ọvbehe
Ọsian keghi nọ egbe ẹre wẹẹ: “De emwi ne imẹ gha rhie ne Jehova, rhunmwuda ẹse hia nọ he ru mẹ?” (Psm 116:12) De emwi eso ne Jehova ru nẹẹn? E Jehova keghi ru iyobọ nẹẹn vbe ẹghẹ ne “ohan kevbe ohawa” khian na te gbe ẹre rua. Deba ọni, e Jehova keghi miẹn ọnrẹn fan ‘hin obọ uwu rre.’ Nian, ọ kegha gualọ odẹ nọ khian ya “rhie” emwi werriegbe ne Jehova. De emwi ne ọsian na khian ghi ru? Ọ na wẹẹ irẹn gha “hae Jehova emwi” ne irẹn ve ẹre. (Psm 116:3, 4, 8, 10-14) Ọ na ghi wẹẹ irẹn gha hia ne irẹn mu eyan hia ne irẹn yan ma e Jehova sẹ, kevbe wẹẹ, irẹn gha vbe gha ru emwi hia nọ khẹke ne irẹn gha ru.
Wẹ gha vbe sẹtin ru vberriọ. Odẹ vbo? U ghi gha ya ilele kevbe uhi ọghe Osanobua ru emwi vbe ẹdagbọn ruẹ. Nọnaghiyerriọ, ọ khẹke ne ugamwẹ ne u rhie ne Jehova gha re emwi nọ ghi ru ekpataki sẹ vbe ẹdagbọn ruẹ, u ghi vbe gi orhiọn nọhuanrẹn ọghe Osanobua gha dia ruẹ vbe emwi hia ne u ru. (Asan 12:13; Gal 5:16-18) Ọghe ne ẹmwata, u i khian sẹtin ha e Jehova osa ye emwi hia nọ he ru nuẹn. Ọrheyerriọ, ọ wa ‘ya ẹko rhiẹnrhiẹn e Jehova’ vbe ọ gha bẹghe ẹre wẹẹ, u ya ekhọe hia rhiegba ye ugamwẹ ọghẹe. (Itan 27:11) Uyi nọkhua wa nọ, ne ẹkpotọ na kie ne ima ya gha ya ẹko rhiẹnrhiẹn e Jehova vbe odẹ vbenian!
Emwi Ne Ima Gha Miẹn Ruẹ Vbe Ebe Lẹvitikọs
9 Iruẹmwi nogieva: Ma keghi ga e Jehova rhunmwuda ne ima na gbọyẹmwẹ ye emwi nọ ru ne ima. Ma gha miẹn emwi ruẹ vbe izọese ọghe ekpọnmwẹ ne Ivbi Izrẹl ghaa ru vbe ẹghẹ nẹdẹ. Ebe Lẹvitikọs gi ima rẹn wẹẹ, Ivbi Izrẹl ghaa ru izọese ne iran “ya kpọnmwẹ Osanobua” ye emwi nọ ru ne iran. (Lẹv 7:11-13, 16-18) Ekhọe obọ iran ẹre Ivbi Izrẹl ya gha ru izọese na, ai gbagbae ye iran egbe. Ọna rhiema wẹẹ ahoẹmwọmwa ne ọmwa mwẹ ne Jehova, ẹre ọ yae ru egbe izọese vbenian. Iran gha ghi ya aranmwẹ ru izọese gie Jehova nẹ, ọmwa nọ ru izọese nii kevbe ẹgbẹe ọre kẹ kevbe avbe ohẹn ghi koko rri aranmwẹ nii. Sokpan ọ mwẹ emwi eso vbe egbe aranmwẹ nii ne iran i re, ọghe Jehova ọkpa nọ. De emwi ne ọni khin?
10 Iruẹmwi nogieha: Ahoẹmwọmwa ne ima mwẹ ne Jehova, ẹre ọ ya ima rhie ugamwẹ nọ maan sẹ nẹẹn. Ẹvbi nọ rre egbe aranmwẹ ẹre ọ ghi maan sẹ vbe aro e Jehova. Gberra ọni, ọ vbe mwẹ ako ọvbehe ne Jehova wa ya aro nọ ghaan ghee, ọkpa vbọ ọre ihẹnmwẹ (kidney) ọghe aranmwẹ. (Tie Lẹvitikọs 3:6, 12, 14-16.) Ọna ẹre ọ si ẹre ne ẹko na rhiẹnrhiẹn e Jehova, vbe Ovbi Izrẹl gha ya avbe abọ ni ru ekpataki sẹ vbe egbe aranmwẹ ru izọese gie ẹre. Ovbi Izrẹl gha ru izọese vbenian, te ọ rhiẹre ma wẹẹ, ugamwẹ nọ ghi maan sẹ ẹre irẹn rhie ne Osanobua. Erriọ Jesu vbe ya rhie ugamwẹ nọ ghi maan sẹ ne Jehova, rhunmwuda ahoẹmwọmwa nọ mwẹ nẹẹn. (Jọn 14:31) Ahoo ọghe Osanobua ọre emwi nọ ghi ru ekpataki sẹ ne Jesu; erriọ uhi ọghe Osanobua vbe gha yẹẹ ọre na lele. (Psm 40:8) Vbene ẹmwata, ekhọe hia ẹre Jesu ya ga e Jehova, ẹi mwẹ ọna ma ya ẹko rhiẹnrhiẹn e Jehova!
