IRUẸMWI 19
Ivbiotu E Kristi Ọghe Ẹmwata Ẹre Avbe Osẹe Jehova Khin Ra?
Ma ne Avbe Osẹe Jehova yayi wẹẹ, Ivbiotu e Kristi ọghe ẹmwata ẹre ima khin. Vbọzẹ? Gia ziro yan emwi ne iyayi ima hẹnhẹn egbe yan, eni na rẹn ima ginna nọ ya ima lughaẹn, kevbe ahoẹmwọmwa ne ima mwẹ ne egbe.
1. De emwi ne iyayi ọghe Avbe Osẹe Jehova hẹnhẹn egbe yan?
Jesu khare wẹẹ: “Ẹmwata ẹre ẹmwẹ [Osanobua] khin.” (Jọn 17:17) Ukpowẹ ọghe Jesu ẹre ima ne Avbe Osẹe Jehova lele. Rhunmwuda ọni, emwi hia ne ima yayi, ke otọ gha dee, uwu e Baibol ẹre ọ ye. Gia ghee emwi ne ima ru vbe odẹ ukpo 1870 nọ rhie ọna ma. Etẹn ima na ghaa tie ẹre Bible Students vbe ẹghẹ nii, keghi gbarokotọ ghee imamwaemwi ni rre Baibol. Emwi ne iran miẹn vbe Baibol, ẹre iran ghi yayi, agharhemiẹn wẹẹ ọ lughaẹn ne emwi ne avbe esọsi yayi vbe ẹghẹ nii. Iyeke ọni, iran na suẹn gha tama emwa vbekpa ẹmwata ne iran miẹn na.a
2. Vbọzẹ ne ima na tie egbe ima Osẹe Jehova?
E Jehova keghi tie eguọmwadia ẹre, osẹe ọghe irẹn rhunmwuda, iran ẹre ọ ta ẹmwata nọ dekaẹn irẹn ma emwa. (Hibru 11:4–12:1) Vbe igiemwi, vbe ẹghẹ nẹdẹ, Osanobua keghi tama emwa rẹn wẹẹ: “Wa ọrọre osẹe mwẹ.” (Tie Aizaia 43:10.) E Baibol vbe tie Jesu “Osẹe Ẹmwata.” (Arhie Maan 1:5) Rhunmwuda ọni, vbe ukpo 1931, ma keghi suẹn gha tie egbe ima Osẹe Jehova. Te ima wa ya eni na hio.
3. De vbene Avbe Osẹe Jehova ya ya egbe taa e Jesu vbe odẹ nọ ya gha rhie ahoẹmwọmwa ma?
Jesu hoẹmwẹ erhuanegbe ẹre sẹrriọ wẹẹ, iran na ghi yevbe ẹgbẹe ọre. (Tie Mak 3:35.) Erriọ Avbe Osẹe Jehova ni rre otagbọn hia vbe ya re ẹgbẹe ọkpa. Ọni ẹre ọ si ẹre ne ima na tie egbe ima etẹn. (Failimọn 1, 2) Ma vbe lele adia nọ khare wẹẹ: “Wa gha hoẹmwẹ ivbi iyayi ne iho uwa.” (1 Pita 2:17) Odẹ ughughan ẹre ima ya rhie ahoẹmwọmwa na ma. Vbe igiemwi, etẹn ima rhọkpa ghaa rre ọlọghọmwa, ma ghi ya ekhọe hia ru iyobọ ne iran.
GUALỌ OTỌ RE SAYỌ
Gia ziro yan rẹn sayọ, okha ọghe Avbe Osẹe Jehova kevbe emwi ọvbehe ni sosẹ yọ wẹẹ, Ivbiotu e Kristi ọghe ẹmwata ẹre ima khin.
Emwi nọ rre Baibol, ẹre Ivbiotu e Kristi ọghe ẹmwata yayi, iran vbe tama emwa ọvbehe vbekpa re
4. Emwi nọ rre Baibol ẹre ima yayi
E Jehova ka tae yotọ nẹ wẹẹ, a gha do rẹn ẹmwata ni rre Baibol sayọ. Tie Daniẹl 12:4, NW, iyeke ọni, uwa ghi ziro yan inọta na:
De emwi nọ khian “vẹwae” vbe uwu ẹbu emwa Osanobua, zẹvbe ne iran ya gbarokotọ ghee Baibol sayọ?
Ghee vbene ẹbu emwa na ghaa tie ẹre Bible Students ya gha gbarokotọ tie Baibol hẹ. Ọkpa vbe usun iran na ọre Charles Russell. Kpee VIDIO na, iyeke ọni, uwa ghi ziro yan inọta nọ lelẹe.
Vbe vidio na, de vbene Charles Russell kevbe etẹn nikẹre ya gha ruẹ e Baibol hẹ?
U ka rẹn ra?
Vbe ẹghẹ eso, ma ru afiwerriẹ ye emwi eso ne ima te ka yayi. Vbọzẹ? Te Osanobua fẹko ru iyobọ ne emwa ya rẹn ẹmwata ni rre Ẹmwẹ ọghẹe, zẹvbe ne uwanmwẹ ovẹn nọ da yan rre ya fẹko mu otọ yọ, ọ te sẹ ẹghẹ avan. (Tie Itan 4:18.) Agharhemiẹn wẹẹ ẹmwẹ ni rre Baibol i fi werriẹ, ma vbe zẹdia fi emwi eso ne ima te yayi werriẹ, zẹvbe ne ima ya rẹn otọ e Baibol sayọ.
