Vbe Sọlomọn ghi khian ọba ọghe Izrẹl nẹ, e Jehova keghi nọ rẹn wẹẹ: ‘De emwi ne u hoo ne I ru nuẹ?’ E Sọlomọn keghi kha wẹẹ: ‘Ọvbokhan kherhe ẹre I khin, I ma rẹn emwi rhọkpa. Lahọ ya ẹwaẹn we mwẹ, ne I mieke na sẹtin gbaroghe emwa ruẹ.’ E Jehova na kha wẹẹ: ‘Rhunmwuda ne u na wẹẹ, ne I ya ẹwaẹn we ruẹ, I gha ya ruẹ khian ọmwa nọ ghi mwẹ ẹwaẹn sẹ vbe uhunmwu otagbọn hia. I gha vbe zẹ ẹfe kuọ ruẹ. U gha họn ẹmwẹ mẹ, u gha tọ.’

E Sọlomọn keghi suẹn Ọgua Osa na bọ. Ọ loo igoru, esiliva, erhan, kevbe okuta ni ghi maan sẹ ya bọ nene Ọgua Osa. Ikpia vbe ikhuo nibun ni wa guẹ iwinna ẹre ọ bọ Ọgua Osa na. Ukpo ihinrọn ẹre iran ya bọ Ọgua Osa na; vbe iran ghi bọe nẹ, iran na yae fiohan gie Jehova. Iran keghi viọ emwi izọhẹ ye uhunmwu aka. E Sọlomọn keghi fan fi iguẹ vbe odaro aka nii, ọ na na erhunmwu gie Jehova wẹẹ: ‘Eo Jehova, ma rẹnrẹn wẹẹ ọgua na, ma mose sẹ, ọ ma vbe kpọlọ sẹ, lahọ miẹn ugamwẹ ọghomwa yi, ne u vbe họn erhunmwu ima.’ De aro ne Jehova ya ghee ọgua ne iran bọ na kevbe erhunmwu ne Sọlomọn na? E Sọlomọn ghi wa na erhunmwu fo, erhẹn keghi ke orere iso rre, do giẹn emwi izọhẹ ni rre uhunmwu aka nii. Evbọ sunu na sosẹ yọ wẹẹ, e Jehova miẹn Ọgua Osa nii yi. Vbe Ivbi Izrẹl ghi bẹghe emwi nọ sunu na, iran na gha ghọghọ.

Rhunmwuda ẹwaẹn ne Osanobua ya we Ọba e Sọlomọn, a kegha họn usi ẹre rre vbe otọ nibun. Emwa kegha bu ẹre rre, ne ọ sọfurre ye ọlọghọmwa ọghe iran. Uhiẹn oloi ọghe Siẹba keghi mu okhian gha die ẹguaẹ e Sọlomọn, ne ọ do nọ rẹn ọta eso ni wegbe. Ọ ghi rhie ewanniẹn ye inọta ọghẹe nẹ, oloi nii keghi tama rẹn wẹẹ: ‘I ma te ka yaeyi ighẹ ẹmwẹ ne I họn vbekpa ruẹ, sokpan I bẹghe ẹre nẹ wẹẹ, u mwẹ ẹwaẹn sẹ vbene a gie ruẹ yi. Te Jehova ne Osa ruẹ wa gele fiangbuẹ.’ Vbe ẹghẹ ne Sọlomọn ya gha kha, ọfunmwegbe ẹre ọ wa gha rre otọ Izrẹl. Sokpan emwi eso keghi ya egbe kaẹn egbe.

Vbe ẹghẹ ne Sọlomọn ya gha ga e Jehova, ọfunmwegbe wa gha rre otọ Izrẹl. Sokpan e Sọlomọn keghi viọ ikhuo nibun, ni ga ẹbọ rọnmwẹ. Vbene ẹghẹ ya khian, e Sọlomọn keghi deba iran gha ga ẹbọ. Ọna keghi ya ohu mu e Jehova. Ọ na tama e Sọlomọn wẹẹ: ‘I gha mu arriọba na hin obọ ruẹ rre, I ghi ghae re ye ihe eva. I ghi mu abọ nọ kpọlọ sẹ ne ọkpa vbe eguọmwadia ruẹ, sokpan I ghi mu abọ nekherhe nọ rrọọ ne ẹgbẹe ruẹ.’

E Jehova keghi rhan otọ ẹmwẹ na sayọ. Ẹdẹ ọkpa, vbe Jeroboam nọ re ọkpa vbe eguọmwadia e Sọlomọn ghi mu okhian rrie ehe, ọ keghi dekun akhasẹ Ahija vbe odẹ. Ahija keghi sirra e Jeroboam sọọ ẹwu ọghẹe ye ihe 12, ọ na tama rẹn wẹẹ: ‘E Jehova gha mu arriọba ọghe Izrẹl hin obọ e Sọlomọn rre, ọ ghi ghae re ye ihe eva. Viọ abọ igbe vbe ẹwu na sọọ re na, rhunmwuda uwẹ ẹre ọ khian rri ọba yan uniẹn igbe ọghe Ivbi Izrẹl. Ọba e Sọlomọn ghi họn ẹmwẹ na, ọ na gha hoo ne ọ gbe Jeroboam rua! E Jeroboam na lẹẹ gha rrie otọ Igipt. Vbe Sọlomọn ghi wu nẹ, ovbiẹre ighẹ e Rehoboam ẹre ọ ghi rriọba lelẹe. Ẹghẹ nii, ẹre Jeroboam ya werriegbe gha die otọ Izrẹl.

Eniwanrẹn ni rre otọ Izrẹl keghi bu e Rehoboam ude wẹẹ: ‘Adeghẹ u na gha ya obọ esi mu emwa ruẹ, iran gha họn ẹmwẹ nuẹ.’ Sokpan avbe ihua re keghi tama rẹn wẹẹ: ‘Te ọ khẹke ne u gha ya obọ nọ tọn mu emwa ruẹ! U vbe mu iwinna ba iran iwinna!’ E Rehoboam keghi rhie ude ne ihua re bu ẹre. Ọ na gha ya obọ nọ tọn mu emwa rẹn, rhunmwuda ọni iran keghi sọtẹ daa re. Iran keghi ma e Jeroboam ọba, ne ọ gha kha yan uniẹn igbe ọghe Ivbi Izrẹl. Uniẹn igbe na ẹre a ghi do rẹn ye arriọba ọghe Izrẹl. E Rehoboam ẹre ọ ghi gha kha yan uniẹn eva nikẹre, na ghi do rẹn ye arriọba ọghe Juda. Uniẹn eva na, keghi wa rhikhan mu e Rehoboam. Erriọ a ghi ya ghae uniẹn 12 ọghe Ivbi Izrẹl ye ihe eva.

E Jeroboam ma hoo ne emwa rẹn gha yo ọgua Osa nọ rre Jerusalẹm. Vbọsiẹ? E Rehoboam ẹre ọ ghaa kha yan e Jerusalẹm, rhunmwuda ọni e Jeroboam na gha roro ẹre wẹẹ, emwa irẹn sẹtin rhie egbe ba arriọba ọghe Rehoboam. Ẹre Jeroboam na ghi ma ẹkhuia ẹmila igoru eva, ọ na tama emwa rẹn wẹẹ: ‘E Jerusalẹm rree gbe. Wa sẹtin gha ga mwa.’ Ẹre iran na ghi suẹn gha ga amazẹ nii. Iran na werriegbe mianmian e Jehova.