Etẹn Ima Nikpia Ni Re Igbama, Wa Hia Ne Uwa Gha Re Ikpia Ni Deziẹn Vbe Odẹ Ọghe Orhiọn

1. Vbọ khẹke ne okpia nọ re Ovbi Otu e Kristi ru nọ mieke na musọe?

E DEVID ne ọba keghi tama e Sọlomọn wẹẹ: “Gha mwẹ udinmwẹ, ghẹ vbe ru emwi ọvbokhan.” (1 Ọba 2:​1-3) Te ọ khẹke ne ikpia hia ni re Ivbi Otu e Kristi vbe gha lele ibude na. Ne iran mieke na sẹtin musọe, te ọ khẹke ne iran gha lele uhi ọghe Osanobua, iran ghi vbe gha ya ilele ọghẹe ru emwi vbe ẹdagbọn iran. (Luk 2:52) Vbọsiẹ nọ na khẹke ne Ivbi Otu e Kristi hia ni re igbama, hia vbe odẹ ke odẹ ne iran mieke na do gha re ikpia ni deziẹn vbe odẹ ọghe orhiọn?

2-3. Vbọzẹ nọ na ru ekpataki ne ọtẹn nokpia nọ re igbama hia nọ do gha re Ovbi Otu e Kristi nọ deziẹn?

² Ikpia ni re Ivbi Otu e Kristi wa mwẹ iwinna nibun ne iran ru vbe uwu ẹgbẹe kevbe iko ne iran ye. Ẹ i mwẹ uwa ne Ivbi Otu e Kristi ni re igbama ma re muẹn roro, dọmwadẹ emwi ne uwa khian ya ẹdagbọn uwa ru. A sẹtin miẹn wẹẹ, u hoo ne u rhie egbe ye iwinna ugamwẹ ẹghẹ hia, kevbe ne u do gha re ọguọmwadia iwinna, kevbe wẹẹ, vbene ẹghẹ ya khian u do gha re ọkpa vbe ediọn ni rre iko. U sẹtin vbe gha hoo ne u ru orọnmwẹ, ne u vbe gha mwẹ emọ. (Ẹfis 6:4; 1Tim 3:1) Ne u mieke na sẹtin ru ena hia, te ọ khẹke ne u gha re Ovbi Otu e Kristi nọ deziẹn vbe odẹ ọghe orhiọn.b

³ Vbọ khian ru iyobọ nuẹn ya gha re Ovbi Otu e Kristi nọ deziẹn vbe odẹ ọghe orhiọn? Emwi eso rrọọ nọ khẹke ne u ruẹ. Nọnaghiyerriọ, de emwi eso nọ khẹke ne u ru nian, nọ gha mu ruẹ egbe khẹ emwi eso ne u hoo ne u ya ẹdagbọn ruẹ ru vbe odaro?

EMWI ESO NE U GHA RU NE U MIEKE NA GHA RE OVBI OTU E KRISTI NỌ DEZIẸN

4. De eke ne u khian na miẹn igiemwi esi ne u gha sẹtin ya egbe taa? (Vbe ya ghee efoto.)

⁴ Gha lele igiemwi esi. Igiemwi esi ọghe emwa nibun ne igbama gha sẹtin ya egbe taa wa vuọn e Baibol. Iran wa hoẹmwẹ e Jehova, erriọ iran vbe ya gbaroghe emwa ọghe Osanobua vbe odẹ ughughan. U gha vbe miẹn igiemwi esi ọghe ikpia eso ni deziẹn vbe odẹ ọghe orhiọn vbe uwu ẹgbẹe ruẹ kevbe iko ne u ye. (Hib 13:7) Igiemwi ọghe Jesu vbe rre evba, ọmwa nọ gba ẹre Jesu wa gha khin. (1 Pit 2:21) Zẹvbe ne u ya tie okha ọghe iran, gha muẹn roro uyinmwẹ esi ne iran mwẹ. (Hib 12:​1, 2) U ghi vbe hia ne u ya egbe taa iran.