11 A gha sẹtin ya izọese ekpọnmwẹ ne Ivbi Izrẹl ghaa ru vbe ẹghẹ nẹdẹ, gie ugamwẹ ne ima rhie ne Jehova vbe ẹdẹnẹrẹ. Ugamwẹ nọ maan sẹ ẹre ima rhie ne Jehova, rhunmwuda, ekhọe hia ẹre ima ya hoẹmwẹ e Jehova. Ẹko keghi rhiẹnrhiẹn e Jehova vbe ọ gha bẹghe ẹbo emwa nibun ni ya ekhọe hia gae, rhunmwuda ahoẹmwọmwa ne iran mwẹ nẹẹn! Aro nọ ghaan ẹre Jehova ya ghee iwinna ne ima ru vbe ugamwẹ ọghẹe. Sokpan, ẹi wa re ọni ọkpa ẹre irẹn rhie aro tua, irẹn vbe ghee ekhọe ima, nọ mieke na rẹn evbọzẹe ne ima na ru emwi ke emwi ne ima ru vbe ugamwẹ ọghẹe. Emwi nọ rhie ifuẹko ne ọmwa na khin! Adeghẹ u roro ẹre wẹẹ, u i ghi sẹtin ru emwi ne u te ka ru vbe ugamwẹ e Jehova, rhunmwuda wẹẹ u khian ọmaẹn nẹ, gha mwẹ ilẹkẹtin wẹẹ e Jehova bẹghe ekhọe ruẹ. Ọ rẹnrẹn wẹẹ, ahoẹmwọmwa ne u mwẹ ne irẹn, ẹre ọ gua ruẹ kpa ya ru emwi ne u sẹtin ru vbe ugamwẹ ọghẹe. Ọ wa vbe gbọyẹmwẹ yọ.
Emwi Ewe Ọghe Orhiọn
w12 5/15 22 ¶1-2
Ọta Ne Emwa Nọ
Vbe ihuan ne ọsian ọkpa so, ọ na wẹẹ: “Ọ kakabọ da e Jehova vbe emwa rẹn ni mwẹ ẹkoata gha wu.” (Psm 116:15) Aro nọ ghaan ẹre Jehova ya ghee arrọọ ọghe emwa hia ni gae vbe odẹ ọghe ẹmwata. Vbọrhirhighayehẹ, ẹ i re uwu ọghe orhunmwu ọkpa ẹre a guan kaẹn vbe ebe Psalm 116.
A ghaa ya ọta ọghe irorinmwi guan, ọ ma khẹke na rhilo ẹmwẹ nọ rre Psalm 116:15 ginna ọmwa nii nọ wu, ọ gha khọnrẹn wẹẹ, te ọmwa nii ya ẹkoata ga e Jehova ya sẹ ẹdẹ nọ wu. Vbọzẹ? Rhunmwuda, emwi ne ọsian tae vbe ako nii ma wa dekaẹn orhunmwu ọkpa kẹkan. Emwi na ya ẹmwẹ nọ rre ako na kha ọre wẹẹ, ọ gha da Osanobua gbe, deghẹ emwa rẹn hia ni ya ẹkoata gae na wulo, rhunmwuda ọni, ẹ i khian kue nọ sunu.—Ya ghee Psalm 72:14; 116:8.
DECEMBER 9-15
EMWI EWE NI RRE UWU ẸMWẸ ỌGHE OSANOBUA PSALM 119:1-56
“De Vbene Igbama Gha Ya Sẹtin Ya Uyinmwẹ Ọnrẹn Khian Nọ Gbae Hẹ?”
w87 11/1 18 ¶10
Wẹ Hia Ne U Gha Re Ọmwa Nọhuanrẹn Vbe Odẹ Hia Ra?
