U Gha Sẹtin Gha Mwẹ Ọfunmwegbe Vbe Ẹghẹ Ibavbaro

1. Vbọ re “ọfunmwegbe Osanobua,” vbọ ya ru iyobọ ne ima hẹ? (Filipai 4:6, 7)

Ọ MWẸ ọfunmwegbe ne emwa nibun ni rre agbọn Esu na ma rẹn. Ọfunmwegbe na, ọre “ọfunmwegbe Osanobua,” ọni ọre ọfunmwegbe ne emwa mwẹ rhunmwuda ne iran na rẹn wẹẹ, ọsie Osanobua ẹre iran khin. Ma ghaa mwẹ ọfunmwegbe na, orhiọn ima ghi sotọ. (Tie Filipai 4:6, 7.) Ma gu emwa ni hoẹmwẹ e Jehova rrọọ vbe ọfunmwegbe. Ọsie ‘Osanobua nọ rhie ọfunmwegbe ne ọmwa’ ẹre ima khin. (1 Tẹs 5:23) Ma gha gele rẹn Erha ima nọ rre ẹrinmwi, ma na mu ẹtin yan rẹn, ma na vbe gha họn ẹmwẹ nẹẹn, ọfunmwegbe Osanobua ghi mu ima orhiọn sotọ vbe ẹghẹ ibavbaro.

2. Vbọzẹ ne ima na yayi wẹẹ, ima gha sẹtin gha mwẹ ọfunmwegbe Osanobua?

² Ma gha gele sẹtin gha mwẹ ọfunmwegbe Osanobua vbe emwi nọ wegbe gha sunu ra, vbe na ghee emianmwẹ nọ wegbe nọ vẹwae, odekun ẹrhia, vbe emwa ghaa gbe olighi vbe ẹvbo ne ima ye, ra vba ghaa zẹ ima kpokpo? Ai miẹn nẹi khian sẹtin si ohan ye ima egbe vbe uwu emwi ne ima sunu yi na. Sokpan, e Jesu tama ima wẹẹ: “Wa ghẹ fian afianma, wa ghẹ gi ohan mu uwa.” (Jọn 14:27) Ma wa ghọghọ wẹẹ, etẹn wa lele ibude na ne Jesu rhie ne ima. E Jehova wa ru iyobọ ne iran, te orhiọn iran wa sotọ agharhemiẹn wẹẹ, iran rre uwu ibavbaro.

VBENE IMA KHIAN YA GHA MWẸ ỌFUNMWEGBE VBE EMIANMWẸ NỌ WEGBE GHAA VẸWAE

3. De vbene emianmwẹ nọ vẹwae vbe ẹdogbo ne ima ye ra vbe uhunmwu otagbọn hia, ya mu idobo ye ọfunmwegbe ne ima mwẹ?

³ Emianmwẹ ghaa vẹwae vbe ẹdogbo ne ima ye ra vbe uhunmwu otagbọn hia, ọ sẹtin wa fi ẹdagbọn ima werriẹ. Gi ima guan kaẹn vbene COVID-19 ya ya agbọn lọghọ emwa nibun. Vba ghi nọ emwa nibun ọta, a na do bẹghe ẹre wẹẹ, emwa nibun ma gha miẹn ovbe vbe asọn rhunmwuda osi nọ ghaa si iran. Emianmwẹ na ya iro han emwa nibun, ọ ya osi si emwa nibun, ọ ya emwa eso suẹn gha da ayọn gbe egbe, eso na suẹn gha loo ukhunmwu ni wegbe, ọ ya emwa eso gha gu emwa iran vbe uwu ẹgbẹe gbinna, eso na kue gha hoo ne iran gbe egbe iran rua. Adeghẹ emianmwẹ na gha vẹwae vbe ẹdogbo ne u ye, vbọ khian ru iyobọ nuẹn ne osi ghẹ gha si ruẹ gbe, kevbe ne u gha mwẹ ọfunmwegbe Osanobua?

