IRUẸMWI 36
Gha Re Ọmwa Ẹmwata Vbe Emwi Hia
Emwa ni ta ẹmwata ẹre ima hoo ne ima gha gu ru ọse. Erriọ e Jehova vbe hoo ne avbe ọsiọre gha ta ẹmwata. Sokpan ẹmwata keghi lọghọ na ta vbe agbọn na, rhunmwuda ne emwa nibun na ta ohoghe. De ere nọ rrọọ vbe a ghaa ta ẹmwata vbe emwi hia?
1. Vbọ mobọ zẹe nọ na khẹke ne ima gha ta ẹmwata?
Ma ghaa ta ẹmwata ma emwa ọvbehe, te ima rhie ẹre ma wẹẹ ima hoẹmwẹ e Jehova, te ima vbe ya ọghọ nẹẹn. Yerre wẹẹ, e Jehova rẹn emwi hia ne ima ru kevbe ne ima mu roro. (Hibru 4:13) Ọ rẹn vbe ima gha ta ẹmwata, ọ wa vbe gbọyẹmwẹ yọ. E Baibol khare wẹẹ: ‘E Nọyaẹnmwa khuiwu iran ni ru ero, sokpan, ọ mu iro ma emwa ẹmwata.’—Itan 3:32.
2. De odẹ eso ne ima gha ya rhie ẹre ma wẹẹ emwa ẹmwata ẹre ima khin?
E Jehova hoo ne ima “gha ta ẹmwata ma egbe.” (Zẹkaraia 8:16, 17) Vbe a ya ọna kha? Ọre te ima gu emwa ima vbe uwu ẹgbẹe guan, ra emwa ne ima gba winna, ra etẹn ne ima gba ga, ra avbe ukọ arriọba, ọ ma khẹke ne ima gha ta ohoghe ma iran, ra ne ima gha mu iran rẹrẹ. Emwa ni ta ẹmwata i rhaa, iran i vbe mu emwa ru. (Tie Itan 24:28 kevbe Ẹfisọs 4:28.) Iran vbe ha igho uhunmwu nọ khẹke ne iran hae. (Rom 13:5-7) Odẹ vbenian kevbe odẹ nibun ọvbehe, ẹre ima ya rhie ẹre ma wẹẹ, “ma hoo ne ima gha re emwa ẹmwata vbe emwi hia.”—Hibru 13:18, NW.
3. De ere na miẹn vbọ vbe a ghaa ta ẹmwata?
A gha rẹn ima ye emwa ẹmwata, emwa ghi do gba ẹko ima. Ọ ghi ya emwa hia vbe iko gha mwẹ agbẹkunsotọ, vbene ọ vbe ye, vbe ẹgbẹe ne a na hoẹmwẹ egbe. Ma ghi gha mwẹ ekhọe ọguọmwaziro nọ hianrẹn. Ọ ghi ya emwa gha “ta ẹmwẹ ọnrẹn ẹse, ighẹ emwi ne a maa emwa ẹre, vbekpa Osanobua ne Ọmiọnmwafan mwa,” ọ ghi vbe ya emwa ọvbehe do deba ima vbe ugamwẹ ẹmwata.—Taitọs 2:10.
GUALỌ OTỌ RE SAYỌ
Gia ziro yan vbene ọ ye Jehova hẹ vbe ekhọe vbe u ghaa ta ẹmwata, kevbe ere ne u gha miẹn vbọ, vbe u ghaa re ọmwa ẹmwata. Ma gha vbe ziro yan odẹ ughughan ne u khian ya gha rhie ẹre ma wẹẹ, ọmwa ẹmwata ẹre u khin.
4. Ẹmwata na ta keghi ya ẹko rhiẹnrhiẹn e Jehova
Tie Psalm 44:21 kevbe Malakai 3:16, iyeke ọni, uwa ghi ziro yan avbe inọta na:
Uwẹ ghee ẹre wẹẹ ẹwaẹn rrọọ deghẹ a na gha gbe gue ẹmwata ra? Vbua gu kha vberriọ?