10 Vbe ebe Ẹfisọs 5:5, e Pọl keghi ya obọ sekhae ne ima wẹẹ: “Rhunmwuda, vbe nai na gbe awawẹ, wa tobọ uwa rẹnrẹn wẹẹ, ọmwaikọmwa nọ gbe alama oghẹ, ra ọmwa nọ ma huan, ra ọmwa arovbẹmwẹ na gha sẹtin vbe tie ẹre ọmwa igẹbọ, nọ gha mwẹ oghae vbe Arriọba e Kristi kevbe ọghe Osanobua, ẹ i rrọọ.” Ọrheyerriọ, arriaisẹn emwa ẹre a mu ẹre aburho ra ẹre a kan fua vbe ukpukpo, rhunmwuda ne iran na mwẹ obọ vbe uyinmwẹ alama oghẹ. Te emwa vbenian ‘ru egbe iran khọọ.’ (1 Kọrint 6:18) Ẹghẹ nibun, emwi nọ mobọ si ọna ọre wẹẹ, emwa vbenian ma gha begbe, zẹvbe ne ẹmwẹ Osanobua khare. (Psalm 119:9) Vbe igiemwi, etẹn nibun ghaa rre ẹghẹ irhiẹdẹ, iran ghi wa fiegbua. Ne iran gha te ya gha gu etẹn mu obọ, iran ghi gha gu emwa ni rre uwu agbọn mu obọ, ni vbe rre ẹghẹ irhiẹdẹ. Iran ghi gha roro ẹre wẹẹ, ‘emwa esi ẹre iran khin,’ rhunmwuda ọni, iran ghi do gu iran gha mwẹ obọ vbe emwi eso nọ ma khẹke Ivbi Otu e Kristi. Erriọ vbe ye, ọse ne kankankan ẹre etẹn eso kevbe emwa ne iran gba winna nẹi re Osẹe Jehova ghi khin. Ọ ghaa mwẹ ọdiọn ọkpa vberriọ nọ ghaa gu okhuo ọkpa vbe isiwinna ru ọse. Ẹdẹ ghi rrie ẹdẹ, ọ na sẹ ẹgbẹe ọre rae, ọ na ya tota ke okhuo nii! Vbe okiekie, a na kan ọdiọn na fua vbe iko. E Baibol ma ta ohoghe vbe ọ khare wẹẹ, “Emwa dan na gu mu obọ ẹre ọ mu uyinmwẹ esi rhia”!—1 Kọrint 15:33.
w06 6/15 25 ¶1
“Igiodẹ Ruẹ Ya Ẹko Rhiẹnrhiẹn Mwẹ”
TE JEHOVA rhie igiodẹ ra ayere ne emwa rẹn, ne iran mieke na sẹtin zin egbe ọlọghọmwa ughughan ne iran werriẹ aro daa, vbe ẹghẹ nọ wegbe ne ima ye na. Ugbẹnso, ma miẹn avbe ayere na vbe ima ghaa tie Baibol, ma vbe miẹn avbe ayere na vbe etẹn ghaa ya ọta guan ra iran ghaa zẹ ewanniẹn vbe iko. Nibun vbe uwu avbe emwi ne ima tie vbe Baibol ra ne ima họn vbe iko i re emwi ọgbọn ne ima, egbọre ma ka họẹn nẹ. Ugbẹnvbe a miẹn wẹẹ ima mianmian egbe, ke ẹghẹ ya fi ẹghẹ, te ọ khẹke ne ima gha ye egbe ima re rre vbekpa emwamwa ọghe Jehova, avbe uhi ọghẹe kevbe adia nọ rhie ne ima. Ọ khẹke ne ima gha gbọyẹmwẹ ye avbe ayere ọghe Osanobua. Iran keghi rhie ẹrhiọn ye ima iwu rhunmwuda, iran ru iyobọ ne ima, ne ima ghẹ mianmian emwi nọ gua ima kpa ya suẹn gha ya ẹdagbọn ima ga Osanobua. Ẹ i khabe ne ọsian na ta ẹmwẹ na vbe ọ so ihuan gie Jehova, ọ wẹẹ: “Igiodẹ [ra ayere] ruẹ ya ẹko rhiẹnrhiẹn mwẹ.”—Psalm 119:24.
w10 4/15 20 ¶2
Rhie Aro Hin Emwi Oya Rre!
2 Emwi ne ima ghee sẹtin ya ima de ye ẹti. Te aro ima kevbe ekhọe ima winna kugbe, rhunmwuda ọni, ma gha ya aro ima bẹghe emwi, ma sẹtin suẹn gha mu emwi nii roro vbe ekhọe, sẹrriọ wẹẹ ma ghi do gha hoo ne ima ru emwi nii. Ugbẹnvbe a miẹn wẹẹ, agbọn nọ vuọn ne uyinmwẹ esakan ne Esu kha yan, ẹre ima sẹ fi, ẹghẹ hia ẹre ima ya miẹn avbe efoto kevbe iyẹn ni ma gba. Ọ gha khọnrẹn wẹẹ, te ima wa fi aro muẹn kẹkan, ọ sẹtin bibi ima odẹ. (1 Jọn 5:19) Ẹ i khabe ne ọsian na rinmwian Osanobua wẹẹ: “Rhie mwẹ aro hin emwi oya rre, gha ru mwẹ ẹse vbene u yan rẹn.”—Psm 119:37.
