RHIEGBE YE IWINNA IKPORHU IYẸN NỌMA
Ebe Itie Ọghe Asikoko Nọkhua Na Khian Ya Ghae
Ukpo ukpo ẹre ima wa ya kpẹho khẹ evbare orhiọn ne ima re vbe asikoko nọkhua. Ne emwa ọvbehe mieke na vbe deba ima danmwẹ ọnrẹn ghee ighẹ umamwẹ ọghe Jehova, ma gha tie emwa nibun ne iran deba ima do ugie na. (Psm 34:8) Ẹbu ediọn ni rre dọmwadẹ iko ẹre ọ rẹn odẹ nọ maan sẹ ne iran khian ya ghae ebe itie na, vbene ọ gha na sẹ emwa nibun obọ.
EMWI NA GHA KỌ YE ORHIỌN
De ẹdẹ ne ima rrie asikoko nọkhua?
De ẹghẹ ne iko ọghomwa khian ya suẹn gha ghae ebe itie na?
De ẹghẹ ne ima ya suẹn iko ọghe emwamwa ikporhu?
De okhuo ne I fian ne egbe mwẹ vbe nọ dekaan ebe itie na khian ghae na?
De ọmwa ne I hoo ne I tie gha dee?
DE ẸMWẸ NE U KHIAN TA?
U gha ghi tuẹ otuẹ na tuẹ vbe ẹdogbo nii nẹ, u sẹtin kha wẹẹ:
“Te ima ghae ebe itie na ne emwa, ne iran gha die asikoko nọkhua na khian do vbe otagbọn hia. Ehe na khian na do ẹre kevbe ẹghẹ nọ khin rre ebe itie na. Ma gha wa ghọghọ deghẹ u na sẹtin rre.”
DE VBENE U KHIAN YA RHIE OBỌ LELE ỌMWA NỌ MWẸ ẸKORHIẸNRHIẸNMWẸ HẸ?
Agharhemiẹn wẹẹ emwa nibun ẹre ima hoo ne ima tie gha die asikoko nọkhua na, te ọ khẹke ne ima rhie obọ lele ọmwaikọmwa nọ mwẹ ẹkorhiẹnrhiẹnmwẹ.
Vbe ẹdẹ uzọla, u sẹtin rhie avbe ebe iyẹn ba ebe itie na, ya winna.