An bɛ nafa sɔrɔ ka kɛɲɛ n’an ka cɛsiriw ye

¹ Kanuya min bɛ Jehowa la ka ɲɛsin hadamadenw ma, a y’o jira cogo caman na. Ala ka kanuya tɛ se ka sanga ni fɛn fosi ye; Yesu y’o jira tuma min na a y’a fɔ don dɔ la jama lajɛlen ye, ko: ‘Ala b’a ka tile bɔ mɔgɔ juguw ni mɔgɔ ɲumanw bɛɛ ye. A bɛ sanji di mɔgɔ tilennenw ni mɔgɔ tilenbaliw bɛɛ ma.’ (Mat. 5:43-48.) Yesu y’a jira k’a Fa ka kanuya jirala cogo wɛrɛ la min ɲɔgɔn tɛ n’o ye a denkɛ kelenpe ka saraka ye, a ye min di k’an kisi. (Yuh. 3:16) Yesu ye dusu don a lamɛnbagaw kɔnɔ walasa u ka waleɲumandɔn jira Ala ka kanuya ko la. Yali an b’an jija k’o kɛ wa?

² N’an b’a fɛ k’an ka waleɲumandɔn jira ka dafa, ka tila ka nafa mɛnta sɔrɔ Jehowa ka kanuya la, fo an ka kalan kɛ ka Jehowa dɔn. (Yuh. 17:⁠3) An mago bɛ laadilikanw ni bilasirali la walasa k’a dɔn an bɛ se ka baara kɛ a ye cogo bɛnnen min na. Walasa k’a jira ko a b’i mago don an na, ani ko a b’an fɛ, Jehowa y’a ka kuma fiyɛlen di an ma, n’o ye Bibulu ye, ani a y’a ka jɛkulu ɲuman sigi, n’o bɛ laadilikanw ni dɔnniya di an ma. (Mat. 24:45-47; 2 Tim. 3:16, 17) Ikomi an y’a ka baarakɛlaw ye minnu y’u yɛrɛbakun di a ma, Jehowa b’an kalan a ka siraw la. Nka, yali an b’a jira an ka cɛsiriw fɛ ko waleɲumandɔn b’an na a ka kanuya ko la wa? Yali an b’a ka laadilikanw labato walasa an ko ka diya a ye, k’an nafa o la wa? (Esa. 48:17: Yak. 1:22) Ciden Pol y’a sɛbɛn 1 Kɔrɛntekaw 3:8 la ko: ‘Min bɛ danni kɛ, ani min b’a sɔn, olu ka kan. Nka, Ala na u bɛɛ kelen-kelen sara ka kɛɲɛ ni u ka baara kɛlenw ye.’

³ O la sa, Ala bɛ min wajibiya an ma, an ka kan k’an ɲɛmajɔ k’o kɛ. Alako ta fan fɛ, mɔgɔ bɛɛ tɛ taa ɲɛ cogo kelen na. Dɔw ka teli ni dɔw ye. Fɛn caman bɛ se ka nɔ bila an ka ɲɛtaa la. O la sa, a tɛna kɛ hakilitigiyako ye ka mɔgɔw suma ɲɔgɔn ma cogo la min bɛ na ni dusu tiɲɛ ye. Nka, an kelen-kelen bɛɛ bɛ cɛsiri minnu kɛ, o nafa ka bon kosɛbɛ. An bɛ se ka mun kɛ walasa an ka gɛrɛ kosɛbɛ jɛkuluba la? Yali an bɛ se k’an ka Krecɛn wajibilako dɔw fa ka ɲɛ ka tɛmɛ fɔlɔ kan wa? Yali an b’an jija a fɛ ka dɔ fara an ka kɛta kan jɛkulu ka baaraw la wa? Yali jɛkuluba ka kuma dɔw tɛ yen an ka kan ka minnu sirataama wa?—1 Tim 4:⁠16.

⁴ Mɔgɔ minnu ye kantigiw ye, an k’olu ladege: An balimakɛw n’an balimamuso kantigi dɔw bɛ ka Masaya kibaru duman weleweleda kabini san tan-tan caman. U ka kan ka ladege, i n’a fɔ Pol tun ka kan n’a ye cogo min na. (1 Kɔr. 11:⁠1). U sɔnna Ala ka kanuya ma, wa, u ye nafa caman sɔrɔ ka da u ka baara gɛlɛn ni u ka cɛsiriw kan, u ye minnu kɛ walasa ka tugu Bibulu ka laadilikanw na. Jɛkulu kɔnɔ, u ye baarakɛla cɛsirilenw kulu dɔ ye min t’a to fosi ka bɔ a ka baaraw kɔrɔ. An bɛ se k’u kelen-kelen bɛɛ ka baara nɔ ye.—Rom. 1:13, 2 Kɔr. 3:1-3.

