E Jonatan ẹre ọ ghaa re ovbi Ọba e Sọl ne ọdiọn. Ovbiyokuo nọ mwẹ udinmwẹ ẹre Jonatan ghaa khin. E Devid keghi kha wẹẹ, okhian kẹ e Jonatan sẹ oghohọn kevbe wẹẹ ọ wegbe sẹ oduma. Vbe ọ ghi rre ẹdẹ ọkpa, e Jonatan keghi miẹn ivbiyokuo e Filistin eso vbe uhunmwu oke ọkpa. E Jonatan keghi tama ọguọmwadia ọghẹe nọ viọ emwi igbinna lelẹe wẹẹ: ‘E Jehova gha rhie ama ne ima, ẹre ima khian na gu Ivbi e Filistin na gbinna. Iran gha wẹẹ ne ima bu iran gha dee, ma ghi gu iran gbinna.’ Ẹre Ivbi e Filistin na ghi khama iran wẹẹ: ‘Wa larre ne uwa do gu ima gbinna!’ E Jonatan kevbe ọguọmwadia ẹre keghi hin oke nii ya gu iran gbinna. Iran keghi gbele orhunmwu 20 vbe ivbiyokuo e Filistin.

E Jonatan ẹre ọ te khẹke nọ rriọba lele Sọl, zẹvbe ọmọ ọdiọn. Sokpan ọ rẹnrẹn wẹẹ, e Jehova zẹ e Devid nọ gha re ọmwa nọ khian ghi rriọba yan Ivbi Izrẹl; ọrheyerriọ, ọ ma gha gbọvo e Devid. E Jonatan vbe Devid na ghi khian ọse ne kankankan. Iran keghi ru eyan ma egbe wẹẹ, te iran khian gha ru iyobọ ne egbe kevbe wẹẹ, iran gha vbe gha sinmwi oseghe ne egbe. E Jonatan keghi rhie ẹwu, umozo, uhanbọ kevbe ukugba ọghẹe ne Devid ne ọ ya rhiẹre ma wẹẹ, ọse kankankan ẹre irẹn vbe Devid khin.

Vbe Sọl ghi khu e Devid khian, e Jonatan keghi tama e Devid wẹẹ: ‘Ghẹ gi ohan muẹn, gha mwẹ udinmwẹ. E Jehova ma ruẹ ọba nẹ. Uhiẹn erha mwẹ vbe rẹn wẹẹ, uwẹ ẹre ọ khian gha re ọba.’ Uwẹ vbe hoo ne u gha mwẹ ọse nọ maan vbe na ghee Jonatan ra?

Ẹi re avbiẹ inugba e Jonatan mu arrọọ ọghẹe ye ikpadede nọ ya miẹn e Devid fan. Ọ rẹnrẹn wẹẹ erhae ighẹ Ọba e Sọl ghaa hoo nọ gbe Devid rua. Ẹre Jonatan na ghi tama erhae wẹẹ: ‘U gha gbe Devid rua, te u rri abe esagiẹn rhunmwuda e Devid ma rẹn ọkpa rẹn eva.’ Rhunmwuda ọna, e Sọl kegha mu ohu e Jonatan. Ukpo eso ghi gberra, e Sọl vbe Jonatan keghi wu vbe okuo.

Vbe Jonatan ghi wu nẹ, e Devid na ya gualọ ovbi e Jonatan ighẹ e Mẹfibosiẹt. Vbe Devid ghi miẹn e Mẹfibosiẹt, ọ na tama rẹn wẹẹ: ‘Ke ẹdẹnẹrẹ kpa, te I khian gha koko ruẹ rhunmwuda wẹẹ erha maan mẹ gbe. Ẹguaẹ mwẹ ẹre u khian gha ye. Eke ọkpa ẹre ima khian na gha rri evbare.’ E Devid ma mianmian ọsiọre ighẹ e Jonatan.

