Kà Nyɔ Ké Gbo-Kpá-Sɔ̃̀ Tò Ɓó Gà-Ðɛ̀ Ðò Tiín Nyɛ

Gà-ɖɛ̀ ɓè nì kpáuń mìɔ ɖé dà pàɖà ɓè zɛ̃̀ɛ̀. Gà-ɖɛ̀ ɖò dyi kpáín, gbo-kpá-sɔ̃̀ ɓè tò-tò kɔ̃̀ ɔ ké páún nì nɔ̀mɔ̀ dyíin. Ɔ ná nì jèɛɛ, Nyɔ-Dyúa-Nì-Nyɔ̀ Ɓèɔ̀ ɖàa páún po ɓɛ́ Gà-Ðɛ̀ Jè-Gbo-Dyé-Kpòò ké dyi dè ɖé bɛ́fèò ɖɔ́ɔ́ séín zɔ̃̀.

Ðíí-gàà ɓè nìà kpoo nìà wɛ múɛɛ dyi gà-ɖɛ̀ ɖò kpá-bɔ̃̀ wɔ̃́ ní, wa ɖá ɛ́ɖɔ̀ ɓè nì ɖé gbɛ̀ɔ̀ múɛ wàɖà, ɓɛ́ wa ké gbo-kpá-sɔ̃̀ ɓɛ́ ɖíí ɓèɔ̀ mu mɔ́ùn wɛ̃ɛ jè dyuò. Ɔ jù ké ɖɛ-mú-gbɔɔ̀-gbɔɔ̀ɔ̀ dyi wɔ̃ kɔ̃ zi ɓó ɖíí ɓèɔ̀ bìì ní, bɛ́fèò mu ɖíí-gàà ɓè ɓɛ́ wa ɓɛ́ìn kpéɛ gãùn ɓɛ́ wa ké nyɔ-ɖɛ-nyí-kũ̀àɔ̀ dyúa nì. Ðíí-gàà ɓèa ɓɛ́ìn gbo-kpá-nyɔ̀ ɓè kè nyíí-ɖɛ̀ jɛ́ɛ́ ɓè tò jè ɖáa, mɔɔ wa ɓɛ́ìn ɖɛ ɓè nyɔ ɓè mu mɔ́ùn wɛ̃ɛ dɔ̃ɔ ɖé gbɛ̀ɔ̀ mú ɓɛ́ wa ké wa geìn.

Kpáná pàɖà nì ɖɛ ɓè kpɔ̃-kà ɖé hwìè nìà kɛ múɛɛ mú. Ɔ póìn nyɔ kũ̀à kɔ̃in-kpa-kpa kè ɖɛín-poìn-poìn ɔ kè wíɖí kè ɖɛín-gbɔɔ̀-gbɔɔ̀ ɓɛ́ ɔ kpá ɔ jù ké ɖíí-gàà ɓè dyi ɖɛ ɓè nyu ɓó wa mìɔùn sɔ̃ kɔ̃ níɛɛ xwaún.

Ðíí-gàà ɓè ɓɛ́ bɛ́fèò gãà kɛɛ ɓɛ́ìn wíɖí kè gbo-kpá-nyɔ̀ jĩ̀-kà kɔ̃̀ ɔ ké nì ɓó nyɔ-ɖɛ-nyí-kũ̀àɔ̀ jè kɛɛ jè gbɔ poɛ. Ké ɖéɛɛ, wa ɓɛ́ìn gɔ̃̀mànà-nyɔ̀ ɓè ɓɛ́ wa nyu ké à kũ̀àɔ̀ fṹà kɛɛ gbo wùɖùɛ̀. Ɔ jèɛɛ, nyɔ ɓè mɛ ɓɔ́ dyí sɔ̀ɔ̀ ɓɛ́ wa ké wíɖí kpɔ̃, mɔɔ wa ké nyíí-ɖɛ̀ tò, mɔɔ ɓɛ́ wa ké ɖé dɛ̀ gà-ɖɛ̀ɔ̀ kpáà kɛɛ mu ɔ sèìn wa diè dyɛ̀ wa dyi hwɛ̀.

Kɛɛ, gà-ɖɛ̀ ɖò dyi kpáín, à mɔ́ gbo-kpá-sɔ̃̀ tòɛ̀ dyi. (Híì 13:16) Ké à ɖɛ̀ɓɛ̀ à ɖíí ɓèɔ̀ mú! Ðɛ́ à ɓɛ́ìn nyuɛ kɛ́? Ðɛ mɔ̀ ɖɛ kpa ɖɛ jɛ́ɛ́ ɖò ɓɛ́ à ɓɛ́ìn nyuɛ kɛɛ mɔ̀ ɓɛ́ à ké nyɔ ɓè ɓɛ́ gà-ɖɛ̀ɔ̀ kpáa gboɛ kè nyɔ ɓè nìà gbo-kpá-sɔ̃̀ tòɛ̀n nyɛɛ jè ɓaà. À ɓɛ́ìn wíɖí ɖé nyíí-ɖɛ̀ gbɔ̀ɖɔ̀ɔ̀ mú poɛ ɖekè ɓó kã́á-ɓòɖò-kũ̀àɔ̀ jè. Dyììn ɖé Nyɔ-Dyúa-Nì-Nyɔ̀ Ɓèɔ̀ hwìè-da-zàìn-zàìn múɛɛ, bɛ́fèò ɖɔ́ɔ́ ɓè mɔ̀ nyɔ ɓɛ́ìn ɖɛ wa ké wíɖí ɓèa kɔ̃ún peɖe dyí-sɛ́ɖɛ́ìn-kà kɛɛ jè gbɔ poɛ nɔ̀mɔ̀ dyíin. Ké ɔ jù ké à dyi mɔ́ ɓɛ́ à ké kũ̀àɔ̀ ɖò nyu ní, à ɓɛ́ìn tɛ̀mɛ̀ìn dyììn ɖé Poo-Ðɛ̀-Po-Kpòòɔ̀ Gbo-Kpá-Sɔ̃̀-Nyí-Nyí Ðífèɖèɔ̀ (DC-50) mú-dyíìn-dyíìn mú.

DYÉ VÍÐÒ MƆ̀À, DYÍÍ-NÌ VƐ̀NƐ̀ ÐÒ ÐÉ BÀÐÀZÉÈ-ƁÒÐÒƆ̀ KƆ̃ KƐƐ DYI, NÌÍ, ƁƐ́ ƁÈ KÉ DYI-DIÈ-ÐƐ̀ KƆÀ ƁÓ DYÍƐƐ GƆ̃̀ JÙ:

Ðɛ́ tó nì hwòɖò-dyùàɔ̀ dyi ɓá nyíí-ɖɛ̀-tò-kũ̀à ɓɛ́ Jɛhova Zàse ɓè nyu ma ti dyíí-nìɔ̀ kpá ma ɖé Bàɖàzéè-ɓòɖòɔ̀ kɔ̃ ɓó 2020 kɛɛ jè dyíɛ́?