⁵ An bɛ don min na iko bi, san o san, kalanden kuraw ba caman de bɛ ka na jɛkuluba la. (Esa. 60:8). Olu fana bɛ ka baara kɛ n’u sɛbɛ ye walasa ka kɛ mɔgɔ mɔlenw ye Ala sira la, wa, u bɛ cɛsiri min kɛ wajuli la, o ka kan ni tanuni ye. A bɛ u dusulamin k’a ye ko Jehowa bɛ duba mɔgɔw ye, mɔgɔ minnu b’u magan a ka baara la. An balimakɛw n’an balimamuso mɔlenw ka misaliw bɛ o mɔgɔ kuraw dɛmɛ u k’a faamu ko sisan tɛ waati ye mɔgɔ k’i sumaya Ala ka baara la. N’an ye weleweledala kuraw ye walima weleweledala ŋanaw ye, n’an bɛ ka t’a fɛ ka kɔgɔ Ala sira la, an bɛna an jija k’an ka wajibilakow dafa Krecɛnya sira la, ka nafa sɔrɔ ala-ka-marako fɛɛrɛ tigɛlenw na. Yali an b’o de kɛ wa?

⁶ An bɛ min kalan, an k’o sirataama: Waati jan sanni Yakuba ka sɛbɛn ko an ka kan ka kɛ mɔgɔw ye minnu “bɛ baara kɛ,” Musa y’a fɔ Yahutuw ye ko: “Aw ka ne ka kuma to aw dusukun” na. (Yak. 1:25; Dut. 11:18). O kosɔn, dɔnniya dɔrɔn tun tɛ bɔli kɛ. Yahutuw kɛtɔ ka Jehowa kan minɛ, u tun ka kan ka Tɔn kumaw kɛ u dusukun na. O sariyakoloba in ma yɛlɛma. Siga t’a la ko Yesu Krista, Ala denkɛ tun bɛ kanminɛni nafa dɔn. (Yuh. 8:28) A y’a fɔ ka jɛya Matiyu 7:24 na ko: “Mɔgɔ o mɔgɔ bɛ ne ka kuma ninnu lamɛn ka u kɛ, o tigi bɛ se ka kɛɲɛ ni mɔgɔ hakilitigi dɔ ye.”

⁷ An bɛ min kalan kafo ka jamalajɛw la, yali an b’o sirataama wa? Yali an b’a faamu mun na an ka waati in na, a wajibiyalen don an ka to an ɲɛna, k’an ka kow bɛrɛ bɛnnen to wa? Sendonbaga b’an kɛlɛ sira birilen minnu fɛ, ani a bɛ jan minnu da an ɲɛ, yali an b’an kɔlɔsi olu bɛɛ la wa? Nafa min b’a la ka saniya jogo ani alako ta fan fɛ, jɛkulu kɔnɔ, jɛkuluba bɛ laadilikanw ni lasɔminikan di an ma o ko la, ka segin o kan tuma bɛɛ, yali waleɲumandɔn b’an na o ko la ka ɲɛsin jɛkuluba ma wa? An bɛ min mɛn, an kelen-kelen bɛɛ b’o sirataama ka se hakɛ jumɛn ma?—Yak. 1:23-25.

⁸ Ala-ka-marako san nata la, don kɛrɛnkɛrɛnnen jamalajɛ kumakun sinsinnen bɛ kosɛbɛ Bibulu kan, n’o ye ko: “A’ ye kolo Ala ye. A’ ye jɔ Sitanɛ ɲɛ k’a kɛlɛ.” (Yak. 4:7) Nin ye laadilikan ɲuman ye dɛ an ka waati gɛlɛn in na! An bɛ Ala ka ciw mara minkɛ, o ye sababu ye Sitanɛ k’an kɛlɛ. Sendonbaga bɛ dabali juguw kɛ walasa k’an ka dannaya tiɲɛ. An sinsinnen bɛ se ka to olu ɲɛ cogo min na, jamalajɛ bɛna o jira an na. (Heb. 2:1) O la sa, an bɛna nafaw sɔrɔ ka kɛɲɛ n’an ka cɛsiriw ye.