4. Vbọzẹ nọ na mu ima orhiọn sotọ, rhunmwuda ne ima na rẹn emwi ne Jesu wẹẹ ọ khian sunu vbe ẹdẹ okiekie na?

⁴ E Jesu khare wẹẹ, emianmwẹ nọ vẹwae a gha rre “ehe ughughan” vbe uhunmwu otagbọn na. (Luk 21:11) Vbe ọna ya mu ima orhiọn sotọ hẹ? Ẹi kpa ima odin vbe emianmwẹ ghaa vẹwae khian. Ma rẹnrẹn wẹẹ, emwi ne Jesu ta ẹre ọ wa sunu na. Rhunmwuda ọni, ọ khẹke ne ima lele ibude ne Jesu rhie ne emwa ni khian gha rrọọ vbe ẹdẹ okiekie. Ọ khare wẹẹ: “Uwa ghẹ fian afianma.”​—Mat 24:6.

5. (a) Zẹvbe nọ rre ebe Filipai 4:8, 9, de emwi nọ khẹke ne ima gha nọ e Jehova, vbe emianmwẹ nọ wegbe ghaa vẹwae khian? (b) Ma ghaa danmwehọ ako ọghe Baibol na rrẹkọdi, de vbene ọ khian ya ru iyobọ ne ima hẹ?

⁵ Te emianmwẹ nọ vẹwae wa ya osi si ọmwa, orhiọn ọmwa i ghi sotọ. Ọna ọre emwi nọ sunu daa ọtẹn nokhuo ọkpa na tie ẹre Desi.b E COVID-19 ghi gbe ọtiẹn erhae nokpia, ọtiẹn ọnrẹn ne iran gba re eyeyẹ, kevbe ọbo ebo ọghẹe, orhiọn ọnrẹn ma ghi sotọ. Ọ na gha mu ohan wẹẹ irẹn sẹtin vbe mu emianmwẹ na, irẹn ghi ya mu ne iye irẹn nọ khian ọmaẹn nẹ. Rhunmwuda emianmwẹ na nọ vẹwae khian, ọ na vbe gha mu ohan wẹẹ, a sẹtin rhie irẹn obọ sotọ vbe iwinna, ẹghẹ nii, irẹn i khian ghi miẹn igho ne irẹn khian ya gha ha osa owa, ra ne irẹn khian ya gha dẹlẹ emwi evbare ye owa. Osi si ẹre sẹrriọ wẹẹ, ọ ma ghi gha miẹn ovbe vbe asọn. Sokpan de emwi nọ ghi ru iyobọ ne Desi, ne orhiọn ọnrẹn mieke na sotọ? Ọ keghi na erhunmwu gie Jehova nọ mu irẹn orhiọn sotọ, ne irẹn mieke na gha roro emwi ẹse. (Tie Filipai 4:8, 9.) Ọ kegha danmwehọ ako ọghe Baibol na rrẹkọdi, ọ na yevbe na miẹn wẹẹ, te Jehova “gu ẹre guan.” Ọtẹn nokhuo na khare wẹẹ, “Urhu ne khuẹrhẹ na ya tie avbe ako ọghe Baibol ne I ghaa kpe, keghi wa mu mwẹ orhiọn sotọ, ọ na ye mwẹ ẹre rre wẹẹ, e Jehova mwẹ ẹmwẹ mwẹ vbe orhiọn.”​—Psm 94:19.