5. Vbọ khian ru iyobọ nuẹn ya gha roro emwi ẹse? Vbọzẹ ne ọna na ru ekpataki? (Psalm 119:9)

⁵ Hia ne u “gha roro emwi ẹse.” (Itan 3:21) Te okpia nọ roro emwi ẹse ka mu ukpa mu uwerhẹn ghee emwi nọ khian ru, ọ ke ru ẹre. Nọnaghiyerriọ, hia ne u ruẹ vbe na ya roro emwi ẹse hẹ, ne u vbe do gha re ọmwa nọ roro emwi ẹse. Vbọzẹ? Rhunmwuda, igbama ni ya ẹmwẹ obọ iran ru emwi ẹre ọ vuọn ehe hia vbe agbọn Esu na, emwi ke emwi nọ rre iran ekhọe ẹre iran ru. (Itan 7:7; 29:11) Emwi ughughan na miẹn vbe ẹkpẹti ughe kevbe itanẹt gha sẹtin fi uyinmwẹ ruẹ werriẹ. Sokpan vbua khian ya sẹtin gha re ọmwa nọ roro emwi ẹse? Hia ne u rẹn avbe ilele nọ rre uwu e Baibol, u ghi hia ne u rẹn evbọzẹe ne avbe ilele na na ru ekpataki. U ghi vbe hia ne avbe ilele na gha dia ruẹ, ne u mieke na sẹtin gha ru emwi nọ gha ya ẹko rhiẹnrhiẹn e Jehova. (Tie Psalm 119:9.) Adeghẹ u na gha roro emwi ẹse, ọ gha wa kakabọ ru iyobọ nuẹn ya do gha re okpia nọ deziẹn vbe odẹ ọghe orhiọn. (Itan 2:​11, 12; Hib 5:14) Gia guan kaẹn asefẹn eva ne u gha na sẹtin rhie ẹre ma wẹẹ, u roro emwi ẹse: (1) vbe odẹ ne u ya gu etẹn nikhuo mu obọ (2) kevbe odẹ ne u ya mu egbe.

6. U ghaa roro emwi ẹse, vbọ khian ya ru iyobọ nuẹn hẹ ya gha rhie ọghọ nọ khẹke ne ikhuo?

⁶ U ghaa roro emwi ẹse, ẹre u khian na sẹtin gha rhie ọghọ nọ khẹke ne ikhuo. Emwi nọ maan nọ deghẹ ọtẹn nokpia na gha hoo nọ rẹn ọtẹn nokhuo sayọ kevbe ne iran gba gha si egbe obọ. Vbọrhirhighayehẹ, ọtẹn nokpia nọ roro emwi ẹse, i khian ta emwi ra nọ gbẹn emwi gie ọtẹn nokhuo nii, nọ gha ya ọtẹn nokhuo nii gha roro ẹre wẹẹ, ẹmwẹ ọnrẹn yẹẹ ọre, vbe ẹ i re te ọ gele hoo nọ rhie ọtẹn nokhuo nii rọnmwẹ. (1Tim 5:​1, 2) Adeghẹ ọtẹn nokpia vbe ọtẹn nokhuo na gha si egbe obọ, ọ ma khẹke ne iran eva ọkpa gha rre ehe nọ divbiẹ, vbene ọmwa rhọkpa i na gu iran rre evba, ne emwa ghẹ mieke na do gha ya aro nọ ma khẹke ghee nene ọtẹn nokhuo.—1 Kọr 6:18.

7. Adeghẹ ọtẹn nokpia na gha roro emwi ẹse, vbọ khian ya ru iyobọ nẹẹn hẹ, vbe ọ gha khian ru azẹ nọ dekaẹn vbe nọ ya mu egbe?

