Bibulu kalan minnu bɛ wolo kalandenw na
1 Filipe kɛlen kɔ ka ‘Yesu kibaru duman fɔ a ye’, Ecopi kuntigi dɔ ko a ma ko: “Mun bɛ ne bali ka batise?” (Kɛw. 8:27-39). Kanuya tun bɛ kuntigi in na ka ɲɛsin Ala ka sɛbɛn fiyɛlenw ma. O de la, dɛmɛ sɔrɔlen kɔfɛ ka bɔ Filipe yɔrɔ hakili ta fan fɛ, a tun labɛnnen don ka kɛ kalanden dɔ ye. Nka, ka Sɛbɛnniw sɛgɛsɛgɛ u yɛrɛw fɛ, caman daŋaniyalen tɛ a kan k’u mago b’o la.
2 Hɛrɛ la, Jehowa ka jamakulu ye gafenin kura dɔ di an ma, n’o tɔgɔ ko Un livre pour tous. Bibulu ka cikan ye min ye ka ɲɛsin an ka waati ma, a bɛ wele bila an ma k’o sɛgɛsɛgɛ. Fɛn min b’a kɔnɔ, o ka kan ka mɔgɔ kɔnɔnajɛlenw bɛɛ sama, a dɔ rɔ minnu kalannnen don, nka, n’u tɛ fɛn caman dɔn Bibulu kan. Nin baarakɛminɛn ɲuman in dilanna walisa ka nege don u la u k’u mago don o kitabu la.
3 Tuma min na an bɛ Bibulu kalan dɔ daminɛ, an bɛna se ka nafa sɔrɔ a la n’an bɛ hakilina ɲumanw lajɛ ko kura, hakilina minnu bɛ bɔ san 1996 Zuwɛnkalo Ministère du Royaume ka farankan kɔnɔ. O b’a jira kalan minnu bɛ nɔ to, olu bɛ ɲɛminɛ cogo min na ni Connaissance gafe ye. Kalan kɛtuma na, an ka kalanden ka ɲɛtaa kɔlɔsi walisa k’a dɔn yɔrɔ minnu ka kan ni kɔlɔsili ye kosɛbɛ. An k’a dusu lamin a ka kɔn k’a yɛrɛ labɛn ani ka Bibulu tɛmɛsiraw lajɛ. A bɛ jaabi di cogo min na ka kɛɲɛ n’a yɛrɛ ka kuma cogo ye, o bɛ se ka waleɲumandɔn dunba jira ka ɲɛsin tiɲɛ ma. Tuma caman na, mɔgɔ minnu bɛ Tɔn ka sɛbɛn dɔ wɛrɛw kalan, ani minnu bɛ lajew la tuma bɛɛ, u bɛ ɲɛtaa sɔrɔ teliya la. A bɛ min kalan, an k’a dusu lamin a k’o kuma fɔ a laminimɔgɔw ye. Ni ɲumanya ye, an k’a jira a la a ka kan ka min kɛ walisa ka ɲɛtaa sɔrɔ hakili ta fan fɛ. Mɔgɔ minnu bɛ filanfilan na, an man kan ka kalan kɛ n’u ye kudayi. Minnu bɛ Bibulu kalan, u ka kan ka bɔ u yɛrɛ la ka kalan kɛ, k’u sinsi tiɲɛ ta fan fɛ ani ka taa ɲɛ fo u k’u yɛrɛ latɛmɛ Ala ma ani ka batɛmu ta.
4 Du dɔw kɔnɔ, Bibulu kalanw ka ca bawo denbaya kɔnɔmɔgɔ caman bɛɛ kalan kɛ u dan ma. Nka, tuma caman na, denbaya kɔnɔmɔgɔw ka fara ɲɔgɔn kan ka kalan kɛ o ka fisa, bawo a bɛ denbaya kɔnɔmɔgɔw jɛ hakili ta fan fɛ.
5 Yesu ye ci di an ma ka kalandenw kɛ (Mat. 28:19). O tuma, an ka kan ka kalanw ɲɛminɛ, kalan minnu bɛ mɔgɔw bila ka ɲɛtaa sɔrɔ fo u k’a fɔ ko: “Mun bɛ ne bali ka batise?”