5. Ma keghi yin zẹvbe nọ gua eni ọghe ima ro
Vbọzẹ ne ima na suẹn gha tie egbe ima Osẹe Jehova? Kpee VIDIO na, iyeke ọni, uwa ghi ziro yan inọta nọ lelẹe.
Vbọzẹ ne eni na ighẹ Osẹe Jehova na khẹke ima?
Vbọ ya e Jehova zẹ emwa, ne iran gha re ọsosẹ ọghe irẹn? Ọ hoo ne iran gi emwa rẹn wẹẹ, irẹn ọre Osa ọghe ẹmwata, rhunmwuda, ẹi re avbiẹ ohoghe, ẹre a he ta vbekpa irẹn. Gia ziro yan eva vbe ohoghe na.
Ugamwẹ eso keghi maa emwa re wẹẹ, Osanobua hoo ne iran gha ya amazẹ ga irẹn. Sokpan, tie Lẹvitikọs 26:1, iyeke ọni, uwa ghi ziro yan avbe inọta na:
De ẹmwata nọ rre ẹmwẹ na? De aro ne Jehova ya ghee amazẹ na loo vbe ugamwẹ?
Avbe ọkaolotu ugamwẹ eso keghi maa emwa re wẹẹ Jesu ọre Osanobua. Sokpan, tie Jọn 20:17, iyeke ọni, uwa ghi ziro yan avbe inọta na:
De ẹmwata nọ rre ẹmwẹ na? Orhunmwu ọkpa ẹre Osanobua kevbe Jesu khin ra?
Vbọ ye ruẹ hẹ vbe ekhọe ne u na rẹn wẹẹ, e Jehova gie Avbe Ọsosẹ ọghẹe, ne iran ya gi emwa rẹn ẹmwata vbekpa irẹn vbe Ovbi ẹre?
6. Ma hoẹmwẹ egbe
E Baibol keghi ya Ivbiotu e Kristi gie abọ ughughan ni rre egbe ọmwa. Tie 1 Kọrinti 12:25, 26, iyeke ọni, uwa ghi ziro yan avbe inọta na:
Vbọ khẹke ne Ovbiotu e Kristi ru vbe ogieva re ghaa rri oya?
De emwi ne aro ruẹ he da vbe odẹ ne Avbe Osẹe Jehova ya mwẹ ahoẹmwọmwa daa egbe iran?
Osẹe Jehova eso ghaa rri oya, Avbe Osẹe Jehova nikẹre vbe otagbọn hia, ghi zẹ emwi ru vbobọvbobọ. Ghee odẹ ọkpa ne iran ya ru ọna. Kpee VIDIO na, iyeke ọni, uwa ghi ziro yan inọta nọ lelẹe.
De vbene ahoẹmwọmwa ọghe Avbe Osẹe Jehova ya rhie egbe ma hẹ vbe odẹ ne iran ya ru iyobọ ne etẹn iran, ne oguomiẹrẹ sunu daa?
Ivbiotu e Kristi ọghe ẹmwata keghi ru iyobọ ne emwa ni gualọ iyobọ
EMWA ESO KEGHI KHA WẸẸ: “Ọ ma he kpẹẹ gbe na mu ugamwẹ ọghe Avbe Osẹe Jehova gbọọ.”
De ẹghẹ ne Jehova ya suẹn gha tie eguọmwadia ẹre osẹe ọghe irẹn?
OLIKA ẸMWẸ
Ivbiotu e Kristi ọghe ẹmwata, ẹre Avbe Osẹe Jehova khin. Ẹgbẹe ọkpa ẹre ima hia khin vbe otagbọn hia, emwi nọ rre Baibol ẹre ima yayi, ma vbe gi emwa rẹn ẹmwata vbekpa e Jehova.
Ogbewerriẹ
Vbọzẹ ne ima na suẹn gha tie egbe ima Osẹe Jehova?
De obọ ne ima ne Avbe Osẹe Jehova ya mu egbe?
Uwẹ yayi wẹẹ Ivbiotu e Kristi ọghe ẹmwata, ẹre Avbe Osẹe Jehova khin ra?
RUẸ SAYỌ
Ghee odẹ ọkpa ne Avbe Osẹe Jehova he ya vẹ imamwaemwi ohoghe rua.
Ghee ewanniẹn ọghe ọta eso ne emwa nọ vbekpa Avbe Osẹe Jehova.
“Avbe Inọta Ne Emwa Mobọ Nọ Vbekpae Avbe Osẹe Jehova” (Ọ rre intanẹt)
E Stephen i hoo nọ ya aro bẹghe emwa ni ke uniẹn ọvbehe rre. Te ọ wa gha gu iran khọn. Ghee emwi nọ miẹn vbe egbe Avbe Osẹe Jehova nọ ghi fi ẹre ekhọe werriẹ.
“Ẹdagbọn Mwẹ Kegha Rhia Yọ Rhia Yọ” (The Watchtower, July 1, 2015)
a Ke ukpo 1879 gha dee, ẹre ima ke loo ebe ọghomwa na tie ẹre ebe Owa Ọkhẹ, ya rhan otọ imamwaemwi ni rre Baibol.