6. De vbene Baibol na tie ne egbe ọmwa kevbe iko na yo khian ya ru iyobọ nuẹn hẹ?

⁶ Ẹmwata nọ wẹẹ emianmwẹ ghaa vẹwae, u i khian ghi sẹtin gha ru emwi eso ne u te ka ru, sokpan ghẹ gi ọna ya ruẹ bizugbe e Baibol na tie ne egbe ọmwa kevbe iko na yo. Avbe okha ọghe etẹn ni rre ebe ọghomwa kevbe vidio ughughan gha ye ruẹ ẹre rre wẹẹ, etẹn wa ye rhikhan mu e Jehova agharhemiẹn wẹẹ, iran miẹn ọlọghọmwa ughughan. (1 Pit 5:9) Emwi ne ima ruẹ vbe iko gha ya ruẹ gha muẹn roro ẹmwẹ igiọdu ne ima miẹn vbe Baibol. Iko na yo gha vbe kie ẹkpotọ nuẹn ya rhie igiọdu ne emwa ọvbehe, iran ghi vbe rhie igiọdu nuẹn. (Rom 1:11, 12) U ghaa muẹn roro vbene Jehova ya ru iyobọ ne eguọmwadia ẹre vbe ẹghẹ ne iran na gha khuọnmwi, vbe orhiọn iran ma sotọ, ra vbe ẹghẹ ne iran ya gha rre uwu ohioro, amuẹtinyan ruẹ ghi gha wegbe sayọ, u ghi do gha mwẹ ilẹkẹtin wẹẹ, ọ gha vbe ru iyobọ nuẹn.

7. Vbua miẹn ruẹ vbe obọ ukọ e Jọn?

⁷ Hia ne u gha nọ ẹmwẹ etẹn. Emianmwẹ ghaa vẹwae khian, a sẹtin wẹẹ ne ima ghẹ gha sikẹ emwa ọvbehe, uhiẹn ya sẹ egbe etẹn ne ima gba ga. Vbe ẹghẹ vbenian ma sẹtin wa gha hoo ne ima miẹn etẹn ima aro, vbe na ghee ukọ e Jọn, nọ ghaa hoo nọ miẹn Gaiọs ghee mwẹ ghee ruẹ. (3 Jọn 13, 14) Ọrheyerriọ, e Jọn ghi bẹghe ẹre wẹẹ, irẹn i khian he sẹtin miẹn Gaiọs, ọ na gbẹn elẹta gie ẹre. Deghẹ u i sẹtin yo owa etẹn ya tuẹ iran, hia ne u tie iran vbe efoni, e vidio kọl, ra u ghi ya efoni ra e kọmputa gie uhunmwu gie iran. Ma ghaa nọ ẹmwẹ etẹn vbenian, orhiọn ima ghi sotọ. Osi ghaa si ruẹ, gu avbe ediọn guan, u ghi lele ibude ne iran rhirhi rhie nuẹn.​—Aiz 32:1, 2.

VBENE U KHIAN YA SẸTIN GHA MWẸ ỌFUNMWEGBE VBE ODEKUN ẸRHIA GHA SUNU

8. De vbene odekun ẹrhia gha ya sẹtin mu idobo ye ọfunmwegbe ne u mwẹ?

⁸ Adeghẹ amẹ, ugbohiotọ ra erhẹn na mu emwi rhia vbe ẹdogbo ne u ye, ọ sẹtin ya osi gha si ruẹ, sẹrriọ wẹẹ, ọ sẹtin rhie ẹghẹ, osi vberriọ ke fo vbe otọ. Adeghẹ ọmwa ruẹ vbe uwu ẹgbẹe na wu, ra emwi ewe ne u mwẹ na wii ruẹ, u sẹtin wa gha khiẹ, agbọn sẹtin wa khan ruẹ ra ohu ohu ghi wa gha mu ruẹ. Ọ ghaa yerriọ, ọ ma rhie ma wẹẹ, te u mu ẹmwẹ emwi ewe yan uhunmwu ra u i mwẹ amuẹtinyan. Emwi nọ wegbe ẹre ọ sunu daa ruẹ, rhunmwuda ọni, ẹi re emwi dan deghẹ u na gha khiẹ. (Job 1:11) Sokpan vbe uwu ena hia, u gha sẹtin gha mwẹ ọfunmwegbe. Odẹ vbo?

