IRUẸMWI 43
Ọ Khẹke Ne Ivbiotu E Kristi Gha Da Ayọn Ra?
Vbe uhunmwu otagbọn hia, iziro ughughan ẹre emwa mwẹ, vbe nọ dekaẹn ayọn na da. Ugbẹnso, emwa eso keghi da ayọn, vbe iran ghaa gu avbe ọse sọyẹnmwẹ egbe. Eso i zẹdẹ da hiehie, vbene eso na da gbe egbe. De emwi ne Baibol khare vbekpa ayọn na da?
1. Emwi awua ẹre ayọn na da khin ra?
E Baibol ma mu awua ye ayọn na da. Ọ kue kha wẹẹ, ọkpa vbe usun ẹse ọhẹ nọ ke obọ Osanobua rre ẹre nọ. Ọni ẹre ọ zẹe ne Baibol na wẹẹ, ‘te ayọn ya ẹko rhiẹnrhiẹn ọmwa.’ (Psalm 104:14, 15) Ikpia vbe ikhuo eso ni ya ẹkoata ga e Jehova, ne Baibol guan kaẹn, vbe gha da ayọn.—1 Timoti 5:23.
2. De ibude ne Baibol rhie ne emwa ni da ayọn?
E Jehova gbodan ye ayọn nọ bun gbe na da kevbe na da gbe egbe. (Galatia 5:21) Ẹmwẹ ọnrẹn khare wẹẹ: “Ghẹ gu iran ni da ayọn gbe mu obọ.” (Itan 23:20) Nọnaghiyerriọ, deghẹ ima da ayọn, ọ gha khọnrẹn nọ gha re vbe ehe ne ọmwa rhọkpa i ye, ọ ma khẹke ne ima dae sẹrriọ wẹẹ, te ayọn ghi gbe ima, ma i ghi sẹtin roro emwi ẹse, ẹmwẹ ne ima ta i ghi gba vbe unu, ra te ọ ghi si emianmwẹ ye ima egbe. Deghẹ ima i sẹtin da ayọn ye oreghe, ọ khẹke ne ima wa dobọ ayọn na da yi.
3. De aro nọ khẹke ne ima ya gha ghee azẹ ne emwa ọvbehe ru nọ dekaẹn ayọn na da?
Dọmwadẹ ọghẹe ẹre ọ khian zẹ ne egbe ẹre, deghẹ irẹn gha da ayọn, ra irẹn i da. Ọ ma khẹke ne ima gha ya aro dan ghee ọmwa nọ da ayọn ye oreghe. Ọmwa gha vbe wẹẹ irẹn i da ayọn, ọ ma khẹke ne ima gha kpikpi ẹre nọ da. (Rom 14:10) Ọ ma vbe khẹke ne ima da ayọn deghẹ ọ gha rhua emwa ọvbehe owẹ. (Tie Rom 14:21.) “Ọ ma kei ne ọmwa wa gha rẹn ọghe enegbe ẹre ọkpa, ọ kere nọ vbe gha rẹn ọghe emwa ọvbehe.”—Tie 1 Kọrinti 10:23, 24.
GUALỌ OTỌ RE SAYỌ
Gia ziro yan ilele ọghe Baibol, ni gha ru iyobọ nuẹn ya rẹn deghẹ ọ khẹke ne u da ayọn, kevbe vbene u gha dae sẹ hẹ deghẹ u da ayọn. A gha vbe ziro yan emwi nọ khẹke ne u ru, deghẹ ọ lọghọ ruẹ ne u sẹtin gha da ayọn ye oreghe.
4. Uwẹ ẹre ọ khian zẹ ne egbuẹ deghẹ u gha da ayọn
De aro ne Jesu ya gha ghee ayọn na da? Na ya rhie ewanniẹn ye inọta na, gia ziro yan emwi ọyunnuan nokaro ne Jesu ru. Tie Jọn 2:1-11, iyeke ọni, uwa ghi ziro yan avbe inọta na:
De emwi ne emwi ọyunnuan na, maa ima re vbekpa aro ne Jesu ya ghee ayọn kevbe emwa ni da ayọn?
Ne Jesu ma na gbodan ye ayọn na da, de aro nọ khẹke ne Ovbiotu e Kristi ya gha ghee emwa ni da ayọn?
Vbọrhirhighayehẹ, ne Ovbiotu e Kristi na mwẹ asẹ nọ khian ya gha da ayọn, ma rhie ma wẹẹ, ọ khẹke nọ gha da ayọn vbe ẹghẹ hia. Tie Itan 22:3, iyeke ọni, uwa ghi ziro yan rẹn deghẹ ọ khẹke ne u da ayọn vbe:
U gha khian fi imọto ra u gha khian loo e masini ya winna.
U ghaa hanmwa.
Ọbo ebo gha wẹẹ ne u ghẹ gha da ayọn.
Ọ ghaa lọghọ ruẹ ne u gha da ayọn ye oreghe.
Uhi arriọba gha wẹẹ ne u ghẹ da ayọn.
Sirra ọmwa nẹi ghi da ayọn, rhunmwuda nọ na ka gha da ayọn gbe egbe vbe ẹghẹ nọ gberra.
Ọ khẹke ne u ya ayọn nọ gbe ọmwa mu ọghọ ye emwa egbe vbe ugie orọnmwẹ ruẹ ra, ra vbe u gha tie emwa ne iran do sọyẹnmwẹ egbe ra? Ne u mieke na rẹn emwi ne u gha ru, kpee VIDIO na.
