An ka kanw bɛɛ ani diinɛw bɛɛ mɔgɔw waaju
1 Ni timinandiya ye, an san kɛmɛ fɔlɔ la, Krecɛnw ye seereya kɛ mɔgɔw ye, mɔgɔ minnu tun bɛ kuma kan wɛrɛw la minnu n’u taw tun tɛ kelen ye ani minnu ka diinɛ n’u taw tun tɛ kelen ye fana. Mun bɔra o la? “A ka c’a la, san 100nan na, Krecɛn jɛkulu dɔ tun bɛ marabolo kelen-kelen na Mediterane dafɛla la.”—Histoire du Moyen Âge (angl.).
2 Mali la, mɔgɔw fanba bɛ kuma bamanankan na an’u bɛ silamɛ diinɛ de la. N’an delilen bɛ ka waajuli kɛ tubabukan dɔrɔn na, laala misiɔnɛri danyɔrɔ dɔ bɛ sɔrɔ an yɛrɛ ka jamana na. An bɛ se ka tugu Yesu ka cikan la ‘ka waajuli kɛ k’a dafa jama ye’ ani kanw bɛɛ ani diinɛw bɛɛ mɔgɔw ye cogo di?—Kɛwalew 10:42, NW.
Mɔgɔ minnu bɛ kan wɛrɛ fɔ min tɛ tubabukan ye seereya ka kɛ u ye
3 Jamana caman na, weleweledalaw hakɛ cayali fanba bɔra mɔgɔw la minnu tun bɛ u barakan fɔ o jamana ninnu na. An ka dugu la, ka bɔ tubabukan bɛ fɔ jɛkulu minnu na, jɛkulu wɛrɛ bɛ yen bamankan bɛ fɔ yɔrɔ min na. O bɛɛ n’a ta, yali caman bɛ se ka kɛ tuguni walisa kulu wɛrɛw ka sigi mɔgɔw barakanw bɛ fɔ yɔrɔ minnu na wa?
4 Kan bɛ balilan min sigi, an k’o kunnasagon: Siga t’a la, mɔgɔ caman bɛ faamuya sɔrɔ teliya la ani ka ɲɛ kosɛbɛ ni kalan bɛ kɛ u kun u fakan na. “Kibaru duman kosɔn” ani walisa ka “niyɔrɔ sɔrɔ nafa la tɔw fɛ”, balimakɛw ni balimamusow caman b’u cɛsiri ka kuma kanw na minnu bɛ fɔ jamana kɔnɔmɔgɔw fɛ (1 Kɔr. 9:23). Balimamuso dɔ ye baara kɛ ni kuma daminɛcogo Avenir/Securité ye min bɛ sɔrɔ Comment raisonner gafe tubabukannama kɔnɔ. Nka, a ma se k’a kumaɲɔgɔn bila a ka mago don baro la. A toɲɔgɔnmuso y’a fɔ a kɔnɔ ko tubabukan baro ma u kumaɲɔgɔn dusu minɛ. O la sa, a y’o baro kelen bɔ bamanankan na. U kumaɲɔgɔn y’a da don baro la ni nisɔndiya ye. O ye balimamuso fila bɛɛ ɲaga.—A’ ye Kɛwalew 22:2 lajɛ.
5 Ka kalanni ni sɛbɛnni dege i fakan na, o bɛ mɔgɔ hakili bonya ani o b’a to fana o tigi bɛ ɲɛci kɛrɛnkɛrɛnnen sɔrɔ bamanankan jɛkulu n’a foro la. N’i bɛ i barakan dɔ mɛn, bamanankan misali la, fɛɛrɛ minnu bɛ tigɛ i ka jɛkulu kɔnɔ ka ɲɛsin o kan ma, i k’olu kɔkɔrɔmadondo.—Mat. 9:37, 38.
6 Gafe bamanankannama ye bamanankan fɔlaw dɛmɛ ka Bibulu kalansiraw faamu koɲuman ani k’a kalan. Tutigɛbaga dɔ y’a kɔlɔsi ko Wajibiya gafenin kumaw ɲɛfɔcogo jɛlen don kosɛbɛ wa dɔnniyaba bɛ sɔrɔ a ɲɛ damadɔw dɔrɔn kɔnɔ. A y’a kɔlɔsi k’a ka kalanden dɔ y’a ka jow bɛɛ fili k’a sababu kɛ a ye min kalan dakun kelenpe kɔnɔ. Kalanden wɛrɛ, o tun ye muso dɔ de ye min tun bɛ siran su o su a kana a cɛ salen ye a kɛtɔ ka tɛmɛ dukɛnɛ na dugutila fɛ. Dakun kelenpe dɔrɔn ani Bibulu tɛmɛsira minnu tun b’a kɔnɔ, o y’a dɛmɛ k’a ka siranya kɛlɛ.