Vbua yayi wẹẹ ọ ye Jehova hẹ vbe ima ghaa ta ẹmwata, uhiẹn vbọ ghaa lọghọ na ru vberriọ?
Emọ ghaa ta ẹmwata, ẹko ghi gha rhiẹnrhiẹn evbibiẹ iran. Ma gha vbe gha ta ẹmwata, ẹko ghi vbe gha rhiẹnrhiẹn e Jehova
5. Gha rhie ẹre ma vbe ẹghẹ hia wẹẹ ọmwa ẹmwata ẹre u khin
Emwa nibun yayi wẹẹ, ai khian wa sẹtin gha ta ẹmwata vbe ẹghẹ hia. Sokpan ghee evbọzẹe nọ na khẹke ne ima gha ta ẹmwata vbe ẹghẹ hia. Kpee VIDIO na.
Tie Hibru 13:18, NW, iyeke ọni, uwa ghi ziro yan vbene ima khian ya gha ta ẹmwata hẹ . . .
vbe uwu ẹgbẹe.
vbe isiwinna ra vbe owebe.
vbe ihe ọvbehe.
6. Ma miẹn ere vbe ẹmwata na ta
Ẹmwata na ta sẹtin si ima fi ọlọghọmwa. Sokpan ẹdẹ ghaa rrie ẹdẹ, u ghi do bẹghe ẹre wẹẹ, ai miẹn emwi na ya gie ẹmwata. Tie Psalm 34:12-16, iyeke ọni, uwa ghi ziro yan inọta na:
De vbene ẹmwata na ta ya ya agbọn maan ọmwa hẹ?
Ọdọ vbe amwẹ ghaa ta ẹmwata ma egbe, iran ghi gha sikẹ egbe sayọ
A gha rẹn ruẹ zẹvbe ọmwa ẹmwata vbe isiwinna ruẹ, nọ yan isiwinna ruẹ ghi gba ẹko ruẹ
U ghaa re ọmwa ẹmwata vbe ẹvbo ne u ye, avbe ukọ arriọba ghi gha ghee ruẹ adazẹ
EMWA ESO KEGHI KHA WẸẸ: “Ọ mwẹ ohoghe eso nai ka yọ rhunmwuda ohoghe nekherhe nọ.”
Vbọ ya ruẹ yayi wẹẹ ohoghe hia ẹre ọ sọnnọ e Jehova?
OLIKA ẸMWẸ
E Jehova hoo ne avbe ọsiọre gha ta ẹmwata vbe ẹghẹ hia, ọ vbe hoo ne iran gha re emwa na gba ẹko ẹre vbe emwi hia ne iran ru.
Ogbewerriẹ
De odẹ eso ne ima gha ya rhie ẹre ma wẹẹ, emwa ẹmwata ẹre ima khin?
Vbọzẹ nọ na re emwi ukọnmwẹ deghẹ a na gha gbe gue ẹmwata?
Vbọzẹ ne u na hoo ne u gha ta ẹmwata vbe ẹghẹ hia?
RUẸ SAYỌ
De vbene evbibiẹ emọ gha ya sẹtin maa ivbi iran vbene a ya ta ẹmwata hẹ?
De ere na miẹn vbọ vbe a ghaa mu eyan na yan rẹn sẹ?
Tie uhunmwuta na, ne u ya rẹn deghẹ ọ khẹke na ye gha ha igho uhunmwu, ọ gha khọnrẹn wẹẹ ai loo ẹre ẹse.
“Ọ Khẹke Ne U Gha Ha Igho Uhunmwu Ra?” (The Watchtower, September 1, 2011)
Vbọ ya okpia ọkpa nọ ghaa fi ibeleku do gha re ọmwa ẹmwata?