Bɔ̃̌ Nɔ̀mɔ̀ Dyíinɔ̀ Sɔ̀ìn Ðé Gèɖèpɔ́ɔ̀ Gbo Jǎà?

1. Nyɛ́ kɔ̃̀ wuɖu nìà ɖé Báɓòɔ̀ múɛ́?

Bɔ̃̌ nɔ̀mɔ̀ dyíin kà nyɔǔn mu ɓóɖó-kpàà kɔ̃ cĩ́ìn ɓó sè-ná-sèɛ̀ tiín nyɛɛ céè ɖé Báɓòɔ̀ mú. (Wɛ́ɖɛ́ 37:29) Báɓòɔ̀ mɔ̀ céè-ɖɛ̀ kpò mɛ́nɛ́ɛ́ kpáɖá-nyɔ̀-tã se mɛ̀nɛ̌ìn-ɖò. Gèɖèpɔ́ɔ̀ nyuɛ ma ké gàa kpò kpáɖá-nyɔ̀ sɔ̃́ ɓě ɓɛ́ ɔ dèìn ma hwòɖǒ múin nyɛɛ céè ma Báɓòɔ̀. Mózè mɔ̀ nyɔ céè ma céè-ɖɛ̀ kpò hm̀m̌ kĩ́ín-kĩ́ínɔ̀. Ɔ ɖǎ ma céèɛɛ, zɔ̃ táázĩ̀ìn tã kè hɔ̃dɛ̀ɖɛ̀ hm̀m̌ ɖǎ zi. Àpɔ́sò Jɔ̃́ɔ́ mɔ̀ nyɔ céè ma céè-ɖɛ̀ hwɛ̀ìn gbɔɔ̀. Ɔ ɖǎ ma céèɛɛ, ɔ ɓɛ́àìn zɔ̃ táázĩ̀ìn dyúáɖò kè hɔ̃dɛ̀ɖɛ̀ mɛ̀nɛ̌ìn-hĩinyɛ kɔ̃ ziɛ. Nyɛ́ kɔ̃̀ hwìɖǐi-poìn-ɖɛ̀ ɓě ɓɛ́ wa céèà ɖé Báɓòɔ̀ mú kɛ́? Gèɖèpɔ́ɔ̀ wùɖù ma wa gbo dyììn ɖé zùù hwɛ̀ǐn-hwɛ̀ǐnɔ̀ mú. (2 Sámíò 23:2) Wa céè ma Gèɖèpɔ́ɔ̀ hwìɖǐi-poìn-ɖɛ̀ ɓě. Wa se ma wa mìɔùn nììn hwìɖǐi-pòìn-ɖɛ̀ ɓě céè. Ɔ kɔ̃̀ jè Jɛ̀hóvàà wuɖu mɔ̀ nyɔ nìà ɖé Báɓòɔ̀ múɛ..​—Zà 2 Tímétè 3:16; 2 Píɖɛ̀ 1:20, 21 wuɖuún.

Dyé víɖò mɔ̀à Nyɛ́ kɔ̃̀ Wuɖu Nìà Ðé Báɓòɔ̀ Múɛ́? kɛɛ dyi.

2. Xwɛ̌ à ɓɛ́ìn dyí dyuòɛ̀ kà Báɓòɔ̀ mɔ̀ jǎà kɛ́?

À dyuòɛ̀ dyí kà Báɓòɔ̀ sɔ̀ìn ɖé Gèɖèpɔ́ɔ̀ gboɛ sepóɛɖé ɔ cɛ̃ ɖɛ ɓě mu kpáùn ɖé dyúa jɛ́ɛ́ kɛ. Gàa ɖò se ɔ nyuɛ ɓɛ́ìn. (Jasúé 23:14) Kpé-séín-ɓéɖé Gèɖèpɔ́ɔ̀ ɖòùn mɔ̀ nyɔ ɓɛ́ìn ɖɛ nìà ɖé dyúa ɓó nyɔǔn bììɛɛ dyéɛ.​—Zà Àzédyà 42:9; 46:10 wuɖuún.

Báɓòɔ̀ se nì kà céè-ɖɛ̀ tɔ̀ɔ̀ ɓě nìà kɛ. À hwòɖǒ ɖúɛ dyí kǎà céè-ɖɛ̀ sɔ̀àìn ɖé Gèɖèpɔ́ɔ̀ gboɛɛ ɓéɖé ɔ ké nì. Wa ɖǎ Báɓòɔ̀ táázĩ̀ìn kè táázĩ̀ìn céè ɖé wuɖu-dù hɔ̃dɛ̀ɖɛ̀ kè hɔ̃dɛ̀ɖɛ̀ kò-kò ɓě mú. Ké ɔ ɖǎ ɓóɖó-kpàà dà séín nyini. Ɔ mɔ̀ céè-ɖɛ̀ sùà dyɛo, kɛɛ ɖɛ ɓě ɔ cɛ̃ ɓá dyɔɔ̀ kè ɓóɖó-kpàà jè dyíɛɛ mɔ̀ jǎà. Ɓó ɖeɛɛ, nyɔ kpò kpáɖá-nyɔ̀ sɔ̃́ ɓě ɓɛ́ wa céè ma kà Báɓòɔ̀ kɛɛ se ma ɖɛ kò-kò céè. Ké ɖeɛɛ, ɖɛ ɓě Báɓòɔ̀ cɛ̃ ɓá ɖɛ̀ɓɛ̀ǐn-ɖɛ̀ɓɛ̀ǐn jè dyíɛɛ ɓɛ́ìn ɖé jǎà Gèɖèpɔ́ɔ̀ ɖòùn gbo sɔ̀ìn. Ké ɔ ɓéɖé kpé ɓɛ́ ɔ ké nyɔǔn cĩ́-cĩ́ gbo zĩàìn ɓɛ́ ɔ ké dyíin nɔ̀mɔ̀. Jǎà ɓě nìà kɛɛ nyuɛ ké nyɔ táázĩ̀ìn vò-vò ɓě poɛ jǎà kà Báɓòɔ̀ mɔ̀ Gèɖèpɔ́ɔ̀ Wuɖuɛ.​—Zà 1 Tɛ̀sàɖónìà 2:13 wuɖuún.