⁷ Odẹ ọvbehe ne etẹn nikpia ni re igbama gha ya rhie ẹre ma wẹẹ iran roro emwi ẹse, ọre ne iran sẹtin gha ru azẹ nọ khẹke, vbọ gha de ọghe egbe ne iran mu kevbe eto ne iran mu ye uhunmwu. Emwa ni ma rẹn e Jehova, nẹi vbe ya uhi ẹre ru emwi, ẹre ọ mobọ se avbe ukpọn ni rre atẹ ne emwa yọ. Iziro nọ ma gba ne iran mwẹ, ẹre ọ mobọ ya iran se avbe ukpọn ne piẹnpiẹnpiẹn, ikpia gha yọe, iran ghi do yevbe na ghee ikhuo. Ọtẹn nokpia nọ re igbama nọ hoo nọ do gha re Ovbi Otu e Kristi nọ deziẹn gha khian zẹ aro ukpọn nọ khian yọ, irẹnmwi ọghe Baibol kevbe igiemwi esi ọghe etẹn ni rre uwu iko ẹre ọ khẹke nọ dia ẹre. Ọ sẹtin nọ egbe ẹre wẹẹ: ‘Aro ukpọn ne I yọ rhie ẹre ma wẹẹ, ọmwa nọ roro emwi ẹse kevbe nọ mu ọghe emwa ọvbehe roro, ẹre imẹ khin ra? Emwa gha bẹghe aro ukpọn ne I yọ, iran gha rherhe rẹn wẹẹ, ọmwa nọ ga e Jehova ẹre I khin ra?’ (1 Kọr 10:​31-33; Taitọs 2:6) Etẹn hia ni rre uwu iko kevbe Jehova keghi ya aro nọ ghaan ghee ọtẹn nokpia nọ re igbama nọ roro emwi ẹse.

8. Vbọ khian ru iyobọ ne ọtẹn nokpia nọ ye re igbama ya gha re ọmwa nọ gia mu ẹtin yan?

⁸ Gha re ọmwa nọ gia mu ẹtin yan. Ọtẹn nokpia nọ re igbama, na gha sẹtin mu ẹtin yan i ya iwinna rẹn ku. (Luk 16:10) Gi ima guan kaẹn igiemwi nọ gbae ne Jesu rhie yotọ. Ọ ma ya iwinna rẹn rhẹghẹrẹ hiehie. Nọghayayerriọ, ọ keghi ru emwi hia fẹẹrẹ ne Jehova we nọ ru, uhiẹn vbe ẹghẹ ne emwi ya gha lọghọ. Ọ hoẹmwẹ emwa hia, katekate erhuanegbe ẹre, ọ na vbe ya ekhọe hia wu ne iran. (Jọn 13:1) Ọ khẹke ne ima hia ne ima ru iwinna ke iwinna na mu ne ima, ma gha ru vberriọ, te ima ya egbe tae Jesu. Adeghẹ u ma wa rẹn vbe na ru ẹre hẹ, nọ iyobọ vbe obọ etẹn na ta ẹmwẹ ọnrẹn ẹse, ọna gha rhie ẹre ma wẹẹ, ọmwa nọ mu egbe rriotọ ẹre u khin. Hia ne u ru enene iwinna ẹse, ghẹ wa ru ekherhe ne u vbe sẹrae. (Rom 12:11) Nọghayayerriọ, ru enene iwinna fo, ‘vbe na miẹn wẹẹ, e Jehova ẹre u ru ẹre na, ẹ i re emwa nagbọn.’ (Kọl 3:23) Ọghe ne ẹmwata, ma rẹnrẹn wẹẹ, a i miẹn nọ fo na, rhunmwuda ọni, u gha ba emwi ku, miẹn kue wẹẹ uwẹ ẹre ọ ru ẹre.—Itan 11:2.

RUẸ EMWI ESO NỌ GHA RU IYOBỌ NUẸN VBE ẸDAGBỌN RUẸ

9. Vbọzẹ nọ na khẹke ne u ruẹ emwi eso nọ gha ru iyobọ nuẹn vbe ẹdagbọn ruẹ?

⁹ Adeghẹ u hoo ne u gha re Ovbi Otu e Kristi nọ deziẹn vbe odẹ ọghe orhiọn, ọ khẹke ne u ruẹ emwi eso nọ gha ru iyobọ nuẹn vbe ẹdagbọn ruẹ. Ọna gha ru iyobọ nuẹn ya sẹtin ru iwinna ke iwinna na mu nuẹn vbe iko, u vbe sẹtin gha ru iwinna ne u khian na gha miẹn igho, ne u mieke na sẹtin gha gbaroghe egbuẹ kevbe ẹgbẹe ruẹ, u ghi vbe gu emwa ọvbehe gha rrọọ vbe ọfunmwegbe. Gia guan kaẹn emwi eso nọ khẹke ne u ruẹ.