Vbe Sọl ghi wu nẹ, e Devid na ghi khian ọba. Ukpo 30 ẹre ọ ghaa ye vbe ọ khian ọba. Ukpo eso ghi gberra, e Devid keghi ru abakuru. E Devid ghi rre egedege vbe ẹguaẹ ọghẹe vbe asọn ọkpa, ọ keghi miẹn okhuo ọkpa ne mose mose. Vbe iran ghi tama e Devid wẹẹ Batsiẹba ẹre a tie okhuo na, kevbe wẹẹ Uraia ne ọkpa vbe ivbiyokuo ọghẹe ọre ọdafẹn ọnrẹn, e Devid na wẹẹ na tie nene okhuo gie irẹn. Ọ ghi rre, e Devid na lovbiẹ kẹ. E Batsiẹba na do gha hanmwa ne Devid. E Devid ma hoo ne ọmwa rhọkpa rẹn vbekpa emwi nọ sunu. Ọ na tama ọkaokuo ọghẹe nọ gi Uraia ọkpa gha rre odaro okuo ne obọ mieke na vba re. Uraia ghi wu nẹ, e Devid keghi rhie Batsiẹba la owa.

Sokpan e Jehova wa bẹghe emwi dan hia nọ sunu. De emwi ne Jehova khian ghi ru? E Jehova keghi gie akhasẹ ọghẹe ighẹ e Natan bu e Devid. E Natan na tama e Devid wẹẹ: ‘Ọ mwẹ ọdafẹn ọkpa nọ mwẹ ohuan nibun kevbe ovbiogue ọkpa nọ mwẹ ohuan ọkpa kẹkan. Ovbiogue nii wa hoẹmwẹ ohuan ọghẹe ẹsẹsẹmwẹse. Sokpan ọdafẹn nọ rrọọ keghi miẹn ovbiogue nii ohuan ọghẹe.’ Ẹmwẹ na keghi wa mu e Devid ohu, ọ na kha wẹẹ: ‘Te a khian wa gbe ọdafẹn nii rua!’ E Natan na ghi tama e Devid wẹẹ: ‘Uwẹ ọre nene ọdafẹn!’ Ẹmwẹ na keghi wa gbe Devid egbe. Ẹre Devid na ghi tama e Natan wẹẹ: ‘I ru orukhọ dae Jehova nẹ.’ Orukhọ ne Devid ru keghi si ọlọghọmwa nibun ye ẹgbẹe ọghẹe. E Jehova rri e Devid oya ye orukhọ nọ ru sokpan ọ na ye gie Devid gha rrọọ rhunmwuda ẹkoata kevbe imuegberriotọ ọghẹe.

E Devid te gha hoo nọ bọ Ọgua Osa, sokpan e Jehova keghi kha wẹẹ, ovbi ẹre ighẹ e Sọlomọn ẹre ọ khian bọ ẹre. Ẹre Devid na suẹn gha ru emwamwa yotọ ne ovbiẹre mieke na sẹtin bọ ẹre. E Devid keghi kha wẹẹ: ‘Te ọ khẹke ne Ọgua Osa nii hionkhuan. Ọvbokhan ẹre Sọlomọn ye khin, rhunmwuda ọni, I gha gu ẹre ru emwamwa yotọ.’ E Devid keghi mwamwa igho nọ kpọlọ yotọ na ya ru iwinna na. Ọ na vbe gualọ emwa ni guẹ iwinna ni khian winna vbe nene Ọgua Osa. Ọ vbe mwamwa igoru kevbe esiliva yotọ kevbe wẹẹ ọ na viọ erhan e sida ke Taia kevbe Saidọn rre. Vbe Devid ghi khian ọmaẹn nẹ, ọ keghi rhie ebe nọ gie vbene nene Ọgua Osa khian gha ye hẹ ne Sọlomọn. Ọ na tama e Sọlomọn wẹẹ: ‘E Jehova ẹre ọ wẹẹ ne I gbẹnnẹ emwi na yotọ nuẹ. E Jehova gha ru iyobọ nuẹ. Ghẹ gi ohan muẹn. Ya udinmwẹ winna iwinna na.’