Xwɛ̌ M̀ Gmɔ̀ Ðɛ Mu Kpáùn Ðé Dyúa Kɛɛ Dya Kɛ́?

ÐƐ BÁƁÒƆ̀ CƐ̃ KƐƐ MƆ̀

“Gèɖèpɔ́ɔ̀ . . . mu wa mícɛ̃̀ séín dyéɖéín dyi sámáùn. Mɛ́-mɛ́ ɖò se nìɛ̌ mu ɖe. Kpé-po-po ɖò se nìɛ̌ mu ɖe. Vĩ̌-vĩ̌ ɖò se nìɛ̌ mu ɖe. Nyɔ-ɖɛ-puà-puà ɖò se nìɛ̌ mu ɖe. Sepóɛɖé ɖɛ ɓě nì ma kĩ́ín nyɛɛ ɖǎ dyi zi.”—Wɛ̀ɖɛ̀ɓèɖésĩ̀ɔ̀ 21:3, 4, Dèè-Wùɖù Sùà Kèɛ̀ Ðie.

ÐƐ MƆ̀ Ɔ XWÍNÍÍN ƁÓ M̀ BÌÌƐƐ MƆ̀

Nì mu kũ̀à ɓɛ́ ɔ ɓéɖé xwíníín, ké ɔ dyà hwòɖǒ-dyi-dè-dè kɛɛ nyuùn.—Àzédyà 65:21-23.

Wɛ́-wɛ́ mɔɔ gǎ-dyé-dyé ɖò se nìɛ̌ mu ɖe.—Àzédyà 25:8; 33:24.

M̀ kè nì xwéɖé-dùɔ̀ kè nì ɓǎto ɓě mu fɛ̀ɛ̀ ɓɛ́ ɔ se mánáín-hwɛ̀-hwɛ̀ ɖò ɓéɖéɛɛ múàǔn dyi kpáìn.—Wɛ́ɖɛ́ 37:11, 29.

À ƁƐ́ÌN ÐƐ BÁƁÒƆ̀ CƐ̃ KƐ JÀÀ POƐ CÁÀ?

Ǹdye, ɓó xwíníín sɔ̃́ ɓě nìà kɛ jè:

• Gèɖèpɔ́ɔ̀ ɓéɖé kpé ɓɛ́ ɔ ké ɖɛ ɓě ɔ ɖáìn nyɔǔn nyɛ́nɛ́ín nyɛɛ nyu. Ðé Báɓòɔ̀ múɛɛ, Jɛ̀hóvà Gèɖèpɔ́ɔ̀ ɖòùn ɖé wa ɖáìn “nyɔ ɓéɖéà kpé séín” nyɛ, sepóɛɖé ɔ kpéɔ̀ se sèìn-naín ɖò kɔ̃̀. (Wɛ̀ɖɛ̀ɓèɖésĩ̀ɔ̀ 15:3) Ɔ jèɛɛ, ɔ ɓéɖé kpé séín ɓɛ́ ɔ ké à nyɛ́nɛ́ín-ɖáìn-ɖɛ̀ ɓá ɓóɖó-kpàà gbo zĩàìn jè dyíɛɛ nyu ɓɛ́ ɓóɖó-kpàà ké dyíin nɔ̀mɔ̀. Kà Báɓòɔ̀ nyuà cɛ̃ɛ kɛɛ, ɔ ɖá, “Gèɖèpɔ́ɔ̀ ɓɛ́ìn ɖɛ séín nyuɛ.”—Máfíò 19:26.

• Gèɖèpɔ́ɔ̀ nìɛ̀ mɔ́ɔuń ɓɛ́ ɔ ké nyɔǔn nyɛ́nɛ́ín-ɖáìn-ɖɛ̀ ɓěɔ̀ nyu. Ɔ hwɔìn kà, Jɛ̀hóvà nìɛ̀ mɔ́ɔǔn ɓɛ́ ɔ ké nyɔ ɓě ɖǎǒ zɔ̃̌ɔ̀ mɛ́ɛ fɛ̀ɛ̀ mú po ɖeɛ.—Àzédyà 26:19.

  Ké ɖeɛɛ, Báɓòɔ̀ tɛ̀mɛ̀ìn kà ɓɛ́ Gèɖèpɔ́ɔ̀ dyú-gàà Jízɛ̀ kánáìn ma wɛ́-nyɔ̀ ɓě dyiɛ. Ðɛ́ kɔ̃̀ jè ɔ nyuɛ ma náa kɛ́? Sepóɛɖé ɔ mɔ́ ɓɛ́ ɔ kéɛ ma nyu. (Máà 1:40,41) Jízɛ̀ tɛ̀mɛ̀ìn ma ɔ Ɓǎ kpeɖe ɓěɔ̀ jɛ́ɛ́ dyììn ɖé ɔ nyɔǔn gbo-kpá-kpá mú.—Jɔ̃́ɔ́ 14:9.

  Ɔ jèɛɛ, à ɓɛ́ìn jǎà poɛ kà ɓɛ́ Jɛ̀hóvà kè Jízɛ̀ mɔ́ ɓɛ́ wa ké à gbo kpá, ɓɛ́ à ké múàǔn nì ɖé dyúa.—Wɛ́ɖɛ́ 72:12-14; 145:16; 2 Píɖɛ̀ 3:9.