‘Jehowa ye ne dɛmɛbaga ye’

¹ Tuma min na Yesu ye waajuli ci di a ka kalanden fɔlɔw ma, a y’a fɔ u ye ko: ‘A filɛ, ne bɛ aw ci ka taa i n’a fɔ sagaw bɛ taa waraw cɛma.’ (Mat. 10:16). Yali o kosɔn u kɛra siranbagatɔw ye ani u y’u yɛrɛ minɛ ka waajuli kɛ wa? Ayi. U cogo kɛra i n’a fɔ ciden Pol y’a ɲɛfɔ cogo min na kɔfɛ a Krecɛn ɲɔgɔnw ye ko: “An bɛ se ka fɔ ka an ja gɛlɛya a la ko: ‘ne dɛmɛbaga ye [“Jehowa,” NW] de ye, ne tɛna siran. Mɔgɔ bɛ se ka mun kɛ ne la?’” (Heb. 13:6). U ɲagalila k’a masɔrɔ u y’a jate bonya ye ka maloya sɔrɔ Yesu tɔgɔ kosɔn, ani u taara’ fɛ ka kalan kɛ ani ka kibaru duman fɔ k’a sɔrɔ u ma dabila.—Kɛwalew 5:​41, 42.

² Bi bi in na, waajuli min bɛ kɛra diɲɛ kɔnɔ o sera a laban na. Tigitigi i n’a fɔ Yesu tun y’a fɔ cogo min na, siyaw bɛɛ b’an kɔniya (Mat. 24:9). Kɔdonni kɛra an ka waajuli la. A lagosila, a balila yɛrɛ dugukolo yɔrɔ dɔw la. Ni limaniya b’an jɛ, an bɛ se ka bagabaga. Nka, k’a dɔn ko Jehowa y’an dɛmɛbaga ye ani k’a bɛ fanga di an ma, o b’an sinsi an ka jɔ a kan k’an timinandiya.

³ Ka dusu sɔrɔ, o kɔrɔ ye ka kɛ mɔgɔ kologɛlɛnw, farinw ani jagɛlɛnw ye. O kɔdonnen don siranya, yiranyirannciya, ani jitɔya la. Yesu ka kalandenw mago bɛ tuma bɛɛ dusu la walisa ka muɲuli kɛ. Wajibi don an ka dusu sɔrɔ walisa an kana to diɲɛ min ye Ala jugu ye, a jogow n’a kɛwalew k’an dusu faga. O ye dusulaminko ye an bolo dɛ ka miiri Yesu ka misali nafama la, ale min ye se sɔrɔ diɲɛ kan (Yuh. 16:33)! An ka hakili to fana cidenw la, o minnu kɔrɔbɔli gɛlɛnw kɔnɔ, u y’a fɔ ni farinya ye ko: “Wajibi don an ka Ala kanminɛ ka tɛmɛ mɔgɔ ta kan.”—Kɛwalew 5:29.

⁴ An tɛ mɔgɔw ye minnu bɛ segin kɔ: An ka kan k’an cɛsiri walisa ka hakili ɲuman mara an ka baara ko la (Heb. 10:39). An kana ɲinɛ abada ko Jehowa de b’an ci a ka kanuya n’a ka hinɛ kɔnɔ ka ɲɛsin hadamadenw bɛɛ ma. A t’a ɲini abada a ka magannaw fɛ u ka fɛn kɛ kuntilenna nafama tɛ min na. Fɛn o fɛn b’an fɛ k’a kɛ, o bɛna laban mɔgɔw ka hɛrɛ la, mɔgɔ minnu bɛ Ala kanu.—Rɔm. 8:28.

⁵ Hakilila ɲuman sɔrɔli b’an dɛmɛ ka taa’ fɛ ka mɔgɔw ɲini, mɔgɔ minnu bɛ iko sagamusow an ka danyɔrɔw la. An bɛ se ka mɔgɔw ka kunsalenya mafilɛ u ka jigitiɲɛ n’u ka jigitunun taamasyɛn ye. An ka to an ka kanuya k’an kɛ mɔgɔ faamuyalenw ni mɔgɔ sabalilenw ye sa! Tuma o tuma n’an bɛ sɛbɛn dɔ to walima n’an bɛ mago dɔɔnin dɔrɔn ye, an kuntilenna ka kan ka kɛ ka teliya ka segin-ka-bɔnyeli kɛ walisa k’o mago ɲaga. An man kan ka siga abada an seko la ka Bibulu kalan dɔ daminɛ walima k’a ɲɛminɛ. O nɔ na, an ka ɲini tuma bɛɛ Jehowa fɛ delila la, a k’an kɔkɔrɔmadondo ani k’an ɲɛminɛ. An ka d’a la k’a bɛna an dɛmɛ.

⁶ An jɛyalen b’a la ko Jehowa bɛna baara lase a dan na (A’ ye Filipekaw 1:6 lajɛ). Jehowa y’an dɛmɛbaga ye. An ka dannaya dafalen ale la, o b’an kologɛlɛya walisa ‘an kana sɛgɛn ko ɲuman kɛ la . . . k’a dabila’.—Gal. 6:9.