E Jehova keghi tama e Samuẹl wẹẹ: ‘Gha rrie owa e Jese. Ọkpa vbe ivbi ẹre nikpia ẹre ọ khian ghi rriọba yan otọ Izrẹl.’ Samuẹl na gele gha khian. Ọ ghi miẹn ovbi e Jese ne ọdiọn, e Samuẹl na gha roro ẹre wẹẹ: ‘Ọna ẹre Jehova khian wa zẹ.’ Sokpan e Jehova keghi gi e Samuẹl rẹn wẹẹ, ẹi re ọni irẹn zẹ. E Jehova na tama rẹn wẹẹ: ‘Ẹi re ose ẹre imẹ ghee, sokpan emwi nọ rre ọmwa ekhọe ẹre I ghee.’

Ẹghẹ nii, e Jese keghi tie ivbi ẹre nikpia ehan ladian, ne iran do miẹn e Samuẹl. Sokpan e Samuẹl na tama e Jese wẹẹ: ‘E Jehova ma zẹ iran rhọkpa. Erriọ iran wa sẹ ra?’ E Jese keghi wanniẹn wẹẹ: ‘Nọ kherhe sẹ vbọ ẹre ọ ghi kẹ. Eni ẹnrẹn ọre Devid sokpan ọ su ohuan mwẹ gha rrie eke ne iran khian na rri evbare.’ Vbe Devid ghi sẹ owa, e Jehova keghi tama e Samuẹl wẹẹ: ‘Ọna wa nọ zẹẹ!’ Samuẹl na ghi nọnọ ori ye ọre uhunmwu, nọ rhiema wẹẹ irẹn ẹre Jehova zẹ nọ khian ghi rriọba yan otọ Izrẹl.

Vbọ ghi kpẹẹ fua, okuo keghi de ne Ivbi Izrẹl kevbe Ivbi e Filistin. Arhuan ọkpa na tiẹre Golaiat ẹre ọ ghaa re ọkaokuo ọghe Ivbi e Filistin. E Golaiat kegha ya Ivbi Izrẹl gbogiẹ vbe ẹdẹgbegbe. Ọ na gha tama iran wẹẹ: ‘Uwa zẹ okpia ọkpa ladian, ne ọ do gu mwẹ gbinna. Obọ re gha ke ukhunmwu mẹ, ma ghi khian eviẹn ọghe uwa. Sokpan obọ mwẹ gha ke ukhunmwu nẹ, uwa ghi gha re eviẹn ọghe ima.’

E Devid keghi viọ evbare gie etiọnrẹn ne ivbiyokuo vbe agọ ọghe Ivbi Izrẹl. Ọ ghi họn ẹmwẹ ne Golaiat tae, ọ na kha wẹẹ: ‘I gha gu ẹre gbinna!’ Ọba e Sọl na tama rẹn wẹẹ: ‘Uwẹ ne ọvbokhan kherhe, uwẹ gha sẹtin?’ E Devid keghi wanniẹn wẹẹ: ‘E Jehova gha ru iyobọ mẹ.’

E Sọl keghi yọ e Devid ẹwu igbinna ọghẹe sokpan e Devid keghi khama rẹn wẹẹ: ‘I i khian sẹtin ya ọna gbinna.’ E Devid na rhie umọvọn ọghẹe gha rrie ọkpẹn ẹzẹ. Ọ ghi sẹ evba, ọ na hannọ ikpokuta isẹn viọ ye ẹkpo. E Devid keghi rhulẹ bu e Golaiat. E Golaiat ghi bẹghe Devid, ọ na wa ya urhu nọ la tama rẹn wẹẹ: ‘Bu mwẹ gha dee, uwẹ ne ovbi amimi. I gha mu ikun ruẹ ne avbe ahianmwẹ ni rre iso kevbe avbe aranmwẹ oha ne iran rri ọre.’ Sokpan ohan ma mu e Devid. Ọ na tama e Golaiat wẹẹ: ‘Umozo kevbe asoro ẹre uwẹ ya bu imẹ dee, sokpan eni e Jehova ẹre imẹ ya bu ruẹ dee. Ẹi re ima uwẹ khian gu gbinna, sokpan Osanobua ẹre u khian gu gbinna. Emwa hia fẹrẹ ni rre emwa, gha bẹghe ẹre wẹẹ, e Jehova sẹ umozo kevbe asoro. Te obọ ima gha ke ukhunmwu ne uwa.’