Dyé víɖò mɔ̀à Xwɛ̌ À Ɓɛ́ìn Dyí Dyuòɛ̀ Kà Báɓòɔ̀ Mɔ̀ Jǎà Cèè-Ðɛ̀ Kɛ́? kɛɛ dyi.

3. Báɓòɔ̀ ɓá ɖɛ́ jè dyíɛ́?

Báɓòɔ̀ ɓá bɔ̃̌ nɔ̀mɔ̀ dyíin kà ɓɛ́ Gèɖèpɔ́ɔ̀ ɓéɖé hwòɖǒɛ̀-gbɔ-po-ɖɛ̀ nɔ̀mɔ̀ dyíin ɓó nyɔǔn bììɛɛ jè dyí. Báɓòɔ̀ zaìn kɔ̃in kà páɖédǎ nyu ma xwáɖáún séɛ̀ ɖé ɖɛ dè gbɔɔ̀ múɛ, ɔ kè kà ɓɛ́ ɔ mu ɖe dyiìn nyɛ.​—Zà Wɛ̀ɖɛ̀ɓèɖésĩ̀ɔ̀ 21:4, 5 wuɖuún.

Gèɖèpɔ́ɔ̀ Wuɖuɔ̀ ɓéɖé gma ɓě, kè cɛ̃́-ɖɛ̀ ɓě, ɔ kè náún-po-wùɖù ɓě. Ké ɖeɛɛ, Báɓòɔ̀ cɛ̃ɛ kà Gèɖèpɔ́ɔ̀ nyuó zɔ̃̌ɔ̀ nyɔǔn-dyù kpɔ̃ɔ kɛ. Ðɛ ɓě ɖǎó zɔ̃̌ɔ̀ céèɛɛ tɛ̀mɛ̀ìn à nììn Gèɖèpɔ́ɔ̀ kpèɖè ɓěɔ̀ dyí. Ɔ jèɛɛ, Báɓòɔ̀ ɓɛ́ìn m̀ gbo kpáa ɓɛ́ m̀ ké Gèɖèpɔ́ɔ̀ dyí dyuò. Ɔ zaìn kɔ̃in kà m̀ ɓɛ́ìn ɔ ɓǎto jǔɛ kɛ.​—Zà Wɛ́ɖɛ́ 19:7, 11; Jĩ́ìn 2:23; 4:8 wuɖuún.

4. Xwɛ̌ m̀ ɓɛ́ìn Báɓòɔ̀ múin wɔ̃́ɔ kɛ́?

Céè-ɖɛ̀ nìà kɛ mu m̀ gbo kpáùn ɓɛ́ m̀ ké Báɓòɔ̀ múin wɔ̃́ kà dyúáɖò Jízɛ̀ nyu ma nyɔǔn gbo kpáa kɛ. Ɔ tɛ̀mɛ̀ìn ma nyɔ ɓě Báɓòɔ̀ vɔ̀sì ɖò-ɖò ɓě ké ɔ “cɛ̃ ma wa hwòɖǒ kɔ̃in.”​—Zà Ðúù 24:27, 45 wuɖuún.

Bɔ̃̌ nɔ̀mɔ̀ dyíin sɔ̀ìn ɖé Gèɖèpɔ́ɔ̀ gboɛɛ ɓɛ́ìn nyɔ hwòɖǒ kpɔ̃ɔ ɓɛ́ ɔ ké ɖɛ vò-vò dyí zi. Kɛɛ nyɔ ɖíɛ́ ɓě seɛ jè gbo kɔ̃̀. Ké ɔ po nyɔ tɔ̀ɔ̀ ɓě dyoɖoún. Kɛɛ nì hwòɖǒ mɛ ɓɔ́ ɖé ɖei kpáa. Nì hwìɖǐǐ-taɓa-taɓaɔ̀ sèìn ɓɛ́ m̀ ké Gèɖèpɔ́ɔ̀ dyí dyuò, nìí, nì mu sè-ná-sèɛ̀ fɛ̀ɛ̀ múàǔn dyi kpáìn.​—Zà Jɔ̃́ɔ́ 17:3 wuɖuún.