Tie Rom 13:13 kevbe 1 Kọrinti 10:31, 32, NW. Uwa gha tie dọmwadẹ ako na nẹ, uwa ghi ziro yan inọta na:
U gha lele ilele nọ rre ako na, de vbene ọ gha ya ru iyobọ nuẹn hẹ ya ru azẹ nọ gha ya ẹko rhiẹnrhiẹn e Jehova?
Dọmwadẹ Ovbiotu e Kristi, ẹre ọ khian zẹ ne egbe ẹre deghẹ irẹn gha da ayọn ra irẹn i da. Ọmwa nọ da ayọn sẹtin vbe kha wẹẹ irẹn i da vbe ugbẹnso
5. Uwẹ ẹre ọ khian zẹ ne egbuẹ, vbene u gha da ayọn sẹ hẹ
Deghẹ u da ayọn, evbọ khẹke ne u kọ ye orhiọn na khin: Agharhemiẹn wẹẹ e Jehova ma mu awua ye ayọn na da, ọ sọnnọ ọnrẹn deghẹ a na gha da ayọn nọ bun gbe. Vbọzẹ? Tie Hozia 4:11, 18, iyeke ọni, uwa ghi ziro yan inọta na:
De emwi nọ gha sẹtin sunu deghẹ ọmwa na gha da ayọn nọ bun gbe?
De emwi nọ gha ru iyobọ ne ima ya gha da ayọn ye oreghe? Ọ khẹke ne ima rẹn vbene ima gha dae sẹ hẹ, nẹ ghẹ do gha gbe ima. Tie Itan 11:2, iyeke ọni, uwa ghi ziro yan inọta na:
Vbọzẹ nọ na khẹke ne u zẹ ne egbuẹ, vbene u gha da ayọn sẹ hẹ?
6. Hia ne u ban ayọn na da gbe egbe
Ghee emwi nọ ru iyobọ ne okpia ọkpa ya ban ayọn na da gbe egbe. Kpee VIDIO na, iyeke ọni, uwa ghi ziro yan inọta ni lelẹe.
Vbe vidio na, de vbene Dmitry ya gha yin hẹ, vbe ọ gha da ayọn nẹ?
Ọ sẹtin ya uhukpa ban ayọn na da ra?
De vbene ọ ghi ya sẹtin ban ayọn na da gbe egbe hẹ vbe okiekie?
Tie 1 Kọrinti 6:10, 11, iyeke ọni, uwa ghi ziro yan avbe inọta na:
Vbọ wegbe sẹ hẹ ighẹ orukhọ ọghe ayọn na da gbe egbe?
Vbọ ya ima rẹn wẹẹ, ọmwa nọ da ayọn gbe egbe gha sẹtin fi werriẹ?
Tie Matiu 5:30, NW, iyeke ọni, uwa ghi ziro yan inọta na:
Ne Jesu na wẹẹ ne ọmwa fian obọ re ọkpa fua vbe erre nọ zẹ na, rhie ma wẹẹ, te ima gha sẹ emwi eso rae, ne ima mieke na ya ẹko rhiẹnrhiẹn e Jehova. Vbọ khẹke ne u ru deghẹ ọ lọghọ ruẹ ne u ban ayọn na da gbe egbe?a
Tie 1 Kọrinti 15:33, iyeke ọni, uwa ghi ziro yan avbe inọta na:
Avbe ọse ruẹ gha sẹtin ya ruẹ gha da ayọn gbe egbe ra? Vbua gu kha vberriọ?
ỌMWA SẸTIN NỌ WẸẸ: “Emwi dan nọ deghẹ ọmwa na gha da ayọn ra?”
De ewanniẹn ne u gha rhie ne ọmwa vberriọ?
OLIKA ẸMWẸ
Te Jehova kpemehe ayọn, ne ima ya gha sọyẹnmwẹ egbe, sokpan ọ gbodan ye ayọn nọ bun gbe na da kevbe na da gbe egbe.
Ogbewerriẹ
De emwi ne Baibol khare vbekpa ayọn na da?
De ẹbe nọ si vbe ọmwa ghaa da ayọn nọ bun gbe?
De aro nọ khẹke ne ima ya gha ghee azẹ ne emwa ọvbehe ru nọ dekaẹn ayọn na da?
RUẸ SAYỌ
De vbene avbe ehọnrre gha ya sẹtin ru azẹ nọ maan vbekpa ayọn na da?
Ghee emwi eso ne u gha ru, ne u mieke na sẹtin ban ayọn na da gbe egbe.
Emwa eso ke da ayọn, iran ghi ka mu ukpu ayọn ọghe iran kaẹn ọghe emwa ọvbehe, iran ghi vbe tọẹn mu ghee odukhunmwu. Ọ khẹke ne Ovbiotu e Kristi gha mwẹ obọ vbe uyinmwẹ vbenian ra?
Vbe okha nọ mwẹ uhunmwuta na, “Ọdayọn Da Iku Ẹre I Te Gha Khin,” u gha miẹn vbene okpia ọkpa ghi ya sẹtin ban ayọn nọ bun gbe na da.
a Avbe ọbo ebo gha sẹtin ru iyobọ ne emwa ni ma ghi sẹtin ban ayọn na da gbe egbe. Ọbo ebo nibun khare wẹẹ, ọ ma zẹdẹ khẹke ne emwa ni ka gha da ayọn gbe egbe ye gha da ayọn hiehie.