Emwi Ewe Ọghe Orhiọn
w05 4/15 10 ¶2
Mu Ẹtin Yan Ẹmwẹ Ọghe Jehova
2 Ọkpa vbe usun olika ẹmwẹ ni rre ebe Psalm 119 ọre vbene ẹmwẹ Osanobua ru ekpataki sẹ hẹ. Ọ gha kẹ, te ọsian nọ gbẹn ihuan na mwamwaẹn ọsegbe ọsegbe, zẹvbe nọ gua ikpẹmwẹ na loo vbe Hibru ro, nọ mieke na sẹtin gha ye ẹre rre. Te a mwamwa uviẹn 176 ni rre ebe Psalm na lele ikpẹmwẹ ni rre abidi ọghe Hibru. Vbe urhuẹvbo ọghe Hibru na ka ya gbẹn e Baibol, te a ghae ebe Psalm na ye abọ 22, dọmwadẹ abọ na mwẹ uviẹn 8, ikpẹmwẹ ọkpa ẹre ọ suẹn avbe uviẹn na. Ebe Psalm na guan kaẹn ẹmwẹ Osanobua, uhi ọghẹe, ẹmwẹ ayere ọghẹe, odẹ nọ ya ru emwi, adia ọghẹe, iyi ọghẹe, ibuohiẹn ọghẹe kevbe ilele ọghẹe. Vbe ako iruẹmwi na kevbe nọ lelẹe, ma gha zẹ iro yan ebe Psalm 119, zẹvbe nọ guaẹro ighẹ e Baibol ọkpa na ke urhuẹvbo ọghe Hibru zedu ẹre vbe odẹ nọ gbae. Ma ghaa muẹn roro emwi ughughan ni sunu daa eguọmwadia e Jehova vbe ẹghẹ nọ gberra kevbe ẹghẹ ne ima ye na, ọ gha ru iyobọ ne ima ya gbọyẹmwẹ ye ihuan na sayọ, ọ vbe ru iyobọ ne ima ya gha ya aro nọ ghaan ghee Ẹmwẹ Osanobua nọ re Baibol.
DECEMBER 16-22
EMWI EWE NI RRE UWU ẸMWẸ ỌGHE OSANOBUA PSALM 119:57-120
Vbene Ima Gha Ya Sẹtin Zin Egbe Ọlọghọmwa Hẹ
w06 6/15 20 ¶2
“U Miẹn Vbene Uhi Ruẹ Yẹẹ Mwẹ Hẹ!”
2 U sẹtin gha nọ wẹẹ, “De vbene uhi ọghe Osanobua ya rhie ifuẹko ne ọsian na hẹ?” Emwi nọ ru iyobọ ne ọsian na, ọre nọ na gha mwẹ ilẹkẹtin wẹẹ, e Jehova mwẹ ẹmwẹ irẹn vbe orhiọn. Rhunmwuda nọ na rẹn iyobọ ne uhi Osanobua ye ne irẹn, ọ na gha ghọghọ, agharhemiẹn wẹẹ, avbe eghian rẹn ghaa ya agbọn lọghọe. Ọ na vbe yẹrẹro wẹẹ, obọ esi ẹre Jehova ya gha mu irẹn. Deba ọni, rhunmwuda ne ọsian na na gha lele uhi ọghe Osanobua, ẹre ọ zẹe ighẹ ọ ye gha rre agbọn, ọ na vbe do mwẹ ẹwaẹn sẹ avbe eghian rẹn. Rhunmwuda nọ na gha lele uhi ọghe Osanobua, egbe keghi fu ẹre rre, orhiọn rẹn na vbe sotọ.—Psalm 119:1, 9, 65, 93, 98, 165.
w00 12/1 14 ¶3
Avbe Ayere Ọghe Jehova Kakabọ Yẹẹ Ruẹ Ra?
