Ukpo 40 ẹre Aizik ghaa ye vbe ọ rhie ọvbokhan rẹn ighẹ e Ribẹka. Ọ wa hoẹmwẹ ọvbokhan rẹn na ẹsẹsẹmwẹse. Vbene ẹghẹ ya khian, iran na do biẹ ivin eva. Emọ ikpia ẹre iran ghaa khin.

Eni ọdiọn ọre Isọ, eni ọvbokhan na gha re Jekọb. Ohuẹ nọ gua gbe aranmwẹ ẹre Isọ ghaa khin, rhunmwuda ọni, ai kẹ miẹn ọnrẹn vbe owa. Sokpan owa ẹre Jekọb wa gha dia.

Vbe ẹghẹ nẹdẹ, ọmọ ọdiọn ẹre ọ mu otọ ọghe erhae ra igho ọghe erhae nọ ghi kpọlọ sẹ vbe erha iran gha wu. Ọni ẹre a tie ẹre ukhu. Ọmwa nọ khian rri ukhu ọmọ ọdiọn vbe ẹgbẹe ọghe Aizik keghi re ọmwa ne Jehova khian la egbe ẹre mu eyan nọ yan rẹn ma Ebraham sẹ. Iwinna eyan nii ma zẹdẹ mu Isọ sokpan e Jekọb wa rẹn wẹẹ eyan na wa ru ekpataki.

Isọ ghi ke oha rre vbe ẹdẹ ọkpa, egbe keghi wọọ re. Evbare ne Jekọb ghaa le na winrin ye ọre ihue, ẹre ọ na kha wẹẹ: ‘Ohanmwẹ khian gbe mwẹ ruan! Fian mẹ vbe evbare ne u le!’ E Jekọb keghi kha wẹẹ: ‘I gha fian nuẹ deghẹ u na ka yan ma mwẹ wẹẹ, ne I mu ukhu ọghuẹ.’ Isọ keghi kha wẹẹ: ‘Iwinna ukhu ne I khian re ma mu mwẹ! U sẹtin mu. Ohanmwẹ ẹre ọ wa gbe mwẹ na.’ Uwẹ yayi wẹẹ ẹwaẹn rre emwi ne Isọ ru na ra? Hiehie! Emwi kpataki ẹre Isọ mu fua na rhunmwuda evbare nọ ma sẹ emwi.

Vbe Aizik ghi khian ọmaẹn nẹ, ọ na wẹẹ ne irẹn fiangbe ovbi irẹn ne ọdiọn. Sokpan e Ribẹka keghi ru iyobọ ne Jekọb ne ọvbokhan, ne erhae mieke na fiangbe ẹre. Vbe ẹghẹ ne Isọ ghi ya rẹn, ohu na suẹn gha muẹn, ọ na wẹẹ irẹn khian gbe Jekọb rua. Aizik vbe Ribẹka na gha hoo ne iran gbogba ga e Jekọb, ẹre iran na ghi tama rẹn wẹẹ: ‘Rhulẹ bu ọtẹn iyuẹ nokpia ighẹ e Leban, a te miẹn wẹẹ ẹko fu Isọ rre.’ E Jekọb keghi họn ẹmwẹ ne evbibiẹ ọre, ẹre ọ na ghi lẹẹ fua.

E Jehova keghi yan ma e Jekọb wẹẹ irẹn gha gbogba ga re vbene ọ vbe gbogba ga Ebraham kevbe Aizik. E Jekọb na do gha rre ẹvbo ọkpa na tie ẹre Haran, evba ẹre ọ na rhie okhuo biẹlẹ, ẹgbẹe ọre na do gha kpọlọ kevbe wẹẹ e Jekọb na do fe ẹsẹsẹmwẹse.

Vbe ọ ghi zẹ kpẹẹ, e Jehova keghi tama e Jekọb wẹẹ: ‘Werriegbe gha rrie ẹvbo ruẹ.’ Ẹre Jekọb vbe ẹgbẹe ọre na kun ihẹ. Vbe iran ghi khian vbe odẹ, emwa eso na do tama e Jekọb wẹẹ: ‘Ọtuẹn ighẹ Isọ viọ ikpia 400 lele egbe dee vbe odẹ!’ E Jekọb na gha roro ẹre wẹẹ te Isọ khian do gbele irẹn vbe ẹgbẹe ọre rua. Ọ na ghi na erhunmwu gie Jehova wẹẹ: ‘Lahọ, miẹn mwẹ fan vbe obọ ọtẹnmwẹ.’ Ẹdẹ ghi gbe, e Jekọb na gie emwa ne iran viọ ohuan, ẹwe, ẹmila kevbe ekẹtẹkẹtẹ nibun gie Isọ.

Odibosa keghi rhie egbe ma e Jekọb vbe asọn nii! Odibo nii na gu e Jekọb gbinna ne ẹdẹ gbe. Agharhemiẹn wẹẹ obọ vba e Jekọb, ọ ma gi ẹtin fo ẹre. Odibosa nii na ghi tama rẹn wẹẹ: ‘Gu mwẹ kpa.’ Sokpan e Jekọb keghi kha wẹẹ: ‘I i kue ne u kpa, vbe ẹi re te u fiangbe mwẹ nẹ.’

Vbe okiekie, odibosa nii keghi fiangbe Jekọb. Ẹghẹ nii, e Jekọb na ghi rẹn wẹẹ e Jehova i khian kue ne Isọ ru irẹn emwi rhọkpa.

Ẹdẹ ghi gbe, e Jekọb keghi bẹghe Isọ kevbe ikpia 400 ni lelẹe khian. E Jekọb na rhulẹ bu ẹre ya gbe uhunmwu kotọ nẹ vbe igba ihinrọn. Isọ keghi rhulẹ bu e Jekọb ya muẹn dede. Iran eveva na sa eve rua, ẹre iran na ghi ru adọlọ. Vbe uwẹ a yayi wẹẹ, ekhọe Jehova ghaa ye hẹ, vbe ọ bẹghe vbene Jekọb ya gu ọtiọnrẹn ru adọlọ?

Vbe okiekie, dọmwadọghẹ na werriegbe gha rrie owa re. Emọ ikpia 12 ẹre Jekọb ghaa mwẹ. Eni ivbi ẹre nikpia ọre Rubẹn, e Simiọn, e Livai, e Juda, e Dan, e Naftali, e Gad, Asia, Isaka, e Zebulọn, e Josẹf, kevbe Bẹnjamin. E Jehova keghi loo ọkpa vbe emọ na ya miẹn emwa rẹn fan—eni ọmọ na kegha re Josẹf. U rẹn vbene Jehova ya loo ẹre hẹ ra? Gi ima ruẹ ọre sayọ.