9. De vbene Jesu ya mu ima egbe yotọ khẹ odekun ẹrhia?

⁹ Ghẹ mianmian emwi ne Jesu ta. Ma i yevbe emwa ni rre uwu agbọn ni roro ẹre wẹẹ, odekun ẹrhia i khian sẹtin sunu daa iran, sokpan ma rẹnrẹn wẹẹ, te odekun ẹrhia khian gha tua sayọ, kevbe wẹẹ, eso vbọ sẹtin kue sunu daa ima. E Jesu tama erhuanegbe ẹre wẹẹ, “Igbohiotọ” kevbe odekun ẹrhia nibun a gha sunu. (Luk 21:11) Ọ khare wẹẹ, te “ọkhọ” khian gha muan yọ, ọna ẹre ọ si ẹre ne avbe ikpata vbe izigan kevbe emwa ni gbinna gbinna igbinna na vuọn ehe hia. (Mat 24:12) E Jesu ma kha wẹẹ, emwa nẹi re Osẹe Jehova ọkpa ẹre ena hia na sunu yi na, khian gha sunu daa. Ọghe ne ẹmwata, eguọmwadia e Jehova ne odekun ẹrhia he sunu daa i re avbiẹ. (Aiz 57:1; 2 Kọr 11:25) E Jehova i khian wa gbaroghe ima vbe odẹ ọghe ọyunnuan vbe odekun ẹrhia gha sunu, sokpan ọ gha ru iyobọ nọ khẹke ne ima, ne orhiọn ima mieke na sotọ.

10. Ma gha mu egbe yotọ khẹ odekun ẹrhia, vbe ọni a ya rhie ẹre ma wẹẹ, ima mu ẹtin yan e Jehova? (Itan 22:3)

¹⁰ Ma gha mu egbe yotọ, ẹre orhiọn ima khian na sotọ vbe odekun ẹrhia gha sunu. Sokpan ọmwa mu egbe yotọ rhie ma wẹẹ, ọ ma mu ẹtin yan e Jehova ra? Hiehie. Ẹmwata nọ rrọọ ọre wẹẹ, ma gha mu egbe yotọ, te ima rhie ẹre ma wẹẹ, ima mu ẹtin yan e Jehova wẹẹ, ọ gha sẹtin gbaroghe ima. Vbe ima gu kha vberriọ? Rhunmwuda, Ẹmwẹ Osanobua ẹre ọ wẹẹ, ne ima gha mu egbe yotọ khẹ odekun ẹrhia. (Tie Itan 22:3.) Ẹghẹ hia ẹre otu e Jehova vbe ya loo avbe ebe ọghomwa, iko ne ima yo, kevbe ayawewe ya ye ima ẹre rre wẹẹ, ne ima mu egbe yotọ khẹ odekun ẹrhia nọ gha sẹtin sunu.c Ma mu ẹtin yan e Jehova ra? Deghẹ ima gele mu ẹtin yan ẹnrẹn, ọ khẹke ne ima mu egbe yotọ nian, odekun ẹrhia ke sunu.

11. Vbua miẹn ruẹ vbe emwi nọ sunu daa Ọtẹn Nokhuo Margaret?

¹¹ Gia guan kaẹn ọtẹn nokhuo ọkpa na tie ẹre Margaret. A keghi tama rẹn nọ kpa hin owa ẹre rre, vbe ẹghẹ ne erhẹn ya mu vẹn vbe ẹdogbo nọ ye. Rhunmwuda ne emwa nibun na vbe gha hoo ne iran lẹẹ hin owa rre vbe ẹdogbo nii, odẹ na wa khui. Ighogho nọ mwẹ emi na wa gba ehe hia, rhunmwuda ọni, e Margaret ma sẹtin ladian vbe uwu imọto ẹre. Vbọrhirhighayehẹ, emwi rhọkpa ma ru ẹre, rhunmwuda ọ mu egbe yotọ. Ọ keghi rhie emapu ye uwu e pọs nọ rhie lele egbe, nọ mieke na rẹn odẹ nọ khẹke nọ la. Ọtẹn nokhuo na, ka ya la odẹ na nẹ, nẹ ghẹ mieke na lọghọe gbe na la vbe odekun ẹrhia gha sunu. Akpawẹ ẹi re ne Margaret na mu egbe yotọ, u ma miẹn wẹẹ, a te gbe egbe ye ẹse.