3 Aro nọ ghaan ẹre ọsian wa ya gha ghee avbe ayere ọghe Osanobua. Ọ keghi kha wẹẹ: “Vbe nai na rhẹghẹrẹ, ẹgiẹgiẹ ẹre I ya ya iyi ruẹ ru emwi. Irri ọghe emwa dan lẹga mwẹ, sokpan, mẹ ma mianmian uhi ruẹ.” (Psalm 119:60, 61) Avbe ayere ọghe Jehova keghi ru iyobọ ne ima ya zin egbe ukpokpo, rhunmwuda ma mwẹ ilẹkẹtin wẹẹ, Erha ima nọ rre ẹrinmwi gha sẹtin giagia avbe irri ne avbe eghian ima ya gbalọ ima. Vbe nọ ghi te sẹ ẹghẹ nii, e Jehova keghi mu idobo hin odẹ rre ne ima, ne ima mieke na ye sẹtin gha kporhu iyẹn nọ maan ọghe Arriọba Osanobua.—Mak 13:10.
w06 9/1 14 ¶4
Avbe Olika Ẹmwẹ Ni Rre Ebe Nogie Isẹn Ọghe Psalm
119:71—De ere ne ima gha sẹtin lae miẹn vbe ima ghaa rri oya? Ọlọghọmwa gha sẹtin ru iyobọ ne ima ya mu ẹtin yan e Jehova sayọ, ọ ru iyobọ ne ima ya rhiegba ye erhunmwu na na, ọ ya ima gbarokotọ tie Baibol, ma ghi vbe gha rhie emwi ne ima tiere ye uyinmwẹ. Deba ọni, ọlọghọmwa ne ima ye gha sẹtin ru iyobọ ne ima ya bẹghe uyinmwẹ eso ne ima mwẹ, nọ khẹke ne ima fi werriẹ. Ma ghaa rre uwu ọlọghọmwa, ma i khian gha mu ohu gberra egbe deghẹ ima na kue ne ọlọghọmwa nii, ru iyobọ ne ima ya maan sẹ vbene ima ka ye.
“Gu Enọ Viẹ Gha Viẹ”
3 Vbene ẹmwata, e Jehova ne Erha mwa nọ mwẹ ẹnina ọre ẹzi ọghe ifuẹko. (Tie 2 Kọrint 1:3, 4.) E Jehova nọ ghi mwẹ itohan sẹ keghi rhie ilẹkẹtin ne emwa rẹn vbọ khare wẹẹ: “Mẹ ọrọre ọmwa ne ọ rhie ẹtin ye uwẹ iwu.”—Aiz 51:12; Psm 119:50, 52, 76.
5 Ma gha sẹtin gha mwẹ ọnrẹn vbe ilẹkẹtin wẹẹ e Jehova gha ru iyobọ ne ima. Nọnaghiyerriọ ọ khẹke ne ima gha fannọ otọ ẹko ima ma rẹn vbe erhunmwu vbe ima ghaa rre uwu akhiẹ. U miẹn vbene ọ fu ima ẹko rre hẹ, ne ima na rẹn wẹẹ e Jehova rẹn obalọ ne ima la gberra kevbe wẹẹ, irẹn ẹre ọ rhie ifuẹko ne ima vbe ẹghẹ nọ khẹke! Sokpan vbọ ya ru ọna hẹ?
Emwi Ewe Ọghe Orhiọn
w06 9/1 14 ¶5
Avbe Olika Ẹmwẹ Ni Rre Ebe Nogie Isẹn Ọghe Psalm
119:96—Vbe a ya ẹmwẹ na ighẹ ‘ufomwẹ ọghe emwi hia ni gbae’ kha? Aro ne ima ne emwa nagbọn ya ghee emwi nọ gbae, ẹre ọsian na ghaa guan kaẹn. Ọ gha kẹ, emwi nọ ghaa mwẹ vbe ekhọe ọre wẹẹ, ma ne emwa nagbọn gha miẹn emwi, ma sẹtin gha ghee ẹre wẹẹ ọ gbae, sokpan emwi nii sẹtin ye gha mwẹ eke nọ kẹe yi. Sokpan, uhi ọghe Osanobua i ye vberriọ, te ọ wa gba fo. Ọ gha sẹtin gha dia ima vbe emwi hia fẹẹrẹ ne ima ru vbe ẹdagbọn ima. Odẹ na ya zedu ako na vbe Baibol na tie ẹre New International Version ọre, “I bẹghe ẹre nẹ wẹẹ, emwi hia ni gbae mwẹ uwu sokpan, avbe uhi ruẹ i mwẹ uwu.”
DECEMBER 23-29
EMWI EWE NI RRE UWU ẸMWẸ ỌGHE OSANOBUA PSALM 119:121-176
Emwi Nọ Gha Ru Iyobọ Ne Ima, Ne Ima Ghẹ Si Obalọ Gie Egbe Ima
Gi Uhi Kevbe Ilele Ọghe Osanobua Gha Dia Ekhọe Ọguọmwaziro Ọghuẹ
5 Ne ima mieke na gha miẹn ere vbe uhi Osanobua, te ọ khẹke ne ima gha gbọyẹmwẹ yọ, ẹi re ne ima gha tie ẹre kẹkan. E Baibol khare wẹẹ: “Wa gie emwi dan gha sọnnọ uwa, wa gie emwi esi gha yẹẹ uwa.” (Emọs 5:15) Vbe ima khian ya sẹtin gha lele adia na hẹ? Te ọ khẹke ne ima gha ya aro ne Jehova ya ghee emwi ghee ẹre. Vbe igiemwi, gia kha wẹẹ u i vbiẹ ẹse vbe asọn. Rhunmwuda ọni, ọbo ebo nọ gbaroghe ruẹ keghi tama ruẹ aro evbare ne u khian gha re, aro iku isasa egbe ne u khian gha ku kevbe afiwerriẹ eso ne u gha ru vbe arrọọ ruẹ. U ghi lele adia na, u na do gha vbiẹ ẹse. Ẹi mwẹ u ma gbọyẹmwẹ ye iyobọ ne ọbo ebo nii ru nuẹn.