7 Denbayaba dɔ mɔgɔw tun bɛ nisɔndiya sɔrɔ ka Wajibiya kalan lamɛn tutigɛbaga dɔ fɛ, a na o na. Tuma min na a ye gafenin kasɛti kofɔ u ye, u y’a jira ni kɔrɔtɔba ye k’u b’a fɛ k’a kelen sɔrɔ. U ko: “O cogo la, an bɛ se ka kalan lamɛn tuma bɛɛ hali n’i tɛ yen!”
8 N’i bɛ bamanankan fɔ nɔgɔya la, i jija ka Bibulu kalanw daminɛ ni Wajibiya gafenin n’a kasɛti ye. A tun ka gɛlɛn balimamuso dɔ ma ka Bibulu kalanw ɲɛminɛ ni sɛbɛnw tubabukannama ye. A ni balimakɛw ni balimamuso wɛrɛw tun bɛ taa ɲɔgɔn fɛ walisa u k’a dɛmɛ k’olu kɛ. A nisɔndiyalen don sisan ka Wajibiya gafenin sɔrɔ bamanankan na. O kɛra sababu ye a ka se ka Bibulu kalanw ɲɛminɛ cogo nafaman na katuguni gafenin dɔ min tun b’a yɛrɛ ka kan na.
9 Minɛn minnu b’an bolo, an ka baara kɛ n’u ye: Sɛbɛnw b’an bolo bamanankan, sererekan ani wɔlɔfɔkan na. A ka ɲi ka sɛbɛnw sɔrɔ o kanw na an kun ani Bibulu bamanankannama. Hali n’an bɛ mɔgɔw sɔrɔ minnu b’a fɔ ko ka kalanjɛ kɛ o kan na o ka gɛlɛn, an kana ɲinɛ ko Wajibiya gafenin kasɛti b’an bolo..
Mɔgɔ minnu tɛ Krecɛn diinɛ na, an ka seereya kɛ u ye
10 Mɔgɔw lamɔna cogo min na diinɛ kɔnɔ, k’o dɔn, o b’an dɛmɛ ka seereya nafaman kɛ u ye Ala ka Masaya ko la. Diɲɛ kɔnɔ diinɛ minnu barika ka bon kosɛbɛ, u ko la, L’humanité à la recherche de Dieu gafe b’an dɛmɛ k’olu bakuruba dɔn a kɛtɔ ka faamuya wasalen di an ma mɔgɔw ka diinɛkalansiraw kan walisa k’u dɛmɛ ka tiɲɛ dɔn. An kana ɲinɛ minɛn nafaman kɔ n’o ye Comment raisonner gafe ye. O kitabu in ɲɛ 24nan na, hakilila waleyata dilenw bɛ mɔgɔw jaabi cogo kan, mɔgɔ minnu bɛ diinɛ na min bɛ jɔyɔrɔ fɔlɔ la jamana kɔnɔ. Chemin du paradis sɛbɛndennin ani Soumission gafenin bɛnnen bɛ kɛrɛnkɛrɛnnenya la o la.
11 An k’an ka kuma fɔtaw kɔlɔsi: A man kan an ka diinɛ dɔ mɔgɔw bɛɛ bila kulu kelen na, an kɛtɔ ka jate k’u kelen-kelen bɛɛ dalen bɛ min na, o n’o diinɛkɔnɔmɔgɔ tɔw taw ye kelen ye diyagoya la. O nɔ na, an ni mɔgɔ min bɛ baro la, an k’an cɛsiri k’a miiricogo faamu (Kɛw. 10:24-35). Kabini a denmisɛnman, o tun ye Salimoon kalan ko Kuranɛ ye Ala ka Kuma ye. Nka, a tun ma se abada ka sɔn kalansira ma min bɛ Ala jira iko min ye hinɛnci ye k’a sɔrɔ a bɛ hadamadenw tɔɔrɔ jahanama tasuma kɔnɔ. Don dɔ, Jehowa Seerew y’a wele ka na lajɛ dɔ la. A ye tiɲɛ faranfasi. Sisan, a nisɔndiyalen don ka maakɔrɔ jɔyɔrɔ baara kɛ Krecɛn jɛkulu kɔnɔ.