12. Vbọzẹ nọ na khẹke ne ima gha lele adia ne otu rhie ne ima?

¹² Arriọba sẹtin wẹẹ ne ima ghẹ kpa hin owa rre, ra ne ima kpa hin owa rre, iran sẹtin vbe wẹẹ ne ima ru emwi ọvbehe ne emwi hia mieke na gha khian ẹse ra rhunmwuda wẹẹ iran hoo ne iran gbogba ga ima. Adia vbenian gha rre, emwa eso i rherhe rhie obọ lelẹe, iran ghi gha la ẹdẹ yọ rhunmwuda iran ma hoo ne emwi ewe ne iran mwẹ wii iran. Sokpan ma ne Ivbiotu e Kristi vbo? E Baibol tama ima wẹẹ: “Wa rhunmwuda e Nọyaẹnmwa, gha gbe uhunmwu ke otọ ne asẹ ke asẹ ọghe emwa nagbọn na, ne nọgbaisi ne ọre ogie nọ khaemwisẹ yan ehia ra avbe gọvina ne irẹn gie.” (1 Pit 2:13, 14) Adia ne otu e Jehova vbe rhie ne ima wa vbe gbogba ga ima. Ẹghẹ hia ẹre a vbe ya tama ima ne ima gi avbe ediọn rẹn eke ne ima dia, ima ghi vbe rhie efoni nọmba ọghe ima ne iran, ne iran mieke na sẹtin tie ima vbe emwi nọ wegbe gha sunu. Uwẹ ru ọna nẹ ra? A sẹtin tama ima ne ima ghẹ zẹdẹ kpa hin owa rre, a sẹtin wẹẹ ne ima kpa hin owa rre. A sẹtin vbe tama ima vbene evbare ne otu kpemehe ẹre, khian ya gha sẹ ima obọ hẹ kevbe vbene ima khian ya gha ru iyobọ ne emwa ọvbehe kẹ kevbe ẹghẹ nọ khẹke ne ima ya ru iyobọ ne iran. Deghẹ ima ma lele adia na rhie ne ima, ma sẹtin mu arrọọ ọghe ima kevbe ọghe avbe ediọn ye ikpadede. Ghẹ mianmian wẹẹ, avbe ediọn ẹre ọ gbaroghe ima. (Hib 13:17) E Margaret khare wẹẹ, “I wa ya ekhọe hia yayi wẹẹ, ne I na lele adia ne ediọn rhie mẹ, ẹre ọ zẹ ighẹ I miẹn uhunmwu.”

13. Vbọ ru iyobọ ne etẹn nibun ne orhiọn iran na sotọ, agharhemiẹn wẹẹ iran kpa hin ehe ne iran te ye rre?

¹³ Etẹn nibun ni kpa hin ehe ne iran ye rre rhunmwuda odekun ẹrhia, okuo ra rhunmwuda olighi nọ rre ẹvbo, wa hia vbe odẹ ke odẹ ne eke ne iran ghi ye gu iran egbe ro, kevbe ne iran sẹtin rhie egbe ye iwinna ugamwẹ vbobọvbobọ. Te etẹn ima na, yevbe Ivbiotu e Kristi ni ghaa rrọọ vbe ẹghẹ nẹdẹ, ni zagha gba ehe hia rhunmwuda ukpokpo, te iran wa ye “kporhu iyẹn nọ maan ọghe Ẹmwẹ Osanobua.” (Iwinna 8:4) Iwinna ikporhu na keghi ru iyobọ ne iran, ne iran ya rhie aro tua ẹmwẹ Arriọba Osanobua, ne iran gha te ya rhie aro tua ọlọghọmwa ne iran ye. Rhunmwuda ọni, te ọyẹnmwẹ wa sẹ iran, erriọ orhiọn iran vbe ya sotọ.