10-11. Adeghẹ ọtẹn nokpia na ruẹ vbe na ya tie ebe kevbe vbe na ya gbẹn hẹ, vbọ khian ya ru iyobọ nẹẹn hẹ kevbe etẹn ni rre iko? (Psalm 1:​1-3) (Vbe ya ghee efoto.)

¹⁰ Ruẹ vbe na ya tie ebe kevbe vbe na ya gbẹn hẹ. E Baibol gi ima rẹn wẹẹ, deghẹ okpia hoo nọ gha ghọghọ kevbe ne emwi dunna ne irẹn, ọ khẹke nọ gha tie Ẹmwẹ Osanobua vbe ẹdẹgbegbe, ọ ghi vbe gha mu emwi nọ tie roro. (Tie Psalm 1:​1-3.) Ọ na gha tie Baibol vbe ẹdẹgbegbe, ọ gha do rẹn aro ne Jehova ya ghee emwi, ọna gha ru iyobọ nẹẹn, ya gha ghee emwi vbene Jehova ghee ẹre, ọ ghi vbe gha roro emwi ẹse. (Itan 1:​3, 4) Egbe ikpia vbenian ẹre a gualọ vbe iko. Vbọ ya ima kha vberriọ?

¹¹ Te etẹn wa gualọ iyobọ ọghe ikpia ni gbegba nọ gha sẹtin ya e Baibol ma iran emwi, iran ghi vbe yae rhie ibude ne iran. (Taitọs 1:9) Adeghẹ u na gua gha tie ebe ẹse, u na vbe gua gha gbẹn, ọ gha ru iyobọ nuẹn ya mu egbe ọta ne u khian ya guan vbe iko kevbe ne u sẹtin zẹ ewanniẹn, nọ gha ya amuẹtinyan ọghe etẹn wegbe. U gha vbe sẹtin gha gbẹnnẹ emwi eso nọ gha ru iyobọ nuẹn yotọ, vbe u ghaa ruẹ emwi, vbe u ghaa danmwehọ ọta vbe iko, vbe asikoko ọghe otako kevbe vbe asikoko nọkhua. Avbe emwi ne u gbẹnnẹ yotọ na gha ya amuẹtinyan ọghuẹ wegbe sayọ, u gha vbe sẹtin loo ẹre ya ru iyobọ ne emwa ọvbehe.

12. Vbọ khian ru iyobọ nuẹn ya sẹtin gha gu emwa zẹ iro ẹse?

¹² Ruẹ vbe na ya gu emwa zẹ iro hẹ. Ọ khẹke ne Ivbi Otu e Kristi ruẹ vbe na ya gu emwa zẹ iro hẹ. Okpia nọ gele gua gu emwa zẹ iro, ẹre ọ gbehọkotọ danmwehọ vbe emwa ghaa gu ẹre guan, ọ ghi vbe hia nọ rẹn vbene emwi gele ye iran hẹ. (Itan 20:5) Ọ ghi ya vbene urhu ọmwa nii ye hẹ, vbene ugbaro ẹre ye hẹ vbe uhunmwu, kevbe vbe nọ ya ru emwi, ya rẹn vbene emwi gele ye ọmwa nii hẹ. Vbe ẹ i re te u mwẹ ẹghẹ ne emwa, u i khian sẹtin ruẹ vbe na ya ru avbe emwi na sunu yi na. Adeghẹ efoni ẹre u mobọ loo ya gu emwa guan, vbe na ghee email kevbe text message, ọ ghi do gha lọghọ ruẹ ne u sẹtin gha gu emwa guan ghee mwẹ ghee ruẹ. Nọnaghiyerriọ, hia ne u gualọ ẹkpotọ ne u khian ya gha gu emwa guan, ghee mwẹ ghee ruẹ.—2 Jọn 12.

