Vbene U Khian Ya Sẹtin Gha Ye Ako Ọghe Ebe Nọhuanrẹn Rre

Ọ he ka lọghọ ruẹ ẹdẹ ne u sẹtin ye ako ebe nọhuanrẹn nọ yẹẹ ruẹ sẹ rre ra? Ọ sẹtin gha re ako ọghe ebe nọhuanrẹn nọ rhie ifuẹko nuẹn, nọ ru iyobọ nuẹn ya sẹtin lẹẹ ne iziro dan ra ne u hoo ne u ya rhie igiọdu ne emwa ọvbehe. (Psm 119:​11, 111) Gi ima guan kaẹn emwi eso nọ gha ru iyobọ nuẹn ya gha ye ako ọghe ebe nọhuanrẹn rre.

• Loo e tag nọ rre JW Library^® app. U gha la ako ne tag ye, u ghi mu tag ọgbọn ye evba. U sẹtin gbẹn “Ako Ebe Nọhuanrẹn Nọ Yẹẹ Mwẹ Sẹ” yọ, u ghi gbẹnnẹ ako ọghe ebe nọhuanrẹn ne u hoo ne u gha yerre ye ako na.

• U sẹtin gbẹn ako ọghe ebe nọhuanrẹn ye eke ne u gha na rherhe gha bẹghe ẹre. U sẹtin gbẹn ako ọghe ebe nọhuanrẹn ye emwi, u ghi rhie ẹre ye eke ne u gha na rherhe gha bẹghe ẹre. Emwa eso rhie ẹre ye okhiẹ ọghe ughegbe ọghe iran; vbene eso na sikaẹn mu ẹkhu ọghe fridge ọghe iran. Eso sẹtin mu ẹre efoto iran ghi yae ru e screen saver vbe efoni ra ekọmputa ọghe iran.

• U sẹtin vbe gbẹn ọnrẹn ye ekadi nọ gha ru iyobọ nuẹn ya rẹn ọnrẹn ye uhunmwu. Gbẹn ako ọghe ebe nọhuanrẹn nii ye obọ ọkpa, u ghi gbẹnnẹ ẹmwẹ nọ rre ako nii ye obọ nọkpa. Iyeke ọni, mu abọ ne u gbẹnnẹ ako ọghe ebe nọhuanrẹn nii yi ladian, u ghi hia ne u ye ẹmwẹ nọ rre ako nii rre, ra u ghi mu ẹmwẹ nọ rre ako nii ladian, u ghi hia ne u yerre ako ebe nọhuanrẹn nọ khin.