12 Tuma min na an bɛ mɔgɔw waaju minnu ka diinɛkalansira tɛ Krecɛnw taw ye, an ka kan k’an ɲɛmajɔ walisa an ka kuma daminɛcogo kana an bali ka baro kɛ n’u ye kibaru duman ko la (Kɛw. 24:16). Diinɛ dɔw kɔnɔmɔgɔw tɛ sɔn fɛnw ma minnu bɛ se k’u kunbɔ u ka diinɛ kan. O la sa, an k’an cɛsiri ka kumakun dɔw sɔrɔ an bɛna bɛn minnu kan walisa k’u sama ka na tiɲɛw na, o minnu bɛ Bibulu kɔnɔ. Mɔgɔ minnu bɛ iko sagamusow, u bɛna sɔn kuma daminɛcogo dɔ ma ɲumanya bɛ min na ani min bɛ tiɲɛ jira cogo jɛlen na.
13 Nafa b’a la fana ka kuma fɔtaw sugandi walisa an kana mɔgɔ yɔrɔ janya an ka cikan na cogo bɛnbali la. Misali la, n’an bɛ sin ka fɔ k’an ye Krecɛnw ye, a dɔ rɔ, an kumaɲɔgɔn b’an jɛ yɔrɔnin kelen ni Krecɛnte egilisi mɔgɔw ye, o bɛna se ka kɛ balilan dɔ ye. Min ka ɲi fana, o ye ka kuma Bibulu ko la i n’a fɔ “Sɛbɛnniw” walima “sɛbɛn senumanw”.—Mat. 21:42; 2 Tim. 3:15.
14 A’ ye silamɛw waaju: (A’ ye L’humanité à la recherche de Dieu gafe masalakun 12nan lajɛ.) Silamɛw bɛ sɔn silamɛya ma (walima mahomɛt ta ma), n’o ye ka da Ala la, sɔn kɛra ale kelenpe min ka alaya ma ani Mohamɛt ma (570-632 an tile ɲɛ), iko kira laban ani u bɛɛ la fɔlɔ. U ma sɔn minkɛ ko den bɛ Ala fɛ, silamɛw bɛ Yesu Krista mafilɛ dɔrɔn iko Ala ka kira min ye filanan ye. Kuranɛ min tɛ san 1400 bɔ, a bɛ Sɛbɛnniw heburukannama ni gɛrɛkikannama kofɔ. Silamɛya ni katolikiya yɔrɔ caman bɔlen bɛ ɲɔgɔn fɛ. A diinɛ fila bɛɛ bɛ kalan kɛ hadamaden ka ni sabaliya kan, waatinin tɔɔrɔw ani jahanama tasuma kan.
15 An dalen bɛ Ala lakika kelenpe la. An bɛ Bibulu mafilɛ iko kitabu fiyɛlen Ala fɛ. O ye fɛn jɛlenw ye aw bɛnnen don minnu kan. Kuranɛ kalan ɲɛmajɔlen b’a jira ko Tahurɛta, Zaburu ani Linjila jiralen bɛ ka kɛ Ala ka Kuma ye, o minnu ka kan ka jateminɛ o cogo la ani k’u sirataama. O bɛ se k’an bila ka Bibulu yɔrɔ ninnu kalan kofɔ an kumaɲɔgɔn ye.
16 Laala, kuma daminɛcogo nata bɛna se ka nafa sɔrɔ ni mɔgɔ ye min ye silamɛ ye: “Ne bɛ baro kɛ tuma caman na ni silamɛw ye, wa n’ ye kunnafoni dɔw sɔrɔ nin gafe in kɔnɔ minnu b’i ka diinɛkalansiraw kan. [An ka Comment raisonner gafe dayɛlɛ a ɲɛ 24nan na.] A fɔlen bɛ k’i dalen b’a la ko Yesu tun ye kira ye, nka ko Mohamɛt tun ye kira laban ani u bɛɛ la fɔlɔ ye. Yali i dalen b’a la fana ko Musa tun ye kira lakika ye wa? [An ka to a ka jaabi di.] Yali n’ bɛ se k’a jira i la Ala ye Musa dege min na a yɛrɛ tɔgɔ ko la wa?” O kɔ, an ka Ekisɔde 6:2, 3nan kalan. Segin-ka-bɔnye la, an na se ka kuma “Ala kelenpe, diinɛ kelenpe” kan, o min bɛ Le temps de la vraie soumission à Dieu ɲɛ 13nan na.
17 Bi bi in na, mɔgɔ caman kɛcogo bɛ bɛn Esayi 55:6nan ma. An b’a kalan o yɔrɔ la ko: “Aw ka Jehowa ɲini a ye tuma la, aw ka a tɔgɔ wele ka a to aw kɔrɔ.” O bɛ sirataama mɔgɔ kɔnɔjɛlenw bɛɛ la, u ka kan walima u ka diinɛ kɛra fɛn o fɛn ye. An bɛ se ka d’a la ko Jehowa bɛna an ka cɛsiriw duba walisa an ka taa ani ka “mɔgɔsiya bɛɛ kɛ kalandenw ye”.—Mat. 28:19, Layidu kura.