VBENE U KHIAN YA SẸTIN GHA MWẸ ỌFUNMWEGBE VBA GHAA ZẸ RUẸ KPOKPO

14. Ma ghaa miẹn ukpokpo, vbọ khian ya si osi ye ima egbe hẹ?

¹⁴ A ghaa zẹ ima kpokpo, ma i khian ghi sẹtin gha ru emwi nibun ne ima te ru nọ ya ima ghọghọ. Ọ wa sẹ ima ọyẹnmwẹ vbe ima gha yo iko, vbe ima gha ladian vbe ikporhu, ra vbe ima ghaa ru emwi ọvbehe, vbene ohan i na mu ima wẹẹ a gha mu ima ye eghan. Adeghẹ ima ma ghi sẹtin gha ru avbe emwi na, ohan sẹtin do gha mu ima, ma sẹtin vbe gha si osi rhunmwuda wẹẹ, ima ma rẹn emwi nọ khian sunu daa ima. Ẹi re emwi dan deghẹ ima na gha si osi. Sokpan, te ọ ye khẹke ne ima gha begbe. E Jesu tae wẹẹ, erhuanegbe ẹre sẹtin sẹ irẹn rae vbe iran gha miẹn ukpokpo. (Jọn 16:1, 2) Nọnaghiyerriọ, vbọ khian ru iyobọ ne ima, ne ima ye gha mwẹ ọfunmwegbe vba ghaa zẹ ima kpokpo?

15. Vbọzẹ nọ ma na khẹke ne ima gha mu ohan ukpokpo? (Jọn 15:20; 16:33)

¹⁵ Ẹmwẹ Osanobua tama ima wẹẹ: “Emwa hia ni hoo ne iran gha yin uyinmwẹ nọ yẹẹ Osanobua, ni ya egbe ba e Kristi, a gha zẹ iran kpokpo.” (2 Tim 3:12) Ọ mwẹ ọtẹn nokpia ọkpa na tie ẹre Andrei, te ọ wa gha lọghọ ne ọtẹn nokpia na ya ẹmwẹ nọ rre ako na yi, vba mu awua ye iwinna ima vbe ẹvbo ẹre. Ọ khare wẹẹ: ‘Osẹe Jehova wa bun vbe emwa. Vba arriọba khian ya sẹtin mu ima hia fẹẹrẹ khui ye eghan hẹ?’ Sokpan iziro na ma zẹdẹ mu orhiọn Andrei sotọ, nọghayayerriọ, ọ na yae gha si osi. Vbọrhirhighayehẹ, etẹn ọvbehe keghi mu emwi hia ye obọ e Jehova, iran ma gha roro ẹre wẹẹ, arriọba i khian sẹtin mu iran khui. Rhunmwuda iran rẹnrẹn wẹẹ, arriọba sẹtin ru vberriọ, sokpan iran ma gha si osi vbe na ghee Andrei. Rhunmwuda ọni, Andrei na suẹn gha roro emwi vbe na ghee etẹn na, ọ na ghi sẹ emwi hia rae ye obọ e Jehova. Orhiọn ọnrẹn na ghi sotọ, ọ na vbe sẹtin gha sọyẹnmwẹ agharhemiẹn wẹẹ emwi ma gha khuẹrhẹ ne iran. Ma gha vbe sẹtin gha sọyẹnmwẹ vbe emwa ghaa zẹ ima kpokpo, orhiọn ima ghi vbe sotọ. Agharhemiẹn wẹẹ, e Jesu tama ima wẹẹ ima gha werriẹ aro daa ukpokpo, ọ vbe gi ima rẹn wẹẹ, ma gha sẹtin mudia gbain.​—Tie Jọn 15:20; 16:33.