6 Erriọ uhi ọghe Osanobua vbe ye ne ima. Ma ghaa lele avbe uhi na, ma i miẹn ikuanegbe ne orukhọ si ye ọmwa egbe. Ma ghi do gha mwẹ adogbannọ vbe arrọọ ọghe ima. Vbe igiemwi, e Baibol wẹẹ ne ima ghẹ rra, ne ima ghẹ si uma dan, ne ima ghẹ taa ohoghe, ne ima ghẹ gu orhiọn dan mu obọ kevbe ne ima gha gbaengbe ne oghẹ. (Tie Itan 6:16-19; Arhie 21:8) Ma ghaa lele avbe adia na, afiangbe nọkhua ẹre ima miẹn vbọ. Ọna ẹre ọ ghi ya ima gbọyẹmwẹ ye uhi Osanobua, ọ ghi vbe ya ima hoẹmwẹ Osanobua sayọ.
w93 4/15 17 ¶12
Avbe Igbama—De Emwi Ne Uwa Hia Vbe Odẹ Ke Odẹ Ne Uwa Gha Ru?
12 Nọ ghi wa sẹ ehia ọre wẹẹ, te ọ khẹke ne emwi dan na ru gha sọnnọ uwa. (Psalm 97:10) Vbọ khian ru iyobọ nuẹn, ne emwi nọ te yẹẹ ruẹ mieke na do gha re emwi nọ ghi sọnnọ ruẹ? U ghi roro emwi nọ khian kẹrikian! “Wa ghẹ rẹrẹ egbe uwa: Ọmwa rhọkpa i sẹtin do Osanobua ọzuọ. Evba kọe, ẹre a rhọ; rhunmwuda, ọmwa nọ kọ emwi ne egbe ẹre hoo, ọfuan ẹre ọ khian rhọ vbe obọ emwi ne egbe ẹre hoo.” (Galetia 6:7, 8) Deghẹ edanmwẹ na de rre nọ gha sẹtin ya ruẹ yin uyinmwẹ alama oghẹ, u ghi roro emwi nọ khian kẹrikian—ọni ọre vbene emwi ne u khian ru na khian da e Jehova sẹ hẹ, emwi nọ khọọ sẹ ọna i rrọọ. (Yae taa Psalm 78:41.) Ghẹ mianmian wẹẹ, u sẹtin mu ẹko ra emianmwẹ nọ wegbe vbe na ghee AIDS. Vbe muẹn roro, obalọ ne ọna gha sẹtin si yọ ruẹ egbe, deba ọni, ọ sẹtin ya ruẹ mu ẹkpẹn ne egbuẹ fua. Ọ sẹtin vbe si ọlọghọmwa nibun ọvbehe yọ ruẹ egbe, ne u gha rri oya ẹre la ẹghẹ nọ taẹn. Ọtẹn nokhuo ọkpa nọ re Ovbi Otu e Kristi keghi kha wẹẹ: “Mẹ vbe ọdafọn mwẹ ka gu emwa ọvbehe ru emwi ọdọ vbe amwẹ nẹ, vbene ima te rẹn egbe. Agharhemiẹn wẹẹ Ivbi Otu e Kristi ẹre ima ghi khin nian, ugbẹnso ma ye gui, ma i vbe gba ẹko egbe rhunmwuda uyinmwẹ esakan ne ima ka yin, vbene ima te ru orọnmwẹ.” U ghi vbe yerre wẹẹ, a sẹtin miẹn ruẹ iwinna eso ne u te ru vbe uwu iko, uhiẹn a sẹtin vbe kan ruẹ fua! (1 Kọrint 5:9-13) Orhiẹnrhiẹn ọghe ovbi ẹghẹ kherhe rhọkpa rrọọ, nọ sẹ ne ima gha rhunmwuda ẹre rri egbe oya vbenian ra?