⁹ An ka yɛrɛkalan nafa sɔrɔ: Yɛrɛkalan b’an dɛmɛ ka dannaya sinsinnen sɔrɔ, ka dɔ fara an ka waleɲumandɔn kan tiɲɛ ta fan fɛ. A bɛ dɔ fara an daŋaniya kan, k’an dɛmɛ an bɛ kuma cogo min na, o ka kɛ mɔgɔ kumacogo ye min dalen bɛ a yɛrɛ la. A bɛ faamuyali ni kow faranfasili di an ma, k’an dɛmɛ an ka mɔgɔya kura don an na. (Kol. 1:9-11) Nka, kalan nafaman bɛ waati tali ni cɛsiriw wajibiya. Kɛcogoya wɛrɛ tɛ yen walasa ka dɔnniya jɔnjɔn ni alamɔgɔyaba sɔrɔ. An bɛ cɛsiri minnu kɛ kalan na, an bɛ o nafa fana de sɔrɔ. —2 Kɔr. 9:6, 7; Gal. 6:7.

¹⁰ Yali an bɛ waati bɛnnen bila dɔgɔkun o dɔgɔkun walasa ka jɛkulu lajɛw labɛn wa? O ye cogo dɔ ye an b’an ka waleɲumandɔn jira alako ta fan fɛ dumuni ko la, Jehowa bɛ dumuni min di an ma jɔnkɛ dannamɔgɔ hakilima bolo fɛ. Ka lajɛw labɛn ka ɲɛ, o b’an dɛmɛ ka tugu Ala ka Kuma kalanni n’a sɛgɛsɛgɛli bolodalen na. Bibulu yɔrɔ minnu bolodala ka kalan Ala-ka-marako Kalan na, yali an y’a boloda ka waati ta dɔgɔkun o dɔgokun k’o yɔrɔw kalan wa? A dan ye dɔrɔn ka sanga damadɔw ta don o don walasa ka tɛmɛsiraw kalan, ka taasi u la. Cogo minnu b’an bolo walasa k’an ka kɛnɛkan cidenyabaara kɛ ka ɲɛ, Baara ka lajɛ b’an hakili jigin olu la. Yali an bɛ nin Baara ka lajɛ in labɛn wa? N’an b’a labɛn, yali an bɛ miiri a kumaw na walasa k’a dɔn an bɛ se ka baara kɛ n’u ye cogo min na cidenyabaara la wa? Yali an b’an jija k’o sirataama o yɔrɔnin bɛɛ la wa? An ka kan ka fɛɛrɛ jɔnjɔnw tigɛ walasa ka La Tour de Garde ni gafe kalan labɛn. Yali an b’o kɛ wa?

¹¹ An ka an ta kɛ lajɛw la: An bɛ nafa caman sɔrɔ ka bɔ lajɛw la, n’an bɛ kuma u la. N’an bɛ lajɛw labɛn, ka tila k’an jija ka kuma u la, o b’a to an hakili sigilen bɛ to kalan na, k’an dɛmɛ ka nafa sɔrɔ lamɛnbaga tɔw ka ɲɛfɔliw la. Siɲɛ fɔlɔ min na u kumana lajɛ la, walima siɲɛ fɔlɔ min na u y’u ka kalansen fɔlɔ kɛ Ala-ka-marako Kalan na, caman hakili b’a la a gɛlɛyara u ma cogo min na. K’a sɔrɔ caman bɔra an ka siranya la, yali an bɛ ka t’a fɛ cɛsiriw la walasa mɔgɔ bɛɛ k’a ye k’an taara ɲɛ wa? (1 Tim. 4:15) Mɔgɔ wɛrɛw bɛ nafa ni dusulamin sɔrɔ an ka kumaw na. N’an labɛnnen don koɲuman, ni fɛn minnu ka kan ka kalan lajɛ la, n’an y’olu fana sɛgɛsɛgɛ, an bɛna se ka kuma cogo nafama na, ka tɔw bila kanuya ni wale ɲumanw na.—Heb. 10:23-25.

¹² An ka kuma man kan ka janya, wa, a man kan ka fɔ cogo la fana min faamuyali ka gɛlɛn. Tuma caman na, a ka fisa ka kuma surunw fɔ minnu bɛ ɲininkaliw jaabi jɔnjɔnw di, walima minnu bɛ tɛmɛsira dɔ waleyacogo faamuyali nɔgɔya an bolo. N’an labɛnnen don koɲuman, an bɛna se ka kuma an yɛrɛ ka kumacogo la. O la sa, mɔgɔ tɔw ni an yɛrɛw fana bɛna nafabaw sɔrɔ o la. Mun na? Katuguni ka kuma an yɛrɛ ka kumacogo la, o b’an wajibiya ka miiri an ka kuma fɔta la, ka miiriyaw ɲɛfɔ iko an y’a faamu cogo min na. Tuma dɔw la, o bɛ tɔw dɛmɛ ka fɛn kalantaw faamu. O b’an fana dɛmɛ k’an hakili to o la kɔfɛ.