16. De adia nọ khẹke ne ima rhie owẹ lele vba ghaa zẹ ima kpokpo?

¹⁶ A gha mu awua ye iwinna ima, ra deghẹ a na dobọ iwinna ugamwẹ eso ne ima ru yi, abotu kevbe ediọn sẹtin rhie adia ne ima. Te iran rhie avbe adia na ne ima rhunmwuda, iran ma hoo ne emwi rhọkpa sunu daa ima, iran vbe hoo ne ima ye gha miẹn emwi hia nọ gha ya ima sikẹ e Jehova, kevbe nọ gha vbe ru iyobọ ne ima ya gha kporhu iyẹn nọ maan vbene ẹtin ima sẹ. Hia ne u gha lele adia na rhirhi rhie nuẹn, ọ gha khọnrẹn wẹẹ, u ma wa rẹn evbọzẹe na na rhie adia nii nuẹn. (Jems 3:17) Vbe deba ọni, ghẹ tama emwa ọvbehe emwi nọ ma khẹke ne iran rẹn vbekpa etẹn ima kevbe vbene ima ya ru iwinna ugamwẹ ima hẹ.​—Asan 3:7.

17. Vbe na ghee avbe ukọ, de emwi nọ khẹke ne ima ru?

¹⁷ Emwi nọ mobọ ya Esu kpokpo eguọmwadia Osanobua ọre rhunmwuda ne iran na “sẹ osẹe vbekpa e Jesu.” (Arhie 12:17) Ghẹ gi ohan Esu kevbe emwa ni rre uwu agbọn gha mu ruẹ. Ma ghaa kporhu, vbe ẹghẹ na ya zẹ ima kpokpo, ọ keghi ya ima sọyẹnmwẹ. Vbe ẹghẹ ne arriọba Ivbi e Ju ya tama avbe ukọ ọghe Jesu ne iran dobọ iwinna ikporhu iyẹn nọ maan yi, iran ma ru vberriọ, iran keghi họn ẹmwẹ ne Osanobua. Iran na ye gha kporhu, rhunmwuda te iwinna na wa gha ya iran sọyẹnmwẹ. (Iwinna 5:27-29, 41, 42) Ẹmwata nọ rrọọ ọre wẹẹ, a gha dobọ iwinna ugamwẹ eso ne ima ru yi, ọ khẹke ne ima gha ya ẹwaẹn kporhu. (Mat 10:16) Ma ghaa hia vbene ẹtin ima sẹ vbe iwinna ikporhu iyẹn nọ maan, ọyẹnmwẹ ghi gha sẹ ima, orhiọn ima ghi vbe sotọ rhunmwuda ma rẹnrẹn wẹẹ, emwi ne ima ru ya ẹko rhiẹnrhiẹn e Jehova kevbe wẹẹ, iwinna na gha sẹtin miẹn emwa fan.

“OSANOBUA NỌ RHIE ỌFUNMWEGBE NE IMA, GHA GU UWA GHA RRỌỌ”

18. De ọmwa nọ gha gele sẹtin rhie ọfunmwegbe ne ima gualọ ne ima?

¹⁸ Gha mwẹ ilẹkẹtin wẹẹ ma gha ye sẹtin gha mwẹ ọfunmwegbe, ọ gha khọnrẹn ne ima gha rre uwu ọlọghọmwa. Ma ghaa rre uwu ọlọghọmwa, ọ khẹke ne ima gha yerre wẹẹ ọfunmwegbe Osanobua ẹre ima gualọ, e Jehova ọkpa ẹre ọ khian sẹtin rhie ọfunmwegbe na ne ima. Mu ẹtin yan e Jehova vbe emianmwẹ ghaa vẹwae, odekun ẹrhia gha sunu, ra vba ghaa zẹ ruẹ kpokpo. Rhikhan mu otu ọghẹe. Gha muẹn roro emwi ne Osanobua wẹẹ, irẹn khian ru ne ima vbe odaro. U gha ru vberriọ, ‘Osanobua nọ rhie ọfunmwegbe ne ima, gha gu ruẹ gha rrọọ.’ (Fil 4:9) Vbe ako iruẹmwi nọ ghi lele ọna, ma gha guan kaẹn vbene ima khian ya sẹtin ru iyobọ ne etẹn ima ni rre uwu ibavbaro ne iran mieke na gha mwẹ ọfunmwegbe ọghe Osanobua.