Pɔ́ɔ̀ Ðíí-Màà Dyú Se Ma Fã̀à Peɖe

À cɛ̃́ gàa-dyù gmɔ̀ ɓɛ́ ɔ póìn ma ɔ ɖeɛ̀ ɖíí-gàà fɛ̀ɛ̀ kɛɛ jè. Gàa-dyù gmɔ̀ɔ̀ tùɔ̀ mɔ̀ ma àpɔ́sò Pɔ́ɔ̀. À se gàa-dyù gmɔ̀ɔ̀ nyɛ́nɛ́ dyuò, kɛɛ ɖɛ à dyuò dyíɛɛ mɔ̀, ɔ nyu ma ɖɛ ɖò ké ɔ se ma fã̀à peɖe. Nì mɔ́ ɓɛ́ m̀ ké ɖɛ ɔ nyu ma kà kɛɛ jè wɔ̃́ɔ̀?—

Pɔ́ɔ̀ nì ma kpɔɖɔ ɖeín ɖé Jùɖúsɛ̀ɖɛ̀ìn. Wa kpɔ̃ɔ ma sepóɛɖé ɔ nì ma Jízɛ̀ jè zìo poɛń. Ðɛ-gbà-nyu-gàà ɓě ɖò nyɛ́ ma Pɔ́ɔ̀ mú, ɔ jèɛɛ wa poìn ma ɖɛ gbà xwaún. Ké wa ɖá,‘Ɓěà diè sójà-ɓǎɔ̀ dyi ɓɛ́ ɔ ké ɔ sójà ɓěɔ̀ nyu ɓɛ́ wa ké Pɔ́ɔ̀ gɔ̌mànà dyúa dyà. À mu à mìɔùn vǐèìn ɖé hwìèɔ̀ kɔ̃, ké Pɔ́ɔ̀ dyi zìɛń nììn, nìí, à muɛ kpɔ̃ùn ɓɛ́ à ké ɔ ɖáɓá!’

Pɔ́ɔ̀ ɖíí-màà dyúɔ̀ wɔ̃́ ma ɖɛ gbà wa poìn ma kà xwaún wɛ̃ɛ jè. Ðɛ́ ɔ ɓɛ́ìn ma nyuɛ kɛ́? Ɔ mu ma ɖé dɛ̀ ɓɛ́ Pɔ́ɔ̀ nì ma kà kpɔɖɔɔ̀ ɖeín nyɛ ké ɔ cɛ̃ɛ ma jè Pɔ́ɔ̀ gbo. Wàɖà cá kɛɛ, Pɔ́ɔ̀ cɛ̃ɛ ma ɔ gbo ɓɛ́ ɔ ké ma ɖɛ gbà nìà kɛɛ jè sójà-ɓǎɔ̀ gbo cɛ̃. Nì hwòɖǒ ɖá ɔ se ma mú kàmà ɓɛ́ Pɔ́ɔ̀ ɖíí-màà dyúɔ̀ ké ma ɖɛ nìà kɛɛ sójà-ɓǎɔ̀ gbo cɛ̃ɛ̀?— Gbào, sepóɛɖé sójà-ɓǎɔ̀ kɛɛ mɔ̀ ma nyɔ kpa ɖɛ ɖò. Kɛɛ Pɔ́ɔ̀ ɖíí-màà dyúɔ̀ se ma fã̀à peɖe, ké ɔ cɛ̃ɛ ma sójà-ɓǎɔ̀ gbo.

Sójà-ɓǎɔ̀ dyuò ɖɛ ɔ ké ma nyu nyɛ̀nɛ̀ɛ̀ kɛɛ dyí. Ɔ ɖú ma sójà ɓɛ́ìn ma sójà 500 jǔɛ̀ kɛɛ dyí ɓɛ́ wa ké ma Pɔ́ɔ̀ dyí gmɔ̀! Ɔ cɛ̃ɛ ma wa gbo ɓɛ́ wa ké ma Pɔ́ɔ̀ ɖé Sɛ̀sɛ̀wíɖíà-hwɔ̀ɖɔ̀ɔ̀ mú kpa ɓó wéa máaún-kà. Pɔ́ɔ̀ pó ma nyɔ ɓěɔ̀ xwaún?— Ǹdye, ɖɛ-gbà-nyu-gàà ɓěɔ̀ se ma ɔ gbo vɔ̃ɔ ɓɛ́ìn! Wa ɖɛ gbà wa poìn ma kà xwaún wɛ̃ɛ se ma kpá.

Ðɛ́ m̀ ɓɛ́ìn cɛ̃́ɛ sɔ̀ìn ɖé ɖɛ ɓě à ɖǎà kɔ̃in zaìn nyɛɛ mú kɛ́?— M̀ ɓɛ́ìn nyɔ ɓɛ́ ɔ se fã̀à peɖeɛ jǔɛ̀ ɖekè kà Pɔ́ɔ̀ ɖíí-màà dyúɔ̀ nì ma kà kɛ. À dyi nyɔ tɔ̀ɔ̀ ɓě gbo wùɖùɛ̀ nì ɓá Jɛ̀hóvà jè dyí ní, nìí, à se ɓéɖé ɓɛ́ à ké fã̀à peɖe. M̀ se fã̀à peɖeɛ mu, ké nì mu Jɛ̀hóvà jè cɛ̃ìn kánáá pūù?— M̀ dyiɛ náa nyu ní, nìí, m̀ ɓɛ́ìn nyɔ ɖò póɛ̀n.