M̀ Ɓɛ́ìn Gbo-Kpá-Sɔ̃̀ Tòɛ̀ Ɓó Xwéɖé-Dùɔ̀ Múàùn Kpá Jè

Jɛhova mɔ́ ɓɛ́ xwéɖé-dù ɓè ké múàùn kpá. (Wɛ́ 127:3-5; Ìkí 9:9; 11:9) Kɛɛ, à múàɔ̀ ɓɛ́ìn xwáɖáún sèɛ̀ sɔ̀ìn ɖé ɓóɖó-kpàà fũ̀à-fṹá-ɖɛ̀ ɓè kè xwéɖé-dùɔ̀ nyɔ ɓè ɖɛ-xwa-bĩ-bĩ mú. Ðɛ́ nyɔ ɓè nì ɖé xwéɖé-dùɔ̀ múɛɛ ɖò-ɖò séín ɓɛ́ìn nyuɛ ɓɛ́ xwéɖé-dùɔ̀ ké múàùn nì kɛ́?

Nyɔ́nɔ́-ɓà dyé ɔ gmàà kpéín. (1Pí 3:7) Ɔ kè ɔ gmàà hwèɖè da. Ɔ ní mɔ́ ɖɛ ɔ se ɔ gmàà xwaún dyéɛ ɓɛ́ìn nyɛ, ké ɔ tɛ̀mɛ̀ìn zuò-po-hwòɖò ɓó ɖɛ ɔ gmàà nyu ɓó ɔ kè xwéɖé-dùɔ̀ bììɛɛ jè. (Kɔ̀ɖ 3:15) Ɔ cɛ̃ ɔ gmàà mú ɖɛ̀ɓɛ̀ jè, ké ɔ ɓàìn ɔ.—Nɔ́ɔ́ 31:28, 31.

Màa mɔ́ hwìè ɓè dyi ɓɛ́ ɔ ké ɔ dyú-ɓà sɔ̃ xwíɖíi dè. (Nɔ́ɔ́ 31:12) Ɔ nì ɔ dyú-ɓà xwíɖíi, ké ɔ kpɔ̃ìn ɓó ɔ gbo. (Kɔ̀ɖ 3:18) Ɔ wùɖù ɔ dyú-ɓà gbo kpéín-dyé-kà, ké ɔ cɛ̃ ɖɛín-ɖɛ̀ ɓá ɔ jè dyí.—Nɔ́ɔ́ 31:26.

Wóɖóìn-nyɔ̀ ɓè kè waà dyú ɓè hwèɖè da. (Dì 6:6, 7) Wa cɛ̃ɛ wa dyú ɓè gbo kà wa ɖɛ̀ɓɛ̀ wa múɛ. (Máf 3:17) Wa dyi wa kpeɖe zàùn nììn, wa tɛ̀mɛ̀ìn ɖɛ̀ɓɛ̀ìn-ɖɛ̀ɓɛ̀ìn kè ɖɛ-múin-wɔ̃́-wɔ̃́.—Ìfí 6:4.

Dyú ɓè dè waà wóɖóìn-nyɔ̀ ɓè dya, ké wa dyé wa kpéín. (Nɔ́ɔ́ 23:22) Wa cɛ̃ waà hwìɖìi-poìn-ɖɛ̀ ɓè kè waà hwòɖò-kpɔ̃-ɖɛ̀ ɓè jè waà wóɖóìn-nyɔ̀ ɓè gbo. Wa wɔ̃́ìn kpeɖe-zà-zà sɔ̀ìn ɖé wa wóɖóìn-nyɔ̀ ɓèɔ̀ gboɛɛ gbo, ké wa tɛ̀mɛ̀ìn kpéín-dyé-dyé.—Nɔ́ɔ́ 19:20.

DYÉ DYÍ-TƐ̀MƐ̀ÌN-ÐƐ̀ VÍÐÒ MƆ̀À, DYÀ MÚÀ ÐÉ NÌ XWÉÐÉ-DÙƆ̀ MÚ KƐƐ DYI, NÌÍ, ƁƐ́ ƁÈ KÉ DYI-DIÈ-ÐƐ̀ KƆÀ ƁÓ DYÍƐƐ GƆ̃̀ JÙ:

Ðɛ́ nyɔ ɖò-ɖò séín nyu ɓɛ́ xwéɖé-dùɔ̀ ké múàùn ɓéɖé kɛ́?