Emwi Ewe Ọghe Orhiọn
Ya Ekhọe Hia Yayi Wẹẹ “Ẹmwata” Ẹre Ẹmwẹ Osanobua Khin
8 Ima ne eguọmwadia e Jehova wa rẹn wẹẹ, “Osanobua nọ gia mu ẹtin yan” ẹre Jehova khin kevbe wẹẹ, ẹghẹ ọkpa i rrọọ nẹi ya gualọ umamwẹ ọghe ima. (Psm 31:5; Aiz 48:17) Ma rẹnrẹn wẹẹ, ima gha sẹtin mu ẹtin yan ẹmwẹ nọ rre uwu e Baibol rhunmwuda, “ẹmwata ne uhunmwu ẹmwẹ ẹre ẹmwẹ [Osanobua] khin.” (Tie Psalm 119:160.) Ma wa kue ye emwi ne okpia ọkpa nọ rri egie ebe vbe iruẹmwi e Baibol khare, ọ wẹẹ: “Osanobua i ta ohoghe, ẹmwẹ nọ ta i defua, te ọ wa sẹ vbene ọ ya tae. Emwa Osanobua gha sẹtin gha mwẹ ilẹkẹtin wẹẹ emwi nọ tae gha sẹ rhunmwuda, iran mu ẹtin yan Osa nọ tae.”
DECEMBER 30–JANUARY 5
EMWI EWE NI RRE UWU ẸMWẸ ỌGHE OSANOBUA PSALM 120-126
Eve Ẹre Iran Ya Kọ Emwiokọ, Sokpan Oghọghọ Ẹre Iran Ya Rhọ Emwiorhọ Ọghe Iran
w04 6/1 16 ¶10
Afiangbe Nọ Ne Emwa Ni Rhie Uyi Gie Osanobua
10 Ma gha rhiegbe ye iwinna ọghe na ya emwa khian erhuanegbe, te ima gu e Setan gbinna. Ebe Jems 4:7 khare wẹẹ: “Wa gha gbe Esu odan, ẹghẹ nii, ọ ghi lẹẹ ne uwa.” Ọna ma rhie ma wẹẹ, emwi nọ khuẹrhẹ na khin. Te ima gha loo ẹrhiọn ne ima mieke na sẹtin ga Osanobua. (Luk 13:24) Sokpan, vbe ebe Psalm 126:5, e Baibol keghi kha wẹẹ: “Iran ni ghaa viẹ vbe ẹghẹ ne iran na gha kọ emwiokọ, gha ya oghọghọ rhọ emwiorhọ ọghe iran.” Ọghe ne ẹmwata, Osa ne ima ga i re Osa nẹi gbọyẹmwẹ ye emwi. Ọ keghi “san iran ẹse ighẹ emwa ni ya ekhọe hia gualọe,” ọ ghi vbe fiangbe emwa ni rhie uyi gie ẹre.—Hibru 11:6.
De Vbene Ọ Khẹke Ne Amuẹtinyan Ruẹ Wegbe Sẹ Hẹ?
17 Uwẹ rre uwu akhiẹ ra, rhunmwuda ọmwa ruẹ nọ wu? Adeghẹ erriọ nọ, hia ne u tie okha ọghe emwa na huẹn kpaegbe ni rre Baibol. Ọna gha ya ruẹ gha mwẹ ilẹkẹtin wẹẹ, arhiọkpaegbe gha gele sunu. Ọ mwẹ ọmwa vbe uwu ẹgbẹe ruẹ na kan fua vbe iko ra? Te ọna ghi vbe si obalọ yọ ruẹ egbe ra? Deghẹ erriọ nọ, hia ne u tie Baibol kevbe avbe ebe ọghomwa, ne u mieke na gha mwẹ ilẹkẹtin wẹẹ, odẹ ne Jehova ya gbe ọmwa hin ọkhọ rre, ẹre ọ maan sẹ. U ghaa werriẹ aro daa ọlọghọmwa nọ rhirhi gha khin, gha ghee ẹre zẹvbe ẹkpotọ nọ kie nuẹn, ne u ya ru emwi nọ gha ya amuẹtinyan ruẹ wegbe. Gha fannọ otọ ẹko ruẹ ma e Jehova. Ghẹ zẹ egbuẹ hin usun rre; nọghayayerriọ, gha gu etẹn mu obọ vbe ẹghẹ hia. (Itan 18:1) Ẹmwata nọ wẹẹ, ugbẹnso, u gha wa ye emwi eso nọ sunu daa ruẹ rre, u sẹtin wa gha viẹ; ọrheyerriọ, hia ne u ye gha ru emwi nọ gha ru iyobọ nuẹn ya sẹtin zin egbe. (Psm 126:5, 6) Gha yo iko kevbe ikporhu, u ghi vbe gha tie Baibol vbe ẹghẹ hia. Gha muẹn roro vbe ẹghẹ hia, avbe afiangbe ni khẹ ruẹ vbe odaro. Zẹvbe ne u ya bẹghe vbene Jehova ya ru iyobọ nuẹn, amuẹtinyan ruẹ ghi gha wegbe yọ.
w01 7/15 18-19 ¶13-14
Ghẹ Gi Egbe Wọọ Ruẹ Vbe Iwinna Emwiokọ Na Rhọ!
