Ivbi Izrẹl keghi werriegbe suẹn gha ga ẹbọ. Vbe ẹghẹ ne Ivbi Amọn ghi ya mu okuo gie Ivbi Izrẹl, ẹbọ ne Ivbi Izrẹl ga ma sẹtin miẹn iran fan. Ọwara ukpo nibun ẹre Ivbi Izrẹl ya rrioya. Vbe okiekie, iran na ghi rinmwia e Jehova, iran na gha kha wẹẹ: ‘Ma wa ru orukhọ daa ruẹ nẹ. Lahọ miẹn ima fan vbe obọ eghian ima.’ Ivbi Izrẹl keghi guọghọ avbe ẹbọ ọghe iran hia, iran na ghi werriegbe suẹn gha ga e Jehova. E Jehova ma ghi hoo ne Ivbi Izrẹl gha rrioya.

Ọ ghaa mwẹ ovbi iyokuo ọkpa na tie ẹre Jẹfta, ne Ivbi Izrẹl zẹ nọ gha re ọkaolotu ọghe ivbi iyokuo nọ khian gu Ivbi Amọn khọn. E Jẹfta keghi tama e Jehova wẹẹ: ‘Adeghẹ u na mudia ne ima, ne ima ya khọn miotọ, ọmwa nọ ka ladian vbe owa mwẹ do gbe ọbokhian mẹ, I gha yae fiohan nuẹ.’ E Jehova keghi họn erhunmwu ọghe Jẹfta, ọ na ru iyobọ nẹ nọ ya khọn miotọ.

Vbe Jẹfta ghi sẹ owa, ovbi ẹre nokhuo, nọ re ukpọmọkpa nọ mwẹ, ẹre ọ ka ladian do gbe ọbokhian nẹ. Ọ na gha gbe, ọ na gha kpee ukusẹ. De emwi ne Jẹfta khian ghi ru? Ọ keghi yerre wẹẹ irẹn ru eyan ma e Jehova, ẹre ọ na ghi kha wẹẹ: ‘Eo, ovbimwẹ! U gbe mwẹ rua. I ru eyan ma e Jehova nẹ. Adeghẹ I gha mu eyan na sẹ, ọni nọ wẹẹ te u khian gha rrie ibọkpọ nọ rre Siailo ne u ya gha ga Osanobua vba.’ Ovbi ẹre keghi kha wẹẹ: ‘Adeghẹ u ru eyan ma e Jehova, te ọ khẹke ne u muẹn sẹ. Lahọ rhie ẹghẹ kherhe mẹ, ne I viọ avbe ọse mwẹ nikhuo lele egbe gha rrie uhunmwu oke, ne ima ya gbe uki eva vba. Iyeke ọni, I ghi do gha khian.’ Ẹdẹ agbọn rẹn hia ẹre ovbi e Jẹfta nokhuo ya ga e Jehova vbe ibọkpọ ọghe ugamwẹ. Ukpo ukpo ẹre avbe ọsiọre ya gha mu otuẹ giẹ.

Elai ghaa mwẹ emọ ikpia eva ni vbe gha ga zẹvbe ohẹn vbe ibọkpọ ọghe ugamwẹ. Eni iran ọre Hofnai kevbe Finihaz. Iran ma gha lele uhi ọghe Jehova, iran na vbe gha ya obọ dan mu emwa. Ivbi Izrẹl gha do ya aranmwẹ ru izọese gie Jehova, e Hofnai kevbe Finihaz ghi rri abọ nọ maan sẹ vbọ. Vbe Elai ghi họn vbekpae orukhọ ne ivbi ẹre ru, ọ ma gbe iran hin ọkhọ rre. E Jehova gha kue ne ọna wa gha sunu khian ra?

Agharhemiẹn wẹẹ, ọvbokhan kherhe ẹre Samuẹl ghaa khin vbe ehe ne Hofnai vbe Finihaz ye, ọ ma yegbe taa iran. E Jehova keghi hoẹmwẹ e Samuẹl. E Samuẹl ghi vbiẹ vbe asọn ọkpa, ọ keghi họn vbe ọmwa tie eni ẹnrẹn. Ẹre ọ na kpaegbe rhulẹ bu Elai ya tama rẹn wẹẹ: ‘Ghee mwẹ mwa!’ Sokpan Elai keghi tama rẹn wẹẹ: ‘I ma tie ruẹ. Ya lovbiẹ.’ E Samuẹl na ya lovbiẹ. E Samuẹl na werriegbe họn urhu nii igbava. Vbe Samuẹl ghi bu Elai vbe nogieha, Elai na ghi rẹn wẹẹ e Jehova ẹre ọ tie ẹre na. Ẹre Elai na ghi tama e Samuẹl wẹẹ, deghẹ ọ na ghi werriegbe họn urhu nii, ne ọ wanniẹn ọnrẹn wẹẹ: ‘Ghee mwẹ mwa e Jehova. Mẹ ne ọguọmwadia ruẹ danmwehọ ruẹ.’

E Samuẹl na werriegbe ya lovbiẹ. Ẹre ọ na werriegbe họn vbe ọmwa tie ẹre wẹẹ: ‘Samuẹl! Samuẹl!’ Ẹre Samuẹl na ghi wanniẹn wẹẹ: ‘Ghee mwẹ mwa. Mẹ ne ọguọmwadia ruẹ danmwehọ ruẹ.’ E Jehova na ghi tama rẹn wẹẹ: ‘Tama Elai wẹẹ te I khian rri irẹn vbe ẹgbẹe ọre oya. Ọ rẹnrẹn wẹẹ emwi ne ivbi irẹn ru vbe ibọkpọ mwẹ i maan, sokpan ọ ma sẹtin dia iran.’ Ẹdẹ ghi gbe, e Samuẹl na ya kie urho ọghe ibọkpọ zẹvbe ne ọ ka ruẹ. Ohan ma gi ẹre tama Elai uhunmwu ne Jehova gie ẹre. Sokpan Elai keghi tama rẹn wẹẹ: ‘Ovbimwẹ, tama mwẹ emwi hia ne Jehova tama ruẹ.’ Ẹre Samuẹl na ghi ta emwi hia ma Elai.

Vbene Samuẹl ya gha waan, erriọ e Jehova ya gha ru iyobọ nẹ. Emwa hia ni ghaa rrọọ vbe ẹghẹ nii keghi rẹn wẹẹ, e Samuẹl ẹre Jehova zẹ nọ gha re akhasẹ kevbe ọbuohiẹn.