13. De emwi ọvbehe nọ khẹke ne ọtẹn nokpia nọ re igbama ruẹ? (1Timoti 5:8) (Vbe ya ghee efoto.)

¹³ Ruẹ emwi nọ gha ru iyobọ nuẹn ya gha gbaroghe egbuẹ. Ọ khẹke ne Ovbi Otu e Kristi nọ deziẹn vbe odẹ ọghe orhiọn, sẹtin gha gbaroghe egbe ẹre kevbe ẹgbẹe ọre. (Tie 1 Timoti 5:8.) Vbe ẹvbo eso, etẹn nikpia ni re igbama ruẹ iwinna obọ vbe obọ erha iran, ra vbe obọ ọmwa ọvbehe vbe uwu ẹgbẹe. Vbe avbe ẹvbo ọvbehe, ọtẹn nokpia nọ re igbama sẹtin ruẹ vbe na ya do ẹki hẹ kevbe iwinna obọ, vbe ọ ghaa rre owebe nukpogieva. Vbe nọ rhirhi gha ye hẹ, ọ khẹke ne u ruẹ iwinna agbọn nọ gha ru iyobọ nuẹn ya miẹn iwinna. (Iwinna 18:​2, 3; 20:34; Ẹfis 4:28) Hia na rẹn ruẹ ye ọmwa nọ wegbe obọ, kevbe nọ gha suẹn iwinna, ọ ghi ru ẹre fo. U ghaa re ọmwa vberriọ, u sẹtin rherhe miẹn iwinna, kevbe wẹẹ iwinna nii i fe ruẹ obọ. U ghaa mwẹ avbe uyinmwẹ ni khẹke Ivbi Otu e Kristi, u na vbe ruẹ emwi eso nọ gha ru iyobọ nuẹn vbe ẹdagbọn ruẹ, u ghi sẹtin mu egbe yotọ khẹ emwi ne u khian ya ẹdagbọn ruẹ ru vbe odaro. Gia guan kaẹn emwi eso ne ima gha sẹtin ru.

MU EGBE YOTỌ KHẸ EMWI NE U KHIAN YA ẸDAGBỌN RUẸ RU VBE ODARO

14. Vbọ khian ru iyobọ ne ọtẹn nokpia nọ re igbama ya mu egbe yotọ, nọ mieke na la iwinna ugamwẹ ẹghẹ hia?

¹⁴ U sẹtin rhie egbe ye iwinna ugamwẹ ẹghẹ hia. Egbe ọvbokhan ẹre etẹn nikpia nibun ni deziẹn vbe odẹ ọghe orhiọn ya la iwinna ugamwẹ ẹghẹ hia. Adeghẹ ọtẹn nokpia na gha ru iwinna arọndẹ, ọ gha vbe ru iyobọ nẹẹn ya rẹn vbene ọ khian sẹtin gu obọ emwa ọvbehe hẹ. Ọ gha vbe ru iyobọ nẹẹn ya gha ya ẹwaẹn loo igho. (Fil 4:​11-13) Emwi ọkpa nọ gha ru iyobọ ne ọmwa ya la iwinna ugamwẹ ẹghẹ hia ọre arọndẹ ọghe ọyọmwabọ. Etẹn nibun keghi rhie obọ ye iwinna arọndẹ ọghe ovbi ẹghẹ kherhe, ọna keghi ru iyobọ ne iran ya sẹtin rhie obọ ye iwinna arọndẹ ọghe ọyọmwabọ. Iwinna arọndẹ keghi kie ẹkpotọ yọ na ya sẹtin rhie egbe ye iwinna ugamwẹ ẹghẹ hia ọvbehe, vbe na ghee iwinna owa ugamwẹ na bọlọ ra na ya ga vbe Bẹtẹl.

