Vbe Ivbi Izrẹl ni ya ba otọ e Jẹriko ghee ghi sẹ evba, owa okhuo ọkpa na tie ẹre Rehab ẹre iran dia. Ọba e Jẹriko ghi họn, ọ na gie ivbi iyokuo gha rrie owa e Rehab. E Rehab keghi viọ ikpia nii lẹre ye uhunmwu owa re, ẹre ọ na tama ivbi iyokuo nii wẹẹ iran kpa nẹ. Ọ keghi tama ikpia ni do ba e Jẹriko ghee wẹẹ: ‘I gha ru iyobọ ne uwa rhunmwuda I rẹnrẹn wẹẹ e Jehova rre uwa iyeke kevbe wẹẹ, uwa gha khọnmiotọ yan otọ na. Lahọ, uwa ru eyan ma mwẹ wẹẹ uwa gha miẹn ẹgbẹe mwẹ fan.’

Ikpia nii keghi ru eyan ma e Rehab wẹẹ: ‘Emwi rhọkpa i khian ru uwẹ vbe ẹgbẹe ruẹ.’ Iran na vbe kha wẹẹ: ‘Rhi irri nọ baa ye ewindo ruẹ, ne ima ghẹ mieke na guọghọ uwa.’

E Rehab na ghi ya irri mu iran la ewindo tuorre. Iran na ya lẹre ye uhunmwu oke vbe ikpẹdẹ eha, a te miẹn wẹẹ iran werriegbe bu e Jọsua. Vbe iyeke ọni, Ivbi Izrẹl keghi fian Ẹzẹ e Jọdan rra, ẹre iran na la otọ nii. E Jẹriko ẹre iran ka guọghọ. E Jehova keghi tama iran ne iran la ẹvbo nii lẹga vbe ikpẹdẹ ehan, iran ghi lae uhukpa vbe ẹdẹ. Vbe ikpẹdẹ nogie ihinrọn, iran na la ẹvbo nii lẹga vbe igba ihinrọn. Ẹre avbe ohẹn na ghi kpee okpe, ivbi iyokuo na da tu gogogo. Ẹre ekẹn ni rre ẹvbo nii na gha dele! Sokpan owa e Rehab nọ diakẹ ogba ekẹn ọghe ẹvbo nii ma de. E Rehab vbe ẹgbẹe ọre keghi miẹn fan rhunmwuda ne iran na mu ẹtin yan e Jehova.

Okhekhe ọghe emwi nọ sunu daa e Jẹriko keghi gba agbẹnvbo hia ni ghi dekẹ vbe otọ e Kenan. Avbe ọba ọghe avbe agbẹnvbo nii, na si uhunmwu koko ne iran ya gu Ivbi Izrẹl khọn. Sokpan emwi ọvbehe ẹre Ivbi e Gibiọn wa gha mwẹ vbe ekhọe. Iran keghi yọ ukpọn ne yanghan yanghan, iran na bu e Jọsua ya tama rẹn wẹẹ: ‘Ẹvbo nọ rree ẹre ima ke dee na. Ma wa họn vbekpae emwi ne Jehova ru ne uwa vbe Igipt kevbe Moab. Ma gha khian eguọmwadia ọghe uwa, sokpan uwa ka ru eyan ma ima nẹ wẹẹ, uwa i khian guọghọ ima.’

E Jọsua keghi ya iran yi, ẹre ọ na vbe ru eyan ma iran. Ikpẹdẹ eso ghi gberra nẹ, e Jọsua na do rẹn wẹẹ ẹi re ẹvbo nọ rree ẹre iran ke rre. Otọ e Kenan ẹre iran ke rre. E Jọsua keghi nọ Ivbi e Gibiọn wẹẹ: ‘Vbọsiẹ ne uwa na ta ohoghe ma ima?’ Iran na kha wẹẹ: ‘Ohan ẹre ọ ghaa mu ima! Ma rẹnrẹn wẹẹ e Jehova ne Osa ọghe uwa, ẹre ọ gbinna ne uwa. Lahọ, uwa ghẹ gbe ima rua.’ E Jọsua keghi mu eyan ọghẹe sẹ, ọ ma ghi gbe iran rua.

Vbe ọ ma he kpẹẹ vba, ọba isẹn ọghe otọ e Kenan na wẹẹ iran khian guọghọ Ivbi e Gibiọn. Ẹre Jọsua vbe ivbi iyokuo ọghẹe na gha khian vbe asọn nii ya miẹn iran fan. Okuo keghi suẹn vbe owiẹ nọ lelẹe. Ivbi e Kenan na suẹn gha lẹẹ fua. Ehe ke ehe ne iran rhirhi lẹẹ gha rrie, e Jehova keghi ru ẹre ne esia gha dele gbe iran. Ẹre Jọsua na ghi rinmwia e Jehova, ne ọ gi ovẹn mudia hii, nẹ ghẹ giẹ dero. Vbọsiẹ ne Jọsua na wẹẹ ne Jehova ru egbe emwi vberriọ nọ ma he ka sunu ẹdẹ? Rhunmwuda wẹẹ, ọ mu ẹtin yan e Jehova. Ovẹn ma de vbe ẹdẹ ohoho, a te miẹn wẹẹ Ivbi Izrẹl khọnmiotọ yan avbe ọba ọghe Kenan kevbe ivbi iyokuo ọghe iran.