¹³ An ka danni kɛ kosɛbɛ wajuli la: Cidenyabaara min b’an Krecɛnw bolo, o ye nafoloba de ye. (2 Kɔr. 4:7) Yali an b’a mafilɛ o cogo de la wa? Cidenyabaara bɛ bonya di an ma k’an ka dannaya jira an kumaw fɛ. Yesu y’a fɔ ko mɔgɔ dusukun falen bɛ fɛn min na, k’a da b’o de fɔ. (Luka 6:45) An bɛ cɛsiri minnu kɛ walasa ka an ta kɛ kosɛbɛ wajuli la, o bɛ nafa caman lase an ma. Dɔ bɛ fara an ka tiɲɛ faamuyali kan, wa, an bɛ se ka baara kɛ ka ɲɛ kosɛbɛ ni Bibulu ye. Nisɔndiya b’an na ka tiɲɛ kuma fɔ mɔgɔ wɛrɛw ye, k’u dɛmɛ u k’u Dabaga dɔn. Dalilu min bɛ Ala bolo ka mara kɛ, k’a ka Masabaya sigi, an ye o seereyabagaw ye. An nisɔndiyalen don k’a dɔn ko an ko ka di Jehowa ye, bawo an dara a ja la, wa, k’an b’a sago fana kɛ.—Mat. 5:48.

¹⁴ An bɛ cɛsiri minnu kɛ, n’an b’an yɛrɛ sɛgɛsɛgɛ tuma bɛɛ o ko la, an bɛ bato min kɛ Jehowa ye, o tɛna kɛ abada baara ye ten dɔrɔn. O kɔrɔ ye mun ye? O kɔrɔ ye k’an tɛna Ala ka baara kɛ ni kunsalenya ye, ka baara kɛ mɔgɔ ɲɛkɔrɔ ko dɔrɔn kosɔn, walima ka fitinin dɔrɔn kɛ k’a sɔrɔ an ma an yɛrɛ di o baara ma ni kɔnɔnajɛya ye. An ka kan ka baara kɛ Jehowa ye n’an dusukun bɛɛ ye. Bibulu kɔnɔ, wajibi don k’i yɛrɛ bɛɛ di a ka baara ma. (Kol. 3:23, 24) Tiɲɛ don ko an bɛɛ kelen-kelen ka kow tɛ kelen ye, wa, Jehowa fana t’a wajibiya an ka fɛn kɛ min bɛ tɛmɛ an seko kan. O bɛɛ n’a ta, an bɛ se ka min kɛ, Jehowa sigilen bɛ n’a ye an k’o kɛ. (Mat. 22:37) Ikomi an ka dafabaliya t’an bila k’an magan, tuma ni tuma, a ka ɲi an ka ɲini k’a dɔn an ka kan ka yɔrɔ minnu ɲɛ an ka baara la Ala ye. Yali an bɛ to k’o kɛ wa?

¹⁵ An ka kan ka to an ɲɛna walasa an ka hajuw, n’an negekow kana an bali an ka an yɛrɛ di cogo bɛɛ la fisaman na Jehowa ka baara la. An ka kan k’an diyanyekow, an ka lafiyawaatikow, ani an ka ɲɛnajɛkow to u yɔrɔ la. An ka kan k’an jija fana walasa an ka dahirimɛ ɲini baaraw kana an ka waati bɛɛ ta. N’an bɛ tugu Yesu ka laadilikan na min bɛ Matiyu 6:22, 23 la, siga t’a la k’an bɛna se ka dɔ fara an ka cɛsiriw kan ka ɲɛsin alako ta fan fɛ kow ma, ka nafa caman sɔrɔ o la.

¹⁶ K’a sɔrɔ an ma baara gɛlɛn kɛli dabila walasa ka mɔgɔya kura don an na, an bɛna sɔn an jɔyɔrɔw ma, ka tugu laadilikanw ni hakililataw la an bɛ minnu sɔrɔ lajɛw ni jamalajɛw la ani sɛbɛnw kɔnɔ. Ka kɛɲɛ n’an sekow ye, an kelen-kelen bɛɛ ka kalan kɛ ni timinandiyaba ye, ka kuma cogo ɲɛnama na lajɛw la, ani k’an ta kɛ baara la ka mɔgɔw kɛ kalandenw ye. N’an b’a jira o cogo la ko waleɲumandɔn b’an na Ala ka kanuya ko la, a jɛlɛn don ko an bɛna nafa caman sɔrɔ alako ta fan fɛ la, kabini sisan. Jigi sinsinnen fana bɛna to an na ka ɲɛnamaya banbali kɛ diɲɛ kura kɔnɔ min layidu tara Ala fɛ.