Ẹre Devid na ghi rhie ikpokuta ọkpa ye umọvọn ọghẹe, ọ na ya ẹtin hia fi ẹre. E Jehova keghi ruẹ ne ikpokuta nii vba e Golaiat vbe uharo. E Golaiat keghi de gbe otọ, ọ na wu. Ivbi e Filistin ghi miẹn emwi nọ sunu, iran keghi lẹẹ fua. Uwẹ mu ẹtin yan e Jehova vbene Devid ghaa ye ra?

Vbe Devid ghi gbe Golaiat rua nẹ, Ọba e Sọl keghi ya e Devid khian ọkaolotu ọghe ivbiyokuo ọghẹe. Ẹghẹ ke ẹghẹ ne Devid ya yo okuo, obọ re kegha ke ukhunmwu. Rhunmwuda ọni, okhekhe ẹre keghi gba ehe ehia. E Devid gha ghi ke okuo rre, ikhuo ni rre ẹvbo nii ghi gha gbe, iran ghi vbe gha sihuan wẹẹ: ‘E Sọl gbele emwa arriaisẹn sokpan e Devid gbele arriaisẹn vbe ihe igbe igbe!’ E Sọl keghi suẹn gha gbọvo e Devid. Ọ na gha hoo nọ gbe Devid rua.

E Devid wa guẹ akpata na kpee. Vbe ẹdẹ ọkpa, e Devid ghi kpee akpata, e Sọl keghi fi asoro nọ rre ọre obọ gie Devid ne ọ gbe ẹre rua. Sokpan e Devid keghi gbaẹngbe nẹ, ẹre nene asoro na ya so egbe ekẹn. Ẹi re avbiẹ inugba Sọl te hia nọ gbe Devid rua sokpan ọ ma gba re. Ẹre Devid na ghi lẹẹ gha rrie uwu ato.

E Sọl na viọ ivbiyokuo 3,000 lele egbe gha gualọ e Devid khian. E Sọl keghi domian la uwu uvun okuta ne Devid vbe ivbiyokuo ẹre lẹre yi. Ivbiyokuo e Devid keghi tama e Devid wẹẹ: ‘Wa loo ẹkpotọ na ya gbe Sọl rua.’ E Devid na fẹko do ya fian vbe ehọ ukpọn ne Ọba e Sọl yọ. E Sọl ma rẹn ẹghẹ ne Devid ya ru ẹre. Vbe iyeke ọni, ekhọe e Devid na gha bu abe gbe ẹre, rhunmwuda wẹẹ ọ ma rhie ọghọ ne ọba ne Jehova hannọ zẹ. E Devid ma kue ne ivbiyokuo ẹre gbe Sọl rua. E Devid keghi tama e Sọl wẹẹ irẹn gha te sẹtin gbe ẹre rua sokpan irẹn ma ru vberriọ. E Sọl gha rhunmwuda ọna, sẹ e Devid rae ra?

Ẹn o. E Sọl na ye gha khu e Devid khian. Vbe asọn ọkpa, e Devid vbe Abisiai ne ovbi ọtiọnrẹn keghi do la agọ ọghe Sọl. E Sọl vbe emwa rẹn na gha vbiẹ uhiẹn ya sẹ egbe Abna ne ọkaokuo ọghe Sọl. Abisiai keghi tama e Devid wẹẹ: ‘Ẹkpotọ nọkhua ẹre ọ wa kie ne ima na! Gu mwẹ wa gbe ẹre rua.’ Sokpan e Devid keghi wanniẹn ọnrẹn wẹẹ: ‘E Jehova ẹre ọ khian bu ohiẹn e Sọl. Gi ima wa rhie asoro kevbe ọgọ amẹ ọghẹe kpa.’

E Devid keghi hin oke nọ rre ọkpẹn eke ne Sọl bu agọ yi. E Devid keghi ke evba datu wẹẹ: ‘Abna, vbọsiẹ ne u ma na gbogba ga ọba? Ọgọ amẹ kevbe asoro ọghẹe vbo?’ E Sọl ghi họn urhu na, ọ na rẹn wẹẹ e Devid nọ. Ọ keghi tama e Devid wẹẹ: ‘Ẹkpotọ te kie nuẹ ne u ya gbe mwẹ rua, sokpan u ma ru vberriọ. I rẹnrẹn wẹẹ, uwẹ ẹre ọ khian rriọba lele mwẹ vbe otọ Izrẹl.’ E Sọl na ghi werriegbe gha rrie ẹguaẹ ọghẹe. Sokpan ẹi wa re emwa hia vbe ẹgbẹe ọghe Sọl ẹre ọ ghaa khẹko e Devid.