15-16. Vbọ khian ru iyobọ ne ọtẹn nokpia nọ re igbama ya gbegba nọ gha ga zẹvbe ọguọmwadia iwinna ra ọdiọn?

¹⁵ Ọguọmwadia iwinna ra ọdiọn. Ọ khẹke ne etẹn nikpia hia vbe odẹ ke odẹ ne iran gbegba ne iran mieke na sẹtin ga zẹvbe ediọn, odẹ vberriọ, iran ghi sẹtin ru iyobọ ne etẹn ni rre iko. E Baibol khare wẹẹ, ọtẹn nokpia ghaa hia nọ gbegba nọ gha ga zẹvbe ediọn, “iwinna esi ẹre ọ hoo nọ ru.” (1Tim 3:1) A te miẹn wẹẹ, ọtẹn nokpia khian ọdiọn, te ọ gha ka ga nẹ zẹvbe ọguọmwadia iwinna. Odẹ wa bun ne avbe ọguọmwadia iwinna ya ru iyobọ ne ediọn. Ekhọe hia ẹre ediọn kevbe eguọmwadia iwinna ya ru iyobọ ne etẹn, erriọ iran vbe ya rhie egbe ye iwinna ikporhu. Etẹn nikpia ni ye re igbama, ni rre odẹ ukpo 17-19, gha sẹtin ga zẹvbe eguọmwadia iwinna. Ọguọmwadia iwinna nọ gele gbegba gha sẹtin ga zẹvbe ọdiọn, ọ gha khọnrẹn nọ gha rre ukpo 20.

¹⁶ Vbọ khian ru iyobọ nuẹn ya sẹtin gbegba nọ gha ga zẹvbe ọguọmwadia iwinna ra ọdiọn? E Baibol ya unu kaẹn emwi nọ khẹke ne u ru, ọ khẹke ne u hoẹmwẹ e Jehova, ẹgbẹe ruẹ kevbe etẹn ni rre iko. (1Tim 3:​1-13; Taitọs 1:​6-9; 1 Pit 5:​2, 3) Hia ne u rẹn otọ emwi ne ọmwa gha ru nọ mieke na sẹtin gbegba. Na erhunmwu ne Jehova ru iyobọ nuẹn, ne u mieke na sẹtin ru avbe emwi na.c

17. Vbọ khian ru iyobọ ne ọtẹn nokpia nọ re igbama ya mu egbe yotọ nọ mieke na gha re ọdọ kevbe uhunmwuta ẹgbẹe nọ rẹn enegbe, vbọ gha ru orọnmwẹ nẹ? (Vbe ya ghee efoto.)

¹⁷ Ọdọ kevbe uhunmwuta ẹgbẹe. Zẹvbe ne Jesu tae, etẹn nikpia eso sẹtin kha wẹẹ, iran i khian rhie okhuo. (Mat 19:12) Vbọrhirhighayehẹ, adeghẹ u hoo ne u rhie okhuo, u ghi rẹn wẹẹ, ọdọ kevbe uhunmwuta ẹgbẹe ẹre u khian ghi gha khin. (1 Kọr 11:3) E Jehova hoo ne ọdọ hoẹmwẹ ọvbokhan rẹn, ọ ghi gha gbaroghe ẹre, ọ ghi gha mwẹ ẹghẹ nẹẹn, ọ ghi vbe gha ru emwi nọ gha yae sikẹ e Jehova sayọ. (Ẹfis 5:​28, 29) Avbe uyinmwẹ esi kevbe emwi nọ khẹke ne u ruẹ na he guan kaẹn sin vbe ako iruẹmwi na, vbe na ghee, ne u gha roro emwi ẹse, ne u gha rhie ọghọ nọ khẹke ne ikhuo, ne u gha re ọmwa nọ gia mu ẹtin yan, gha ru iyobọ nuẹn ya gha re ọdọ nọ rẹn enegbe. Ọna gha ru iyobọ nuẹn ya ru iwinna nọ khẹke ne u ru zẹvbe ọdọ kevbe uhunmwuta ẹgbẹe.