13 Ẹmwẹ nọ rre ebe Psalm 126:5, 6 keghi rhie ifuẹko ne emwa ni gu Osanobua winna. Sokpan, emwa nọ ghi rhie ifuẹko na sẹ, ọre emwa na zẹ kpokpo. Ako nii khare wẹẹ: “Iran ni ghaa viẹ vbe ẹghẹ ne iran na gha kọ emwiokọ, gha ya oghọghọ rhọ emwiorhọ ọghe iran. Iran ni ghaa viẹ vbe iran viọ emwiokọ khian, gha dọlegbe rre vbe ihuan oghọghọ na so, vbe iran a gha viọ emwiorhọ die owa.” Ẹmwẹ ne ọsian na tae vbekpa emwiokọ na kọ kevbe na rhọ keghi gie vbene Jehova ya gbaroghe ibozẹghẹ ọghe Ivbi Izrẹl, ni dọlegbe ke imu vbe Babilọn gha die owa, kevbe vbene ọ vbe ya fiangbe iran hẹ. Iran wa gha sọyẹnmwẹ vbe a fan iran vbe imu, sokpan, ẹ i mwẹ iran ma vbe gha khiẹ vbe iran kọ emwiokọ ye avbe otọ ni dihoi rua, na ma ya mu ugbo vbe ọwara ukpo 70 ne iran ya gha rre imu. Vbọrhirhighayehẹ, iran ni ma gi egbe emwiokọ na kọ wọọ iran, ni vbe gha mwẹ obọ vbe iwinna owa na bọlọ, keghi rri ere iwinna ne iran winnaẹn, iran na vbe gha sọyẹnmwẹ.
14 Ameve sẹtin gha rhọọ kua vbe aro ima vbe ima ghaa rre uwu ọlọghọmwa, ra vbe etẹn ima ghaa rri oya rhunmwuda emwi esi ne iran ru. (1 Pita 3:14) Te iwinna ikporhu ọghe ima vbe yevbe iwinna emwiokọ na rhọ, sokpan vbe okaro, a sẹtin miẹn wẹẹ iwinna na wa lọghọ ima rhunmwuda, ọ yevbe na miẹn wẹẹ ẹ i biẹ ọmọ esi. Vbọrhirhighayehẹ, deghẹ ima na ye gha kọ ikpẹ ẹmwata, ma na vbe gha gbe amẹ khakhae, Osanobua gha ru ẹre nọ waan, ọ ghi fiangbe iwinna ima gberra vbene ima te ya aro yi. (1 Kọrint 3:6) Ọna wa rhiegbe ma vbe odẹ na ya ghae Baibol ne emwa kevbe avbe ebe ọvbehe ni rhan otọ e Baibol.
Emwi Ewe Ọghe Orhiọn
cl 73 ¶15
Ẹtin Nọ Ya Gbogba Ga Emwa—“Osanobua Ọre Ugue Ọghe Ima”
15 Gia ka guan kaẹn vbene Jehova ya gbogba ga ima hẹ, ne emwi rhọkpa ghẹ ru ima. Ma ne eguọmwadia e Jehova gha sẹtin ya aro yọ wẹẹ, e Jehova gha gbogba ga ima hia zẹvbe ẹbu. Vbe ẹ i re erriọ, te obọ e Setan gha te ke ukhunmwu ne ima nẹ. Muẹn roro: Emwi ne Setan nọ re “ọmwa nọ kha yan agbọn na” wa gualọ, ọre nọ wabọ ugamwẹ ẹmwata rua. (Jọn 12:31; Arhie Maan 12:17) Eso vbe uwu avbe arriọba ni ghi mwẹ ẹtin sẹ vbe uhunmwu otagbọn na, mu awua ye iwinna ikporhu ọghe ima, iran te vbe gha hoo ne iran wa wabọ ima rua fo fẹẹrẹ. Ọrheyerriọ, te emwa ọghe Jehova wa ye mudia gbain, iran ma dobọ iwinna ikporhu yi! Vbọzẹ ne avbe agbẹnvbo na ni mwẹ ẹtin, ma na sẹtin dobọ iwinna ọghe ima ne Ivbi Otu e Kristi yi, agharhemiẹn wẹẹ ima i bun kevbe wẹẹ te ima yevbe emwa nẹi mwẹ nọ gbinna ne iran? Rhunmwuda, e Jehova gbogba ga ima, te ọ tan ifuẹn ọghẹe nọkhua gue ima!—Psalm 17:7, 8.