Ukpo 40 ẹre Mosis gbe vbe otọ ọghe Midian. Irẹn kegha mwẹ emọ vbe amwẹ. Ẹdẹ ọkpa, vbe irẹn ghi su ohuan ọghẹe khian vbe ọkpẹn Oke Sainai, ọ keghi miẹn emwi ọyunnuan. Oha na wa mu erhẹn, sokpan ebe ẹre ma gha giẹn! Ẹre Mosis na wẹẹ ne irẹn sikẹ evba ne irẹn mieke na bẹghe emwi nọ sunu. Ọ keghi họn urhu ọkpa vbuwe oha nii khare wẹẹ: ‘E Mosis! Ghẹ sikẹ emwa. Viọ ibata hin owẹ rre rhunmwuda otọ nọhuanrẹn ẹre u mudia yi na.’ E Jehova ẹre ọ ghaa loo odibo ọghẹe ya gu e Mosis guan.

Ohan mu e Mosis sẹrriọ wẹẹ, ọ na viọ obọ gue aro. Odibo nii keghi kha wẹẹ: ‘I bẹghe oya ne Ivbi Izrẹl re. I gha miẹn iran fan hin otọ Igipt rre kevbe wẹẹ I ghi viọ iran gha rrie otọ nọ maan. Uwẹ ẹre ọ khian su emwa mwẹ hin otọ Igipt rre.’ Uwẹ ma ghee ẹre wẹẹ, emwi ọkpaodin ẹre ọna ghaa khin ne Mosis?

E Mosis keghi nọ rẹn wẹẹ: ‘Adeghẹ iran na nọ mwẹ ọmwa ne ọ gie mwẹ rre, vbia khian ghi tama iran hẹ?’ Osanobua keghi tama rẹn wẹẹ: ‘Tama iran wẹẹ Osanobua ọghe Ebraham, ọghe Aizik, kevbe ọghe Jekọb ẹre ọ gie ruẹ rre.’ E Mosis keghi kha wẹẹ: ‘Adeghẹ iran ma na danmwehọ mwẹ vbo?’ E Jehova keghi rhie ama eso ne Mosis nọ rhiema wẹẹ irẹn gha ru iyobọ nẹẹn. Ọ keghi tama e Mosis nọ fi ọkpọ ọghẹe fi otọ. Ọkpọ nii keghi khian ẹyẹn! Vbe Mosis ghi rhie ẹyẹn nii ẹrhunrhun, ọ na werriegbe khian ọkpọ. E Jehova keghi kha wẹẹ: ‘Adeghẹ u na ru ọna ma iran, iran gha rẹn wẹẹ imẹ ẹre ọ gie ruẹ rre.’

E Mosis keghi kha wẹẹ: ‘ọmwa nọ bẹmwẹ ẹre I khin.’ E Jehova keghi tama rẹn wẹẹ: ‘I gha rhie ẹmwẹ ne u khian ta yọ ruẹ unu, I ghi vbe tama ọtuẹn ighẹ Erọn nọ ru iyobọ nuẹn.’ Ugbẹnvbe Mosis ghi rẹn wẹẹ Osanobua gu irẹn rrọọ, ọ keghi viọ emọ vbe amwẹ werriegbe gha rrie Igipt.

Ivbi Igipt wa gha ya Ivbi Izrẹl winna iwinna nọ wegbe. E Jehova keghi gie Mosis kevbe Erọn bu e Fero ne iran ya tama rẹn wẹẹ: ‘Gi emwa mwẹ kpa ne iran ya ga mwẹ vbuwe ato.’ Ẹre Fero na khama iran wẹẹ: ‘Emwi ne Jehova khare ma kaan mwẹ, mẹ i khian zẹ Ivbi Izrẹl obọ.’ Rhunmwuda ọna, e Fero keghi dọlegbe mu iwinna ba iwinna ne Ivbi Izrẹl te ka ru. Te Jehova khian rri e Fero oya. Uwẹ rẹn vbene ọ khian ya ru ọna hẹ ra? E Jehova keghi ruẹ ne Orueghe Igbe dekun Ivbi Igipt. E Jehova na tama e Mosis wẹẹ: E Fero ma hoo nọ họn ẹmwẹ mẹ. Vbene ọ ghi ye na, owiẹ nakhuẹ bu ẹre gha rrie Ẹzẹ e Nail. U ghi tama rẹn wẹẹ, ugbẹnvbe a miẹn wẹẹ ọ ma kue ne emwa mwẹ kpa, I gha ruẹ ne Ẹzẹ e Nail khian esagiẹn esagiẹn.’ E Mosis na wa bu e Fero vbene Osanobua wẹẹ nọ ru zẹẹ. Ẹre Erọn na ya ọkpọ ọghẹe kaan Ẹzẹ e Nail sirra e Fero. Ẹzẹ nii keghi khian esagiẹn, ọ na gha wia, ehẹn hia ni rre uwu ẹre na wulọ. Iran ma ghi sẹtin sa amẹ na wọn vbe ẹzẹ nii. Ọrheyerriọ, e Fero ma ye kue ne Ivbi Izrẹl kpa.

Ọ ghi rre ikpẹdẹ ihinrọn, e Jehova na dọlegbe gie Mosis nọ ya khama e Fero wẹẹ: ‘Deghẹ u ma gi emwa mwẹ kpa, I gha ruẹ ne ẹkirẹ gba otọ Igipt hia.’ Erọn ghi niẹn ọkpọ ọghẹe ghee odukhunmwu, ẹkirẹ na gba ehe hia. Ke ebẹdi ọghe iran ya sẹ egbe ọkpan ne iran ya rri evbare na vuọn ne ẹkirẹ. Ẹre Fero na ghi tama e Mosis nọ rinmwia e Jehova nọ ruẹ ne avbe ẹkirẹ ghẹ ghi kpokpo iran. Ọ na wẹẹ irẹn gha kue ne Ivbi Izrẹl kpa. Rhunmwuda ọni, e Jehova keghi ruẹ ne avbe ẹkirẹ nii wulo. Ẹre Ivbi Igipt na ghi silo avbe ẹkirẹ ni wulo ladian. Ehe hia na gha wia. Sokpan e Fero ma ye gi Ivbi Izrẹl kpa.

E Jehova keghi tama e Mosis wẹẹ: ‘U ghi wẹẹ ne Erọn ya ọkpọ ọghẹe fi otọ emwi. Ọ gha ruẹ nẹ, ekẹn ni rre otọ ghi khian ẹkhunkhun ra ikian negiẹrẹ ni sa ọmwa.’ Vbe Erọn ghi ru ẹre nẹ, ẹkhunkhun na gele gba ehe ehia. Ẹre Ivbi Igipt eso na ghi tama e Fero wẹẹ: ‘Osanobua ẹre ọ ru emwi na.’ Ọrheyerriọ e Fero ma ye kue ne Ivbi Izrẹl kpa.