18. De vbene ọtẹn nokpia nọ re igbama khian ya mu egbe yotọ hẹ, nọ mieke na gha re erha nọ rẹn enegbe?

¹⁸ Erha. U gha ghi rhie okhuo nẹ, u sẹtin do khian erha. Vbua khian miẹn ruẹ vbe obọ e Jehova, nọ gha ru iyobọ nuẹn ya gha re erha nọ rẹn enegbe? Emwi wa bun ne u gha miẹn ruẹ. (Ẹfis 6:4) E Jehova keghi tama Jesu vbe idagbo wẹẹ, irẹn hoẹmwẹ ọnrẹn kevbe wẹẹ, irẹn miẹn ọnrẹn yi. (Mat 3:17) Adeghẹ u na ghi biẹ vbe akhuẹ, gha tama ivbuẹ vbe ẹghẹ hia wẹẹ, u hoẹmwẹ iran. Hia ne u gha tian iran vbe ẹghẹ hia vbe iran gha ru emwi esi. Erha ọmọ nọ ya egbe taa igiemwi ọghe Jehova, gha sẹtin ru iyobọ ne ivbi ẹre ya do gha re Ivbi Otu e Kristi ni deziẹn vbe odẹ ọghe orhiọn. Adeghẹ u na gha ya obọ esi mu ẹgbẹe ruẹ kevbe etẹn ni rre uwu iko nian, u na vbe gha ru emwi nọ gha ya iran rẹn wẹẹ, u hoẹmwẹ iran kevbe wẹẹ u gbọyẹmwẹ ye emwi ne iran ru, ọ gha ru iyobọ nuẹn ya gha re erha nọ rẹn enegbe. (Jọn 15:9) Ọna gha ru iyobọ nuẹn ya ru iwinna ruẹ ẹse zẹvbe ọdọ kevbe erha. Vbe nọ ghi te sẹ ẹghẹ nii, e Jehova gha loo ruẹ vbe otu ọghẹe, u ghi vbe gha mwẹ iyobọ ne u ye ne ẹgbẹe ruẹ kevbe iko ruẹ.

VBỌ KHẸKE NE U GHA RU NIAN?

19-20. Vbọ khian ru iyobọ ne etẹn nikpia ni re igbama ya gha re etẹn nikpia ni deziẹn vbe odẹ ọghe orhiọn? (Ghee efoto nọ rre odaro ebe na.)

¹⁹ Etẹn nikpia ni re igbama, adeghẹ uwa hoo ne uwa gha re Ovbi Otu e Kristi nọ deziẹn vbe odẹ ọghe orhiọn, te uwa gha winna yọ. Gualọ etẹn ni rẹn enegbe, ne u gha ya egbe taa, u ghi vbe gha roro emwi ẹse, gha re ọmwa na gha sẹtin mu ẹtin yan, hia ne u ruẹ emwi eso ni gha ru iyobọ nuẹn vbe ẹdagbọn ruẹ, u ghi vbe mu egbe yotọ khẹ emwi ne u khian ya ẹdagbọn ruẹ ru vbe odaro.

²⁰ Ugbẹnso, egbe sẹtin wa wọọ ruẹ, vbe u gha muẹn roro iwinna nọ khẹ ruẹ vbe odaro. Sokpan, u gha sẹtin musọe. Ghẹ mianmian wẹẹ, e Jehova mu egbe nọ khian ya ru iyobọ nuẹn. (Aiz 41:​10, 13) Etẹn ni rre uwu iko gha vbe ru iyobọ nuẹn. U gha ghi gele do khian Ovbi Otu e Kristi nọ deziẹn vbe odẹ ọghe orhiọn, ẹre u khian na gha sọyẹnmwẹ, ẹkun ghi vbe sẹ ruẹ otọ. Etẹn nikpia ni re igbama, ma hoẹmwẹ uwa ẹsẹsẹmwẹse! Erhunmwu ne ima na, ọre ne Jehova fiangbe uwa, zẹvbe ne uwa ya hia ne uwa gha re Ivbi Otu e Kristi nọ deziẹn vbe odẹ ọghe orhiọn.—Itan 22:4.